ನವದೆಹಲಿ, 06 ನವೆಂಬರ್ (ಹಿ.ಸ.):

ದೇಶದಾದ್ಯಂತ ನಾಲ್ಕು ಪಥ ಹಾಗೂ ಅದಕ್ಕಿಂತ ಹೆಚ್ಚು ಪಥಗಳ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ವಾಹನಗಳನ್ನು ನಿಲ್ಲಿಸದೆ ಸುಂಕ ವಸೂಲಿ ಮಾಡುವ ವ್ಯವಸ್ಥೆ ಜಾರಿಗೆ ತರಲು ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (ಎನ್‌ಎಚ್‌ಎಐ) ಹೊಸ ಮಾರ್ಗಸೂಚಿಗಳನ್ನು ಪ್ರಕಟಿಸಿದೆ.

ಈ ವ್ಯವಸ್ಥೆಯಡಿ ಹೊಸದಾಗಿ ನಿರ್ಮಾಣವಾಗುವ ಹಾಗೂ ನಿರ್ಮಾಣ ಹಂತದಲ್ಲಿರುವ ರಾಷ್ಟ್ರೀಯ ಹೆದ್ದಾರಿ ಯೋಜನೆಗಳಲ್ಲಿ ತಡೆಗೋಡೆರಹಿತ ಸುಂಕ ವಸೂಲಿಗೆ ಅನುಕೂಲವಾಗುವಂತೆ ಮೂಲಸೌಕರ್ಯ ರೂಪಿಸಲಾಗುತ್ತದೆ. ಇದರಿಂದ ವಾಹನಗಳು ಸುಂಕ ಕೇಂದ್ರಗಳಲ್ಲಿ ನಿಲ್ಲದೆ ಸಂಚರಿಸುತ್ತಲೇ ಸುಂಕ ಪಾವತಿಸಲು ಸಾಧ್ಯವಾಗಲಿದೆ.

ಸುಂಕ ಕೇಂದ್ರಗಳಲ್ಲಿ ವಾಹನಗಳ ಸರದಿ ಮತ್ತು ಕಾಯುವ ಸಮಯವನ್ನು ಕಡಿಮೆ ಮಾಡುವುದು, ಇಂಧನ ಬಳಕೆ ತಗ್ಗಿಸುವುದು ಹಾಗೂ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಸುರಕ್ಷಿತ ಮತ್ತು ಸುಗಮ ಸಂಚಾರಕ್ಕೆ ಅವಕಾಶ ಕಲ್ಪಿಸುವುದು ಈ ವ್ಯವಸ್ಥೆಯ ಪ್ರಮುಖ ಉದ್ದೇಶವಾಗಿದೆ ಎಂದು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ ತಿಳಿಸಿದೆ.

ಹೊಸ ಮಾರ್ಗಸೂಚಿಗಳಲ್ಲಿ ಸುಂಕ ಕೇಂದ್ರಗಳ ವಿನ್ಯಾಸ, ಪಥಗಳ ಸಂಖ್ಯೆ ಮತ್ತು ವ್ಯವಸ್ಥೆ, ಕಂಬಸಾಲುಗಳ ಮೇಲಿನ ಉಪಕರಣಗಳ ಅಳವಡಿಕೆ, ರಸ್ತೆ ಮೂಲಸೌಕರ್ಯ, ಬೆಳಕಿನ ವ್ಯವಸ್ಥೆ, ಸೂಚನಾ ಫಲಕಗಳು ಸೇರಿದಂತೆ ವಿವಿಧ ಸೌಲಭ್ಯಗಳಿಗೆ ಏಕರೂಪದ ಮಾನದಂಡಗಳನ್ನು ನಿಗದಿಪಡಿಸಲಾಗಿದೆ.

ರಾಷ್ಟ್ರೀಯ ಹೆದ್ದಾರಿಗಳ ವಿಭಿನ್ನ ವಿನ್ಯಾಸಗಳಿಗೆ ಅನುಗುಣವಾಗಿ ತಡೆಗೋಡೆರಹಿತ ಸುಂಕ ಕೇಂದ್ರಗಳ ರಚನೆ, ಸುಂಕ ವಸೂಲಿ ಪಥಗಳ ಸಂಖ್ಯೆ, ಉಪಕರಣಗಳ ಅಳವಡಿಕೆಯ ಸ್ಥಳ ಮತ್ತು ರಸ್ತೆ ಸುರಕ್ಷತಾ ಕ್ರಮಗಳನ್ನು ನಿರ್ಧರಿಸಲಾಗಿದೆ. ವಾಹನಗಳನ್ನು ಭೌತಿಕ ತಡೆಗೋಡೆಗಳ ಬಳಿ ನಿಲ್ಲಿಸುವ ಅಗತ್ಯವಿಲ್ಲದ ಕಾರಣ ಸಾಂಪ್ರದಾಯಿಕ ಸುಂಕ ಕೇಂದ್ರಗಳಿಗೆ ಹೋಲಿಸಿದರೆ ಪಥಗಳ ಸಂಖ್ಯೆಯನ್ನು ತರ್ಕಬದ್ಧಗೊಳಿಸಲಾಗಿದೆ. ಇದರಿಂದ ಲಭ್ಯವಿರುವ ಸ್ಥಳದ ಸಮರ್ಪಕ ಬಳಕೆ ಹಾಗೂ ಸುಗಮ ಸಂಚಾರ ಸಾಧ್ಯವಾಗಲಿದೆ.

ಈ ಮಾರ್ಗಸೂಚಿಗಳು ಎಲ್ಲ ಹೊಸ ಮತ್ತು ನಿರ್ಮಾಣ ಹಂತದಲ್ಲಿರುವ ರಾಷ್ಟ್ರೀಯ ಹೆದ್ದಾರಿ ಯೋಜನೆಗಳಿಗೆ ಅನ್ವಯಿಸಲಿವೆ. ವಿಸ್ತೃತ ಯೋಜನಾ ವರದಿ ಸಿದ್ಧಪಡಿಸುವ ಹಂತದಲ್ಲಿರುವ ಯೋಜನೆಗಳಲ್ಲಿ ಹೊಸ ವಿನ್ಯಾಸವನ್ನು ಅಳವಡಿಸಲಾಗುತ್ತದೆ. ಈಗಾಗಲೇ ಗುತ್ತಿಗೆ ನೀಡಿರುವ ಅಥವಾ ನಿರ್ಮಾಣ ಹಂತದಲ್ಲಿರುವ ಯೋಜನೆಗಳಲ್ಲಿ ಒಪ್ಪಂದದ ನಿಯಮಗಳ ಮೂಲಕ ಅಗತ್ಯ ಬದಲಾವಣೆಗಳನ್ನು ಜಾರಿಗೆ ತರಲಾಗುತ್ತದೆ. ಹೊಸ ಯೋಜನೆಗಳಲ್ಲಿ ನಿಗದಿತ ಮಾನದಂಡಗಳನ್ನು ಅಳವಡಿಸುವಂತೆ ಹಾಗೂ ಹಾಲಿ ಯೋಜನೆಗಳಲ್ಲಿಯೂ ಅವುಗಳನ್ನು ಅನುಷ್ಠಾನಗೊಳಿಸುವಂತೆ ಪ್ರಾಧಿಕಾರದ ಪ್ರಾದೇಶಿಕ ಕಚೇರಿಗಳಿಗೆ ಸೂಚಿಸಲಾಗಿದೆ.

ಸುಂಕ ಕೇಂದ್ರಗಳಲ್ಲಿ ಸಮರ್ಪಕ ಬೆಳಕಿನ ವ್ಯವಸ್ಥೆ, ವಾಹನ ಸವಾರರಿಗೆ ಮುಂಚಿತವಾಗಿ ಮಾಹಿತಿ ನೀಡುವ ಸೂಚನಾ ಫಲಕಗಳು ಹಾಗೂ ವಿದ್ಯುನ್ಮಾನ ಬದಲಾಯಿಸಬಹುದಾದ ಸಂದೇಶ ಫಲಕಗಳನ್ನು ಅಳವಡಿಸುವುದಕ್ಕೂ ಮಾರ್ಗಸೂಚಿಗಳಲ್ಲಿ ಆದ್ಯತೆ ನೀಡಲಾಗಿದೆ. ಇದರಿಂದ ಸುಂಕ ವಸೂಲಿ ಪ್ರದೇಶದಲ್ಲಿ ವಾಹನ ಚಾಲಕರಿಗೆ ಸ್ಪಷ್ಟ ಗೋಚರತೆ ಮತ್ತು ಅಗತ್ಯ ಮಾಹಿತಿ ದೊರೆಯಲಿದ್ದು, ಸುರಕ್ಷಿತ ಸಂಚಾರಕ್ಕೆ ಅನುಕೂಲವಾಗಲಿದೆ.

ಇದಲ್ಲದೆ, ಸುಂಕ ಕೇಂದ್ರಗಳ ಕಾರ್ಯನಿರ್ವಹಣೆ ಮತ್ತು ನಿರ್ವಹಣೆಗಾಗಿ ಆಡಳಿತ ಕಟ್ಟಡದೊಂದಿಗೆ ಕಾರ್ಯಾಚರಣೆ ಹಾಗೂ ನಿರ್ವಹಣಾ ಕೇಂದ್ರ ಸ್ಥಾಪಿಸುವುದಕ್ಕೂ ಅವಕಾಶ ಕಲ್ಪಿಸಲಾಗಿದೆ.

ಇದಕ್ಕೂ ಮೊದಲು, ವೇಗದ ಸಂಚಾರಕ್ಕೆ ಅವಕಾಶವಿರುವ ನಿಯಂತ್ರಿತ ಪ್ರವೇಶ ಸೌಲಭ್ಯದ ರಾಷ್ಟ್ರೀಯ ಹೆದ್ದಾರಿಗಳ ಯೋಜನೆ ಮತ್ತು ವಿನ್ಯಾಸಕ್ಕೆ ಸಂಬಂಧಿಸಿದಂತೆ ಎನ್‌ಎಚ್‌ಎಐ ಸಮಗ್ರ ಮಾರ್ಗಸೂಚಿಗಳನ್ನು ಪ್ರಕಟಿಸಿತ್ತು. ಮುಂಬರುವ ವೇಗದ ರಾಷ್ಟ್ರೀಯ ಹೆದ್ದಾರಿ ಕಾರಿಡಾರ್‌ಗಳ ವಿಸ್ತೃತ ಯೋಜನಾ ವರದಿ ಸಿದ್ಧಪಡಿಸುವಾಗ ತಾಂತ್ರಿಕ ಮಾನದಂಡಗಳಲ್ಲಿ ಏಕರೂಪತೆ ತರುವುದು ಹಾಗೂ ರಸ್ತೆ ಸುರಕ್ಷತೆಯನ್ನು ಬಲಪಡಿಸುವುದು ಇದರ ಉದ್ದೇಶವಾಗಿತ್ತು.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.