ನವದೆಹಲಿ, 09 ನವೆಂಬರ್ (ಹಿ.ಸ.):

ಸಂಸತ್ತಿನ ಮುಂಗಾರು ಅಧಿವೇಶನ ಮುಕ್ತಾಯಗೊಂಡು 88 ದಿನಗಳು ಕಳೆದರೂ ಲೋಕಸಭೆ ಮತ್ತು ರಾಜ್ಯಸಭೆಯ ಅಧಿವೇಶನವನ್ನು ಅಧಿಕೃತವಾಗಿ ಅಂತ್ಯಗೊಳಿಸಿಲ್ಲ. ಈ ಮೂಲಕ 2008ರಲ್ಲಿ ದಾಖಲಾಗಿದ್ದ 87 ದಿನಗಳ ಹಿಂದಿನ ದಾಖಲೆಯನ್ನು ಮುರಿದಂತಾಗಿದೆ.

ಆಗಸ್ಟ್ 13ರಂದು ಉಭಯ ಸದನಗಳ ಕಲಾಪವನ್ನು ಅನಿರ್ದಿಷ್ಟಾವಧಿಗೆ ಮುಂದೂಡಲಾಗಿತ್ತು. ಆದರೆ ನವೆಂಬರ್ 9ರ ವೇಳೆಯೂ ಅಧಿವೇಶನವನ್ನು ಅಧಿಕೃತವಾಗಿ ಅಂತ್ಯಗೊಳಿಸಿಲ್ಲ. ಹೀಗಾಗಿ ಇದೇ ಅಧಿವೇಶನದ ಭಾಗವಾಗಿ ಸಂಸತ್ತಿನ ಸಭೆಯನ್ನು ಮತ್ತೆ ಕರೆಯುವ ಸಾಧ್ಯತೆಯೂ ಇದೆ.

ಸರ್ಕಾರದ ಉದ್ದೇಶದ ಬಗ್ಗೆ ಪ್ರಶ್ನೆ

ಈ ಬೆಳವಣಿಗೆ ಕುರಿತು ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಜಯರಾಮ್ ರಮೇಶ್ ಸರ್ಕಾರದ ಉದ್ದೇಶವನ್ನು ಪ್ರಶ್ನಿಸಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ ಪ್ರತಿಕ್ರಿಯಿಸಿರುವ ಅವರು, ಸಂಸತ್ತಿನ ಕಲಾಪವನ್ನು ಅನಿರ್ದಿಷ್ಟಾವಧಿಗೆ ಮುಂದೂಡಿ 88 ದಿನಗಳಾದರೂ ಅಧಿವೇಶನ ಅಂತ್ಯಗೊಳಿಸದಿರುವುದು ಗಮನಾರ್ಹ ಎಂದು ಹೇಳಿದ್ದಾರೆ.

ಸಂಸತ್ತಿನ ಕಾರ್ಯವಿಧಾನಕ್ಕೆ ಸಂಬಂಧಿಸಿದ 'ಕೌಲ್ ಅಂಡ್ ಶಕ್ಧರ್' ಪುಸ್ತಕದ ಎಂಟನೇ ಆವೃತ್ತಿಯನ್ನು ಉಲ್ಲೇಖಿಸಿರುವ ಅವರು, ಸಾಮಾನ್ಯವಾಗಿ ಸದನವನ್ನು ಅನಿರ್ದಿಷ್ಟಾವಧಿಗೆ ಮುಂದೂಡಿದ ಎರಡರಿಂದ ನಾಲ್ಕು ದಿನಗಳಲ್ಲಿ ಅಧಿವೇಶನ ಅಂತ್ಯಗೊಳಿಸಲಾಗುತ್ತದೆ ಎಂದು ತಿಳಿಸಿದ್ದಾರೆ. 2015ರ ಮುಂಗಾರು ಅಧಿವೇಶನದಲ್ಲಿ ಈ ಅಂತರ ಗರಿಷ್ಠ 28 ದಿನಗಳಾಗಿತ್ತು ಎಂದು ಪುಸ್ತಕದಲ್ಲಿ ಉಲ್ಲೇಖಿಸಲಾಗಿದೆ.

ಸಂಸದೀಯ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು ಅವರು ಅಕ್ಟೋಬರ್ 19ರಂದು ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರಿಗೆ ಬರೆದ ಪತ್ರದಲ್ಲಿ 2008ರ 87 ದಿನಗಳ ವಿಳಂಬವನ್ನು ಉಲ್ಲೇಖಿಸಿದ್ದರು. ಅಂದು ಎಲ್ಲ ಪಕ್ಷಗಳ ಒಮ್ಮತದ ಮೇರೆಗೆ ಈ ನಿರ್ಧಾರ ಕೈಗೊಳ್ಳಲಾಗಿತ್ತು ಎಂದು ಜಯರಾಮ್ ರಮೇಶ್ ತಿಳಿಸಿದ್ದಾರೆ.

ಆದರೆ, ಈಗಿನ ಸರ್ಕಾರವು ಕೇಂದ್ರ ಗೃಹ ಸಚಿವರಿಗೆ ಕ್ಷೇತ್ರ ಮರುವಿಂಗಡಣೆ ವಿಧೇಯಕಗಳನ್ನು ಅಂಗೀಕರಿಸಲು ಲೋಕಸಭೆಯಲ್ಲಿ ಮೂರನೇ ಎರಡರಷ್ಟು ಬಹುಮತ ಕ್ರೋಡೀಕರಿಸಲು ಕಾಲಾವಕಾಶ ನೀಡುವ ಉದ್ದೇಶದಿಂದ ಅಧಿವೇಶನವನ್ನು ಅಂತ್ಯಗೊಳಿಸದೆ ಉಳಿಸಿಕೊಂಡಿದೆ ಎಂದು ಅವರು ಆರೋಪಿಸಿದ್ದಾರೆ.

ಮಹಿಳಾ ಮೀಸಲಾತಿ ಕಾಯ್ದೆ ಜಾರಿಗೆ ಚರ್ಚೆ?

ಅಧಿವೇಶನವನ್ನು ಅಧಿಕೃತವಾಗಿ ಅಂತ್ಯಗೊಳಿಸದಿರುವ ಹಿನ್ನೆಲೆಯಲ್ಲಿ ಮಹಿಳಾ ಮೀಸಲಾತಿ ಕಾಯ್ದೆಯ ಅನುಷ್ಠಾನಕ್ಕೆ ಸಂಬಂಧಿಸಿದ ಸಂವಿಧಾನ ತಿದ್ದುಪಡಿ ಪ್ರಸ್ತಾವನೆ ಕುರಿತು ಚರ್ಚಿಸಲು ಸಂಸತ್ತಿನ ವಿಶೇಷ ಸಭೆಯನ್ನು ಕಡಿಮೆ ಅವಧಿಯ ಸೂಚನೆ ನೀಡಿ ಕರೆಯುವ ಸಾಧ್ಯತೆಯ ಬಗ್ಗೆಯೂ ಚರ್ಚೆಗಳು ನಡೆಯುತ್ತಿವೆ.

ಈ ಪ್ರಸ್ತಾವನೆಯಡಿ ಕ್ಷೇತ್ರ ಮರುವಿಂಗಡಣೆ ಮೂಲಕ ಲೋಕಸಭೆಯ ಪ್ರಸ್ತುತ 543 ಸ್ಥಾನಗಳನ್ನು ಗರಿಷ್ಠ 850ಕ್ಕೆ ಹೆಚ್ಚಿಸುವ ಉದ್ದೇಶವಿದೆ. ಆದರೆ, ಸಂಸತ್ತಿನ ಮುಂದಿನ ಸಭೆ ಕರೆಯುವ ಕುರಿತು ಸರ್ಕಾರ ಯಾವುದೇ ಅಧಿಕೃತ ಪ್ರಕಟಣೆ ಹೊರಡಿಸಿಲ್ಲ.

ಅಧಿವೇಶನ ಅಂತ್ಯಕ್ಕೆ ನಿಗದಿತ ಕಾಲಮಿತಿ ಇಲ್ಲ

ಸಂವಿಧಾನದಲ್ಲಿ ಸದನದ ಕಲಾಪವನ್ನು ಅನಿರ್ದಿಷ್ಟಾವಧಿಗೆ ಮುಂದೂಡಿದ ಬಳಿಕ ಅಧಿವೇಶನವನ್ನು ಅಧಿಕೃತವಾಗಿ ಅಂತ್ಯಗೊಳಿಸಲು ನಿರ್ದಿಷ್ಟ ಕಾಲಮಿತಿ ನಿಗದಿಪಡಿಸಿಲ್ಲ. ಹೀಗಾಗಿ ದೀರ್ಘಕಾಲದವರೆಗೆ ಅಧಿವೇಶನ ಅಂತ್ಯಗೊಳಿಸದಿರುವುದು ಸ್ವತಃ ಸಂವಿಧಾನಾತ್ಮಕ ಅಥವಾ ಕಾರ್ಯವಿಧಾನದ ಉಲ್ಲಂಘನೆಯಾಗುವುದಿಲ್ಲ.

ಲಭ್ಯ ದಾಖಲೆಗಳ ಪ್ರಕಾರ, 2008ರಲ್ಲಿ 87 ದಿನ, 1987ರಲ್ಲಿ 76 ದಿನ, 1989ರಲ್ಲಿ 54 ದಿನ, 2006 ಮತ್ತು 2013ರಲ್ಲಿ ತಲಾ 49 ದಿನ ಹಾಗೂ 1963ರಲ್ಲಿ 41 ದಿನಗಳ ಕಾಲ ಸಂಸತ್ತಿನ ಅಧಿವೇಶನವನ್ನು ಅಧಿಕೃತವಾಗಿ ಅಂತ್ಯಗೊಳಿಸಿರಲಿಲ್ಲ.

2008ರಲ್ಲಿ ಅಂದಿನ ಸಂಯುಕ್ತ ಪ್ರಗತಿಪರ ಮೈತ್ರಿಕೂಟ ಸರ್ಕಾರದ ವಿರುದ್ಧದ ಅವಿಶ್ವಾಸ ನಿರ್ಣಯದ ಚರ್ಚೆಗಾಗಿ ಜುಲೈ 21 ಮತ್ತು 22ರಂದು ಲೋಕಸಭೆ ಸಭೆ ಸೇರಿತ್ತು. ಬಳಿಕ ಅಕ್ಟೋಬರ್ 17ರಂದು ಕಲಾಪ ಮತ್ತೆ ಆರಂಭವಾಗಿ ಅಕ್ಟೋಬರ್ 24ರಂದು ಮುಂದೂಡಲಾಗಿತ್ತು. ನಂತರ ಡಿಸೆಂಬರ್ 10ರಂದು ಸದನದ ಮುಂದಿನ ಸಭೆ ನಡೆದಿತ್ತು.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.