ನವದೆಹಲಿ, 13 ಅಕ್ಟೋಬರ್ (ಹಿ.ಸ.):

ಭಾರತೀಯ ವಾಯುಪಡೆಯ ಮುಖ್ಯಸ್ಥ ವಾಯುಪಡೆಯ ಮುಖ್ಯ ಮಾರ್ಷಲ್ ಎ.ಪಿ. ಸಿಂಗ್ ಅವರು ಜೋಧಪುರ ವಾಯುಪಡೆ ನೆಲೆಯಲ್ಲಿ ಸ್ವದೇಶಿ ತೇಜಸ್ ಯುದ್ಧವಿಮಾನದಲ್ಲಿ ತಮ್ಮ ಸೇವಾವಧಿಯ ಕೊನೆಯ ಯುದ್ಧವಿಮಾನ ಹಾರಾಟ ನಡೆಸಿದರು. ಈ ತಿಂಗಳ ಅಂತ್ಯದಲ್ಲಿ ನಿವೃತ್ತರಾಗಲಿರುವ ಅವರು, ‘ತರಂಗ ಶಕ್ತಿ’ ಸಮರಾಭ್ಯಾಸದ ಸಂದರ್ಭದಲ್ಲಿ ಈ ಹಾರಾಟ ನಡೆಸುವ ಮೂಲಕ ತಮ್ಮ ಹಾರಾಟದ ವೃತ್ತಿಜೀವನದ ಸ್ಮರಣೀಯ ಅಧ್ಯಾಯವೊಂದಕ್ಕೆ ತೆರೆ ಎಳೆದರು.

‘ಸಹಭಾಗಿತ್ವದಲ್ಲಿ ಶಕ್ತಿ’ ಎಂಬ ಆಶಯದೊಂದಿಗೆ ನಡೆದ ಈ ಹಾರಾಟದಲ್ಲಿ ಸ್ನೇಹಪರ ವಿದೇಶಿ ರಾಷ್ಟ್ರಗಳ ಯುದ್ಧವಿಮಾನಗಳು ಹಾಗೂ ಸೂರ್ಯಕಿರಣ ವೈಮಾನಿಕ ಪ್ರದರ್ಶನ ತಂಡವೂ ಭಾಗವಹಿಸಿತ್ತು. ಸದಾ ಮುಂಚೂಣಿಯಲ್ಲಿ ನಿಂತು ನಾಯಕತ್ವ ವಹಿಸುವುದನ್ನು ನಂಬಿರುವ ಯುದ್ಧವಿಮಾನ ಚಾಲಕನ ಬದ್ಧತೆಯನ್ನು ಈ ಹಾರಾಟ ಪ್ರತಿಬಿಂಬಿಸಿದೆ. ತಮ್ಮ ವೃತ್ತಿಜೀವನದ ಕೊನೆಯ ಯುದ್ಧವಿಮಾನ ಹಾರಾಟಕ್ಕೆ ಭಾರತದಲ್ಲಿ ನಿರ್ಮಿಸಲಾದ ತೇಜಸ್ ಅನ್ನು ಆಯ್ಕೆ ಮಾಡಿಕೊಂಡಿರುವುದು ಸ್ವದೇಶಿ ಯುದ್ಧವಿಮಾನದ ಮೇಲಿನ ಅವರ ವಿಶ್ವಾಸವನ್ನು ತೋರಿಸುತ್ತದೆ.

ವಾಯುಪಡೆಯ ಸಂಸ್ಥಾಪನಾ ದಿನದ ಸಂದರ್ಭದಲ್ಲಿ ನಡೆದ ವಾರ್ಷಿಕ ಸುದ್ದಿಗೋಷ್ಠಿಯಲ್ಲಿ, ತಮ್ಮ ವೃತ್ತಿಜೀವನದ ಅವಧಿಯಲ್ಲಿ ವಿವಿಧ ಸ್ಥಿರ ರೆಕ್ಕೆ ಮತ್ತು ತಿರುಗುವ ರೆಕ್ಕೆಗಳ ವಿಮಾನಗಳಲ್ಲಿ 5,000 ಗಂಟೆಗಳಿಗೂ ಅಧಿಕ ಹಾರಾಟದ ಅನುಭವ ಹೊಂದಿದ್ದರೂ, ಸೇವಾವಧಿ ಮುಗಿಯುವ ಮೊದಲು ತೇಜಸ್ ಮಾರ್ಕ್-2 ವಿಮಾನವನ್ನು ಹಾರಿಸಲಾಗದ ಕೊರಗು ಉಳಿಯಲಿದೆಯೇ ಎಂದು ಅವರನ್ನು ಪ್ರಶ್ನಿಸಲಾಗಿತ್ತು.

ಇದಕ್ಕೆ ಉತ್ತರಿಸಿದ್ದ ಎ.ಪಿ. ಸಿಂಗ್, ಜೀವನದಲ್ಲಿ ಎಲ್ಲ ಗುರಿಗಳನ್ನೂ ಸಾಧಿಸಲು ಸಾಧ್ಯವಾಗುವುದಿಲ್ಲ. ಸಾಧಿಸಿದ ಗುರಿಗಳನ್ನು ಸ್ವಾಗತಿಸಬೇಕು ಮತ್ತು ಅಪೂರ್ಣವಾಗಿ ಉಳಿದಿರುವ ಗುರಿಗಳನ್ನು ಮುಂದಿನವರಿಗೆ ಬಿಟ್ಟು ಕೊಡಬೇಕು ಎಂದು ಹೇಳಿದ್ದರು.

ಅಕ್ಟೋಬರ್ 31ರಂದು ನಿವೃತ್ತರಾಗಲಿರುವ ಎ.ಪಿ. ಸಿಂಗ್ ಅವರ ಬಳಿಕ ಹಾಲಿ ವಾಯುಪಡೆಯ ಉಪಮುಖ್ಯಸ್ಥ ವಾಯು ಮಾರ್ಷಲ್ ಆಶುತೋಷ್ ದೀಕ್ಷಿತ್ ಅವರು ವಾಯುಪಡೆಯ ಮುಖ್ಯಸ್ಥರಾಗಿ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ.

‘ತರಂಗ ಶಕ್ತಿ’ ಸಮರಾಭ್ಯಾಸದಲ್ಲಿ ಆಸ್ಟ್ರೇಲಿಯಾ, ಬಾಂಗ್ಲಾದೇಶ, ಫ್ರಾನ್ಸ್, ಜರ್ಮನಿ, ಗ್ರೀಸ್, ಶ್ರೀಲಂಕಾ, ಸಂಯುಕ್ತ ಅರಬ್ ಸಂಸ್ಥಾನ ಮತ್ತು ಅಮೆರಿಕ ಸೇರಿದಂತೆ ಎಂಟು ಸ್ನೇಹಪರ ರಾಷ್ಟ್ರಗಳು ತಮ್ಮ ವೈಮಾನಿಕ ಸಂಪನ್ಮೂಲಗಳನ್ನು ಕಳುಹಿಸಿವೆ. ಇತರ 32 ರಾಷ್ಟ್ರಗಳು ವೀಕ್ಷಕರಾಗಿ ಭಾಗವಹಿಸಿವೆ.

ವಿದೇಶಿ ಯುದ್ಧವಿಮಾನಗಳು ಮತ್ತು ಸೂರ್ಯಕಿರಣ ವೈಮಾನಿಕ ಪ್ರದರ್ಶನ ತಂಡದೊಂದಿಗೆ ಹಾರಾಟ ನಡೆಸುವ ಮೂಲಕ ವಾಯುಪಡೆ ಮುಖ್ಯಸ್ಥರು ತಮ್ಮ ಹಾರಾಟದ ವೃತ್ತಿಜೀವನದ ಸ್ಮರಣೀಯ ಅಧ್ಯಾಯವನ್ನು ಪೂರ್ಣಗೊಳಿಸಿದರು.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.