ನೋಯ್ಡಾ, 20 ಏಪ್ರಿಲ್ (ಹಿ.ಸ.) :

ಆ್ಯಂಕರ್ : ನೋಯ್ಡಾದಲ್ಲಿ ಏಪ್ರಿಲ್ 13ರಂದು ನಡೆದ ಕಾರ್ಮಿಕ ಹಿಂಸಾಚಾರ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಇಬ್ಬರು ಆರೋಪಿಗಳನ್ನು ಭಾನುವಾರ ತಡರಾತ್ರಿ ಬಂಧಿಸಿದ್ದಾರೆ. ಪ್ರಕರಣದ ಪ್ರಮುಖ ಸಂಚುಕೋರನಾಗಿ ಗುರುತಿಸಲ್ಪಟ್ಟಿರುವ ಆದಿತ್ಯ ಆನಂದ್ ಅವರ ವಿಚಾರಣೆಯ ಬಳಿಕ ಈ ಬಂಧನ ನಡೆದಿದೆ.

ಬಂಧಿತರನ್ನು ಗರ್ಹ್ವಾಲ್ನ ರುದ್ರಾಕ್ಷ್ ಗಾರ್ಡನ್ ಗ್ರಾಮದ ನಿವಾಸಿ ರಾಮ್ ಕುಮಾರ್ ಠಾಕೂರ್ ಅವರ ಪುತ್ರ ಹಿಮಾಂಶು ಠಾಕೂರ್ ಹಾಗೂ ಲಖನೌ ನಿವಾಸಿ ಡಾ. ಲಾಲ್ ಬಹದ್ದೂರ್ ವರ್ಮಾ ಅವರ ಪುತ್ರ ಸತ್ಯಂ ವರ್ಮಾ ಎಂದು ಗುರುತಿಸಲಾಗಿದೆ. ಇವರನ್ನು ನೋಯ್ಡಾದ ಫೇಸ್-2 ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಬಂಧಿಸಲಾಗಿದೆ.

ಪೊಲೀಸ್ ಆಯುಕ್ತೆ ಲಕ್ಷ್ಮೀ ಸಿಂಗ್ ಅವರ ಮಾಧ್ಯಮ ಉಸ್ತುವಾರಿ ವಿಜಯ್ ಕುಮಾರ್ ಗುಪ್ತಾ ಅವರ ಪ್ರಕಾರ, ಬಂಧಿತ ಇಬ್ಬರೂ ಬುಗುಲ್ ಮಜ್ದೂರ್ ಸ್ಕ್ವಾಡ್ನ ಸಕ್ರಿಯ ಸದಸ್ಯರಾಗಿದ್ದು, ಘಟನೆ ನಡೆದ ದಿನ ನೋಯ್ಡಾದಲ್ಲೇ ಇದ್ದರು. ಅಲ್ಲದೆ, ಪ್ರಕರಣದ ಮಾಸ್ಟರ್ ಮೈಂಡ್ ಎಂದು ಪರಿಗಣಿಸಲ್ಪಟ್ಟಿರುವ ಆದಿತ್ಯ ಆನಂದ್ ಅವರೊಂದಿಗೆ ನಿರಂತರ ಸಂಪರ್ಕದಲ್ಲಿದ್ದರು.

ಪೊಲೀಸರ ತನಿಖೆಯ ಪ್ರಕಾರ, ಹಿಮಾಂಶು ಠಾಕೂರ್ ಒಬ್ಬ ಯೂಟ್ಯೂಬರ್ ಆಗಿದ್ದು, ಕಾರ್ಮಿಕರ ಆರ್ಥಿಕ ಮತ್ತು ಸಾಮಾಜಿಕ ಸಮಸ್ಯೆಗಳ ಕುರಿತು ಎಂಎ ಪೂರ್ಣಗೊಳಿಸಿದ ನಂತರ ಪಿಎಚ್ಡಿ ಮಾಡಲು ಸಿದ್ಧತೆ ನಡೆಸುತ್ತಿದ್ದರು. ಈ ನಡುವೆ ಆಕೃತಿ ಎಂಬ ಯುವತಿಯ ಸಂಪರ್ಕಕ್ಕೆ ಬಂದು, ಬುಗುಲ್ ಮಜ್ದೂರ್ ಸಂಘಟನೆಯಲ್ಲಿ ಸೇರಿದ್ದಾನೆ ಎನ್ನಲಾಗಿದೆ. ಕಾರ್ಮಿಕ ಹಿಂಸಾಚಾರ ಪ್ರಕರಣದಲ್ಲಿ ಆಕೃತಿಯನ್ನು ಈಗಾಗಲೇ ಪೊಲೀಸರು ಬಂಧಿಸಿದ್ದಾರೆ.

ಅಧಿಕಾರಿಗಳ ಪ್ರಕಾರ, ಆಕೃತಿಯ ಮೂಲಕವೇ ಹಿಮಾಂಶು ಠಾಕೂರ್ ಆದಿತ್ಯ ಆನಂದ್ ಅವರ ಸಂಪರ್ಕಕ್ಕೆ ಬಂದಿದ್ದ. ಬಳಿಕ ಕಾರ್ಮಿಕ ಚಳವಳಿ, ಸಾರ್ವಜನಿಕ ಸಭೆಗಳು ಹಾಗೂ ಸಂಘಟನೆಯ ಚಟುವಟಿಕೆಗಳಲ್ಲಿ ಭಾಗವಹಿಸಲು ಆರಂಭಿಸಿದ್ದ. ಆತ ವಿಡಿಯೋ ಕರೆಗಳ ಮೂಲಕ ಕಾರ್ಮಿಕರನ್ನು ಪ್ರಚೋದಿಸುತ್ತಿದ್ದನೆಂಬ ಆರೋಪವೂ ಕೇಳಿಬಂದಿದೆ.

ಈ ಹಿಂದೆ ಆದಿತ್ಯ ಆನಂದ್ ಸೇರಿ ಮೂವರು ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದರು. ಇದೀಗ ಹಿಮಾಂಶು ಮತ್ತು ಸತ್ಯಂ ಬಂಧನವನ್ನು ಪ್ರಕರಣದ ತನಿಖೆಯಲ್ಲಿ ಮಹತ್ವದ ಬೆಳವಣಿಗೆ ಎಂದು ಪರಿಗಣಿಸಲಾಗಿದೆ.

ನೋಯ್ಡಾ ಪೊಲೀಸರು, ಎಸ್ಟಿಎಫ್ ಮತ್ತು ಗುಪ್ತಚರ ಸಂಸ್ಥೆಗಳು ಪ್ರಕರಣದ ಮೂಲವನ್ನು ಪತ್ತೆಹಚ್ಚಲು ನಿರಂತರವಾಗಿ ತನಿಖೆ ನಡೆಸುತ್ತಿವೆ. ಇದೇ ವೇಳೆ, ಲಖನೌದಲ್ಲಿರುವ ಬುಗುಲ್ ಮಜ್ದೂರ್ ಸಂಘಟನೆಯ ಕಚೇರಿಯ ಮೇಲೂ ಪೊಲೀಸರು ದಾಳಿ ನಡೆಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಇನ್ನೊಂದೆಡೆ, ಕಾರ್ಮಿಕ ಹಿಂಸಾಚಾರದ ಬಳಿಕ ಶಾಂತಿ ಭಂಗ ಆರೋಪದಲ್ಲಿ ಬಂಧಿಸಲ್ಪಟ್ಟಿದ್ದ ಸುಮಾರು 1000 ಕಾರ್ಮಿಕರನ್ನು ಜೈಲಿನಿಂದ ಬಿಡುಗಡೆ ಮಾಡಲಾಗಿದೆ. ಆದರೆ, ಬಿಡುಗಡೆಯಾದ ನಂತರ ಮತ್ತೆ ಸಾರ್ವಜನಿಕ ಶಾಂತಿಗೆ ಧಕ್ಕೆ ಉಂಟುಮಾಡುವ ಯಾವುದೇ ಚಟುವಟಿಕೆಯಲ್ಲಿ ಭಾಗವಹಿಸಬಾರದು ಎಂಬ ಷರತ್ತು ವಿಧಿಸಲಾಗಿದೆ.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa