ನವದೆಹಲಿ, 05 ಜನವರಿ (ಹಿ.ಸ.) :

ಆ್ಯಂಕರ್ : ಸೋಮನಾಥ ದೇವಾಲಯವು ಸಾವಿರ ವರ್ಷಗಳ ಇತಿಹಾಸವನ್ನು ಪೂರೈಸಿದ್ದು, ಇದು ಭಾರತದ ಅಜೇಯ ಆಧ್ಯಾತ್ಮಿಕ ಶಕ್ತಿಯ ಜೀವಂತ ಸಂಕೇತವಾಗಿದೆ ಎಂದು ಭಾರತೀಯ ಜನತಾ ಪಕ್ಷ ತಿಳಿಸಿದೆ.

ಸಾವಿರ ವರ್ಷಗಳ ಹಿಂದೆ ಘಜ್ನವಿಯ ಮಹಮೂದ್ ದಾಳಿಯಿಂದ ಧ್ವಂಸಗೊಂಡಿದ್ದ ಸೋಮನಾಥ ದೇವಾಲಯ ಇಂದು ಪುನಃ ತನ್ನ ವೈಭವವನ್ನು ಪಡೆದು, ಕೋಟ್ಯಂತರ ಭಕ್ತರ ನಂಬಿಕೆಯ ಕೇಂದ್ರವಾಗಿ ಉಳಿದಿದೆ ಎಂದು ಪಕ್ಷವು ಹೇಳಿದೆ.

ಸೋಮವಾರ ಬಿಜೆಪಿ ಕೇಂದ್ರ ಕಚೇರಿಯಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಪಕ್ಷದ ರಾಷ್ಟ್ರೀಯ ವಕ್ತಾರ ಸುಧಾಂಶು ತ್ರಿವೇದಿ ಮಾತನಾಡಿ, ಭಾರತದ ಧಾರ್ಮಿಕ ಹಾಗೂ ಆಧ್ಯಾತ್ಮಿಕ ಶಕ್ತಿಯನ್ನು ಅನಾಗರಿಕ ದಾಳಿಗಳ ಮೂಲಕ ನಾಶಮಾಡಿ ಕತ್ತಲೆಗೆ ತಳ್ಳುವ ಪ್ರಯತ್ನಗಳು ನಡೆದಾಗಲೆಲ್ಲಾ, ಭಾರತ ಮತ್ತಷ್ಟು ಶಕ್ತಿಯುತವಾಗಿ ಹೊರಹೊಮ್ಮಿ ಜಗತ್ತಿಗೆ ಹೊಸ ಬೆಳಕನ್ನು ನೀಡಿದೆ ಎಂಬುದನ್ನು ಸೋಮನಾಥ ದೇವಾಲಯದ ಇತಿಹಾಸ ನೆನಪಿಸುತ್ತದೆ ಎಂದರು.

ಪ್ರತಿಯೊಂದು ದೇಶದ ಇತಿಹಾಸದಲ್ಲೂ ಕೆಲ ಮಹತ್ವದ ದಿನಾಂಕಗಳು ಮತ್ತು ಘಟನೆಗಳು ಇರುತ್ತವೆ. ಅವು ನೋವಿನ ಸ್ಮೃತಿಗಳನ್ನು ಉಂಟುಮಾಡಿದರೂ, ಭವಿಷ್ಯದಲ್ಲಿ ಅಂಥ ದುರಂತಗಳು ಮರುಕಳಿಸದಂತೆ ಎಚ್ಚರಿಕೆ ನೀಡುತ್ತವೆ ಎಂದು ತ್ರಿವೇದಿ ಹೇಳಿದರು. ಸೋಮನಾಥ ಶಿವಲಿಂಗದ ಕೇವಲ ದರ್ಶನವೇ ಪಾಪನಾಶಕವಾಗಿದ್ದು, ಪುಣ್ಯವನ್ನು ನೀಡುವ ಹಾಗೂ ಮುಕ್ತಿಗೆ ದಾರಿ ತೋರಿಸುವ ಶಕ್ತಿ ಹೊಂದಿದೆ ಎಂದು ಅವರು ಹೇಳಿದರು.

1951ರ ಮೇ 11ರಂದು ಸೋಮನಾಥ ದೇವಾಲಯದ ಪುನಃಸ್ಥಾಪನೆಯ ಸಂದರ್ಭದಲ್ಲಿ ಭಾರತದ ಮೊದಲ ರಾಷ್ಟ್ರಪತಿ ಡಾ. ರಾಜೇಂದ್ರ ಪ್ರಸಾದ್ ಅವರು, ಸೋಮನಾಥದ ಪುನರ್ ಪ್ರತಿಷ್ಠೆ ಕೇವಲ ವಿಗ್ರಹ ಮತ್ತು ದೇವಾಲಯದ ನಿರ್ಮಾಣದಿಂದ ಮಾತ್ರ ಪೂರ್ಣಗೊಳ್ಳುವುದಿಲ್ಲ; ಬದಲಾಗಿ ಭಾರತವು ಮತ್ತೊಮ್ಮೆ ಸಮೃದ್ಧಿಯ ಶಿಖರ ತಲುಪುವ ದಿನವೇ ಅದರ ನಿಜವಾದ ಪೂರ್ಣತೆಯ ದಿನವಾಗಿರುತ್ತದೆ ಎಂದು ಹೇಳಿದ್ದರು ಎಂದು ತ್ರಿವೇದಿ ಸ್ಮರಿಸಿದರು.

ಜವಾಹರಲಾಲ್ ನೆಹರು ಅವರ ತೀವ್ರ ವಿರೋಧದ ನಡುವೆಯೂ, ಡಾ. ರಾಜೇಂದ್ರ ಪ್ರಸಾದ್ ಅವರ ಸಮ್ಮುಖದಲ್ಲಿ ಸೋಮನಾಥ ದೇವಾಲಯದ ಪುನಃಸ್ಥಾಪನೆ ನಡೆದಿದ್ದು, ಸಾವಿರ ವರ್ಷಗಳ ನಂತರ ಆ ಕನಸು ನನಸಾಯಿತು ಎಂದು ಅವರು ಹೇಳಿದರು. ಇಂದು ಪ್ರಧಾನಿ ನರೇಂದ್ರ ಮೋದಿ ಅವರ ನೇತೃತ್ವದಲ್ಲಿ ಭಾರತವು ವೇಗವಾಗಿ ಸಮೃದ್ಧಿಯತ್ತ ಸಾಗುತ್ತಿದ್ದು, ಸೋಮನಾಥ ನಿರ್ಣಯದ ಆ ಕನಸು ಈಗ ನಿಜವಾಗುವ ಹಂತದಲ್ಲಿದೆ ಎಂದು ಸುಧಾಂಶು ತ್ರಿವೇದಿ ಅಭಿಪ್ರಾಯಪಟ್ಟರು.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa