ನವದೆಹಲಿ, 30 ಸೆಪ್ಟೆಂಬರ್ (ಹಿ.ಸ.):
ರಾಷ್ಟ್ರೀಯ ಸ್ವಯಂಸೇವಕ ಸಂಘದ (ಆರ್ಎಸ್ಎಸ್) ಹಿರಿಯ ಪ್ರಚಾರಕ ಎಂ.ಎ. ಕೃಷ್ಣನ್ ನಿಧನರಾಗಿದ್ದಾರೆ. ‘ಎಂ.ಎ. ಸರ್’ ಎಂದೇ ಪರಿಚಿತರಾಗಿದ್ದ ಅವರು ಕೇರಳದಲ್ಲಿ ರಾಷ್ಟ್ರವಾದಿ ಚಳವಳಿಯ ಪ್ರಮುಖ ಗುರುತಾಗಿ ಬೆಳೆದ ‘ಬಾಲಗೋಕುಲಂ’ ಮತ್ತು ‘ತಪಸ್ಯಾ’ ಸಂಘಟನೆಗಳ ಸ್ಥಾಪಕರಾಗಿದ್ದರು.
ಎಂ.ಎ. ಕೃಷ್ಣನ್ ಅವರ ನಿಧನಕ್ಕೆ ಆರ್ಎಸ್ಎಸ್ ಸಂತಾಪ ಸೂಚಿಸಿದೆ. ಸಂಘದ ಸರಸಂಘಚಾಲಕ ಮೋಹನ್ ಭಾಗವತ್ ಹಾಗೂ ಸರಕಾರ್ಯವಾಹ ದತ್ತಾತ್ರೇಯ ಹೊಸಬಾಳೆ ಜಂಟಿ ಹೇಳಿಕೆ ಬಿಡುಗಡೆ ಮಾಡಿ, ಅವರ ನಿಧನದಿಂದ ಕೇರಳದ ಸಂಪೂರ್ಣ ಸಮರ್ಪಿತ ಹಾಗೂ ನಿಷ್ಠಾವಂತ ಹಿರಿಯ ಪ್ರಚಾರಕರೊಬ್ಬರನ್ನು ಮಾತ್ರವಲ್ಲದೆ ಬಹುಮುಖ ಪ್ರತಿಭೆಯ ವ್ಯಕ್ತಿಯೊಬ್ಬರನ್ನು ಸಂಘ ಕಳೆದುಕೊಂಡಿದೆ ಎಂದು ತಿಳಿಸಿದ್ದಾರೆ.
ಕೇರಳದಲ್ಲಿ ರಾಷ್ಟ್ರವಾದಿ ಚಳವಳಿಯ ಗುರುತಾಗಿ ‘ಬಾಲಗೋಕುಲಂ’ ಮತ್ತು ‘ತಪಸ್ಯಾ’ ಸಂಘಟನೆಗಳು ರೂಪುಗೊಳ್ಳಲು ಎಂ.ಎ. ಕೃಷ್ಣನ್ ಅವರ ಪ್ರಮುಖ ಪಾತ್ರವಿತ್ತು ಎಂದು ಸಂತಾಪ ಸಂದೇಶದಲ್ಲಿ ಉಲ್ಲೇಖಿಸಲಾಗಿದೆ.
ಕೇರಳದಲ್ಲಿ ಸಂಘದ ಆರಂಭಿಕ ಸ್ತಂಭಗಳಲ್ಲಿ ಒಬ್ಬರಾಗಿದ್ದ ಅವರು ಅತ್ಯಂತ ಕಠಿಣ ಪರಿಸ್ಥಿತಿಗಳಲ್ಲೂ ಹಾಗೂ ಸವಾಲಿನ ಪ್ರದೇಶಗಳಲ್ಲೂ ಸಂಘಟನಾ ಕಾರ್ಯವನ್ನು ಕಟ್ಟುವ ನಿಟ್ಟಿನಲ್ಲಿ ನಿರಂತರವಾಗಿ ಶ್ರಮಿಸಿದ್ದರು ಎಂದು ಭಾಗವತ್ ಮತ್ತು ಹೊಸಬಾಳೆ ತಿಳಿಸಿದ್ದಾರೆ.
ಎಂ.ಎ. ಕೃಷ್ಣನ್ ಅವರ ಕುಟುಂಬ ಸದಸ್ಯರು, ಅಪಾರ ಸಂಖ್ಯೆಯ ಅಭಿಮಾನಿಗಳು ಹಾಗೂ ಅವರಿಂದ ಪ್ರೇರಣೆ ಪಡೆದ ಎಲ್ಲರಿಗೂ ಸಂತಾಪ ವ್ಯಕ್ತಪಡಿಸಿರುವ ಅವರು, “ಎಂ.ಎ. ಕೃಷ್ಣನ್ ಸರ್ ಅವರ ಸ್ಮೃತಿಗೆ ಗೌರವಪೂರ್ವಕ ನಮನ ಸಲ್ಲಿಸುತ್ತೇವೆ. ಭಗವಂತನು ಅಗಲಿದ ಆತ್ಮಕ್ಕೆ ಸದ್ಗತಿ ನೀಡಲಿ” ಎಂದು ಪ್ರಾರ್ಥಿಸಿದ್ದಾರೆ.
--------
ಹಿಂದೂಸ್ತಾನ್ ಸಮಾಚಾರ್ / Rakesh.M.B.
