ಜಗದಲ್ಪುರ, 05 ಜನವರಿ (ಹಿ.ಸ.) :
ಆ್ಯಂಕರ್ : ಛತ್ತೀಸ್ಗಢದ ಬಸ್ತಾರ್ನಿಂದ ತೆಲಂಗಾಣದವರೆಗೆ ದಶಕಗಳ ಕಾಲ ವ್ಯಾಪಿಸಿದ್ದ ಮಾವೋವಾದಿ (ನಕ್ಸಲೈಟ್) ಜಾಲವು ಇದೀಗ ಕೊನೆಯ ಹಂತಕ್ಕೆ ತಲುಪಿದೆ. ಭದ್ರತಾ ಪಡೆಗಳ ನಿಖರ ಕಾರ್ಯತಂತ್ರ, ನಿರಂತರ ಕಾರ್ಯಾಚರಣೆಗಳು ಮತ್ತು ಮಾವೋವಾದಿ ನಾಯಕತ್ವದ ಒಳಭಾಗದ ವಿಭಜನೆಯ ಪರಿಣಾಮವಾಗಿ ಕೆಂಪು ಭಯೋತ್ಪಾದನೆಯ ಬೆನ್ನುಮೂಳೆ ಮುರಿದಿದೆ ಎಂದು ಭದ್ರತಾ ಮೂಲಗಳು ತಿಳಿಸಿವೆ.
ಶನಿವಾರ ತೆಲಂಗಾಣದಲ್ಲಿ ಪೀಪಲ್ಸ್ ಲಿಬರೇಶನ್ ಗೆರಿಲ್ಲಾ ಆರ್ಮಿ (ಪಿಎಲ್ಜಿಎ) ಬೆಟಾಲಿಯನ್ ನಂ.1 ಮುಖ್ಯಸ್ಥ ಬರ್ಸೆ ದೇವಾ ಅಲಿಯಾಸ್ ಸುಕ್ಕಾ ಶರಣಾದ ನಂತರ, ಹಾಗೂ ಸುಕ್ಮಾ ಜಿಲ್ಲೆಯಲ್ಲಿ ಕೊಂಟಾ ಏರಿಯಾ ಸಮಿತಿ ಮುಖ್ಯಸ್ಥ ಹಂಗಾ ಮಡ್ಕಮ್ ಅಲಿಯಾಸ್ ಪಂಚುಗ ಮತ್ತು ಆಯಿತಿ ಮುಚಾಕಿ ಅಲಿಯಾಸ್ ಜೋಗಿ ಎನ್ಕೌಂಟರ್ನಲ್ಲಿ ಹತರಾದ ಹಿನ್ನೆಲೆಯಲ್ಲಿ, ಬಸ್ತಾರ್ ಪ್ರದೇಶದ ನಕ್ಸಲೈಟ್ ಸಂಘಟನೆ ನಾಯಕತ್ವವಿಲ್ಲದಂತಾಗಿದೆ.
ಪ್ರಸ್ತುತ ಬಸ್ತಾರ್ನಲ್ಲಿ ಪಾಪ ರಾವ್ ಎಂಬ ಒಬ್ಬನೇ ಉನ್ನತ ಮಟ್ಟದ ನಕ್ಸಲೈಟ್ ಕಮಾಂಡರ್ ಉಳಿದಿದ್ದಾನೆ. ನೆಲಮಟ್ಟದಲ್ಲಿ ಕೇವಲ ಕೆಲವೇ ಮಾವೋವಾದಿಗಳು ಮಾತ್ರ ಸಕ್ರಿಯರಾಗಿದ್ದು, ಸಂಘಟನೆಯ ಕಾರ್ಯಾಚರಣಾ ಸಾಮರ್ಥ್ಯ ಗಂಭೀರವಾಗಿ ಕುಸಿದಿದೆ. ಈ ಹಿನ್ನೆಲೆ ಬಸ್ತಾರ್ ಶೀಘ್ರದಲ್ಲೇ ‘ನಕ್ಸಲ್ ಮುಕ್ತ’ ಪ್ರದೇಶವೆಂದು ಘೋಷಿಸಲ್ಪಡುವ ವಿಶ್ವಾಸವನ್ನು ಭದ್ರತಾ ಸಂಸ್ಥೆಗಳು ವ್ಯಕ್ತಪಡಿಸಿವೆ.
ಬಸ್ತಾರ್ ರೇಂಜ್ ಇನ್ಸ್ಪೆಕ್ಟರ್ ಜನರಲ್ ಆಫ್ ಪೊಲೀಸ್ ಸುಂದರರಾಜ್ ಪಿ. ಮಾತನಾಡಿ, “ಮಾವೋವಾದಿಗಳ ಸಂಖ್ಯೆಯು ನಿರಂತರವಾಗಿ ಇಳಿಮುಖವಾಗುತ್ತಿದೆ. ನಾಯಕತ್ವ ಸಂಪೂರ್ಣವಾಗಿ ವಿಭಜನೆಯಾಗಿದ್ದು, ಪಾಪ ರಾವ್ ಹೊರತುಪಡಿಸಿ ಇನ್ನು ಯಾರೂ ಉನ್ನತ ಮಟ್ಟದಲ್ಲಿ ಉಳಿದಿಲ್ಲ. ಉಳಿದಿರುವವರು ಸಕಾಲದಲ್ಲಿ ಶರಣಾಗದಿದ್ದರೆ, ಮುಂದೆ ಅವರಿಗೆ ಆ ಅವಕಾಶವೂ ಇರುವುದಿಲ್ಲ” ಎಂದು ಎಚ್ಚರಿಕೆ ನೀಡಿದರು.
ಬಸ್ತಾರ್ನಲ್ಲಿ ಜನಿಸಿದ ನಕ್ಸಲೈಟ್ ಕಮಾಂಡರ್ ಬರ್ಸೆ ದೇವಾ ಹೈದರಾಬಾದ್ ಡಿಜಿಪಿಗೆ ಶರಣಾದ ಘಟನೆ ವ್ಯಾಪಕ ಚರ್ಚೆಗೆ ಕಾರಣವಾಗಿದೆ. ಇದರಿಂದ ಬಸ್ತಾರ್ ಮತ್ತು ಛತ್ತೀಸ್ಗಢದಾದ್ಯಂತ ಪ್ರಮುಖ ನಕ್ಸಲೈಟ್ ಕಾರ್ಯಕರ್ತರು ಎನ್ಕೌಂಟರ್ ಭೀತಿಯಿಂದ ಶರಣಾಗುವುದನ್ನು ತಪ್ಪಿಸುತ್ತಿದ್ದಾರೆ ಎಂಬ ಊಹಾಪೋಹಗಳು ಜೋರಾಗಿವೆ. ಕಳೆದ ವರ್ಷ ಸಿಸಿ ಸದಸ್ಯ ರೂಪೇಶ್ ಜಗದಲ್ಪುರದಲ್ಲಿ ಶರಣಾದರೆ, ಛತ್ತೀಸ್ಗಢದ ಹೊರಗಡೆ ಇನ್ನೂ ಕೆಲವು ಪ್ರಮುಖ ನಕ್ಸಲೈಟ್ ಮುಖಂಡರು ಶರಣಾಗಿದ್ದಾರೆ ಎಂಬುದು ಗಮನಾರ್ಹ.
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
