ಬೆಂಗಳೂರು, 13 ಅಕ್ಟೋಬರ್ (ಹಿ.ಸ.):
ಕೇರಳ ಸೇರಿದಂತೆ ವಿವಿಧ ರಾಜ್ಯಗಳಿಂದ ಕರ್ನಾಟಕ ಪ್ರವೇಶಿಸುವ ಅಂತರರಾಜ್ಯ ಪ್ರವಾಸಿ ಬಸ್ ಗಳಿಂದ ಮಾಸಿಕ ಲಂಚ ವಸೂಲಿ ಮಾಡಲಾಗುತ್ತಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿದ್ದು, ಈ ಸಂಬಂಧ ಸಮಗ್ರ ಹಾಗೂ ನಿಷ್ಪಕ್ಷಪಾತ ತನಿಖೆ ನಡೆಸುವಂತೆ ಕರ್ನಾಟಕ ಸಾರಿಗೆ ಇಲಾಖೆಯ ಆಯುಕ್ತರಿಗೆ ದೂರು ಸಲ್ಲಿಸಲಾಗಿದೆ.
ವಕೀಲ ಎಸ್. ನಟರಾಜ ಶರ್ಮಾ ಅವರು ಸಲ್ಲಿಸಿರುವ ದೂರಿನಲ್ಲಿ, ಪ್ರಾದೇಶಿಕ ಸಾರಿಗೆ ಕಚೇರಿ (ಆರ್ಟಿಒ) ಅಧಿಕಾರಿಗಳು, ಮೋಟಾರು ವಾಹನ ನಿರೀಕ್ಷಕರು (ಐಎಂವಿ) ಹಾಗೂ ಗುರು ಎಂಬ ಮಧ್ಯವರ್ತಿಯ ನಡುವೆ ಅಕ್ರಮ ವಹಿವಾಟು ನಡೆಯುತ್ತಿರುವ ಶಂಕೆ ವ್ಯಕ್ತಪಡಿಸಿದ್ದಾರೆ. ಅತ್ತಿಬೆಲೆ, ಎಲೆಕ್ಟ್ರಾನಿಕ್ ಸಿಟಿ, ಮೆಜೆಸ್ಟಿಕ್ ಮತ್ತು ದೇವನಹಳ್ಳಿ ಸೇರಿದಂತೆ ಪ್ರಮುಖ ಸಾರಿಗೆ ಮಾರ್ಗಗಳಲ್ಲಿ ಈ ಅಕ್ರಮ ನಡೆಯುತ್ತಿದೆ ಎಂದು ದೂರಿನಲ್ಲಿ ಆರೋಪಿಸಲಾಗಿದೆ.
ಮಾಸಿಕ ಹಣ ನೀಡದಿದ್ದರೆ ಕಿರುಕುಳದ ಆರೋಪ'ಬಸ್ ಓನರ್ಸ್ ಆಫ್ ಇಂಡಿಯಾ' ಎಂಬ ಅಖಿಲ ಭಾರತ ಬಸ್ ಮಾಲೀಕರ ವಾಟ್ಸ್ಆ್ಯಪ್ ಗುಂಪಿನಲ್ಲಿ ನಡೆದ ಚರ್ಚೆಯ ವೇಳೆ ಹಲವು ಅಂತರರಾಜ್ಯ ಪ್ರವಾಸಿ ಬಸ್ ನಿರ್ವಾಹಕರು ತಮಗಾಗುತ್ತಿರುವ ಕಿರುಕುಳದ ಕುರಿತು ಆರೋಪಗಳನ್ನು ಹಂಚಿಕೊಂಡಿದ್ದಾರೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.
ದಿಯಾ ಟ್ರಾವೆಲ್ಸ್ನಿಂದ ಎಸ್ಎಫ್ಎಸ್ ಟ್ರಾವೆಲ್ಸ್ಗೆ ಬದಲಾಗಿರುವ ಸಂಸ್ಥೆಯ ಶ್ರಿರಾಜ್ ನಾಯರ್ ಅವರು, ಅತ್ತಿಬೆಲೆಯಿಂದ ದೇವನಹಳ್ಳಿ ಕಡೆಗೆ ಬಸ್ಗಳ ಸಂಚಾರಕ್ಕೆ ಪ್ರತಿ ತಿಂಗಳು ₹26,000 ಪಾವತಿಸುತ್ತಿದ್ದರೂ ಜಾರಿ ಅಧಿಕಾರಿಗಳಿಂದ ಕಿರುಕುಳ ಎದುರಿಸುತ್ತಿರುವುದಾಗಿ ಆರೋಪಿಸಿದ್ದಾರೆ.
ಸೋನಾ ಟ್ರಾವೆಲ್ಸ್ನ ರಿಯಾಜ್ ಅವರು ಪ್ರತಿ ವಾಹನಕ್ಕೆ ತಿಂಗಳಿಗೆ ಸುಮಾರು ₹30,000 ನೀಡಬೇಕಾಗುತ್ತಿತ್ತು ಎಂದು ಆರೋಪಿಸಿದ್ದು, ಈ ಮೊತ್ತದಲ್ಲಿ ಶೇ.60ರಷ್ಟು ತೆರಿಗೆ ಹಾಗೂ ಶೇ.40ರಷ್ಟು ಲಂಚ ಎಂಬ ಅನೌಪಚಾರಿಕ ಹಂಚಿಕೆ ವ್ಯವಸ್ಥೆ ಇತ್ತು ಎಂದು ದೂರಿನಲ್ಲಿ ತಿಳಿಸಲಾಗಿದೆ.
ಅದೇ ರೀತಿ, ಸಲಾಬಮ್ ಟ್ರಾವೆಲ್ಸ್ನ ಆದಿಲ್ ಸಿದ್ದಿಕ್ ಅವರು ಅತ್ತಿಬೆಲೆ ಗಡಿಯಲ್ಲಿ ಬಸ್ಗಳ ಸಂಚಾರಕ್ಕೆ ಅನುಮತಿ ಪಡೆಯಲು ಮಧ್ಯವರ್ತಿಗೆ ಪ್ರತಿ ತಿಂಗಳು ₹16,000 ಪಾವತಿಸುತ್ತಿರುವುದಾಗಿ ಆರೋಪಿಸಿದ್ದಾರೆ. ಮನೀಶ್ ಎಂಬ ಬಸ್ ನಿರ್ವಾಹಕರು ಈ ಅಕ್ರಮಕ್ಕೆ ಸಂಬಂಧಿಸಿದ ಡಿಜಿಟಲ್ ಪಾವತಿ ದಾಖಲೆಗಳು ಮತ್ತು ಆಡಿಯೊ ಸಾಕ್ಷ್ಯಗಳನ್ನು ಒದಗಿಸಿದ್ದಾರೆ ಎನ್ನಲಾಗಿದೆ.
ಮಧ್ಯವರ್ತಿಗೆ ಹಣ ಪಾವತಿಸದ ಬಸ್ಗಳನ್ನು ಉದ್ದೇಶಪೂರ್ವಕವಾಗಿ ತಡೆಹಿಡಿದು, ಅಧಿಕೃತ ಕ್ರಮಗಳ ಹೆಸರಿನಲ್ಲಿ ಭಾರಿ ದಂಡ ವಿಧಿಸಲಾಗುತ್ತಿದೆ ಎಂಬ ಆರೋಪಗಳೂ ಕೇಳಿಬಂದಿವೆ.
ಗೂಗಲ್ ಪೇ ಮೂಲಕ ಹಣ ವಸೂಲಿ ಶಂಕೆ:ದೂರಿನಲ್ಲಿ ಗುರು ಎಂಬ ಮಧ್ಯವರ್ತಿಯನ್ನು ಪ್ರಮುಖ ವ್ಯಕ್ತಿಯಾಗಿ ಉಲ್ಲೇಖಿಸಲಾಗಿದೆ. ಈತ ಗೂಗಲ್ ಪೇ ಮೂಲಕ ಮಾಸಿಕ ಹಣ ಸಂಗ್ರಹಿಸುತ್ತಿದ್ದಾನೆ ಹಾಗೂ ಎಲೆಕ್ಟ್ರಾನಿಕ್ ಸಿಟಿಯಲ್ಲಿ ಕರ್ತವ್ಯ ನಿರ್ವಹಿಸುವ ಮೋಟಾರು ವಾಹನ ನಿರೀಕ್ಷಕರೊಬ್ಬರ ಸಂಬಂಧಿಯಾಗಿದ್ದಾನೆ ಎಂದು ಆರೋಪಿಸಲಾಗಿದೆ. ಈ ಆರೋಪಗಳು ಇನ್ನೂ ಸ್ವತಂತ್ರ ತನಿಖೆಯಿಂದ ದೃಢಪಟ್ಟಿಲ್ಲ.
ಅಖಿಲ ಭಾರತ ಪ್ರವಾಸಿ ಪರವಾನಗಿ ಹೊಂದಿರುವ ಬಸ್ ನಿರ್ವಾಹಕರಿಗೂ ಈ ವ್ಯವಸ್ಥೆಯಿಂದ ತೊಂದರೆಯಾಗುತ್ತಿದ್ದು, ನಿಯಮ ಪಾಲಿಸುವ ಕರ್ನಾಟಕದ ಸ್ಥಳೀಯ ಬಸ್ ನಿರ್ವಾಹಕರಿಗೆ ಅನ್ಯಾಯವಾಗುತ್ತಿದೆ. ಅಲ್ಲದೆ, ಸರ್ಕಾರಕ್ಕೆ ಸೇರಬೇಕಾದ ತೆರಿಗೆ ಆದಾಯಕ್ಕೂ ನಷ್ಟವಾಗುವ ಸಾಧ್ಯತೆಯಿದೆ ಎಂದು ದೂರಿನಲ್ಲಿ ಆತಂಕ ವ್ಯಕ್ತಪಡಿಸಲಾಗಿದೆ.
ಡಿಜಿಟಲ್ ದಾಖಲೆಗಳ ಪರಿಶೀಲನೆಗೆ ಒತ್ತಾಯ
ಆರೋಪಗಳ ಸತ್ಯಾಸತ್ಯತೆಯನ್ನು ಪತ್ತೆಹಚ್ಚಲು ಮಧ್ಯವರ್ತಿಯ ಬ್ಯಾಂಕ್ ಖಾತೆ, ಯುಪಿಐ ವಹಿವಾಟು, ಗೂಗಲ್ ಪೇ ಪಾವತಿ ದಾಖಲೆಗಳು ಹಾಗೂ ಕರೆಗಳ ವಿವರಗಳನ್ನು ಪರಿಶೀಲಿಸುವಂತೆ ದೂರುದಾರರು ಆಗ್ರಹಿಸಿದ್ದಾರೆ.
ಅತ್ತಿಬೆಲೆ ಟೋಲ್ಪ್ಲಾಜ್ನ ಬಸ್ ಪ್ರವೇಶ ದಾಖಲೆಗಳನ್ನು ಅಧಿಕೃತ ತೆರಿಗೆ ರಸೀದಿಗಳು, ವಾಹನ ತಪಾಸಣೆ ಕಡತಗಳು, ದಂಡದ ಚಲನ್ಗಳು ಹಾಗೂ ಸಿಬ್ಬಂದಿಯ ಕರ್ತವ್ಯ ವೇಳಾಪಟ್ಟಿಯೊಂದಿಗೆ ಹೋಲಿಕೆ ಮಾಡಿ ಸಮಗ್ರ ವಿಧಿವಿಜ್ಞಾನ ಲೆಕ್ಕಪರಿಶೋಧನೆ ನಡೆಸಬೇಕು ಎಂದು ಮನವಿ ಮಾಡಿದ್ದಾರೆ.
ಈ ಪ್ರಕರಣವನ್ನು ಕರ್ನಾಟಕ ಲೋಕಾಯುಕ್ತ ಪೊಲೀಸರನ್ನೊಳಗೊಂಡ ಭ್ರಷ್ಟಾಚಾರ ನಿಗ್ರಹ ಸಂಸ್ಥೆಗಳಿಗೆ ವರ್ಗಾಯಿಸಿ, ಅಕ್ರಮದಲ್ಲಿ ಭಾಗಿಯಾಗಿರುವ ಶಂಕಿತ ಅಧಿಕಾರಿಗಳು, ಮಧ್ಯವರ್ತಿ ಹಾಗೂ ಅಕ್ರಮ ಪಾವತಿಗೆ ಸಹಕರಿಸಿದ ಬಸ್ ನಿರ್ವಾಹಕರ ವಿರುದ್ಧ ಕಾನೂನು ಮತ್ತು ಶಿಸ್ತು ಕ್ರಮ ಕೈಗೊಳ್ಳಬೇಕು ಎಂಬುದು ದೂರುದಾರರ ಪ್ರಮುಖ ಆಗ್ರಹವಾಗಿದೆ.
ದೂರಿನ ಪ್ರತಿಗಳನ್ನು ಹಣಕಾಸು ಇಲಾಖೆಯ ಹೆಚ್ಚುವರಿ ಕಾರ್ಯದರ್ಶಿ, ಗೃಹ ಇಲಾಖೆಯ ಕಾರ್ಯದರ್ಶಿ ಹಾಗೂ ಸಾರಿಗೆ ಇಲಾಖೆಯ ಕಾರ್ಯದರ್ಶಿಗಳಿಗೂ ಸಲ್ಲಿಸಲಾಗಿದೆ.
--------------
ಹಿಂದೂಸ್ತಾನ್ ಸಮಾಚಾರ್ / BHARGAVI G R
