ವಾಷಿಂಗ್ಟನ್, 11 ಫೆಬ್ರವರಿ (ಹಿ.ಸ.) :

ಆ್ಯಂಕರ್ : ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಸಾಮೂಹಿಕ ಗಡೀಪಾರು ಕಾರ್ಯಾಚರಣೆಯ ವಿರುದ್ಧ ಡೆಮಾಕ್ರಟಿಕ್ ಪಕ್ಷವು ತೀವ್ರ ವಿರೋಧ ವ್ಯಕ್ತಪಡಿಸಿರುವ ನಡುವೆ, ಮಂಗಳವಾರ ನಡೆದ ಅಮೆರಿಕ ಸಂಸತ್ತಿನ ಗೃಹ ಭದ್ರತಾ ಸಮಿತಿಯ ವಿಚಾರಣೆ ಭಾರಿ ಗದ್ದಲಕ್ಕೆ ಸಾಕ್ಷಿಯಾಯಿತು.

ಮಿನ್ನಿಯಾಪೋಲಿಸ್‌ನಲ್ಲಿ ಇಬ್ಬರು ಅಮೆರಿಕನ್ ನಾಗರಿಕರು ಐಸಿಇ ಏಜೆಂಟ್‌ಗಳ ಗುಂಡಿನ ದಾಳಿಯಲ್ಲಿ ಸಾವನ್ನಪ್ಪಿರುವ ಘಟನೆಗಳು ಈ ವಿವಾದಕ್ಕೆ ಕೇಂದ್ರಬಿಂದುವಾಗಿವೆ.

ವಿಚಾರಣೆಯಲ್ಲಿ ಐಸಿಇ ನಿರ್ದೇಶಕ ಟಾಡ್ ಲಿಯಾನ್ಸ್, ಸಿಬಿಪಿ ಆಯುಕ್ತ ರಾಡ್ನಿ ಸ್ಕಾಟ್ ಹಾಗೂ ಯುಎಸ್‌ಸಿಐಎಸ್ ನಿರ್ದೇಶಕ ಜೋಸೆಫ್ ಎಡ್ಲೋ ತೀವ್ರ ಪ್ರಶ್ನೆಗಳನ್ನು ಎದುರಿಸಿದರು. ಕಳೆದ ವರ್ಷದಲ್ಲಿ ಐಸಿಇ 4.75 ಲಕ್ಷ ಗಡೀಪಾರು ಮತ್ತು 3.79 ಲಕ್ಷ ಬಂಧನಗಳನ್ನು ನಡೆಸಿದ್ದು, ಇದರಲ್ಲಿ 7,000 ಶಂಕಿತ ಗ್ಯಾಂಗ್ ಸದಸ್ಯರು ಹಾಗೂ 1,400 ಭಯೋತ್ಪಾದಕ ಸಂಬಂಧಿತ ವ್ಯಕ್ತಿಗಳು ಸೇರಿದ್ದಾರೆ ಎಂದು ಲಿಯಾನ್ಸ್ ಸಮರ್ಥಿಸಿಕೊಂಡರು. ಕಾರ್ಯಾಚರಣೆಯ ಅಪಾಯಗಳ ನಡುವೆಯೂ ಅಧ್ಯಕ್ಷರ ನಿರ್ದೇಶನವನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಲಾಗುತ್ತಿದೆ ಎಂದು ಅವರು ಹೇಳಿದರು.

ಸಮಿತಿಯ ಅಧ್ಯಕ್ಷ ಆಂಡ್ರ್ಯೂ ಗಾರ್ಬರಿನೊ ನೇತೃತ್ವದ ರಿಪಬ್ಲಿಕನ್ ಸದಸ್ಯರು, ದಕ್ಷಿಣ ಗಡಿಯನ್ನು “ಅಮೆರಿಕದ ಇತಿಹಾಸದಲ್ಲೇ ಅತ್ಯಂತ ಸುರಕ್ಷಿತ” ಎಂದು ಶ್ಲಾಘಿಸಿದರು. ಇದೇ ವೇಳೆ, ಫೆಬ್ರವರಿ 15, 2026ರೊಳಗೆ ದ್ವಿಪಕ್ಷೀಯ ಒಪ್ಪಂದವಿಲ್ಲದಿದ್ದರೆ ಗೃಹ ಭದ್ರತಾ ಇಲಾಖೆಗೆ ಹಣಕಾಸು ಬಿಕ್ಕಟ್ಟು ಎದುರಾಗಲಿದೆ ಎಂದು ಎಚ್ಚರಿಸಿದರು.

ಜನವರಿ 7, 2026ರಂದು ಮಿನ್ನಿಯಾಪೋಲಿಸ್‌ನಲ್ಲಿ ಐಸಿಇ ಏಜೆಂಟ್‌ಗಳು ರೆನೀ ಗುಡ್ ಎಂಬ ಅಮೆರಿಕನ್ ನಾಗರಿಕರನ್ನು ಗುಂಡಿಕ್ಕಿ ಕೊಂದಿದ್ದು, ಮೂರು ವಾರಗಳೊಳಗೆ ಅಲೆಕ್ಸ್ ಪ್ರೆಟ್ಟಿ ಎಂಬ ಮತ್ತೊಬ್ಬ ನಾಗರಿಕರೂ ಇದೇ ರೀತಿಯ ದಾಳಿಯಲ್ಲಿ ಸಾವನ್ನಪ್ಪಿದ್ದರು. ಈ ಘಟನೆಗಳ ಬಳಿಕ ದೇಶಾದ್ಯಂತ ಪ್ರತಿಭಟನೆಗಳು ಭುಗಿಲೆದ್ದಿವೆ.

ಡೆಮಾಕ್ರಟಿಕ್ ಸಂಸದರು ಈ ದಾಳಿಗಳನ್ನು “ಅಸಂವಿಧಾನಿಕ” ಎಂದು ಕರೆದಿದ್ದು, ಬಾಡಿ ಕ್ಯಾಮೆರಾ ಬಳಕೆ ಕಡ್ಡಾಯಗೊಳಿಸುವುದು, ವಾರಂಟ್ ಇಲ್ಲದ ಕಾರ್ಯಾಚರಣೆ ನಿಲ್ಲಿಸುವುದು ಹಾಗೂ ಮುಖವಾಡ ಧರಿಸಿದ ಗಸ್ತು ಮತ್ತು ಮೊಬೈಲ್ ಸ್ವೀಪ್‌ಗಳಿಗೆ ಅಂತ್ಯಗೊಳಿಸುವಂತೆ ಒತ್ತಾಯಿಸಿದ್ದಾರೆ. ಆದರೆ, ಲಿಯಾನ್ಸ್ ಬಲಿಪಶುಗಳ ಕುಟುಂಬಗಳಿಗೆ ಕ್ಷಮೆಯಾಚಿಸಲು ನಿರಾಕರಿಸಿದ್ದರಿಂದ ವಿರೋಧ ಇನ್ನಷ್ಟು ತೀವ್ರಗೊಂಡಿತು.

ಪ್ರತಿನಿಧಿಗಳಾದ ಟಿಮ್ ಕೆನಡಿ ಮತ್ತು ಎರಿಕ್ ಸ್ವಾಲ್ವೆಲ್ ಅವರು ಆಡಳಿತದ ಕ್ರಮವನ್ನು “ಕಾನೂನಿನ ನಿರ್ಲಕ್ಷ್ಯ” ಎಂದು ಟೀಕಿಸಿದರು. ಸುಧಾರಣೆಗಳ ಕುರಿತು ಮಾತುಕತೆಗಳು ಸ್ಥಗಿತಗೊಂಡಿರುವ ಹಿನ್ನೆಲೆಯಲ್ಲಿ, DHSಗೆ 2026ರ ಅನುದಾನವನ್ನು ತಡೆಯುವ ಎಚ್ಚರಿಕೆಯನ್ನೂ ಡೆಮಾಕ್ರಟರು ನೀಡಿದ್ದಾರೆ.

ಪ್ರತಿಕ್ರಿಯೆಯಾಗಿ ಅಧ್ಯಕ್ಷ ಟ್ರಂಪ್, ಮಿನ್ನಿಯಾಪೋಲಿಸ್ ಘಟನೆಯ ಬಳಿಕ “ಕೆಲವೊಂದು ಕಡೆ ಮೃದು ಸ್ಪರ್ಶ ಅಗತ್ಯವಿರಬಹುದು” ಎಂದು ಒಪ್ಪಿಕೊಂಡರೂ, ನೂರಾರು ಅಧಿಕಾರಿಗಳನ್ನು ಹಿಂತೆಗೆದುಕೊಂಡು ಸಹ ಗಡೀಪಾರು ಕಾರ್ಯಾಚರಣೆ ಮುಂದುವರಿಸುವುದಾಗಿ ಘೋಷಿಸಿದರು. GOP ಮಿತ್ರರ ಬೆಂಬಲದೊಂದಿಗೆ ಕಠಿಣ ಜಾರಿಗೆ ತಮ್ಮ ಬದ್ಧತೆಯನ್ನು ಪುನರುಚ್ಚರಿಸಿದರು.

ಪ್ರತಿಭಟನೆಗಳು ತೀವ್ರಗೊಳ್ಳುತ್ತಿರುವ ಹಾಗೂ ಹಣಕಾಸಿನ ಗಡುವು ಸಮೀಪಿಸುತ್ತಿರುವ ಈ ಸಂದರ್ಭದಲ್ಲಿ, ಟ್ರಂಪ್ ಆಡಳಿತದ ಗಡೀಪಾರು ನೀತಿ ಅಮೆರಿಕದ ರಾಜಕೀಯದಲ್ಲಿ ಮತ್ತಷ್ಟು ಧ್ರುವೀಕರಣಕ್ಕೆ ಕಾರಣವಾಗುತ್ತಿದೆ. ಅಪರಾಧಿಗಳಲ್ಲದ ವಲಸಿಗರೂ ಸೇರಿದಂತೆ ವ್ಯಾಪಕ ಸಮುದಾಯಗಳು ಈ ಕಾರ್ಯಾಚರಣೆಯಿಂದ ತತ್ತರಿಸುತ್ತಿದ್ದು, ಮುಂದಿನ ದಿನಗಳಲ್ಲಿ ಸಂಘರ್ಷ ಮತ್ತಷ್ಟು ಉಲ್ಬಣಗೊಳ್ಳುವ ಲಕ್ಷಣಗಳು ಗೋಚರಿಸುತ್ತಿವೆ.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa