ನವದೆಹಲಿ, 30 ಜೂನ್ (ಹಿ.ಸ.) :

ಆ್ಯಂಕರ್ : ಮೂರು ದಿನಗಳ ಸೆಶೆಲ್ಸ್ ಪ್ರವಾಸದಲ್ಲಿರುವ ಪ್ರಧಾನಿ ನರೇಂದ್ರ ಮೋದಿ ಅವರು ಭಾರತದ ಶ್ರೀಮಂತ ಕರಕುಶಲ ಮತ್ತು ಕೈಮಗ್ಗ ಪರಂಪರೆಯನ್ನು ಪ್ರತಿಬಿಂಬಿಸುವ ನಾನಾ ರಾಜ್ಯಗಳ ವಿಶೇಷ ಕಲಾಕೃತಿಗಳು ಹಾಗೂ ವಸ್ತ್ರಗಳನ್ನು ಸೆಶೆಲ್ಸ್ನ ಉನ್ನತ ನಾಯಕರಿಗೆ ಉಡುಗೊರೆಯಾಗಿ ನೀಡಿದರು.

ಸೆಶೆಲ್ಸ್ ಅಧ್ಯಕ್ಷ ಪ್ಯಾಟ್ರಿಕ್ ಹೆರ್ಮಿನಿ ಅವರಿಗೆ ಉತ್ತರ ಪ್ರದೇಶದ ಮೊರಾದಾಬಾದ್ ಕರಕುಶಲಗಾರರು ತಯಾರಿಸಿದ ಮೊರಾದಾಬಾದಿ ಹಿತ್ತಾಳೆಯ ಆಮೆಯನ್ನು ಪ್ರಧಾನಿ ಮೋದಿ ಉಡುಗೊರೆಯಾಗಿ ನೀಡಿದರು. ಲೋಹದ ಎರಕ, ನಕ್ಕಾಶಿ ಮತ್ತು ಮೆರಗು ನೀಡುವ ಕಲೆಯಲ್ಲಿ ಮೊರಾದಾಬಾದ್ನ ಕುಶಲತೆಯನ್ನು ಈ ಕಲಾಕೃತಿ ಪ್ರತಿಬಿಂಬಿಸುತ್ತದೆ. ಭಾರತೀಯ ಸಂಪ್ರದಾಯದಲ್ಲಿ ಆಮೆಯನ್ನು ಜ್ಞಾನ, ಸ್ಥಿರತೆ, ತಾಳ್ಮೆ ಮತ್ತು ದೀರ್ಘಾಯುಷ್ಯದ ಸಂಕೇತವಾಗಿ ಪರಿಗಣಿಸಲಾಗುತ್ತದೆ. ಸೆಶೆಲ್ಸ್ನಲ್ಲಿ ವಿಶ್ವಪ್ರಸಿದ್ಧ ಅಲ್ಡಾಬ್ರಾ ದೈತ್ಯ ಆಮೆಗಳು ಕಂಡುಬರುವ ಹಿನ್ನೆಲೆಯಲ್ಲಿ ಈ ಉಡುಗೊರೆಗೆ ವಿಶೇಷ ಮಹತ್ವವಿದೆ ಎಂದು ತಿಳಿಸಲಾಗಿದೆ.

ಪ್ರಥಮ ಮಹಿಳೆ ವೆರೋನಿಕ್ ಹೆರ್ಮಿನಿ ಅವರಿಗೆ ಮಧ್ಯಪ್ರದೇಶದ ಮಹೇಶ್ವರಿ ರೇಷ್ಮೆ ಸ್ಟೋಲ್ ಹಾಗೂ ಕರ್ನಾಟಕದ ಪ್ರಸಿದ್ಧ ಬಿದ್ರಿವೇರ್ ಕಲಾಕೃತಿಯ ಪೆಟ್ಟಿಗೆ ಉಡುಗೊರೆಯಾಗಿ ನೀಡಲಾಯಿತು. ಮಹೇಶ್ವರಿ ರೇಷ್ಮೆ ತನ್ನ ಹಗುರವಾದ ವಿನ್ಯಾಸ, ವಿಶಿಷ್ಟ ನೇಯ್ಗೆ ಮತ್ತು ಸೊಗಸಾದ ಅಲಂಕಾರಿಕ ವಿನ್ಯಾಸಗಳಿಗೆ ಹೆಸರುವಾಸಿಯಾಗಿದೆ. ಬಿದ್ರಿವೇರ್ ಪೆಟ್ಟಿಗೆಯು ಕಪ್ಪು ಲೋಹದ ಮೇಲ್ಮೈಯಲ್ಲಿ ಬೆಳ್ಳಿಯ ನಕ್ಕಾಶಿಯೊಂದಿಗೆ ಭಾರತೀಯ ಲೋಹದ ಕರಕುಶಲ ಪರಂಪರೆಯ ಅತ್ಯುತ್ತಮ ಮಾದರಿಯಾಗಿದೆ.

ಉಪಾಧ್ಯಕ್ಷ ಸೆಬಾಸ್ಟಿಯನ್ ಪಿಲ್ಲೆ ಅವರಿಗೆ ಸಿಕ್ಕಿಂನ ಆರ್ಕಿಡ್ ಕಲಾಚಿತ್ರವನ್ನು ಉಡುಗೊರೆಯಾಗಿ ನೀಡಲಾಯಿತು. ಈ ಚಿತ್ರದಲ್ಲಿ ಭಾರತದ ರಾಷ್ಟ್ರೀಯ ಪಕ್ಷಿ ನವಿಲನ್ನು ಆರ್ಕಿಡ್ ಹೂಗಳ ನಡುವೆ ಚಿತ್ರಿಸಲಾಗಿದೆ. ಆರ್ಕಿಡ್ ಸೆಶೆಲ್ಸ್ನ ರಾಷ್ಟ್ರೀಯ ಪುಷ್ಪವಾಗಿರುವುದರಿಂದ, ಈ ಉಡುಗೊರೆ ಎರಡೂ ರಾಷ್ಟ್ರಗಳ ಜೀವವೈವಿಧ್ಯ ಸಂರಕ್ಷಣೆಯ ಬದ್ಧತೆಯ ಸಂಕೇತವಾಗಿದೆ.

ದ್ವಿತೀಯ ಮಹಿಳೆ ಲೀನಾ ಪಿಲ್ಲೆ ಅವರಿಗೆ ತಮಿಳುನಾಡಿನ ಜಿಐ (GI) ಮಾನ್ಯತೆ ಪಡೆದ ಕಾಂಚೀಪುರಂ ರೇಷ್ಮೆ ವಸ್ತ್ರವನ್ನು ಉಡುಗೊರೆಯಾಗಿ ನೀಡಲಾಯಿತು. ಚಿನ್ನದ ಜರಿಯ ಸೂಕ್ಷ್ಮ ಕೆಲಸ, ಕೆಂಪು, ಹಸಿರು ಹಾಗೂ ಚಿನ್ನದ ಬಣ್ಣಗಳ ಅಂಚುಗಳು ಮತ್ತು ದೇವಾಲಯದ ವಾಸ್ತುಶಿಲ್ಪ, ಪ್ರಕೃತಿ ಹಾಗೂ ಸಾಂಪ್ರದಾಯಿಕ ವಿನ್ಯಾಸಗಳಿಂದ ಪ್ರೇರಿತ ನೇಯ್ಗೆ ಈ ರೇಷ್ಮೆ ವಸ್ತ್ರದ ವಿಶೇಷತೆಯಾಗಿದೆ.

ಸೆಶೆಲ್ಸ್ ರಾಷ್ಟ್ರೀಯ ಅಸೆಂಬ್ಲಿಯ ಸ್ಪೀಕರ್ ಅಜಾರೆಲ್ ಎರ್ನೆಸ್ಟಾ ಅವರಿಗೆ ತಮಿಳುನಾಡಿನ ನೀಲಗಿರಿ ಬೆಟ್ಟಗಳಲ್ಲಿ ವಾಸಿಸುವ ಟೋಡಾ ಸಮುದಾಯದವರು ಕೈಯಾರೆ ತಯಾರಿಸಿದ ಟೋಡಾ ಕಸೂತಿ ಶಾಲುವನ್ನು ಉಡುಗೊರೆಯಾಗಿ ನೀಡಲಾಯಿತು. ಬಿಳಿ ಹತ್ತಿ ಬಟ್ಟೆಯ ಮೇಲೆ ಕೆಂಪು ಮತ್ತು ಕಪ್ಪು ಬಣ್ಣದ ಜ್ಯಾಮಿತೀಯ ಕಸೂತಿಯಿರುವ ಈ ಶಾಲು ಭಾರತದ ಆದಿವಾಸಿ ಪರಂಪರೆ ಮತ್ತು ವಿಶಿಷ್ಟ ಕರಕುಶಲ ಕೌಶಲ್ಯದ ಪ್ರತೀಕವಾಗಿದೆ. 'ಪುಖೂರ್' ಎಂದು ಕರೆಯಲ್ಪಡುವ ಈ ಕಸೂತಿ ವಿಧಾನ ಟೋಡಾ ಸಮುದಾಯದ ವಿಶಿಷ್ಟ ಸಾಂಸ್ಕೃತಿಕ ಪರಂಪರೆಯನ್ನು ಪ್ರತಿಬಿಂಬಿಸುತ್ತದೆ.

ಭಾರತದ ನಾನಾ ರಾಜ್ಯಗಳ ಸಾಂಪ್ರದಾಯಿಕ ಕಲಾಕೃತಿಗಳು ಮತ್ತು ಕೈಮಗ್ಗ ಉತ್ಪನ್ನಗಳನ್ನು ಸೆಶೆಲ್ಸ್ ನಾಯಕರಿಗೆ ಉಡುಗೊರೆಯಾಗಿ ನೀಡುವ ಮೂಲಕ ಉಭಯ ರಾಷ್ಟ್ರಗಳ ನಡುವಿನ ಸಾಂಸ್ಕೃತಿಕ ಬಾಂಧವ್ಯ, ಸ್ನೇಹ ಮತ್ತು ಪರಸ್ಪರ ಗೌರವವನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶವನ್ನು ಪ್ರಧಾನಿ ಮೋದಿ ವ್ಯಕ್ತಪಡಿಸಿದ್ದಾರೆ.

ಹಿಂದೂಸ್ತಾನ್ ಸಮಾಚಾರ್ / Rakesh.M.B.