ಗದಗ, 17 ಸೆಪ್ಟೆಂಬರ್ (ಹಿ.ಸ.) :

ಆ್ಯಂಕರ್ : ಗದಗನಲ್ಲಿ ಸಂಸದ ಹಾಗೂ ಮಾಜಿ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ಅವರು ರಾಜ್ಯ ಸರ್ಕಾರದ ನೀತಿ-ನಿಲುವುಗಳ ವಿರುದ್ಧ ತೀವ್ರವಾಗಿ ವಾಗ್ದಾಳಿ ನಡೆಸಿದರು.

ವೀರೇಶ್ವರ ಲಿಂಗಾಯತ ಸಮಾಜವನ್ನು ಉದ್ದೇಶಪೂರ್ವಕವಾಗಿ ವಿಭಜಿಸಲು ಸರ್ಕಾರ ಪ್ರಯತ್ನಿಸುತ್ತಿದೆ ಎಂದು ಆರೋಪಿಸಿದ ಅವರು, “ಸಮಾಜವನ್ನು ಒಡೆಯುವ ಬದಲು ಚೂರುಚೂರು ಮಾಡುತ್ತಿರುವುದು ರಾಜ್ಯ ಹೈಕಮಾಂಡ್ ಒತ್ತಾಯದ ರಾಜಕೀಯ ನಿರ್ಧಾರ” ಎಂದು ಸಿಡಿದರು.

ಬೊಮ್ಮಾಯಿ ಅವರ ಪ್ರಕಾರ, ಜಾತಿ ಜನಗಣತಿ ಕಾಲಂನಲ್ಲಿ “ಕ್ರಿಶ್ಚಿಯನ್” ಪದವನ್ನು ಲಿಂಗಾಯತರು, ಬ್ರಾಹ್ಮಣರು, ಒಕ್ಕಲಿಗರು, ಎಸ್‌ಸಿ-ಎಸ್‌ಟಿ ಎಲ್ಲರ ಬಳಿಯೂ ಸೇರಿಸಲಾಗಿದೆ. “ಯಾವುದೇ ಸಮೀಕ್ಷೆಯಲ್ಲಿ ಇದಕ್ಕೆ ಆಧಾರವಿಲ್ಲ. ಕಾಂತರಾಜು ಸಮಿತಿ ಸಂವಿಧಾನಾತ್ಮಕ ಶಕ್ತಿ ಹೊಂದಿದೆಯಾ? ಸಿದ್ದರಾಮಯ್ಯ ಅವರು ಉಪಜಾತಿಗಳನ್ನು ಕೃತಕವಾಗಿ ಸೃಷ್ಟಿಸಿ ಸಮಾಜದಲ್ಲಿ ಗೊಂದಲ ಉಂಟು ಮಾಡಿದ್ದಾರೆ. ಇದೊಂದು ವಿನಾಶಕಾಲೇ ವಿಪರೀತ ಬುದ್ಧಿಯಂತಾಗಿದೆ” ಎಂದು ಬೊಮ್ಮಾಯಿ ಹೇಳಿದರು.

ಸಮಾಜವನ್ನು ಒಡೆಯುವ ಯಾವುದೇ ಪ್ರಯತ್ನಕ್ಕೆ ವಿರೋಧ ವ್ಯಕ್ತಪಡಿಸಿ, ವೀರೇಶ್ವರ ಲಿಂಗಾಯತ ಮಹಾಸಭಾ ಸೇರಿದಂತೆ ಸಮಾಜದ ಸಂಘಟನೆಗಳೊಂದಿಗೆ ಚರ್ಚೆ ಮುಂದುವರಿಯುತ್ತಿದೆ ಎಂದು ಸ್ಪಷ್ಟಪಡಿಸಿದರು.

ಇದರೊಂದಿಗೆ, ಬೆಂಗಳೂರಿನ ಮೂಲಸೌಕರ್ಯದ ದುರವಸ್ಥೆಯ ವಿಚಾರವಾಗಿ ಮಾತನಾಡಿದರು, “ಬೆಂಗಳೂರಿನಲ್ಲಿ ರಸ್ತೆಗಳಲ್ಲಿ ಗುಂಡಿಗಳಿಲ್ಲ, ಗುಂಡಿಗಳಲ್ಲಿ ರಸ್ತೆ ಇದೆ ಎಂಬ ಸ್ಥಿತಿ ಉಂಟಾಗಿದೆ. ಐದು ಸಾವಿರ ಗುಂಡಿ ಮುಚ್ಚಲಾಗಿದೆ ಅಂದರೂ ಇನ್ನೂ ಐದು ಸಾವಿರಕ್ಕೂ ಹೆಚ್ಚು ಗುಂಡಿಗಳು ಹಾಗೇ ಇವೆ. ವಿದ್ಯಾರ್ಥಿಗಳು ದಿನನಿತ್ಯ ಶಾಲೆಗೆ ತೆರಳಲು ಮೂರು ತಾಸು ತೆಗೆದುಕೊಳ್ಳುತ್ತಿದ್ದಾರೆ, ಮೈ-ಕೈ ನೋವು ಅನುಭವಿಸುತ್ತಿದ್ದಾರೆ. ಉದ್ಯಮಿಗಳು ಹಾಗೂ ನಾಗರಿಕರು ಸುಸ್ತಾಗಿದ್ದಾರೆ. ಬ್ರ್ಯಾಂಡ್ ಬೆಂಗಳೂರು ಈಗ ಗುಂಡಿಗಳ ಬೆಂಗಳೂರು ಆಗಿದೆ” ಎಂದು ವ್ಯಂಗ್ಯವಾಡಿದರು.

ಸಿಎಂ ಸಿದ್ದರಾಮಯ್ಯ ತಕ್ಷಣ ಹಣ ಬಿಡುಗಡೆ ಮಾಡಿ ರಸ್ತೆ ಅಭಿವೃದ್ಧಿಗೆ ಆದ್ಯತೆ ನೀಡಬೇಕು ಎಂದು ಒತ್ತಾಯಿಸಿದ ಅವರು, “ಅತೀ ಹೆಚ್ಚು ತೆರಿಗೆ ಪಾವತಿಸುವ ಬೆಂಗಳೂರಿನ ಜನತೆಗೆ ಉತ್ತಮ ಮೂಲಸೌಕರ್ಯ ದೊರೆಯದಿದ್ದರೆ ಉದ್ಯಮಿಗಳೂ, ವಿದ್ಯಾರ್ಥಿಗಳೂ ನಗರವನ್ನು ಬಿಟ್ಟು ಹೋಗುವ ಪರಿಸ್ಥಿತಿ ಬರುವುದು” ಎಂದು ಎಚ್ಚರಿಸಿದರು.

ಈ ಮೂಲಕ ಬೊಮ್ಮಾಯಿ ಅವರು ರಾಜ್ಯ ಸರ್ಕಾರದ ಜಾತಿ ಜನಗಣತಿ ನಿರ್ವಹಣೆ ಹಾಗೂ ಮೂಲಸೌಕರ್ಯ ದುರವಸ್ಥೆ ಎರಡರ ಮೇಲೂ ತೀವ್ರ ಟೀಕಾಸ್ತ್ರ ಹಾರಿಸಿದ್ದಾರೆ.

ಹಿಂದೂಸ್ತಾನ್ ಸಮಾಚಾರ್ / lalita MP