ನವದೆಹಲಿ, 09 ನವೆಂಬರ್ (ಹಿ.ಸ.):
ಐಪಿ ಆಧಾರಿತ ದೂರಸಂಪರ್ಕ ಜಾಲಗಳ ಸಂಪರ್ಕ ಶುಲ್ಕಕ್ಕೆ ಸಂಬಂಧಿಸಿದ ಹೊಸ ವ್ಯವಸ್ಥೆ 2027ರ ಜನವರಿ 1ರಿಂದ ಜಾರಿಗೆ ಬರಲಿದೆ. ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರವು (ಟ್ರಾಯ್) ಈ ಸಂಬಂಧ ಮೂರನೇ ತಿದ್ದುಪಡಿ ನಿಯಮಾವಳಿಯನ್ನು ಪ್ರಕಟಿಸಿದೆ.
ಹೊಸ ನಿಯಮದ ಪ್ರಕಾರ, ಒಂದು ಜಿಬಿಪಿಎಸ್ ಸಾಮರ್ಥ್ಯದ ಐಪಿ ಸಂಪರ್ಕಕ್ಕೆ ವಾರ್ಷಿಕ ಗರಿಷ್ಠ 5.6 ಲಕ್ಷ ರೂಪಾಯಿ ಹಾಗೂ 10 ಜಿಬಿಪಿಎಸ್ ಸಾಮರ್ಥ್ಯದ ಸಂಪರ್ಕಕ್ಕೆ 42.3 ಲಕ್ಷ ರೂಪಾಯಿ ಶುಲ್ಕ ನಿಗದಿಪಡಿಸಲಾಗಿದೆ.
ಕೇಂದ್ರ ಸಂಪರ್ಕ ಸಚಿವಾಲಯದ ಪ್ರಕಾರ, ಟ್ರಾಯ್ ಸೋಮವಾರ 'ದೂರಸಂಪರ್ಕ ಅಂತರ್‌ಸಂಪರ್ಕ (ಸಂಪರ್ಕ ಶುಲ್ಕ) (ಮೂರನೇ ತಿದ್ದುಪಡಿ) ನಿಯಮಾವಳಿ, 2026' ಪ್ರಕಟಿಸಿದೆ. ಈ ಮೂಲಕ ಈಗಿರುವ ಇ1/ಟಿಡಿಎಂ ಆಧಾರಿತ ಅಂತರ್‌ಸಂಪರ್ಕ ಸಂಪರ್ಕಗಳ ಜತೆಗೆ ಐಪಿ ಆಧಾರಿತ ಸಂಪರ್ಕಗಳನ್ನೂ ಶುಲ್ಕ ವ್ಯವಸ್ಥೆಯ ವ್ಯಾಪ್ತಿಗೆ ತರಲಾಗಿದೆ.
ಇನ್ನು ಮುಂದೆ 2.048 ಮೆಗಾಬಿಟ್ ಪ್ರತಿ ಸೆಕೆಂಡ್ ಸಾಮರ್ಥ್ಯದ ಹಳೆಯ ಇ1 ಸಂಪರ್ಕಗಳ ಜತೆಗೆ ಮೆಗಾಬಿಟ್ ಮತ್ತು ಗಿಗಾಬಿಟ್ ಪ್ರತಿ ಸೆಕೆಂಡ್ ಸಾಮರ್ಥ್ಯದಲ್ಲಿ ಅಳೆಯುವ ಐಪಿ ಸಂಪರ್ಕಗಳನ್ನೂ ಸಂಪರ್ಕದ ವ್ಯಾಖ್ಯಾನದಲ್ಲಿ ಸೇರಿಸಲಾಗಿದೆ.
ಪರಸ್ಪರ ಒಪ್ಪಿಗೆಯಿಂದ ಕಡಿಮೆ ಶುಲ್ಕ ನಿಗದಿ ಸಾಧ್ಯ
ಹೊಸ ನಿಯಮಗಳ ಪ್ರಕಾರ, ದೂರಸಂಪರ್ಕ ಸೇವಾ ಸಂಸ್ಥೆಗಳು ಪರಸ್ಪರ ಒಪ್ಪಿಗೆಯ ಆಧಾರದ ಮೇಲೆ ನಿಗದಿಪಡಿಸಿದ ಗರಿಷ್ಠ ಮಿತಿಗಿಂತ ಕಡಿಮೆ ಶುಲ್ಕ ವಿಧಿಸಬಹುದು. ಒಂದು ಮತ್ತು 10 ಜಿಬಿಪಿಎಸ್ ಸಾಮರ್ಥ್ಯಗಳ ಹೊರತಾಗಿ ಇತರ ಸಾಮರ್ಥ್ಯದ ಐಪಿ ಸಂಪರ್ಕಗಳಿಗೂ ಪರಸ್ಪರ ಒಪ್ಪಿಗೆಯಿಂದ ಶುಲ್ಕ ನಿಗದಿಪಡಿಸಲು ಅವಕಾಶವಿದೆ. ಆದರೆ, ಇದಕ್ಕಾಗಿ ಪಾರದರ್ಶಕ ಹಾಗೂ ಏಕರೂಪದ ಲೆಕ್ಕಾಚಾರ ಪದ್ಧತಿಯನ್ನು ಅನುಸರಿಸಬೇಕಾಗುತ್ತದೆ.
ಐಪಿ ಸಂಪರ್ಕ ಶುಲ್ಕವು ಸ್ಥಿರ ದೂರವಾಣಿ, ಮೊಬೈಲ್, ರಾಷ್ಟ್ರೀಯ ದೂರವಾಣಿ ಮತ್ತು ಅಂತರರಾಷ್ಟ್ರೀಯ ದೂರವಾಣಿ ಸೇವೆಗಳಿಗೆ ಸಮಾನವಾಗಿ ಅನ್ವಯವಾಗಲಿದೆ. ಈ ಹಿಂದೆ ನಿಗದಿಪಡಿಸಿದ್ದ ಶುಲ್ಕಗಳು ಇ1 ಸಂಪರ್ಕಗಳಿಗೆ ಮಾತ್ರ ಅನ್ವಯಿಸುತ್ತವೆ.
ನಿಯಮಗಳ ಉಲ್ಲಂಘನೆಯಾದಲ್ಲಿ ಪ್ರತಿ ಪ್ರಕರಣದಲ್ಲಿ ಪ್ರತಿ ಸೇವಾ ವಲಯಕ್ಕೆ ಗರಿಷ್ಠ 15 ಲಕ್ಷ ರೂಪಾಯಿವರೆಗೆ ಆರ್ಥಿಕ ದಂಡ ವಿಧಿಸಲು ಅವಕಾಶ ಕಲ್ಪಿಸಲಾಗಿದೆ.
ತಾಂತ್ರಿಕ ಬದಲಾವಣೆಗಳಿಗೆ ಅನುಗುಣವಾಗಿ ತಿದ್ದುಪಡಿ
ದೂರಸಂಪರ್ಕ ಜಾಲಗಳ ನಡುವಿನ ಅಂತರ್‌ಸಂಪರ್ಕ ವ್ಯವಸ್ಥೆಯಿಂದ ವಿವಿಧ ಸೇವಾ ಸಂಸ್ಥೆಗಳ ಗ್ರಾಹಕರು ಪರಸ್ಪರ ಯಾವುದೇ ಅಡೆತಡೆಯಿಲ್ಲದೆ ಸಂವಹನ ನಡೆಸಲು ಸಾಧ್ಯವಾಗುತ್ತದೆ ಎಂದು ಟ್ರಾಯ್ ತಿಳಿಸಿದೆ.
2001ರಲ್ಲಿ ಜಾರಿಗೆ ಬಂದ ಮೂಲ ನಿಯಮಾವಳಿಗಳಲ್ಲಿ ಅಂತರ್‌ಸಂಪರ್ಕ ಸಂಪರ್ಕ ಶುಲ್ಕವನ್ನು ನಿಗದಿಪಡಿಸಲಾಗಿತ್ತು. ಕೊನೆಯ ಬಾರಿಗೆ 2012ರಲ್ಲಿ ತಿದ್ದುಪಡಿ ಮಾಡಲಾಗಿತ್ತು. ತಾಂತ್ರಿಕ ಬೆಳವಣಿಗೆಗಳಿಗೆ ಅನುಗುಣವಾಗಿ ಶುಲ್ಕ ವ್ಯವಸ್ಥೆಯನ್ನು ಪರಿಷ್ಕರಿಸುವ ಉದ್ದೇಶದಿಂದ ಟ್ರಾಯ್ 2025ರ ಏಪ್ರಿಲ್‌ನಲ್ಲಿ ಪರಿಶೀಲನಾ ಪ್ರಕ್ರಿಯೆ ಆರಂಭಿಸಿತ್ತು.
ಈ ಸಂಬಂಧ 2025ರ ನವೆಂಬರ್‌ನಲ್ಲಿ ಸಮಾಲೋಚನಾ ಪತ್ರ ಪ್ರಕಟಿಸಲಾಗಿತ್ತು. ಇದಕ್ಕೆ 17 ಪಾಲುದಾರರು ಸಲಹೆಗಳನ್ನು ಸಲ್ಲಿಸಿದ್ದು, ಒಂಬತ್ತು ಮಂದಿ ಪ್ರತಿಕ್ರಿಯಾತ್ಮಕ ಅಭಿಪ್ರಾಯಗಳನ್ನು ನೀಡಿದ್ದರು. ಬಳಿಕ ಜನವರಿ 28ರಂದು ಮುಕ್ತ ಚರ್ಚೆ ನಡೆಸಲಾಗಿತ್ತು. ಪಾಲುದಾರರ ಅಭಿಪ್ರಾಯಗಳು ಮತ್ತು ತನ್ನದೇ ಆದ ವಿಶ್ಲೇಷಣೆಯ ಆಧಾರದ ಮೇಲೆ ಟ್ರಾಯ್ ಹೊಸ ತಿದ್ದುಪಡಿ ನಿಯಮಾವಳಿಗೆ ಅಂತಿಮ ರೂಪ ನೀಡಿದೆ.
--------
ಹಿಂದೂಸ್ತಾನ್ ಸಮಾಚಾರ್ / Rakesh.M.B.
