ಪಾಟ್ನಾ, 28 ಡಿಸೆಂಬರ್ (ಹಿ.ಸ.) :

ಆ್ಯಂಕರ್ : ಬಿಹಾರದ ಹೌರಾ–ಪಾಟ್ನಾ–ದೆಹಲಿ ಪ್ರಮುಖ ರೈಲು ಮಾರ್ಗದಲ್ಲಿ ಶನಿವಾರ ತಡರಾತ್ರಿ ಭಾರಿ ಅಪಘಾತ ಸಂಭವಿಸಿದ್ದು, ಜಮುಯ್–ಜಸಿದಿಹ್ ವಿಭಾಗದ ಸಿಮುಲ್ತಲಾ ನಿಲ್ದಾಣದ ಸಮೀಪ ಸಿಮೆಂಟ್ ತುಂಬಿದ ಸರಕು ಸಾಗಣೆ ರೈಲು ಹಳಿತಪ್ಪಿದೆ.

ಟೆಲ್ವಾ ಬಜಾರ್ ಹಾಲ್ಟ್ ಬಳಿ ಇರುವ ಸೇತುವೆ ಸಂಖ್ಯೆ 676ರ ಮೇಲೆ ನಡೆದ ಈ ದುರ್ಘಟನೆಯಲ್ಲಿ ಹಲವು ಬೋಗಿಗಳು ಪರಸ್ಪರ ಡಿಕ್ಕಿ ಹೊಡೆದು ಹಳಿಯಿಂದ ಕೆಳಗೆ ಜಾರಿವೆ.

ಅಪಘಾತದ ಪರಿಣಾಮವಾಗಿ, ರಾತ್ರಿ 11.30ರಿಂದ ಮೇಲ್ಮುಖ ಹಾಗೂ ಕೆಳಮುಖ ಎರಡೂ ದಿಕ್ಕಿನ ರೈಲು ಸಂಚಾರ ಸಂಪೂರ್ಣವಾಗಿ ಅಸ್ತವ್ಯಸ್ತಗೊಂಡಿದೆ.

ಸುಮಾರು ಎರಡು ಡಜನ್ ಎಕ್ಸ್‌ಪ್ರೆಸ್ ಹಾಗೂ ಪ್ಯಾಸೆಂಜರ್ ರೈಲುಗಳು ವಿವಿಧ ನಿಲ್ದಾಣಗಳಲ್ಲಿ ನಿಂತುಹೋಗಿದ್ದು, ಪ್ರಯಾಣಿಕರು ತೀವ್ರ ತೊಂದರೆ ಅನುಭವಿಸಿದರು.

ಮಾಹಿತಿಯಂತೆ, ಸರಕು ಸಾಗಣೆ ರೈಲು ಜಸಿದಿಹ್‌ನಿಂದ ಝಝಾಗೆ ಅಪ್‌ಲೈನ್‌ನಲ್ಲಿ ಸಂಚರಿಸುತ್ತಿದ್ದ ವೇಳೆ ಇದ್ದಕ್ಕಿದ್ದಂತೆ ಹಳಿತಪ್ಪಿದೆ.

ರೈಲಿನ ಎಂಜಿನ್ ಸುಮಾರು 400 ಮೀಟರ್ ಮುಂದೆ ಟೆಲ್ವಾ ಬಜಾರ್ ಹಾಲ್ಟ್ ಬಳಿ ಸುರಕ್ಷಿತವಾಗಿ ನಿಂತಿದ್ದು, ಹೆಚ್ಚಿನ ವ್ಯಾಗನ್‌ಗಳು ಸೇತುವೆಯ ಮೇಲೆಯೇ ಅಸ್ತವ್ಯಸ್ತಗೊಂಡಿವೆ.

ರೈಲಿನಲ್ಲಿ ಒಟ್ಟು 42 ವ್ಯಾಗನ್‌ಗಳಿದ್ದು, ಅವುಗಳಲ್ಲಿ ಕೇವಲ 23 ಮಾತ್ರ ಹಳಿಯ ಮೇಲೆ ಉಳಿದಿವೆ. ಎರಡು ಎಂಜಿನ್‌ಗಳನ್ನು ಯಾವುದೇ ಅಪಾಯವಿಲ್ಲದಂತೆ ತೆಲ್ವಾ ಬಜಾರ್ ಹಾಲ್ಟ್‌ನಲ್ಲಿ ಇರಿಸಲಾಗಿದೆ.

ಅಪಘಾತದ ವೇಳೆ ರೈಲಿನ ಚಾಲಕ ಕಮಲೇಶ್ ಕುಮಾರ್ ಹಾಗೂ ಗಾರ್ಡ್ ಮನೀಶ್ ಕುಮಾರ್ ಪಾಸ್ವಾನ್ ತಕ್ಷಣ ಸಿಮುಲ್ತಲಾ ನಿಲ್ದಾಣಕ್ಕೆ ಮಾಹಿತಿ ನೀಡಿದ್ದಾರೆ.

ಘಟನೆಯ ಮಾಹಿತಿ ಪಡೆದ ನಂತರ ಸಿಮುಲ್ತಲಾ ನಿಲ್ದಾಣ ವ್ಯವಸ್ಥಾಪಕ ಅಖಿಲೇಶ್ ಕುಮಾರ್, ಆರ್‌ಪಿಎಫ್ ಒಪಿ ಉಸ್ತುವಾರಿ ರವಿ ಕುಮಾರ್ ಹಾಗೂ ಪಿಡಬ್ಲ್ಯುಐ ರಣಧೀರ್ ಕುಮಾರ್ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.

ಅಸನ್ಸೋಲ್ ರೈಲ್ವೆ ವಿಭಾಗದ ಸಾರ್ವಜನಿಕ ಸಂಪರ್ಕಾಧಿಕಾರಿ ಮಾತನಾಡಿ, ರಕ್ಷಣಾ ಹಾಗೂ ಮರುಸ್ಥಾಪನಾ ಕಾರ್ಯಗಳಿಗೆ ಅಸನ್ಸೋಲ್‌ನಿಂದ ವಿಶೇಷ ತಂಡವನ್ನು ಕಳುಹಿಸಲಾಗಿದೆ ಎಂದು ತಿಳಿಸಿದ್ದಾರೆ.

ಅಪಘಾತಕ್ಕೀಡಾದ ರೈಲು ಅಸನ್ಸೋಲ್‌ನಿಂದ ಸೀತಾಮರ್ಹಿಗೆ ಸಿಮೆಂಟ್ ಸಾಗಿಸುತ್ತಿದ್ದು, ಹಳಿ ಪುನಶ್ಚೇತನ ಕಾರ್ಯ ಪೂರ್ಣಗೊಳ್ಳುವವರೆಗೆ ರೈಲು ಸಂಚಾರದಲ್ಲಿ ಇನ್ನಷ್ಟು ವಿಳಂಬ ಸಂಭವಿಸುವ ಸಾಧ್ಯತೆ ಇದೆ.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa