ಗ್ಲಾಸ್ಗೋ, ಜುಲೈ 28(ಹಿ.ಸ.):

ಆ್ಯಂಕರ್:

ಕಾಮನ್‌ವೆಲ್ತ್ ಕ್ರೀಡಾಕೂಟ–2026ರಲ್ಲಿ ಭಾರತದ ತಾರಾ ಎತ್ತರ ಜಿಗಿತಗಾರ ಸರ್ವೇಶ್ ಕುಶಾರೆ ಪುರುಷರ ಎತ್ತರ ಜಿಗಿತ ಸ್ಪರ್ಧೆಯಲ್ಲಿ ಬೆಳ್ಳಿ ಪದಕ ಗೆದ್ದಿದ್ದಾರೆ. ಇದರೊಂದಿಗೆ ಗ್ಲಾಸ್ಗೋ ಕಾಮನ್‌ವೆಲ್ತ್ ಕ್ರೀಡಾಕೂಟದ ಅಥ್ಲೆಟಿಕ್ಸ್ ವಿಭಾಗದಲ್ಲಿ ಭಾರತಕ್ಕೆ ಮೊದಲ ಪದಕ ತಂದುಕೊಟ್ಟ ಸಾಧನೆ ಮಾಡಿದ್ದಾರೆ.

31 ವರ್ಷದ ಸರ್ವೇಶ್ ಫೈನಲ್‌ನಲ್ಲಿ 2.05 ಮೀ., 2.10 ಮೀ., 2.15 ಮೀ. ಹಾಗೂ 2.20 ಮೀ. ಎತ್ತರವನ್ನು ಮೊದಲ ಪ್ರಯತ್ನದಲ್ಲೇ ಯಶಸ್ವಿಯಾಗಿ ದಾಟಿದರು. ಬಳಿಕ 2.25 ಮೀ. ಎತ್ತರವನ್ನು ಮೂರನೇ ಪ್ರಯತ್ನದಲ್ಲಿ ದಾಟಿ ಬೆಳ್ಳಿ ಪದಕವನ್ನು ಬಹುತೇಕ ಖಚಿತಪಡಿಸಿಕೊಂಡರು.

ಜಮೈಕಾದ ರೊಮೇನ್ ಬೆಕ್‌ಫೋರ್ಡ್ ಕೂಡ 2.25 ಮೀ. ಎತ್ತರವನ್ನು ದಾಟಿದರೂ, ಅದನ್ನು ಮೊದಲ ಪ್ರಯತ್ನದಲ್ಲೇ ಸಾಧಿಸಿದ್ದರಿಂದ ಅವರಿಗೆ ಚಿನ್ನದ ಪದಕ ಲಭಿಸಿತು. ನಂತರ 2.28 ಮೀ. ಎತ್ತರವನ್ನು ದಾಟುವಲ್ಲಿ ಇಬ್ಬರೂ ಮೂರು ಪ್ರಯತ್ನಗಳಲ್ಲೂ ವಿಫಲರಾದರು. ಇಂಗ್ಲೆಂಡ್‌ನ ಕಿಮಾನಿ ಜ್ಯಾಕ್ 2.20 ಮೀ. ಜಿಗಿದು ಕಂಚಿನ ಪದಕ ತಮ್ಮದಾಗಿಸಿಕೊಂಡರು.

ಕಾಮನ್‌ವೆಲ್ತ್ ಕ್ರೀಡಾಕೂಟಕ್ಕೂ ಮುನ್ನ ಸರ್ವೇಶ್ ಅತ್ಯುತ್ತಮ ಲಯದಲ್ಲಿದ್ದರು. ಜೂನ್ 27ರಂದು ಭುವನೇಶ್ವರದಲ್ಲಿ ನಡೆದ ರಾಷ್ಟ್ರೀಯ ಅಂತರರಾಜ್ಯ ಅಥ್ಲೆಟಿಕ್ಸ್ ಚಾಂಪಿಯನ್‌ಶಿಪ್‌ನಲ್ಲಿ 2.31 ಮೀ. ಎತ್ತರ ಜಿಗಿದು ಹೊಸ ರಾಷ್ಟ್ರೀಯ ದಾಖಲೆಯನ್ನು ನಿರ್ಮಿಸಿದ್ದರು. ಅಲ್ಲದೆ, 2025ರ ವಿಶ್ವ ಅಥ್ಲೆಟಿಕ್ಸ್ ಚಾಂಪಿಯನ್‌ಶಿಪ್‌ನಲ್ಲಿ ಪುರುಷರ ಎತ್ತರ ಜಿಗಿತದ ಫೈನಲ್‌ಗೆ ಪ್ರವೇಶಿಸಿದ ಮೊದಲ ಭಾರತೀಯ ಎಂಬ ಇತಿಹಾಸ ನಿರ್ಮಿಸಿ ಆರನೇ ಸ್ಥಾನ ಪಡೆದಿದ್ದರು.

ಈ ಸ್ಪರ್ಧೆಯ ಫೈನಲ್‌ನಲ್ಲಿ ಭಾರತದ ಮೂವರು ಅಥ್ಲೀಟ್‌ಗಳು ಸ್ಪರ್ಧಿಸಿದ್ದರು. ಆದರೆ ತೇಜಸ್ವಿನ್ ಶಂಕರ್ ಆರಂಭಿಕ 2.05 ಮೀ. ಎತ್ತರವನ್ನು ದಾಟಲು ವಿಫಲವಾದ ಬಳಿಕ ಗಾಯದ ಕಾರಣ ಸ್ಪರ್ಧೆಯಿಂದ ಹಿಂದೆ ಸರಿದರು. ಆದರೂ ಅವರು ಟ್ರ್ಯಾಕ್‌ ಪಕ್ಕದಲ್ಲೇ ಉಳಿದು ಸರ್ವೇಶ್ ಅವರಿಗೆ ನಿರಂತರವಾಗಿ ಪ್ರೋತ್ಸಾಹ ನೀಡಿದರು. ಭಾರತದ ಮತ್ತೊಬ್ಬ ಅಥ್ಲೀಟ್ ಜೆ. ಆದರ್ಶ್ ರಾಮ್ ಕೂಡ ಫೈನಲ್‌ನಲ್ಲಿ ಸ್ಪರ್ಧಿಸಿದ್ದರು.

ಸರ್ವೇಶ್ ಕುಶಾರೆ ಅವರ ಬೆಳ್ಳಿ ಪದಕದೊಂದಿಗೆ ಗ್ಲಾಸ್ಗೋ ಕಾಮನ್‌ವೆಲ್ತ್ ಕ್ರೀಡಾಕೂಟ–2026ರ ಅಥ್ಲೆಟಿಕ್ಸ್ ವಿಭಾಗದಲ್ಲಿ ಭಾರತ ಪದಕದ ಖಾತೆ ತೆರೆದಿದ್ದು, ಭಾರತೀಯ ತಂಡದ ಪದಕ ನಿರೀಕ್ಷೆಗೆ ಮತ್ತಷ್ಟು ಬಲ ಸಿಕ್ಕಿದೆ.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.