
ಬೆಂಗಳೂರು, 16 ನವೆಂಬರ್ (ಹಿ.ಸ.):
ಕರ್ನಾಟಕ ಲೋಕಸೇವಾ ಆಯೋಗದ (ಕೆಪಿಎಸ್ಸಿ) ನೇಮಕಾತಿ ಹಗರಣಕ್ಕೆ ಸಂಬಂಧಿಸಿದ ಅಕ್ರಮ ಹಣ ವರ್ಗಾವಣೆ ಪ್ರಕರಣದಲ್ಲಿ ಆಯೋಗದ ಮಾಜಿ ಅಧ್ಯಕ್ಷ ಶಿವಶಂಕರಪ್ಪ ಸಾಹುಕಾರ್ ಸೇರಿದಂತೆ ನಾಲ್ವರ ವಿರುದ್ಧ ಜಾರಿ ನಿರ್ದೇಶನಾಲಯ (ಇಡಿ) ಬೆಂಗಳೂರಿನ ವಿಶೇಷ ನ್ಯಾಯಾಲಯಕ್ಕೆ ದೋಷಾರೋಪ ಪಟ್ಟಿ ಸಲ್ಲಿಸಿದೆ.
ಈ ಕುರಿತು ಜಾರಿ ನಿರ್ದೇಶನಾಲಯ ಪತ್ರಿಕಾ ಪ್ರಕಟಣೆ ಬಿಡುಗಡೆ ಮಾಡಿದ್ದು, ಅಕ್ರಮ ಹಣ ವರ್ಗಾವಣೆ ತಡೆ ಕಾಯ್ದೆ (ಪಿಎಂಎಲ್ಎ) 2002ರ ಕಲಂ 44 ಮತ್ತು 45ರ ಅಡಿಯಲ್ಲಿ ಬೆಂಗಳೂರಿನ ಸಿಸಿಎಚ್-4 ವಿಶೇಷ ನ್ಯಾಯಾಲಯದಲ್ಲಿ ನವೆಂಬರ್ 16ರಂದು ದೋಷಾರೋಪ ಪಟ್ಟಿ ಸಲ್ಲಿಸಲಾಗಿದೆ. ಕೆಪಿಎಸ್ಸಿ ಮಾಜಿ ಅಧ್ಯಕ್ಷ ಶಿವಶಂಕರಪ್ಪ ಸಾಹುಕಾರ್, ಆಯೋಗದ ಸದಸ್ಯೆ ಬಿ.ವಿ. ಗೀತಾ ಶಿವಮೂರ್ತಿ, ಪರೀಕ್ಷಾ ನಿಯಂತ್ರಕರಾಗಿದ್ದ ಐಎಎಸ್ ಅಧಿಕಾರಿ ಜ್ಞಾನೇಂದ್ರ ಕುಮಾರ್ ಗಂಗ್ವಾರ್ ಹಾಗೂ ಬಸವರಾಜ್ ಕನ್ನಾಳೆ ವಿರುದ್ಧ ಹಣ ಅಕ್ರಮ ವರ್ಗಾವಣೆ ಆರೋಪ ಹೊರಿಸಲಾಗಿದೆ.
400 ಹುದ್ದೆಗಳ ನೇಮಕಾತಿಯಲ್ಲಿ ಅಕ್ರಮ
ಕರ್ನಾಟಕ ಸರ್ಕಾರದ ಪಶುಸಂಗೋಪನೆ ಮತ್ತು ಮೀನುಗಾರಿಕೆ ಇಲಾಖೆಯ 400 ಪಶುವೈದ್ಯಾಧಿಕಾರಿ ಹುದ್ದೆಗಳ ನೇಮಕಾತಿಗಾಗಿ 2026ರ ಜನವರಿ 9ರಂದು ನಡೆದ ಪರೀಕ್ಷೆಯಲ್ಲಿ ಅಕ್ರಮಗಳು ನಡೆದಿರುವುದು ಹಾಗೂ ಕೆಪಿಎಸ್ಸಿ ನೇಮಕಾತಿಗಳಲ್ಲಿ ನಕಲಿ ಪ್ರಮಾಣಪತ್ರಗಳನ್ನು ಸಲ್ಲಿಸಿರುವ ಆರೋಪಕ್ಕೆ ಸಂಬಂಧಿಸಿದಂತೆ ಬೆಂಗಳೂರಿನ ವಿಧಾನಸೌಧ ಪೊಲೀಸ್ ಠಾಣೆಯಲ್ಲಿ ದಾಖಲಾಗಿದ್ದ ಮೂರು ಪ್ರಥಮ ಮಾಹಿತಿ ವರದಿಗಳ ಆಧಾರದಲ್ಲಿ ಇಡಿ ತನಿಖೆ ಆರಂಭಿಸಿತ್ತು.
ತನಿಖೆಯ ಪ್ರಕಾರ, ಕೆಪಿಎಸ್ಸಿಯ ಅಂದಿನ ಅಧ್ಯಕ್ಷರು, ಸದಸ್ಯೆ ಹಾಗೂ ಪರೀಕ್ಷಾ ನಿಯಂತ್ರಕರು ಬಸವರಾಜ್ ಕನ್ನಾಳೆ ಮತ್ತಿತರರೊಂದಿಗೆ ಸೇರಿ ತಮ್ಮ ಅಧಿಕಾರ ದುರುಪಯೋಗಪಡಿಸಿಕೊಂಡು ಅಭ್ಯರ್ಥಿಗಳಿಂದ ಹಣ ಪಡೆದು ಆಯ್ಕೆಯ ಭರವಸೆ ನೀಡಿದ್ದರು. ಪ್ರಶ್ನೆಪತ್ರಿಕೆಗಳ ಸೋರಿಕೆ, ಸರಿಯಾದ ಉತ್ತರಗಳನ್ನು ಒಳಗೊಂಡ ಅಭ್ಯರ್ಥಿ ನಿರ್ದಿಷ್ಟ ಉತ್ತರಪಟ್ಟಿಗಳ ಹಂಚಿಕೆ ಹಾಗೂ 1:3 ಅರ್ಹತಾ ಪಟ್ಟಿಯ ದುರುಪಯೋಗದ ಮೂಲಕ ಅಕ್ರಮ ನಡೆಸಲಾಗಿದೆ ಎಂದು ಇಡಿ ಆರೋಪಿಸಿದೆ.
ಪೆನ್ಡ್ರೈವ್ನಲ್ಲಿ ಪ್ರಶ್ನೆಪತ್ರಿಕೆ ಸೋರಿಕೆ
ಪರೀಕ್ಷೆಯ ಗೌಪ್ಯ ಪ್ರಶ್ನೆಪತ್ರಿಕೆಗಳ ಉಸ್ತುವಾರಿ ಹೊಂದಿದ್ದ ಅಂದಿನ ಪರೀಕ್ಷಾ ನಿಯಂತ್ರಕ ಜ್ಞಾನೇಂದ್ರ ಕುಮಾರ್ ಗಂಗ್ವಾರ್ ಅವರು ಅಂತಿಮ ಕರಡು ಹಂತದಲ್ಲಿದ್ದ ಪ್ರಶ್ನೆಪತ್ರಿಕೆಗಳನ್ನು ಸರಿಯಾದ ಉತ್ತರಗಳ ಸಹಿತ ನಕಲು ಮಾಡಿ ಪೆನ್ಡ್ರೈವ್ನಲ್ಲಿ ತಮ್ಮ ಆಪ್ತ ಬಸವರಾಜ್ ಕನ್ನಾಳೆಗೆ ನೀಡಿದ್ದರು ಎಂದು ತನಿಖೆಯಲ್ಲಿ ತಿಳಿದುಬಂದಿದೆ. ಬಳಿಕ ಪ್ರಶ್ನೆಪತ್ರಿಕೆ ನಕಲು ಮಾಡಲು ಬಳಸಿದ್ದ ಸಾಧನವನ್ನು ನಾಶಪಡಿಸಿದ್ದರು ಎನ್ನಲಾಗಿದೆ.
ಬಸವರಾಜ್ ಕನ್ನಾಳೆ ಬೆಂಗಳೂರಿನ ಹೊರವಲಯದಲ್ಲಿ ಅಧಿಕೃತ ದಾಖಲೆಗಳಿಲ್ಲದೆ ಕಾಯ್ದಿರಿಸಿದ್ದ ವಿಲ್ಲಾಗಳಲ್ಲಿ ಪರೀಕ್ಷೆಗೆ ಒಂದು ದಿನ ಮುಂಚಿತವಾಗಿ ಅಭ್ಯರ್ಥಿಗಳಿಗೆ ಪ್ರಶ್ನೆಪತ್ರಿಕೆಗಳ ಮುದ್ರಿತ ಪ್ರತಿಗಳನ್ನು ಹಂಚಿಕೆ ಮಾಡಿದ್ದರು. 10 ಅಭ್ಯರ್ಥಿಗಳಿಂದ ಒಟ್ಟು 3.20 ಕೋಟಿ ರೂ. ಪಡೆಯಲು ಬೇಡಿಕೆಯಿಟ್ಟಿದ್ದು, ಈ ಪೈಕಿ 1.52 ಕೋಟಿ ರೂ. ಸಂಗ್ರಹಿಸಿದ್ದರು. ಇದರಲ್ಲಿ 92 ಲಕ್ಷ ರೂ. ಬ್ಯಾಂಕ್ ವಹಿವಾಟಿನ ಮೂಲಕ ಹಾಗೂ 60 ಲಕ್ಷ ರೂ. ನಗದು ರೂಪದಲ್ಲಿ ಪಡೆದಿದ್ದರು. ಉಳಿದ ಮೊತ್ತಕ್ಕೆ ಸಹಿ ಮಾಡಿದ ಖಾಲಿ ಚೆಕ್ಗಳು ಮತ್ತು ವಾಗ್ದಾನ ಪತ್ರಗಳನ್ನು ಪಡೆದುಕೊಂಡಿದ್ದರು. ಬಳಿಕ ಪೆನ್ಡ್ರೈವ್ ನಾಶಪಡಿಸಿ, ಮುದ್ರಿತ ಪ್ರಶ್ನೆಪತ್ರಿಕೆಗಳನ್ನು ಸುಟ್ಟುಹಾಕಿದ್ದರು ಎಂದು ಇಡಿ ತಿಳಿಸಿದೆ.
ಉತ್ತರಪಟ್ಟಿ ಸೋರಿಕೆಗೂ ಹಣದ ವ್ಯವಹಾರ
ಶಿವಶಂಕರಪ್ಪ ಸಾಹುಕಾರ್ ಅವರ ಸೂಚನೆಯ ಮೇರೆಗೆ ಜ್ಞಾನೇಂದ್ರ ಕುಮಾರ್ ಗಂಗ್ವಾರ್ ಅವರು ಪರೀಕ್ಷೆಗೆ ಸ್ವಲ್ಪ ಮುನ್ನ ಆರು ಅಭ್ಯರ್ಥಿಗಳ ಸರಿಯಾದ ಉತ್ತರಪಟ್ಟಿಗಳನ್ನು ಗೀತಾ ಶಿವಮೂರ್ತಿ ಅವರಿಗೆ ನೀಡಿದ್ದರು. ಇದಕ್ಕೆ ಪ್ರತಿಯಾಗಿ ತಮಗೆ ಬೇಕಾದ ಅಭ್ಯರ್ಥಿಯೊಬ್ಬರಿಗೆ ಕರ್ನಾಟಕ ಆಡಳಿತ ಸೇವೆ ಪರೀಕ್ಷೆಯ ಸಂದರ್ಶನದಲ್ಲಿ ಹೆಚ್ಚಿನ ಅಂಕಗಳನ್ನು ಕೊಡಿಸುವ ಭರವಸೆ ನೀಡಲಾಗಿತ್ತು ಎಂದು ತನಿಖೆಯಲ್ಲಿ ತಿಳಿದುಬಂದಿದೆ.
ಶಿವಶಂಕರಪ್ಪ ಸಾಹುಕಾರ್ ಅವರು ಒಬ್ಬ ಅಭ್ಯರ್ಥಿಯಿಂದ ನಿಗದಿಪಡಿಸಿದ್ದ 20 ಲಕ್ಷ ರೂ.ಗಳ ಪೈಕಿ 10 ಲಕ್ಷ ರೂ. ನಗದು ಪಡೆದಿದ್ದರು. ಮತ್ತೊಂದೆಡೆ, ಗೀತಾ ಶಿವಮೂರ್ತಿ ಅವರು ಮತ್ತೊಬ್ಬ ಅಭ್ಯರ್ಥಿಯಿಂದ 40 ಲಕ್ಷ ರೂ. ಬೇಡಿಕೆಯಿಟ್ಟಿದ್ದು, ಈ ಪೈಕಿ 20 ಲಕ್ಷ ರೂ.ಗಳನ್ನು 2026ರ ಜನವರಿ 8ರಂದು ತಮ್ಮ ಕಾರಿನಲ್ಲಿಯೇ ನಗದು ರೂಪದಲ್ಲಿ ಸ್ವೀಕರಿಸಿದ್ದರು ಎಂದು ಇಡಿ ಆರೋಪಿಸಿದೆ.
ನಕಲಿ ಖಾತೆಗಳ ಮೂಲಕ ಅಕ್ರಮ ಹಣ ವರ್ಗಾವಣೆ
ಅಕ್ರಮವಾಗಿ ಪಡೆದ ಹಣವನ್ನು ನಗದು ರೂಪದಲ್ಲಿ ಹಾಗೂ ಬೀದರ್ ಜಿಲ್ಲೆಯ ಭಾಲ್ಕಿಯಲ್ಲಿರುವ ಓಂ ಲಕ್ಷ್ಮೀ ಸೌಹಾರ್ದ ಸಹಕಾರಿ ಸಂಘ ನಿಯಮಿತ ಸೇರಿದಂತೆ ವಿವಿಧ ಮೂರನೇ ವ್ಯಕ್ತಿಗಳ ಬ್ಯಾಂಕ್ ಖಾತೆಗಳ ಮೂಲಕ ಸಂಗ್ರಹಿಸಲಾಗಿತ್ತು. ನಕಲಿ ಉಳಿತಾಯ ಖಾತೆಗಳಲ್ಲಿ ಹಣ ಇರಿಸಿ, ಬಳಿಕ ಬಸವರಾಜ್ ಕನ್ನಾಳೆಯ ಲೆಕ್ಕಪತ್ರ ನಿರ್ವಹಣೆ ಮಾಡುತ್ತಿದ್ದ ವ್ಯಕ್ತಿಯ ಖಾತೆ, ಅವರ ಸ್ವಂತ ಉದ್ಯಮ ಭಗವತಿ ಎಂಟರ್ಪ್ರೈಸಸ್ ಹಾಗೂ ಸ್ನೇಹಿತರ ಖಾತೆಗಳ ಮೂಲಕ ವರ್ಗಾವಣೆ ಮಾಡಲಾಗಿತ್ತು ಎಂದು ತನಿಖೆಯಲ್ಲಿ ಪತ್ತೆಯಾಗಿದೆ.
ಬಸವರಾಜ್ ಕನ್ನಾಳೆಯಿಂದ ಜ್ಞಾನೇಂದ್ರ ಕುಮಾರ್ ಗಂಗ್ವಾರ್ ಸುಮಾರು 1.52 ಕೋಟಿ ರೂ. ಅಕ್ರಮ ಹಣವನ್ನು ನಗದು ರೂಪದಲ್ಲಿ ಪಡೆದಿದ್ದರು. ಇದರಲ್ಲಿ 52.30 ಲಕ್ಷ ರೂ. ಮೌಲ್ಯದ ಚಿನ್ನ ಮತ್ತು ವಜ್ರದ ಆಭರಣಗಳನ್ನು ತಮ್ಮ ನಿಶ್ಚಿತಾರ್ಥದ ಸಂಗಾತಿಯ ಹೆಸರಿನಲ್ಲಿ ಖರೀದಿಸಿದ್ದರು. ವಿಮಾನ ಪ್ರಯಾಣಕ್ಕಾಗಿ 13.31 ಲಕ್ಷ ರೂ.ಗಳನ್ನು ಮೂರನೇ ವ್ಯಕ್ತಿಗಳ ಬ್ಯಾಂಕ್ ಖಾತೆಗಳ ಮೂಲಕ ಪಾವತಿಸಲಾಗಿತ್ತು ಎಂದು ಇಡಿ ತಿಳಿಸಿದೆ.
ಬಸವರಾಜ್ ಕನ್ನಾಳೆ ಕೂಡ ವಿವಿಧ ಬ್ಯಾಂಕ್ ಖಾತೆಗಳಲ್ಲಿ ಸಣ್ಣ ಮೊತ್ತಗಳ ನಗದು ಠೇವಣಿ ಇರಿಸಿ, ಅವುಗಳನ್ನು ವ್ಯಾಪಾರದ ಆದಾಯವೆಂದು ಬಿಂಬಿಸಿದ್ದರು. ಸಾಲದ ರೂಪದಲ್ಲಿ ಹಣ ವರ್ಗಾವಣೆ ಮಾಡಿ, ತಮ್ಮ ಹೆಸರಿನಲ್ಲಿ ಹಾಗೂ ಸಂಬಂಧಿಕರ ಹೆಸರಿನಲ್ಲಿ ಸ್ಥಿರಾಸ್ತಿಗಳನ್ನು ಖರೀದಿಸುವ ಮೂಲಕ ಅಕ್ರಮ ಹಣವನ್ನು ಮರೆಮಾಚಿದ್ದರು ಎಂದು ಆರೋಪಿಸಲಾಗಿದೆ.
3.99 ಕೋಟಿ ರೂ. ನಗದು ಸಂಗ್ರಹಿಸಿದ್ದ ಆರೋಪ
ಶಿವಶಂಕರಪ್ಪ ಸಾಹುಕಾರ್ ಅವರು 2025ರ ಆಗಸ್ಟ್ನಿಂದ ಡಿಸೆಂಬರ್ವರೆಗೆ 3.99 ಕೋಟಿ ರೂ. ನಗದನ್ನು ಲೆಕ್ಕಪತ್ರಗಳ ಹೊರಗೆ ರಿಯಲ್ ಎಸ್ಟೇಟ್ ಉದ್ಯಮಿಯೊಬ್ಬರ ಬಳಿ ಇರಿಸಿದ್ದರು. ಇದಕ್ಕೂ ಹಿಂದೆ 8ರಿಂದ 10 ಕೋಟಿ ರೂ.ವರೆಗೆ ಇದೇ ರೀತಿಯಲ್ಲಿ ಹಣ ಸಂಗ್ರಹಿಸಿದ್ದರು ಎಂದು ಇಡಿ ತನಿಖೆಯಲ್ಲಿ ತಿಳಿದುಬಂದಿದೆ. ಈ ಮೊತ್ತವು ಅವರ ತಿಳಿದಿರುವ ಆದಾಯದ ಮೂಲಗಳಿಗೆ ಹೋಲಿಸಿದರೆ ಅಸಮರ್ಪಕವಾಗಿದೆ ಎಂದು ಆರೋಪಿಸಲಾಗಿದೆ.
ಅವರು ಗೀತಾ ಶಿವಮೂರ್ತಿ ಮತ್ತು ಅವರ ಪುತ್ರಿಗೆ ಹಣ ವರ್ಗಾವಣೆ ಮಾಡಿದ್ದರು. ಶಹಾಪುರದ ಮದ್ರಕಿ ಗ್ರಾಮದಲ್ಲಿರುವ ತಮ್ಮ ಜಮೀನಿನಲ್ಲಿ ಶಾಲೆ, ಸಮಾವೇಶ ಭವನ ಮತ್ತು ಹೋಟೆಲ್ ನಿರ್ಮಿಸಲು ಅಕ್ರಮ ಹಣ ಬಳಸುವ ಉದ್ದೇಶ ಹೊಂದಿದ್ದರು. ಇದಕ್ಕಾಗಿ ಮಧ್ಯವರ್ತಿಯೊಬ್ಬರನ್ನು ಬಳಸಿಕೊಳ್ಳಲು ಯೋಜಿಸಿದ್ದರು ಎಂದು ತನಿಖೆಯಲ್ಲಿ ಬಹಿರಂಗವಾಗಿದೆ.
ಇದೇ ವೇಳೆ ಗೀತಾ ಶಿವಮೂರ್ತಿ ಅವರು ತಮ್ಮ ಹೆಸರಿನಲ್ಲಿ ಹಾಗೂ ಪುತ್ರಿಯ ಹೆಸರಿನಲ್ಲಿ ಒಂದು ಕೋಟಿ ರೂ.ಗಳನ್ನು ಭದ್ರತೆಯಿಲ್ಲದ ಸಾಲದ ರೂಪದಲ್ಲಿ ಪಡೆದಿದ್ದರು. ಯಾವುದೇ ಒಪ್ಪಂದ, ಭದ್ರತೆ ಅಥವಾ ಮರುಪಾವತಿಯ ವ್ಯವಸ್ಥೆಯಿಲ್ಲದೆ, ವ್ಯವಸ್ಥಿತ ನಗದು ಠೇವಣಿಗಳು ಹಾಗೂ ಕೆಪಿಎಸ್ಸಿಯ ಮತ್ತೊಬ್ಬ ಸದಸ್ಯರ ಕುಟುಂಬದವರ ಬ್ಯಾಂಕ್ ಖಾತೆಗಳ ಮೂಲಕ ಈ ಹಣ ವರ್ಗಾವಣೆಯಾಗಿತ್ತು ಎಂದು ಇಡಿ ಆರೋಪಿಸಿದೆ.
ನಾಲ್ವರು ಆರೋಪಿಗಳ ಹಣದ ಪ್ರಮಾಣ
ಇಡಿ ಸಲ್ಲಿಸಿರುವ ದೋಷಾರೋಪ ಪಟ್ಟಿಯ ಪ್ರಕಾರ, ಆರೋಪಿಗಳು ಅಕ್ರಮ ಹಣದಿಂದ ಆಸ್ತಿ ಸಂಪಾದನೆ, ಸ್ವಾಧೀನ, ಬಳಕೆ ಮತ್ತು ಹಣದ ಮೂಲವನ್ನು ಮರೆಮಾಚಿ ಅದನ್ನು ಕಾನೂನುಬದ್ಧ ಆದಾಯವೆಂದು ಬಿಂಬಿಸಿರುವ ಆರೋಪ ಎದುರಿಸುತ್ತಿದ್ದಾರೆ.
ಶಿವಶಂಕರಪ್ಪ ಸಾಹುಕಾರ್: 4.17 ಕೋಟಿ ರೂ., ಬಿ.ವಿ. ಗೀತಾ ಶಿವಮೂರ್ತಿ: 1.48 ಕೋಟಿ ರೂ., ಜ್ಞಾನೇಂದ್ರ ಕುಮಾರ್ ಗಂಗ್ವಾರ್: ಸುಮಾರು 1.52 ಕೋಟಿ ರೂ., ಬಸವರಾಜ್ ಕನ್ನಾಳೆ: ಸುಮಾರು 1.52 ಕೋಟಿ ರೂ.
37 ಸ್ಥಳಗಳಲ್ಲಿ ಶೋಧ, ನಾಲ್ವರ ಬಂಧನ
ಈ ಹಿಂದೆ ಇಡಿ ಪಿಎಂಎಲ್ಎ ಕಾಯ್ದೆಯ ಕಲಂ 17ರ ಅಡಿಯಲ್ಲಿ ಕೆಪಿಎಸ್ಸಿ ಕಚೇರಿ ಸೇರಿದಂತೆ ಒಟ್ಟು 37 ಸ್ಥಳಗಳಲ್ಲಿ ಶೋಧ ನಡೆಸಿತ್ತು. ಬಸವರಾಜ್ ಕನ್ನಾಳೆಯನ್ನು ಸೆಪ್ಟೆಂಬರ್ 17ರಂದು, ಜ್ಞಾನೇಂದ್ರ ಕುಮಾರ್ ಗಂಗ್ವಾರ್ ಅವರನ್ನು ಸೆಪ್ಟೆಂಬರ್ 18ರಂದು ಹಾಗೂ ಶಿವಶಂಕರಪ್ಪ ಸಾಹುಕಾರ್ ಮತ್ತು ಗೀತಾ ಶಿವಮೂರ್ತಿ ಅವರನ್ನು ಅಕ್ಟೋಬರ್ 6ರಂದು ಬಂಧಿಸಲಾಗಿತ್ತು.
ಶಿವಶಂಕರಪ್ಪ ಸಾಹುಕಾರ್, ಜ್ಞಾನೇಂದ್ರ ಕುಮಾರ್ ಗಂಗ್ವಾರ್ ಮತ್ತು ಬಸವರಾಜ್ ಕನ್ನಾಳೆ ಸದ್ಯ ನ್ಯಾಯಾಂಗ ಬಂಧನದಲ್ಲಿದ್ದಾರೆ. ಆರೋಪಿಗಳಿಗೆ ಸೇರಿದ 1.22 ಕೋಟಿ ರೂ. ಮೌಲ್ಯದ ಆಸ್ತಿಗಳನ್ನು ನವೆಂಬರ್ 13ರಂದು ಹೊರಡಿಸಲಾದ ತಾತ್ಕಾಲಿಕ ಜಪ್ತಿ ಆದೇಶ ಸಂಖ್ಯೆ 43/2026ರ ಮೂಲಕ ಜಪ್ತಿ ಮಾಡಲಾಗಿದೆ.
1:3 ಅರ್ಹತಾ ಪಟ್ಟಿಯ ದುರುಪಯೋಗದಲ್ಲಿ ಕೆಪಿಎಸ್ಸಿಯ ಇತರ ಅಧಿಕಾರಿಗಳು ಹಾಗೂ ಮಧ್ಯವರ್ತಿಗಳ ಪಾತ್ರದ ಕುರಿತು ಇಡಿ ತನಿಖೆ ಮುಂದುವರಿಸಿದೆ.
---------------
ಹಿಂದೂಸ್ತಾನ್ ಸಮಾಚಾರ್ / Rakesh.M.B.