ಬೆಂಗಳೂರು, 02 ಆಗಸ್ಟ್ (ಹಿ.ಸ.):
ಸ್ನೇಹಿತರ ದಿನಾಚರಣೆ ದಿನಾಂಕಕ್ಕೆ ಸೀಮಿತವಲ್ಲ ಸ್ನೇಹವೇ ಸಂಭ್ರಮ
ಪ್ರತಿ ವರ್ಷ ಆಗಸ್ಟ್ ತಿಂಗಳ ಮೊದಲ ಭಾನುವಾರ ಬಂದಾಗ ಸಾಮಾಜಿಕ ಜಾಲತಾಣಗಳಲ್ಲಿ, ಕಾಲೇಜು-ಕಚೇರಿಗಳಲ್ಲಿ ಹಾಗೂ ಸ್ನೇಹಿತರ ವಲಯದಲ್ಲಿ ಹ್ಯಾಪಿ ಫ್ರೆಂಡ್ಶಿಪ್ ಡೇ ಎಂಬ ಶುಭಾಶಯಗಳ ಸುರಿಮಳೆಯೇ ಆಗುತ್ತದೆ. ಸ್ನೇಹದ ಸಂಕೇತವಾಗಿ ಬ್ಯಾಂಡ್ಗಳನ್ನು ಕಟ್ಟುವುದು, ಉಡುಗೊರೆಗಳನ್ನು ನೀಡುವುದು, ಫೋಟೋಗಳನ್ನು ಹಂಚಿಕೊಳ್ಳುವುದು ಸಾಮಾನ್ಯ ದೃಶ್ಯವಾಗಿದೆ.
ಆದರೆ ಒಂದು ಪ್ರಶ್ನೆ ಸಹಜವಾಗಿ ಮೂಡುತ್ತದೆ. ಸ್ನೇಹವನ್ನು ವ್ಯಕ್ತಪಡಿಸಲು ನಿಜವಾಗಿಯೂ ಒಂದು ದಿನದ ಅಗತ್ಯವಿದೆಯೇ? ಕೆಲವರ ಅಭಿಪ್ರಾಯದಂತೆ ಫ್ರೆಂಡ್ಶಿಪ್ ಡೇ ಆಚರಣೆಯ ಹಿಂದೆ ಶುಭಾಶಯ ಪತ್ರ, ಉಡುಗೊರೆ ಹಾಗೂ ಇತರೆ ವಾಣಿಜ್ಯ ವಸ್ತುಗಳ ಮಾರಾಟವನ್ನು ಉತ್ತೇಜಿಸುವ ಉದ್ದೇಶವೂ ಇದೆ. ಆದರೂ ಈ ದಿನ ಸ್ನೇಹದ ಮಹತ್ವವನ್ನು ನೆನಪಿಸುವ ಒಂದು ಉತ್ತಮ ಸಂದರ್ಭವಾಗಿರುವುದನ್ನು ಅಲ್ಲಗಳೆಯಲಾಗುವುದಿಲ್ಲ.
ವಿಶ್ವದ ವಿವಿಧ ದೇಶಗಳಲ್ಲಿ ಸ್ನೇಹಿತರ ದಿನವನ್ನು ವಿಭಿನ್ನ ದಿನಾಂಕಗಳಲ್ಲಿ ಆಚರಿಸಲಾಗುತ್ತದೆ. ವಿಶ್ವಸಂಸ್ಥೆ (ಯುಎನ್) ಪ್ರತಿ ವರ್ಷ ಜುಲೈ 30 ಅನ್ನು ಅಂತಾರಾಷ್ಟ್ರೀಯ ಸ್ನೇಹಿತರ ದಿನವಾಗಿ ಆಚರಿಸಲು ಕರೆ ನೀಡಿದೆ. ಆದರೆ ಭಾರತ, ಅಮೆರಿಕ ಸೇರಿದಂತೆ ಹಲವು ದೇಶಗಳಲ್ಲಿ ಆಗಸ್ಟ್ ತಿಂಗಳ ಮೊದಲ ಭಾನುವಾರವೇ ಫ್ರೆಂಡ್ಶಿಪ್ ಡೇಯಾಗಿ ಜನಪ್ರಿಯವಾಗಿದೆ.
ಭಾರತೀಯ ಸಂಸ್ಕೃತಿಯ ದೃಷ್ಟಿಯಿಂದ ನೋಡಿದರೆ, ಸ್ನೇಹದ ಅತ್ಯುತ್ತಮ ಉದಾಹರಣೆ ಎಂದರೆ ಶ್ರೀಕೃಷ್ಣ ಮತ್ತು ಸುಧಾಮ (ಕುಚೇಲ) ಅವರ ಗೆಳೆತನ. ಐಶ್ವರ್ಯ ಮತ್ತು ಬಡತನದ ಅಂತರವಿದ್ದರೂ ಅವರ ಸ್ನೇಹ ಎಂದಿಗೂ ಬದಲಾಗಲಿಲ್ಲ. ನಿಸ್ವಾರ್ಥ ಪ್ರೀತಿ, ವಿಶ್ವಾಸ ಮತ್ತು ಆತ್ಮೀಯತೆಗೆ ಈ ಸ್ನೇಹ ಇಂದಿಗೂ ಮಾದರಿಯಾಗಿದೆ.
ಉತ್ತರ ಭಾರತದ ಕೆಲವು ಭಾಗಗಳಲ್ಲಿ ಹಾಗೂ ಇಸ್ಕಾನ್ ದೇವಾಲಯಗಳಲ್ಲಿ ಅಕ್ಷಯ ತೃತೀಯದ ದಿನವನ್ನು ಕೃಷ್ಣ-ಸುಧಾಮರ ಭೇಟಿಯ ದಿನವೆಂದು ನಂಬಿ ಸ್ನೇಹಿತರ ದಿನದಂತೆ ಆಚರಿಸಲಾಗುತ್ತದೆ. ಕೇರಳದಲ್ಲಿ ಧನುರ್ಮಾಸದ ಮೊದಲ ಬುಧವಾರವನ್ನು ಕುಚೇಲ ದಿನಂ ಎಂದು ಆಚರಿಸಿ, ಶ್ರೀಕೃಷ್ಣನಿಗೆ ಅವಲಕ್ಕಿ ನೈವೇದ್ಯ ಅರ್ಪಿಸಿ ಸ್ನೇಹಿತರೊಂದಿಗೆ ಸಂಭ್ರಮಿಸುತ್ತಾರೆ.
ಆದರೆ ನಮ್ಮ ಕರ್ನಾಟಕದ, ವಿಶೇಷವಾಗಿ ಉತ್ತರ ಕರ್ನಾಟಕದ ಜೀವನಶೈಲಿಯಲ್ಲಿ ಸ್ನೇಹಕ್ಕೆ ಯಾವುದೇ ಕ್ಯಾಲೆಂಡರ್ ಬೇಕಾಗಿಲ್ಲ. ಮಚ್ಚಾ, ಮಗಾ, ಬ್ರೋ ಎಂದು ಆತ್ಮೀಯವಾಗಿ ಕರೆಯುವ ಗೆಳೆಯರು ಭೇಟಿಯಾದಾಗಲೆಲ್ಲಾ ಅದೇ ಸ್ನೇಹದ ಹಬ್ಬ. ಅಲ್ಲಿ ದಿನಾಂಕಕ್ಕಿಂತ ಬಾಂಧವ್ಯ ಮುಖ್ಯ.
ಕವಿ ಹರಿವಂಶ ರಾಯ್ ಬಚ್ಚನ್ ಅವರ ಮಧುಶಾಲಾ ಕೃತಿಯಲ್ಲಿರುವ ಭಾವವೂ ಇದೇ ಸಂದೇಶವನ್ನು ಸಾರುತ್ತದೆ:
ವರ್ಷಕ್ಕೊಮ್ಮೆ ಮಾತ್ರ ಉರಿಯುವುದು ಹೋಳಿಯ ಜ್ವಾಲೆ,
ಒಮ್ಮೆಯಷ್ಟೇ ಸಾಲಾಗಿ ಬೆಳಗುವುದು ದೀಪಗಳ ಮಾಲೆ;
ಎಲ್ಲರೂ ಒಮ್ಮೆ ಬಂದು ನೋಡಿರಿಲ್ಲಿ,
ಹಗಲಲಿ ಹೋಳಿ, ರಾತ್ರಿಯಲಿ ದೀಪಾವಳಿ, ನಿತ್ಯ ಆಚರಣೆ ಮಧುಶಾಲೆಯಲ್ಲಿ!
ಹಾಗೆಯೇ ನಿಜವಾದ ಸ್ನೇಹವೂ ಒಂದು ದಿನಕ್ಕೆ ಸೀಮಿತವಾಗಿರುವುದಿಲ್ಲ. ಅದು ಪ್ರತಿದಿನವೂ ಬದುಕಿನಲ್ಲಿ ಸಂತೋಷ, ವಿಶ್ವಾಸ ಮತ್ತು ಆತ್ಮೀಯತೆಯನ್ನು ತುಂಬುವ ಸಂಬಂಧ. ಆದ್ದರಿಂದ ಸ್ನೇಹಿತರ ದಿನಾಚರಣೆ ವರ್ಷಕ್ಕೊಮ್ಮೆ ಬರಬಹುದು; ಆದರೆ ನಿಜವಾದ ಸ್ನೇಹಿತರು ಜೊತೆಯಿದ್ದರೆ ಪ್ರತಿದಿನವೂ ಸ್ನೇಹದ ಹಬ್ಬವೇ.
---------------
ಹಿಂದೂಸ್ತಾನ್ ಸಮಾಚಾರ್ / Rakesh.M.B.
