ವಿಜಯಪುರ, 23 ಮಾರ್ಚ್ (ಹಿ.ಸ.)
ಆ್ಯಂಕರ್ : ಜಗತ್ತಿನ ಅಭಿವೃದ್ಧಿ ಪ್ರಕ್ರಿಯೆಯಲ್ಲಿ ತೈಲ ಶಕ್ತಿಯ ಮೇಲೆ ಹೆಚ್ಚುತ್ತಿರುವ ಅವಲಂಬನೆ ಪರಿಸರ ಹಾಗೂ ಮಾನವ ಸಮಾಜಕ್ಕೆ ಗಂಭೀರ ಸವಾಲುಗಳನ್ನು ಉಂಟುಮಾಡುತ್ತಿದೆ. ಈ ಸಮಸ್ಯೆಗೆ ನೈಸರ್ಗಿಕ ಹಾಗೂ ಪರಂಪರೆಯ ಆಧಾರಿತ ಪರಿಹಾರವಾಗಿ ‘ನಂದಿ ಸೇನೆ’ ಸಂಘಟನೆಯ ಮೂಲಕ ನಂದಿ ಶಕ್ತಿಯನ್ನು ಉತ್ತೇಜಿಸುವ ಅಭಿಯಾನ ಆರಂಭಿಸಲಾಗಿದೆ ಎಂದು ನಂದಿ ಕೂಗು ಅಭಿಯಾನದ ಸಂಯೋಜಕ ಬಸವರಾಜ ಬಿರಾದಾರ ವಿಜಯಪುರದಲ್ಲಿ ತಿಳಿಸಿದರು.
ಅವರು ನೀಡಿದ ಮಾಹಿತಿಯ ಪ್ರಕಾರ, ಅನಾದಿ ಕಾಲದಿಂದ ಕೃಷಿ ಮತ್ತು ನಾಗರಿಕತೆಯ ಅಭಿವೃದ್ಧಿಯಲ್ಲಿ ಎತ್ತುಗಳ ಪಾತ್ರ ಮಹತ್ವದ್ದಾಗಿದೆ. ಆದರೆ ಆಧುನಿಕ ಕಾಲದಲ್ಲಿ ತೈಲ ಆಧಾರಿತ ಯಂತ್ರಗಳ ಮೇಲೆ ಅವಲಂಬನೆಯಿಂದ ಕೃಷಿ ಪದ್ಧತಿಗಳಲ್ಲೂ ಬದಲಾವಣೆ ಉಂಟಾಗಿ ಪರಿಸರ ಸಮಸ್ಯೆಗಳು ಹೆಚ್ಚುತ್ತಿವೆ. ಮಣ್ಣು ಹಾಳಾಗುವುದು, ನೀರು ಮತ್ತು ಗಾಳಿ ಮಾಲಿನ್ಯ ಹೆಚ್ಚುವುದು ಮುಂತಾದ ಸಮಸ್ಯೆಗಳು ಕಾಣಿಸಿಕೊಳ್ಳುತ್ತಿವೆ ಎಂದು ಅವರು ಹೇಳಿದ್ದಾರೆ.
ಈ ಹಿನ್ನೆಲೆಯಲ್ಲಿ ‘ನಂದಿ ಕೂಗು’ ಅಭಿಯಾನದ ಅಡಿಯಲ್ಲಿ ‘ನಂದಿ ಸೇನೆ’ ಎಂಬ ಸಂಘಟನೆಯನ್ನು ಕಟ್ಟಿ ಬಳಸಲಾಗುತ್ತಿದೆ.
ನಂದಿ ಸಂತತಿಯನ್ನು ಉಳಿಸಿ ಬೆಳೆಸುವ ಮೂಲಕ ಕೃಷಿ ಹಾಗೂ ಸಮಾಜದ ಪುನರ್ ನಿರ್ಮಾಣ ಮಾಡುವುದೇ ಈ ಸಂಘಟನೆಯ ಉದ್ದೇಶವಾಗಿದೆ ಎಂದು ತಿಳಿಸಿದರು.
ಅವರ ಪ್ರಕಾರ, ಎತ್ತುಗಳನ್ನು ಪೋಷಿಸುವ ರೈತರು, ಶಿವ ಆರಾಧಕರು ಹಾಗೂ ನಂದಿ ಶಕ್ತಿಯ ಮಹತ್ವವನ್ನು ಅರಿತು ಕಾರ್ಯನಿರ್ವಹಿಸುವವರು ಎಲ್ಲರೂ ‘ನಂದಿ ಸೈನಿಕರು’ ಎಂದು ಗುರುತಿಸಿಕೊಳ್ಳಬಹುದು. ನಂದಿ ಆಧಾರಿತ ಕೃಷಿ, ಗೊಬ್ಬರ, ಶಕ್ತಿ ಮತ್ತು ಆರೋಗ್ಯ ಸಂಬಂಧಿತ ಉತ್ಪನ್ನಗಳ ಅಭಿವೃದ್ಧಿಗೆ ಸರ್ಕಾರಗಳು ಪೂರಕ ಕಾನೂನು ಮತ್ತು ಯೋಜನೆಗಳನ್ನು ಜಾರಿಗೆ ತರಬೇಕು ಎಂದು ಅವರು ಅಭಿಪ್ರಾಯಪಟ್ಟರು.
ಸಮಾಜದ ವಿವಿಧ ವಲಯಗಳು—ಪೂಜ್ಯರು, ರಾಜಕೀಯ ನಾಯಕರು, ಉದ್ಯಮಿಗಳು, ರೈತರು ಮತ್ತು ಸಾಮಾನ್ಯ ಪ್ರಜೆಗಳು—ನಂದಿ ಶಕ್ತಿಯ ಮಹತ್ವವನ್ನು ಅರಿತು ಅದರ ಪ್ರಚಾರ ಹಾಗೂ ಅಭಿವೃದ್ಧಿಗೆ ಕೈಜೋಡಿಸಬೇಕು ಎಂದು ಅವರು ಕರೆ ನೀಡಿದರು.
---------------
ಹಿಂದೂಸ್ತಾನ್ ಸಮಾಚಾರ್ / jyothi deshpande
