ನವದೆಹಲಿ, 15 ನವೆಂಬರ್ (ಹಿ.ಸ.):

ಭಾರತ ಮತ್ತು ಈಜಿಪ್ಟ್ ನಡುವಿನ ಕಾರ್ಯತಂತ್ರದ ಪಾಲುದಾರಿಕೆಯನ್ನು ಬಲಪಡಿಸುವುದು ಹಾಗೂ ದ್ವಿಪಕ್ಷೀಯ ವ್ಯಾಪಾರ ಮತ್ತು ಹೂಡಿಕೆ ಸಂಬಂಧಗಳನ್ನು ವಿಸ್ತರಿಸುವ ಉದ್ದೇಶದಿಂದ ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವ ಪಿಯೂಷ್ ಗೋಯಲ್ ಅವರು ನವೆಂಬರ್ 14ರಂದು ಈಜಿಪ್ಟ್‌ನ ಕೈರೋಗೆ ತಲುಪಿದ್ದಾರೆ. ಅವರೊಂದಿಗೆ 130ಕ್ಕೂ ಹೆಚ್ಚು ಉದ್ಯಮ ಪ್ರತಿನಿಧಿಗಳು ಮತ್ತು ನವೋದ್ಯಮಿಗಳ ನಿಯೋಗವೂ ಈಜಿಪ್ಟ್‌ಗೆ ತೆರಳಿದೆ.

ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯದ ಪ್ರಕಾರ, ಪ್ರವಾಸದ ಅಂಗವಾಗಿ ಗೋಯಲ್ ಅವರು ಕೈರೋದಲ್ಲಿರುವ ಹೆಲಿಯೊಪೊಲಿಸ್ ಯುದ್ಧ ಸ್ಮಾರಕ ಸ್ಮಶಾನಕ್ಕೆ ಭೇಟಿ ನೀಡಿ ಭಾರತೀಯ ಸೈನಿಕರಿಗೆ ಗೌರವ ನಮನ ಸಲ್ಲಿಸಿದರು. ಇಲ್ಲಿ ಸಮಾಧಿ ಮಾಡಲಾಗಿರುವ ಅಥವಾ ಸ್ಮರಿಸಲಾಗಿರುವ ಒಟ್ಟು 4,000 ಸೈನಿಕರಲ್ಲಿ 3,727 ಮಂದಿ ಭಾರತೀಯರಾಗಿದ್ದಾರೆ. ಇವರಲ್ಲಿ ಸುಮಾರು 2,000 ಮಂದಿ ಮೊದಲನೇ ಮಹಾಯುದ್ಧದಲ್ಲಿ ಹಾಗೂ 1,700 ಮಂದಿ ಎರಡನೇ ಮಹಾಯುದ್ಧದಲ್ಲಿ ಪ್ರಾಣತ್ಯಾಗ ಮಾಡಿದ್ದರು.

ಈಜಿಪ್ಟ್‌ನ ಭಾರತೀಯ ಸಮುದಾಯ ಸಂಘ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿಯೂ ಪಿಯೂಷ್ ಗೋಯಲ್ ಭಾಗವಹಿಸಿ ಭಾರತೀಯ ಸಮುದಾಯದ ಸದಸ್ಯರನ್ನು ಭೇಟಿಯಾದರು. ಭಾರತ ಮತ್ತು ಈಜಿಪ್ಟ್ ನಡುವಿನ ಸುಮಾರು 650 ಕೋಟಿ ಅಮೆರಿಕನ್ ಡಾಲರ್ ಮೌಲ್ಯದ ದ್ವಿಪಕ್ಷೀಯ ವ್ಯಾಪಾರವು ಎರಡು ಪ್ರಾಚೀನ ನಾಗರಿಕತೆಗಳ ನಡುವಿನ ಪಾಲುದಾರಿಕೆಯ ಆರಂಭವಷ್ಟೇ ಎಂದು ಅವರು ಅಭಿಪ್ರಾಯಪಟ್ಟರು.

ಈಜಿಪ್ಟ್‌ನಲ್ಲಿ ಸುಮಾರು 70 ಭಾರತೀಯ ಕಂಪನಿಗಳು ಕಾರ್ಯನಿರ್ವಹಿಸುತ್ತಿದ್ದು, ಅವುಗಳ ಒಟ್ಟು ಹೂಡಿಕೆ 500 ಕೋಟಿ ಅಮೆರಿಕನ್ ಡಾಲರ್‌ಗಿಂತ ಹೆಚ್ಚಾಗಿದೆ. ಈ ಕಂಪನಿಗಳು ಈಜಿಪ್ಟ್‌ನ ಜನರಿಗೆ ನೇರ ಮತ್ತು ಪರೋಕ್ಷವಾಗಿ ಉದ್ಯೋಗಾವಕಾಶಗಳನ್ನು ಒದಗಿಸುತ್ತಿವೆ. ಭಾರತೀಯ ಸಮುದಾಯವು ಉಭಯ ದೇಶಗಳ ನಡುವಿನ ಜೀವಂತ ಸೇತುವೆಯಾಗಿದೆ ಎಂದು ಗೋಯಲ್ ಹೇಳಿದರು.

ಪ್ರವಾಸದ ಸಂದರ್ಭದಲ್ಲಿ ಭಾರತ–ಈಜಿಪ್ಟ್ ಜಂಟಿ ವ್ಯಾಪಾರ ಸಮಿತಿಯ ಏಳನೇ ಅಧಿವೇಶನ, ಜಂಟಿ ವ್ಯಾಪಾರ ಮಂಡಳಿ ಸಭೆ ಹಾಗೂ ಭಾರತ–ಈಜಿಪ್ಟ್ ಉದ್ಯಮ ವೇದಿಕೆ ನಡೆಯಲಿದೆ. ಜಂಟಿ ವ್ಯಾಪಾರ ಸಮಿತಿಯ ಸಭೆ ನವೆಂಬರ್ 15ರಂದು ಕೈರೋದಲ್ಲಿ ನಡೆಯಲಿದ್ದು, ಪಿಯೂಷ್ ಗೋಯಲ್ ಮತ್ತು ಈಜಿಪ್ಟ್‌ನ ಹೂಡಿಕೆ ಹಾಗೂ ವಿದೇಶಿ ವ್ಯಾಪಾರ ಸಚಿವ ಡಾ. ಮೊಹಮ್ಮದ್ ಫರೀದ್ ಸಲೇಹ್ ಸಹ ಅಧ್ಯಕ್ಷತೆ ವಹಿಸಲಿದ್ದಾರೆ.

ಇದಲ್ಲದೆ, ಈಜಿಪ್ಟ್‌ನ ಹಿರಿಯ ಸಚಿವರೊಂದಿಗೆ ದ್ವಿಪಕ್ಷೀಯ ಸಭೆಗಳು, ಪ್ರಮುಖ ಉದ್ಯಮ ಪ್ರತಿನಿಧಿಗಳೊಂದಿಗೆ ಮಾತುಕತೆ ಹಾಗೂ ಆಫ್ರಿಕನ್ ರಫ್ತು–ಆಮದು ಬ್ಯಾಂಕ್, ಈಜಿಪ್ಟ್ ಕಿರಿಯ ಉದ್ಯಮಿಗಳ ಸಂಘ ಮತ್ತು ಈಜಿಪ್ಟ್–ಭಾರತ ನವೋದ್ಯಮ ವೇದಿಕೆಯ ಪ್ರತಿನಿಧಿಗಳೊಂದಿಗೆ ಸಭೆಗಳು ನಡೆಯಲಿವೆ.

ಈ ಸಭೆಗಳಲ್ಲಿ ವ್ಯಾಪಾರ ಮತ್ತು ಹೂಡಿಕೆಗೆ ಸಂಬಂಧಿಸಿದ ವಿಷಯಗಳನ್ನು ಪರಿಶೀಲಿಸುವುದರ ಜೊತೆಗೆ ಉದ್ಯಮ ಪಾಲುದಾರಿಕೆ ಹಾಗೂ ಹೊಸ ವ್ಯಾಪಾರ ಅವಕಾಶಗಳನ್ನು ಅನ್ವೇಷಿಸಲಾಗುತ್ತದೆ.

ಭಾರತ ಮತ್ತು ಈಜಿಪ್ಟ್ ನಡುವಿನ ಸಂಬಂಧಗಳು ಐತಿಹಾಸಿಕ, ನಾಗರಿಕತೆಯ ಪರಂಪರೆ ಹಾಗೂ ಜನರ ನಡುವಿನ ಸಂಪರ್ಕದ ಆಧಾರದ ಮೇಲೆ ಬೆಳೆದುಬಂದಿವೆ. ಈಗಾಗಲೇ ಕಾರ್ಯತಂತ್ರದ ಪಾಲುದಾರಿಕೆಯ ಹಂತ ತಲುಪಿರುವ ಉಭಯ ದೇಶಗಳು ವ್ಯಾಪಾರ, ಹೂಡಿಕೆ ಮತ್ತು ಕೈಗಾರಿಕಾ ಅಭಿವೃದ್ಧಿ ಕ್ಷೇತ್ರಗಳಲ್ಲಿ ಸಹಕಾರವನ್ನು ಮತ್ತಷ್ಟು ವಿಸ್ತರಿಸುವ ಗುರಿ ಹೊಂದಿವೆ.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.