ಲಾಹೋರ್, 09 ಫೆಬ್ರವರಿ (ಹಿ.ಸ.) :
ಆ್ಯಂಕರ್ : ಬಲೂಚಿಸ್ತಾನದಲ್ಲಿ ನಡೆಯುತ್ತಿರುವ ಬಲವಂತದ ಕಣ್ಮರೆಗಳ ಕುರಿತು ನೀಡಿದ ವಿವಾದಾತ್ಮಕ ಹೇಳಿಕೆಗಳ ಹಿನ್ನೆಲೆಯಲ್ಲಿ ಪ್ರಧಾನಿ ಶಹಬಾಜ್ ಷರೀಫ್ ಅವರ ಸಲಹೆಗಾರ ಹಾಗೂ ಮಾಜಿ ಗೃಹ ಸಚಿವ ರಾಣಾ ಸನಾವುಲ್ಲಾ ತೀವ್ರ ಟೀಕೆಗೆ ಗುರಿಯಾಗಿದ್ದಾರೆ.
ಲಾಹೋರ್ನಲ್ಲಿ ನಡೆದ ಎರಡು ದಿನಗಳ ಆರನೇ ಅಂತಾರಾಷ್ಟ್ರೀಯ ಅಸ್ಮಾ ಜಹಾಂಗೀರ್ ಸಮ್ಮೇಳನದಲ್ಲಿ ಅವರ ಹೇಳಿಕೆಗಳು ಭಾರೀ ಗದ್ದಲಕ್ಕೆ ಕಾರಣವಾಯಿತು.
ಸಮ್ಮೇಳನದ ವೇಳೆ ರಾಣಾ ಸನಾವುಲ್ಲಾ, ಬಲೂಚಿಸ್ತಾನದಲ್ಲಿ ಕಾಣೆಯಾಗಿರುವವರನ್ನು ಬಲೂಚಿಸ್ತಾನ್ ಲಿಬರೇಶನ್ ಆರ್ಮಿ (ಬಿಎಲ್ಎ) ಬೆಂಬಲಿಗರು ಎಂದು ಹೇಳಿದರು. ಭಯೋತ್ಪಾದನೆ ಮುಂದುವರಿದರೆ ಬಲವಂತದ ಕಣ್ಮರೆಗಳೂ ಮುಂದುವರಿಯುತ್ತವೆ ಎಂದು ಅವರು ಹೇಳಿದ್ದು, ಮಾನವ ಹಕ್ಕುಗಳ ಕಾರ್ಯಕರ್ತರು ಹಾಗೂ ಬಲೂಚ್ ಪ್ರತಿನಿಧಿಗಳ ಆಕ್ರೋಶಕ್ಕೆ ಕಾರಣವಾಯಿತು. ಸಭಾಂಗಣದಲ್ಲಿ ಇದ್ದ ಮಹಿಳೆಯೊಬ್ಬರು “ನೀವು ಸುಮ್ಮನಿರಬೇಕು” ಎಂದು ಹೇಳಿದ ಘಟನೆ ಉದ್ವಿಗ್ನತೆಗೆ ಸಾಕ್ಷಿಯಾಯಿತು.
ರಾಣಾ ಅವರ ಹೇಳಿಕೆಗಳನ್ನು ಖಂಡಿಸಿ ಖ್ಯಾತ ಸಾಮಾಜಿಕ ಕಾರ್ಯಕರ್ತೆ ಶಿಮಾ ಕಿರ್ಮಾನಿ, ಬಲೂಚ್ ಐಕ್ಯಮತ ಸಮಿತಿಯ ನಾಯಕ ಸಮಿ ದಿನ್ ಬಲೂಚ್ ಸೇರಿದಂತೆ ಅರ್ಧಕ್ಕಿಂತ ಹೆಚ್ಚು ಭಾಷಣಕಾರರು ಸಮ್ಮೇಳನವನ್ನು ಬಹಿಷ್ಕರಿಸಿದರು. ಅಸ್ಮಾ ಜಹಾಂಗೀರ್ ಅವರ ಸೊಸೆ, ಇಂತಹ ವ್ಯಕ್ತಿಗಳನ್ನು ಮಾನವ ಹಕ್ಕುಗಳ ಸಮ್ಮೇಳನಕ್ಕೆ ಆಹ್ವಾನಿಸಬಾರದು ಎಂದು ತೀವ್ರವಾಗಿ ಟೀಕಿಸಿದರು. ಇಂತಹ ಹೇಳಿಕೆಗಳು ಅಸ್ಮಾ ಜಹಾಂಗೀರ್ ಅವರ ಆತ್ಮಕ್ಕೆ ನೋವುಂಟುಮಾಡುತ್ತವೆ ಎಂದು ಅವರು ಹೇಳಿದರು.
ಈ ಸಂದರ್ಭ ಬಲೂಚಿಸ್ತಾನ್ ರಾಷ್ಟ್ರೀಯ ಪಕ್ಷದ (ಬಿಎನ್ಪಿ) ಅಧ್ಯಕ್ಷ ಹಾಗೂ ಮಾಜಿ ಮುಖ್ಯಮಂತ್ರಿ ಸರ್ದಾರ್ ಅಖ್ತರ್ ಮೆಂಗಲ್ ರಾಣಾ ಸನಾವುಲ್ಲಾ ಹೇಳಿಕೆಗಳಿಗೆ ತೀಕ್ಷ್ಣ ಪ್ರತಿಕ್ರಿಯೆ ನೀಡಿದರು. “ಬಲೂಚಿಸ್ತಾನದಲ್ಲಿ ಸೈನ್ಯ ಪ್ರವೇಶಿಸಿದಾಗ ಜನರು ಭಯದಿಂದ ಮನೆಗಳಲ್ಲಿ ಅಡಗಿಕೊಳ್ಳುತ್ತಾರೆ. ಆದರೆ ಹೋರಾಟಗಾರರು ಬಂದಾಗ ಜನರು ಅವರೊಂದಿಗೆ ಸೆಲ್ಫಿ ತೆಗೆದುಕೊಳ್ಳುತ್ತಾರೆ. ಜನರು ಅವರನ್ನು ತಮ್ಮ ರಕ್ಷಕರಂತೆ ಕಾಣುತ್ತಾರೆ” ಎಂದು ಅವರು ಹೇಳಿದರು.
ಬಲೂಚಿಸ್ತಾನದ ಇತಿಹಾಸವನ್ನು ಉಲ್ಲೇಖಿಸಿದ ಮೆಂಗಲ್, ಕಲಾತ್ ಖಾನ್ ಮತ್ತು ಮೊಹಮ್ಮದ್ ಅಲಿ ಜಿನ್ನಾ ನಡುವಿನ ಒಪ್ಪಂದ ಜಾರಿಗೆ ಬರದೇ ಉಳಿದಿದ್ದು, ಬಲೂಚಿಸ್ತಾನದ ಸ್ವಾಯತ್ತತೆಯನ್ನು ಹತ್ತಿಕ್ಕಲಾಗಿದೆ ಎಂದು ಆರೋಪಿಸಿದರು. ಸಾಮಾಜಿಕ ಮಾಧ್ಯಮದಲ್ಲಿ ಟ್ವೀಟ್ ಮಾಡಿದವರಿಗೆ ಕಠಿಣ ಶಿಕ್ಷೆ ವಿಧಿಸಲಾಗುತ್ತಿದೆ, ಆದರೆ ದೇಶವನ್ನು ನಾಶಮಾಡಿದವರಿಗೆ ಯಾವುದೇ ಶಿಕ್ಷೆಯಿಲ್ಲ ಎಂಬುದು ನ್ಯಾಯದ ವ್ಯಂಗ್ಯ ಎಂದು ಅವರು ಹೇಳಿದರು.
ಈ ವರ್ಷದ ಅಸ್ಮಾ ಜಹಾಂಗೀರ್ ಸಮ್ಮೇಳನದ ವಿಷಯ “ಗಡಿಯುದ್ದಕ್ಕೂ ಮೂಲಭೂತ ಹಕ್ಕುಗಳ ಸವೆತ ಮತ್ತು ಪ್ರತಿರೋಧ” ಆಗಿತ್ತು. ಸುಪ್ರೀಂ ಕೋರ್ಟ್ ಬಾರ್ ಅಸೋಸಿಯೇಷನ್ ಹಾಗೂ ಪಾಕಿಸ್ತಾನ ಬಾರ್ ಕೌನ್ಸಿಲ್ ಸಹಯೋಗದಲ್ಲಿ ನಡೆದ ಈ ಸಮ್ಮೇಳನದಲ್ಲಿ ನ್ಯಾಯಾಧೀಶರು, ವಕೀಲರು, ಪತ್ರಕರ್ತರು, ಮಾನವ ಹಕ್ಕುಗಳ ಕಾರ್ಯಕರ್ತರು ಹಾಗೂ ಯುಎನ್ ಪ್ರತಿನಿಧಿಗಳು ಸೇರಿ 120ಕ್ಕೂ ಹೆಚ್ಚು ಭಾಷಣಕಾರರು ಭಾಗವಹಿಸಿದ್ದರು.
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
