ರಾಷ್ಟ್ರದೃಷ್ಟಿ ಮತ್ತು ವಿಶ್ವಾಸಾರ್ಹತೆ ‘ಹಿಂದುಸ್ಥಾನ್ ಸಮಾಚಾರ' ಗುರುತು : ಅರವಿಂದ್ ಮರ್ಡೀಕರ್

ಭಾರತೀಯ ಪತ್ರಿಕೋದ್ಯಮದ ಇಂದಿನ ಕಾಲಘಟ್ಟದಲ್ಲಿ ಒಂದು ಕಡೆ ಮಾಹಿತಿಯ ವೇಗ ಅಪೂರ್ವ ಮಟ್ಟಕ್ಕೇರಿದರೆ, ಮತ್ತೊಂದೆಡೆ ವಿಶ್ವಾಸಾರ್ಹತೆ, ವೈಚಾರಿಕ ಸಮತೋಲನ ಮತ್ತು ಸಾಂಸ್ಕೃತಿಕ ದೃಷ್ಟಿಕೋನ ಕುರಿತು ಗಂಭೀರ ಪ್ರಶ್ನೆಗಳು ಉದ್ಭವಿಸುತ್ತಿವೆ. ಇಂತಹ ಸಂದರ್ಭದಲ್ಲಿ ಭಾರತದ ಮೊದಲ ಬಹುಭಾಷಾ ಸುದ್ದಿ ಸಂಸ್ಥೆಯಾದ ಹಿಂದುಸ್ಥಾನ್ ಸಮಾಚಾರ ತನ್ನ ಮೂಲ ಧ್ಯೇಯಗಳಾದ — ರಾಷ್ಟ್ರವೇ ಪರಮ, ಭಾರತೀಯ ಭಾಷೆಗಳ ಗೌರವ ಮತ್ತು ಸಕಾರಾತ್ಮಕ ಪತ್ರಿಕೋದ್ಯಮ — ಇವುಗಳನ್ನು ಆಧಾರವಾಗಿಸಿಕೊಂಡು ನಿರಂತರವಾಗಿ ಮುಂದುವರಿಯುತ್ತಿದೆ.

1948ರ ಏಪ್ರಿಲ್ 10ರಂದು ಖ್ಯಾತ ಚಿಂತಕ ದಾದಾಸಾಹೇಬ್ ಆಪ್ಟೆ ಸ್ಥಾಪಿಸಿದ ‘ಹಿಂದುಸ್ಥಾನ್ ಸಮಾಚಾರ ಸುದ್ದಿ ಸಂಸ್ಥೆ ಭಾರತದಲ್ಲಿನ ಮೊದಲ ಬಹುಭಾಷಾ ಸುದ್ದಿ ಸಂಸ್ಥೆಯಾಗಿದೆ. ಬಂಗಾಳಿ, ಒಡಿಯಾ, ಅಸ್ಸಾಮಿ, ತೆಲುಗು, ಮಲಯಾಳಂ, ಉರ್ದು, ಪಂಜಾಬಿ, ಗುಜರಾತಿ, ಹಿಂದಿ ಮತ್ತು ಮರಾಠಿ ಸೇರಿದಂತೆ ಹತ್ತು ಭಾಷೆಗಳಿಂದ ಆರಂಭವಾದ ಈ ಪಯಣ, ಇಂದು ಇಂಗ್ಲಿಷ್ ಸೇರಿ 15 ಭಾರತೀಯ ಭಾಷೆಗಳವರೆಗೆ ವಿಸ್ತರಿಸಿದೆ. 2000ನೇ ವರ್ಷದಲ್ಲಿ ಇದನ್ನು ಶ್ರೀಕಾಂತ್ ಜೋಶಿ ಪುನರ್ ಸ್ಥಾಪಿಸಿದರು. ಇಂದು ದೇಶದ 200ಕ್ಕೂ ಹೆಚ್ಚು ಪತ್ರಿಕೆಗಳು, ಪ್ರಸಾರ ಭಾರತಿ ಅಡಿಯಲ್ಲಿ ಕಾರ್ಯನಿರ್ವಹಿಸುವ ದೂರದರ್ಶನ ಮತ್ತು ಆಕಾಶವಾಣಿ, ರಾಜ್ಯ ಸರ್ಕಾರಗಳು, ಅನೇಕ ಸುದ್ದಿ ವಾಹಿನಿಗಳು, ಸುದ್ದಿ ಜಾಲತಾಣಗಳು ಮತ್ತು ಮಾಧ್ಯಮ ಶಿಕ್ಷಣ ಸಂಸ್ಥೆಗಳು ಇದರ ಸೇವೆಗಳನ್ನು ಬಳಸುತ್ತಿವೆ.

ಸತ್ಯ, ಸಂವಾದ, ಸೇವೆ ಮತ್ತು ಸಹಕಾರವನ್ನು ಮೂಲ ಮಂತ್ರವನ್ನಾಗಿ ಮಾಡಿಕೊಂಡು ಕಾರ್ಯನಿರ್ವಹಿಸುತ್ತಿರುವ ಈ ಸಂಸ್ಥೆ ಹಲವು ಏರುಪೇರುಗಳನ್ನು ಕಂಡಿದ್ದರೂ ತನ್ನ ಮೂಲ ಚಿಂತನೆಗಳಿಂದ ಎಂದಿಗೂ ವಿಚಲಿತವಾಗಿಲ್ಲ. ಇತ್ತೀಚೆಗೆ ಎರಡನೇ ಬಾರಿ ಸರ್ವಾನುಮತದಿಂದ ಅಧ್ಯಕ್ಷರಾಗಿ ಆಯ್ಕೆಯಾದ ಅರವಿಂದ್ ಭಾಲಚಂದ್ರ ಮರ್ಡೀಕರ್ ಅವರು ಪತ್ರಿಕೋದ್ಯಮದ ಬದಲಾಗುತ್ತಿರುವ ಸ್ವರೂಪ, ತಂತ್ರಜ್ಞಾನ, ಫೇಕ್ ನ್ಯೂಸ್, ಭಾರತೀಯ ಭಾಷೆಗಳು ಮತ್ತು ರಾಷ್ಟ್ರದೃಷ್ಟಿ ಕುರಿತು ವಿಶ್ಲೇಷಣಾತ್ಮಕವಾಗಿ ಮಾತನಾಡಿದ್ದಾರೆ. ಆ ಸಂದರ್ಶನದ ಪ್ರಮುಖ ಅಂಶಗಳು ಹೀಗಿವೆ:

ಪ್ರಶ್ನೆ : 2016ರಿಂದ ನೀವು ಹಿಂದುಸ್ಥಾನ್ ಸಮಾಚಾರ ಸಂಸ್ಥೆಯ ನೇತೃತ್ವದ ವಿವಿಧ ಜವಾಬ್ದಾರಿಗಳೊಂದಿಗೆ ಸಂಬಂಧ ಹೊಂದಿದ್ದೀರಿ. ಈ ದೀರ್ಘ ಅನುಭವ ಸಂಸ್ಥೆಯ ಮೂಲ ಚೇತನ ಮತ್ತು ಭವಿಷ್ಯದ ಕುರಿತು ನಿಮಗೆ ಏನು ಕಲಿಸಿದೆ?

ಉತ್ತರ : ನನಗೆ ದೊರೆತ ಅತ್ಯಂತ ದೊಡ್ಡ ಪಾಠ ಎಂದರೆ “ಸಂಯಮ”. ಪತ್ರಿಕೋದ್ಯಮ ಕ್ಷೇತ್ರ ಸದಾ ಸವಾಲುಗಳಿಂದ ತುಂಬಿರುತ್ತದೆ. ಪ್ರತಿಯೊಂದು ಸವಾಲೂ ವಿಭಿನ್ನವಾಗಿರುತ್ತದೆ ಮತ್ತು ಮುನ್ನೆಚ್ಚರಿಕೆ ಇಲ್ಲದೇ ಎದುರಾಗುತ್ತದೆ. ಇಂತಹ ಸಂದರ್ಭದಲ್ಲಿ ಧೈರ್ಯ ಮತ್ತು ಸಮಾಧಾನ ಕಾಪಾಡಿಕೊಳ್ಳುವುದು ಅತ್ಯಂತ ದೊಡ್ಡ ಶಕ್ತಿಯಾಗುತ್ತದೆ.

ಹಿಂದುಸ್ಥಾನ್ ಸಮಾಚಾರ ಸುದ್ದಿ ಸಂಸ್ಥೆ ಅತ್ಯಂತ ಬಲಿಷ್ಠ ವೈಚಾರಿಕ ಅಡಿಪಾಯದ ಮೇಲೆ ಸ್ಥಾಪಿತವಾಗಿದೆ ಎಂಬುದು ನನ್ನ ಸ್ಪಷ್ಟ ನಂಬಿಕೆ. ನಮ್ಮ ಪೂರ್ವಜರು ಇದನ್ನು ಕೇವಲ ಸುದ್ದಿ ಸಂಸ್ಥೆಯಾಗಿ ಅಲ್ಲ, ರಾಷ್ಟ್ರಚೇತನೆಯ ಮಾಧ್ಯಮವಾಗಿ ನಿರ್ಮಿಸಿದರು. ಆದ್ದರಿಂದ ಕಾಲ ಬದಲಾಗಿದೆ, ತಂತ್ರಜ್ಞಾನ ಬದಲಾಗಿದೆ, ಮಾಧ್ಯಮಗಳ ರೂಪ ಬದಲಾಗಿದೆ; ಆದರೆ ಹಿಂದುಸ್ಥಾನ್ ಸಮಾಚಾರ ಮೂಲ ಚೇತನ ಬದಲಾಗಿಲ್ಲ. ನಾವು “ರಾಷ್ಟ್ರವೇ ಪರಮ” ಎಂಬ ಭಾವನೆಯೊಂದಿಗೆ ಮುಂದೆ ಸಾಗಿದ್ದೇವೆ ಮತ್ತು ಮುಂದೆಯೂ ಸಾಗುತ್ತೇವೆ. ಇದೇ ಕಾರಣದಿಂದ ಸಂಸ್ಥೆಯ ಭವಿಷ್ಯ ಅತ್ಯಂತ ಉಜ್ವಲವಾಗಿದೆ ಎಂದು ನನಗೆ ವಿಶ್ವಾಸವಿದೆ.

ಪ್ರಶ್ನೆ : ಡಿಜಿಟಲ್ ಮತ್ತು ಸಾಮಾಜಿಕ ಮಾಧ್ಯಮಗಳ ಯುಗದಲ್ಲಿ ಪರಂಪರೆ ಸುದ್ದಿ ಸಂಸ್ಥೆಗಳ ವಿಶ್ವಾಸಾರ್ಹತೆಯನ್ನು ಉಳಿಸಿಕೊಳ್ಳುವುದು ದೊಡ್ಡ ಸವಾಲಾಗಿದೆ. ಹಿಂದುಸ್ಥಾನ್ ಸಮಾಚಾರ ಇದನ್ನು ಹೇಗೆ ನೋಡುತ್ತದೆ?

ಉತ್ತರ : ಸುದ್ದಿ ಸತ್ಯ, ಸಮತೋಲನಯುತ ಮತ್ತು ವಾಸ್ತವಾಂಶ ಆಧಾರಿತವಾಗಿದ್ದರೆ ವಿಶ್ವಾಸಾರ್ಹತೆಯ ಸವಾಲು ಸ್ವತಃ ನಿವಾರಣೆಯಾಗುತ್ತದೆ. ಇಂದು ಸಾಮಾಜಿಕ ಮಾಧ್ಯಮ ಮತ್ತು ಡಿಜಿಟಲ್ ವೇದಿಕೆಗಳು ಮಾಹಿತಿಯನ್ನು ವೇಗವಾಗಿ ಜನರಿಗೆ ತಲುಪಿಸುವ ಸಾಧನಗಳಾಗಿವೆ. ನಾವು ಅವುಗಳನ್ನು ವಿರೋಧಿಗಳಂತೆ ಅಲ್ಲ, ಸಹಯೋಗಿಗಳಂತೆ ನೋಡುತ್ತೇವೆ.

ಹಿಂದುಸ್ಥಾನ್ ಸಮಾಚಾರ ಸುದ್ದಿ ಸಂಸ್ಥೆ ಹೊಸ ತಂತ್ರಜ್ಞಾನವನ್ನು ಅಳವಡಿಸಿಕೊಂಡು ವಿವಿಧ ಡಿಜಿಟಲ್ ವೇದಿಕೆಗಳಲ್ಲಿ ತನ್ನ ಬಲಿಷ್ಠ ಹಾಜರಾತಿ ನಿರ್ಮಿಸಿದೆ. ಆದಾಗ್ಯೂ ಇಂದಿಗೂ ಜನರು ಪರಂಪರಾಗತ ಪತ್ರಿಕೋದ್ಯಮದ ಮೇಲೆ ಹೆಚ್ಚು ನಂಬಿಕೆ ಇಟ್ಟಿದ್ದಾರೆ ಎಂಬುದನ್ನು ನಾನು ವಿಶ್ವಾಸದಿಂದ ಹೇಳುತ್ತೇನೆ. ಅದಕ್ಕಾಗಿಯೇ ಪತ್ರಿಕೆಗಳ ಪ್ರಸ್ತುತತೆ ಇನ್ನೂ ಉಳಿದಿದೆ. ಪರಂಪರಾಗತ ವಿಶ್ವಾಸಾರ್ಹತೆ ಮತ್ತು ಆಧುನಿಕ ತಂತ್ರಜ್ಞಾನ ಎರಡನ್ನೂ ಸಮತೋಲನದಿಂದ ಜೊತೆಯಲ್ಲಿ ತೆಗೆದುಕೊಂಡು ಹೋಗುವವರೇ ಭವಿಷ್ಯದಲ್ಲಿ ಯಶಸ್ವಿಯಾಗುತ್ತಾರೆ ಎಂಬುದು ನಮ್ಮ ನಂಬಿಕೆ.

ಪ್ರಶ್ನೆ : ನಿಮ್ಮ ನೇತೃತ್ವದಲ್ಲಿ ಸಂಸ್ಥೆಯ ಸಂಪಾದಕೀಯ ಆದ್ಯತೆಗಳಲ್ಲಿ ಯಾವ ಹೊಸ ಆಯಾಮಗಳನ್ನು ಕಾಣಬಹುದು?

ಉತ್ತರ : ನಮ್ಮ ಸ್ಥಾಪನೆಯೇ ಭಾರತೀಯತೆ ಮತ್ತು ರಾಷ್ಟ್ರದೃಷ್ಟಿಯನ್ನು ಕೇಂದ್ರವಾಗಿಟ್ಟುಕೊಂಡು ನಡೆದಿದೆ. ನಮಗೆ ಸಂಸ್ಕಾರಗಳಿಂದ ಸಕಾರಾತ್ಮಕ ಚಿಂತನೆ ಮತ್ತು ರಾಷ್ಟ್ರಹಿತದ ಪಾಠ ದೊರೆತಿದೆ. ಆದ್ದರಿಂದ ದಿಕ್ಕು ಬದಲಿಸುವ ಅಥವಾ ಗೊಂದಲಕ್ಕೀಡಾಗುವ ಪ್ರಶ್ನೆಯೇ ಉದ್ಭವಿಸುವುದಿಲ್ಲ.

ನಾವು ಸಕಾರಾತ್ಮಕ ಪತ್ರಿಕೋದ್ಯಮದಲ್ಲಿ ನಂಬಿಕೆ ಇಟ್ಟಿದ್ದೇವೆ. ಸಮಾಜವನ್ನು ವಿಭಜಿಸುವುದು, ಗೊಂದಲ ಸೃಷ್ಟಿಸುವುದು ಅಥವಾ ನಕಾರಾತ್ಮಕತೆಯನ್ನು ಹೆಚ್ಚಿಸುವುದಕ್ಕಿಂತ ರಚನಾತ್ಮಕ ಚರ್ಚೆಗಳಿಗೆ ಮಹತ್ವ ನೀಡುತ್ತೇವೆ. ಭಾರತದ ಸಾಂಸ್ಕೃತಿಕ ಚೇತನ, ರಾಷ್ಟ್ರೀಯ ಏಕತೆ ಮತ್ತು ಜನಭಾವನೆಗಳನ್ನು ಕೇಂದ್ರವಾಗಿಟ್ಟುಕೊಂಡು ಪತ್ರಿಕೋದ್ಯಮ ಮಾಡುವುದು ನಮ್ಮ ಆದ್ಯತೆಯಾಗಿದೆ.

ಪ್ರಶ್ನೆ : ಇಂದು ‘ಫೇಕ್ ನ್ಯೂಸ್’ ಅತಿದೊಡ್ಡ ಸವಾಲಾಗಿದೆ. ಈ ಹಿನ್ನೆಲೆಯಲ್ಲಿ ನಿಮ್ಮ ಸಂಸ್ಥೆಯ ವಾಸ್ತವ ಪರಿಶೀಲನಾ ನೀತಿ ಏನು?

ಉತ್ತರ : ಫೇಕ್ ನ್ಯೂಸ್ ಆರಂಭಿಕ ಹಂತದಲ್ಲಿ ಅನೇಕ ದೊಡ್ಡ ಮಾಧ್ಯಮ ಸಂಸ್ಥೆಗಳನ್ನೂ ಗೊಂದಲಕ್ಕೀಡು ಮಾಡಿತ್ತು ಎಂಬುದು ಸತ್ಯ. ನಾವು ಸಹ ಅದರಿಂದ ಪಾಠ ಕಲಿತಿದ್ದೇವೆ. ನಂತರ ನಮ್ಮ ಕಾರ್ಯವಿಧಾನದಲ್ಲಿ ಅಗತ್ಯ ಬದಲಾವಣೆಗಳನ್ನು ಮಾಡಿದ್ದೇವೆ.

ಈಗ ಯಾವುದೇ ಸುದ್ದಿಯನ್ನು ಪ್ರಕಟಿಸುವ ಮೊದಲು ಅಧಿಕೃತ ಮೂಲಗಳು, ತಜ್ಞರ ಅಭಿಪ್ರಾಯಗಳು, ವಾಸ್ತವಾಂಶಗಳು ಮತ್ತು ಸಾಕ್ಷ್ಯಗಳ ಗಂಭೀರ ಪರಿಶೀಲನೆ ನಡೆಸಲಾಗುತ್ತದೆ. ನಮ್ಮ ಸ್ಪಷ್ಟ ನೀತಿ — “ಸತ್ಯ ಸುದ್ದಿ, ಇದ್ದ ಹಾಗೆ.”

ಪ್ರಶ್ನೆ : ಸಣ್ಣ ನಗರಗಳು ಮತ್ತು ಪ್ರಾದೇಶಿಕ ಪತ್ರಕರ್ತರನ್ನು ಸಬಲಗೊಳಿಸಲು ಹಿಂದುಸ್ಥಾನ್ ಸುದ್ದಿ ಏನು ಮಾಡುತ್ತಿದೆ?

ಉತ್ತರ : ಭಾರತದ ನಿಜವಾದ ಸ್ವರೂಪ ಸಣ್ಣ ನಗರಗಳು ಮತ್ತು ಗ್ರಾಮಗಳಲ್ಲಿ ನೆಲೆಸಿದೆ. ಆದ್ದರಿಂದ ಪ್ರಾದೇಶಿಕ ವರದಿಗಾರರನ್ನು ಬಲಪಡಿಸುವುದು ನಮ್ಮ ಆದ್ಯತೆಯಾಗಿದೆ.

ನಾವು ಆಧುನಿಕ ಮೊಬೈಲ್ ಆಪ್ ಅಭಿವೃದ್ಧಿಪಡಿಸಿದ್ದೇವೆ. ಅದರ ಮೂಲಕ ವರದಿಗಾರರು ಎಲ್ಲಿಂದ ಬೇಕಾದರೂ ಸುದ್ದಿ ಬರೆಯಬಹುದು, ಫೋಟೋಗಳನ್ನು ಸೇರಿಸಬಹುದು ಮತ್ತು ತಕ್ಷಣ ಅಪ್ಲೋಡ್ ಮಾಡಬಹುದು. ವಿವಿಧ ಭಾಷೆಗಳ ಪತ್ರಕರ್ತರೊಂದಿಗೆ ನಿಯಮಿತ ವರ್ಚುವಲ್ ಸಂವಾದವೂ ನಡೆಯುತ್ತದೆ. ತರಬೇತಿ, ತಾಂತ್ರಿಕ ಸಹಕಾರ ಮತ್ತು ಮನೋಬಲ ಹೆಚ್ಚಿಸುವುದರ ಮೇಲೆ ನಾವು ವಿಶೇಷ ಗಮನ ಹರಿಸುತ್ತೇವೆ. ಯಾವುದೇ ವರದಿಗಾರರ ಉತ್ತಮ ಕಾರ್ಯವನ್ನು ಮೆಚ್ಚುವುದು ನಮ್ಮ ಕಾರ್ಯಸಂಸ್ಕೃತಿಯ ಭಾಗವಾಗಿದೆ.

ಪ್ರಶ್ನೆ : ಕೃತಕ ಬುದ್ಧಿಮತ್ತೆ ಮತ್ತು ಹೊಸ ತಂತ್ರಜ್ಞಾನಗಳ ಯುಗದಲ್ಲಿ ಸಂಸ್ಥೆ ಯಾವ ರೀತಿಯಲ್ಲಿ ಸಿದ್ಧತೆ ಮಾಡಿಕೊಳ್ಳುತ್ತಿದೆ?

ಉತ್ತರ : ತಂತ್ರಜ್ಞಾನದಿಂದ ದೂರ ಉಳಿದು ಪತ್ರಿಕೋದ್ಯಮದ ಭವಿಷ್ಯ ನಿರ್ಮಿಸಲು ಸಾಧ್ಯವಿಲ್ಲ. ಹಿಂದುಸ್ಥಾನ್ ಸಮಾಚಾರ ಈಗಾಗಲೇ ಕ್ಲೌಡ್ ಆಧಾರಿತ ಸುದ್ದಿ ಸಂಸ್ಕರಣಾ ವ್ಯವಸ್ಥೆ ಮತ್ತು ಮೊಬೈಲ್ ಆಪ್ ಬಳಸುತ್ತಿದೆ.

ಎಐ ಕುರಿತು ನಮ್ಮ ತಂಡ ನಿರಂತರವಾಗಿ ಕೆಲಸ ಮಾಡುತ್ತಿದೆ. ಇತ್ತೀಚೆಗೆ ನಾವು ಭಾಷಿಣಿ ವೇದಿಕೆಯೊಂದಿಗೆ ಸಹಭಾಗಿತ್ವ ಮಾಡಿಕೊಂಡಿದ್ದೇವೆ ಮತ್ತು ಅದರ ಪ್ರಮುಖ ಭಾಗ ನಮ್ಮ ವ್ಯವಸ್ಥೆಗೆ ಜೋಡಿಸಲಾಗಿದೆ. ಭಾರತೀಯ ಭಾಷೆಗಳ ವಿಸ್ತರಣೆ ಮತ್ತು ವೇಗವಾದ ಅನುವಾದಕ್ಕೆ ಈ ತಂತ್ರಜ್ಞಾನ ಬಹಳ ಉಪಯುಕ್ತವಾಗಿದೆ.

ಪ್ರಶ್ನೆ : ಭಾರತೀಯ ಭಾಷಾ ಪತ್ರಿಕೋದ್ಯಮದ ಭವಿಷ್ಯವನ್ನು ನೀವು ಹೇಗೆ ನೋಡುತ್ತೀರಿ?

ಉತ್ತರ : ನನ್ನ ಅಭಿಪ್ರಾಯದಲ್ಲಿ ಭಾರತೀಯ ಭಾಷೆಗಳ ಭವಿಷ್ಯ ಅತ್ಯಂತ ಉಜ್ವಲವಾಗಿದೆ. ಸವಾಲುಗಳು ಇದ್ದರೂ ಅವಕಾಶಗಳು ಇನ್ನಷ್ಟು ದೊಡ್ಡದಾಗಿವೆ.

ಭಾರತವು ವಿಭಿನ್ನ ಭಾಷೆಗಳು ಮತ್ತು ಸಂಸ್ಕೃತಿಗಳ ದೇಶ. ಇದೇ ವೈವಿಧ್ಯತೆ ನಮ್ಮ ಶಕ್ತಿ. ಹಿಂದುಸ್ಥಾನ್ ಸಮಾಚಾರ ಅತಿದೊಡ್ಡ ಬಲವೆಂದರೆ ಅದು ಒಂದೇ ಸಮಯದಲ್ಲಿ 15 ಭಾರತೀಯ ಭಾಷೆಗಳಲ್ಲಿ ಕಾರ್ಯನಿರ್ವಹಿಸುತ್ತಿದ್ದು ಪ್ರತಿಯೊಂದು ಭಾಷೆಗೆ ಸಮಾನ ಗೌರವ ನೀಡುತ್ತಿದೆ.

ಪ್ರಶ್ನೆ : ನಿಮ್ಮ ಹಿಂದಿನ ಅವಧಿಯ ಯಾವ ಸಾಧನೆಗಳು ನಿಮಗೆ ಹೆಚ್ಚು ತೃಪ್ತಿ ನೀಡುತ್ತವೆ?

ಉತ್ತರ : ಅನೇಕ ಸಾಧನೆಗಳು ತೃಪ್ತಿ ನೀಡುತ್ತವೆ — ಜಿಎಸ್ಟಿ ನೋಂದಣಿ, ಆಡಳಿತಾತ್ಮಕ ಪಾರದರ್ಶಕತೆ, ಕಾರ್ಯವಿಭಜನೆ, ಶಿಸ್ತು, ಆರ್ಥಿಕ ಯೋಜನೆ ಮತ್ತು ಸಮಯಕ್ಕೆ ಸರಿಯಾಗಿ ಕಾನೂನು ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸುವುದು. ಇವುಗಳಲ್ಲಿ ಅತಿದೊಡ್ಡ ಸಂತೋಷ ಎಂದರೆ ಸಂಸ್ಥೆ ನಿರಂತರವಾಗಿ ಆತ್ಮನಿರ್ಭರತೆಯತ್ತ ಸಾಗುತ್ತಿದೆ.

ಪ್ರಶ್ನೆ : ಯುವ ಪತ್ರಕರ್ತರು ಮತ್ತು ಮಾಧ್ಯಮ ವಿದ್ಯಾರ್ಥಿಗಳಿಗೆ ನಿಮ್ಮ ಸಂದೇಶವೇನು?

ಉತ್ತರ : ಒಬ್ಬ ಉತ್ತಮ ಪತ್ರಕರ್ತನಾಗಬೇಕಾದರೆ ಸಾಮಾನ್ಯ ಜ್ಞಾನ, ಇತಿಹಾಸ ಮತ್ತು ತನ್ನ ಭಾಷೆಯ ಮೇಲೆ ಗಟ್ಟಿ ಹಿಡಿತ ಇರಬೇಕು. ಕೇವಲ ತಂತ್ರಜ್ಞಾನದಿಂದ ಪತ್ರಿಕೋದ್ಯಮ ಸಾಧ್ಯವಿಲ್ಲ.

ಉತ್ತಮ ಸಾಹಿತ್ಯ ಓದಬೇಕು, ಹಿರಿಯ ಪತ್ರಕರ್ತರು ಮತ್ತು ಪ್ರೇರಣಾದಾಯಕ ವ್ಯಕ್ತಿಗಳ ಜೀವನಚರಿತ್ರೆಗಳನ್ನು ಅಧ್ಯಯನ ಮಾಡಬೇಕು. ಸಕಾರಾತ್ಮಕ ಚಿಂತನೆ, ಜಾಗೃತತೆ ಮತ್ತು ನಿಷ್ಕಳಂಕ ನಡತೆ — ಈ ಮೂರು ಗುಣಗಳು ಪತ್ರಕರ್ತನಿಗೆ ದೀರ್ಘಕಾಲದ ಗೌರವ ತಂದುಕೊಡುತ್ತವೆ.

ಪ್ರಶ್ನೆ : ಹಿಂದುಸ್ಥಾನ್ ಸಮಾಚಾರ ಸಾಮಾನ್ಯವಾಗಿ ಒಂದು ನಿರ್ದಿಷ್ಟ ವೈಚಾರಿಕ ಹಿನ್ನೆಲೆಯೊಂದಿಗೆ ಸಂಪರ್ಕಿಸಲಾಗುತ್ತದೆ. ನೀವು ಇದನ್ನು ಹೇಗೆ ನೋಡುತ್ತೀರಿ?

ಉತ್ತರ : ನಾವು ಖಂಡಿತವಾಗಿಯೂ ಒಂದು ಚಿಂತನೆಯ ಪ್ರತಿನಿಧಿಗಳಾಗಿದ್ದೇವೆ — ಮತ್ತು ಅದು “ರಾಷ್ಟ್ರವೇ ಪರಮ” ಎಂಬುದು. ಆದರೆ ಇಲ್ಲಿ ಒಂದು ಪ್ರಮುಖ ವ್ಯತ್ಯಾಸವನ್ನು ಅರ್ಥಮಾಡಿಕೊಳ್ಳಬೇಕು. ಪರವಾಗಿ ನಿಲ್ಲುವುದು ಸಹಜ, ಆದರೆ ಪಕ್ಷಪಾತಿಯಾಗುವುದು ತಪ್ಪು.

ನಾವು ರಾಷ್ಟ್ರಹಿತ, ಸಾಂಸ್ಕೃತಿಕ ಚೇತನ ಮತ್ತು ಸಾಮಾಜಿಕ ಸೌಹಾರ್ದದ ಪರವಾಗಿದ್ದೇವೆ; ಆದರೆ ಪೂರ್ವಾಗ್ರಹಪೀಡಿತರಲ್ಲ. ನಾವು ಎಲ್ಲ ಚಿಂತನೆಗಳಿಗೆ ಅವಕಾಶ ನೀಡುತ್ತೇವೆ, ಆದರೆ ರಾಷ್ಟ್ರವಿರೋಧಿ ದೃಷ್ಟಿಕೋನವನ್ನು ಸಾಮಾನ್ಯ ಚರ್ಚೆಯ ಭಾಗವೆಂದು ಪರಿಗಣಿಸುವುದಿಲ್ಲ.

ಪ್ರಶ್ನೆ : ಇಂದು ಮಾಧ್ಯಮಗಳ ಮೇಲೆ ಮಾರುಕಟ್ಟೆ, ಟಿಆರ್ಪಿ ಮತ್ತು ರಾಜಕೀಯ ಧ್ರುವೀಕರಣದ ಒತ್ತಡ ಕಾಣುತ್ತಿದೆ. ಇಂತಹ ಸಂದರ್ಭದಲ್ಲಿ ಸಮತೋಲನ ಕಾಯ್ದುಕೊಳ್ಳುವುದು ಎಷ್ಟು ಕಷ್ಟ?

ಉತ್ತರ : ಕಷ್ಟ ಖಂಡಿತ, ಆದರೆ ಅಸಾಧ್ಯವಲ್ಲ. ಮಾಧ್ಯಮ ಮಾರಾಟಕ್ಕೆ ಒಳಗಾಗದೇ ಮತ್ತು ಪಕ್ಷಪಾತದಿಂದ ದೂರವಿದ್ದರೆ ಭಯಪಡುವ ಅಗತ್ಯವಿಲ್ಲ.

ನಾವು ಸಂಚಲನಕ್ಕಿಂತ ಸತ್ಯಕ್ಕೆ ಹೆಚ್ಚಿನ ಮಹತ್ವ ನೀಡುತ್ತೇವೆ. “ಅತ್ಯಂತ ವೇಗ”ದ ಅಂಧ ಸ್ಪರ್ಧೆಯಿಂದ ದೂರ ಉಳಿದು “ನಡೆದಂತೆ ಸುದ್ದಿ” ಎಂಬ ನೀತಿಯಡಿ ಕೆಲಸ ಮಾಡುತ್ತೇವೆ. ಭಾರತೀಯ ಭಾಷೆಗಳಲ್ಲಿ ಪತ್ರಿಕೋದ್ಯಮ ಮಾಡುವುದು ನಮ್ಮ ಅತಿದೊಡ್ಡ ಶಕ್ತಿ. ನೆಲಮಟ್ಟದ ವರದಿಗಾರರೇ ನಮ್ಮ ನಿಜವಾದ ಬಲ.

ಪ್ರಶ್ನೆ : ಕೊನೆಗೆ, ಭಾರತೀಯ ಪತ್ರಿಕೋದ್ಯಮದ ಅತಿದೊಡ್ಡ ಸವಾಲು ಮತ್ತು ಅತಿದೊಡ್ಡ ಅವಕಾಶವನ್ನು ಒಂದೊಂದು ವಾಕ್ಯದಲ್ಲಿ ಹೇಳಬೇಕಾದರೆ ಏನು ಹೇಳುತ್ತೀರಿ?

ಉತ್ತರ : ಅತಿದೊಡ್ಡ ಸವಾಲು ಎಂದರೆ — ಮಾಹಿತಿಯ ಅತಿರೇಕದ ನಡುವೆ ಸತ್ಯವನ್ನು ಸುರಕ್ಷಿತವಾಗಿಡುವುದು. ಅತಿದೊಡ್ಡ ಅವಕಾಶ ಎಂದರೆ — ಭಾರತೀಯ ಸಮಾಜದ ಬೇರುಗಳಿಗೆ ಸಂಬಂಧಿಸಿದ ಸಕಾರಾತ್ಮಕ ಪತ್ರಿಕೋದ್ಯಮದ ಪುನರುಜ್ಜೀವನ.

ನಾವು ಸವಾಲುಗಳನ್ನು ಸಂಕಷ್ಟವೆಂದು ಅಲ್ಲ, ಅವಕಾಶವೆಂದು ನೋಡುತ್ತೇವೆ. ಹಿಂದುಸ್ಥಾನ್ ಸಮಾಚಾರ ಅದೇ ವಿಶ್ವಾಸದೊಂದಿಗೆ ಮುಂದುವರಿಯುತ್ತಿದೆ.

ಹಿಂದೂಸ್ತಾನ್ ಸಮಾಚಾರ್ / Rakesh.M.B.