ನವದೆಹಲಿ, 14 ಆಗಸ್ಟ್ (ಹಿ.ಸ.):

ಆ್ಯಂಕರ್:ಆರಂಭಿಕ ವಹಿವಾಟಿನಲ್ಲಿ ಕುಸಿತ ಕಂಡ ದೇಶೀಯ ಷೇರುಪೇಟೆ ಶುಕ್ರವಾರ ಕೆಳಮಟ್ಟದಿಂದ ಚೇತರಿಕೆಯ ಹಾದಿಗೆ ಮರಳಿತು. ಮಾರಾಟದ ಒತ್ತಡದಿಂದ ಸೆನ್ಸೆಕ್ಸ್ ಮತ್ತು ನಿಫ್ಟಿ ಕುಸಿದಿದ್ದರೂ, ವಹಿವಾಟು ಆರಂಭವಾದ 15 ನಿಮಿಷಗಳ ಬಳಿಕ ಖರೀದಿ ಚಟುವಟಿಕೆ ಹೆಚ್ಚಾದ ಹಿನ್ನೆಲೆಯಲ್ಲಿ ಎರಡೂ ಸೂಚ್ಯಂಕಗಳಲ್ಲಿ ಕೊಂಚ ಚೇತರಿಕೆ ಕಂಡುಬಂತು.

ಬೆಳಗ್ಗೆ 10.15ರ ವೇಳೆಗೆ ಸೆನ್ಸೆಕ್ಸ್ 222.70 ಅಂಕಗಳಷ್ಟು ಕುಸಿದು 77,857.26 ಅಂಕಗಳಲ್ಲಿ ವಹಿವಾಟು ನಡೆಸುತ್ತಿತ್ತು. ನಿಫ್ಟಿ 48.45 ಅಂಕಗಳಷ್ಟು ಇಳಿದು 24,347.40 ಅಂಕಗಳಲ್ಲಿತ್ತು.

ಸೆನ್ಸೆಕ್ಸ್ 176.53 ಅಂಕಗಳ ಕುಸಿತದೊಂದಿಗೆ 77,903.43 ಅಂಕಗಳಲ್ಲಿ ವಹಿವಾಟು ಆರಂಭಿಸಿತ್ತು. ಆರಂಭಿಕ ಹಂತದಲ್ಲಿ 357.03 ಅಂಕಗಳಷ್ಟು ಕುಸಿದು 77,722.93 ಅಂಕಗಳಿಗೆ ತಲುಪಿತ್ತು. ನಿಫ್ಟಿ 33.95 ಅಂಕಗಳ ಇಳಿಕೆಯೊಂದಿಗೆ 24,361.90 ಅಂಕಗಳಲ್ಲಿ ವಹಿವಾಟು ಆರಂಭಿಸಿ, ಬಳಿಕ 24,304.30 ಅಂಕಗಳಿಗೆ ಕುಸಿದಿತ್ತು.

ಆರಂಭಿಕ ಒಂದು ಗಂಟೆಯಲ್ಲಿ 2,793 ಷೇರುಗಳಲ್ಲಿ ವಹಿವಾಟು ನಡೆದಿದ್ದು, 1,358 ಷೇರುಗಳು ಏರಿಕೆ ಮತ್ತು 1,435 ಷೇರುಗಳು ಇಳಿಕೆಯಲ್ಲಿ ವಹಿವಾಟು ನಡೆಸಿದವು. ಸೆನ್ಸೆಕ್ಸ್‌ನ 30 ಷೇರುಗಳ ಪೈಕಿ 8 ಷೇರುಗಳು ಏರಿಕೆ ಕಂಡರೆ, 22 ಷೇರುಗಳು ಕುಸಿತದಲ್ಲಿದ್ದವು.

ಅಪೋಲೊ ಹಾಸ್ಪಿಟಲ್ಸ್, ಎಟರ್ನಲ್, ಅದಾನಿ ಪೋರ್ಟ್ಸ್, ಟ್ರೆಂಟ್ ಮತ್ತು ಸಿಪ್ಲಾ ಷೇರುಗಳು ಏರಿಕೆ ಕಂಡರೆ, ಟಾಟಾ ಮೋಟಾರ್ಸ್ ಪ್ಯಾಸೆಂಜರ್ ವೆಹಿಕಲ್ಸ್, ಹಿಂದಾಲ್ಕೊ ಇಂಡಸ್ಟ್ರೀಸ್, ಟಾಟಾ ಸ್ಟೀಲ್, ಜಿಯೋ ಫೈನಾನ್ಷಿಯಲ್ ಮತ್ತು ಮ್ಯಾಕ್ಸ್ ಹೆಲ್ತ್‌ಕೇರ್ ಷೇರುಗಳು ಇಳಿಕೆ ಕಂಡವು.

ಗುರುವಾರದ ವಹಿವಾಟಿನಲ್ಲಿ ಸೆನ್ಸೆಕ್ಸ್ 113.61 ಅಂಕಗಳ ಏರಿಕೆಯೊಂದಿಗೆ 78,079.96 ಅಂಕಗಳಲ್ಲಿ ಮುಕ್ತಾಯಗೊಂಡಿದ್ದರೆ, ನಿಫ್ಟಿ 40.10 ಅಂಕಗಳ ಕುಸಿತದೊಂದಿಗೆ 24,395.85 ಅಂಕಗಳಲ್ಲಿ ದಿನದ ವಹಿವಾಟು ಮುಗಿಸಿತ್ತು.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.