ನವದೆಹಲಿ, 05 ಆಗಸ್ಟ್ (ಹಿ.ಸ.):

ಆ್ಯಂಕರ್:ರಕ್ಷಾಬಂಧನ ಹಬ್ಬದ ಹಿನ್ನೆಲೆಯಲ್ಲಿ ದೆಹಲಿಯಿಂದ ದೇಶದ ವಿವಿಧ ಭಾಗಗಳಿಗೆ ರಾಖಿಗಳನ್ನು ಸಮಯಕ್ಕೆ ತಲುಪಿಸಲು ಅಂಚೆ ಇಲಾಖೆ ವಿಶೇಷ ವ್ಯವಸ್ಥೆ ಕಲ್ಪಿಸಿದೆ. ಆಗಸ್ಟ್‌ 22ರವರೆಗೆ ದೆಹಲಿಯ 34 ಪ್ರಮುಖ ಅಂಚೆ ಕಚೇರಿಗಳು ಹಾಗೂ ದೆಹಲಿ ರೈಲು ನಿಲ್ದಾಣ ಮತ್ತು ನವದೆಹಲಿ ರೈಲು ನಿಲ್ದಾಣದ ಟ್ರಾನ್ಸಿಟ್ ಮೇಲ್ ಕಚೇರಿಗಳಲ್ಲಿ ವಿಶೇಷ ರಾಖಿ ಬುಕ್ಕಿಂಗ್ ಕೌಂಟರ್‌ಗಳನ್ನು ತೆರೆಯಲಾಗುತ್ತಿದೆ.

ಕೇಂದ್ರ ಸಂವಹನ ಸಚಿವಾಲಯ ನೀಡಿರುವ ಮಾಹಿತಿ ಪ್ರಕಾರ, ಗ್ರಾಹಕರು ಅಂಚೆ ಇಲಾಖೆಯ 24 ಸ್ಪೀಡ್ ಪೋಸ್ಟ್ ಹಾಗೂ 48 ಸ್ಪೀಡ್ ಪೋಸ್ಟ್ ಸೇವೆಗಳನ್ನು ಹೆಚ್ಚಿನ ಪ್ರಮಾಣದಲ್ಲಿ ಬಳಸಿಕೊಳ್ಳುವಂತೆ ಮನವಿ ಮಾಡಲಾಗಿದೆ. ಈ ಸೇವೆಗಳ ಮೂಲಕ ಸುರಕ್ಷಿತ ಹಾಗೂ ನಿಗದಿತ ಅವಧಿಯೊಳಗೆ ಅಂಚೆ ತಲುಪಿಸಲಾಗುತ್ತದೆ. ನಿಗದಿತ ಸಮಯದಲ್ಲಿ ವಿತರಣೆ ಆಗದಿದ್ದರೆ ಹಣ ಹಿಂತಿರುಗಿಸುವ ಭರವಸೆಯೂ ಇದೆ.

24 ಸ್ಪೀಡ್ ಪೋಸ್ಟ್ ಸೇವೆ ದೆಹಲಿಯ 35 ನಿಗದಿತ ಬುಕ್ಕಿಂಗ್ ಕೇಂದ್ರಗಳಲ್ಲಿ ಲಭ್ಯವಿದ್ದು, ಇದರ ಮೂಲಕ ಮುಂಬೈ, ಕೊಲ್ಕತ್ತಾ, ಬೆಂಗಳೂರು, ಚೆನ್ನೈ, ಹೈದರಾಬಾದ್ ಸೇರಿದಂತೆ ಆರು ಪ್ರಮುಖ ಮಹಾನಗರಗಳಿಗೆ ನಿಗದಿತ ಅವಧಿಯೊಳಗೆ ಅಂಚೆ ತಲುಪಿಸಲಾಗುತ್ತದೆ.

ಅಶೋಕ್ ವಿಹಾರ್, ಸಿವಿಲ್ ಲೈನ್ಸ್, ಚಾಣಕ್ಯಪುರಿ, ದೆಹಲಿ ಜಿಪಿಒ, ನವದೆಹಲಿ ಜಿಪಿಒ, ಇಂದ್ರಪ್ರಸ್ಥ, ಜನಕಪುರಿ, ಕೃಷ್ಣಾ ನಗರ, ಕರೋಲ್ ಬಾಗ್, ಕಾಲ್ಕಾಜಿ, ಲೋಧಿ ರಸ್ತೆ, ಸರೋಜಿನಿ ನಗರ, ಆರ್‌.ಕೆ. ಪುರಂ, ರಮೇಶ್ ನಗರ, ರೋಹಿಣಿ, ಮಾಯಾಪುರಿ, ಮಾಲವೀಯ ನಗರ, ಮೆಹ್ರೌಲಿ ಸೇರಿದಂತೆ 34 ಪ್ರಮುಖ ಅಂಚೆ ಕಚೇರಿಗಳಲ್ಲಿ ವಿಶೇಷ ರಾಖಿ ಬುಕ್ಕಿಂಗ್ ಸೌಲಭ್ಯ ಕಲ್ಪಿಸಲಾಗಿದೆ. ಇದರ ಜೊತೆಗೆ ದೆಹಲಿ ಹಾಗೂ ನವದೆಹಲಿ ರೈಲು ನಿಲ್ದಾಣಗಳ ಟ್ರಾನ್ಸಿಟ್ ಮೇಲ್ ಕಚೇರಿಗಳಲ್ಲೂ ವಿಶೇಷ ಬುಕ್ಕಿಂಗ್ ಕೌಂಟರ್‌ಗಳು ಕಾರ್ಯನಿರ್ವಹಿಸಲಿವೆ.

ರಕ್ಷಾಬಂಧನದ ಸಂದರ್ಭದಲ್ಲಿ ರಾಖಿಗಳು ಸಮಯಕ್ಕೆ ತಲುಪುವಂತೆ ಸಾರ್ವಜನಿಕರು ಮುಂಚಿತವಾಗಿಯೇ ಅಂಚೆ ಮೂಲಕ ಕಳುಹಿಸಿ ಈ ವಿಶೇಷ ವ್ಯವಸ್ಥೆಯ ಪ್ರಯೋಜನ ಪಡೆಯುವಂತೆ ಅಂಚೆ ಇಲಾಖೆ ಮನವಿ ಮಾಡಿದೆ.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.