ನವದೆಹಲಿ, 24 ಜೂನ್ (ಹಿ.ಸ.) :
ಆ್ಯಂಕರ್ : ಪಂಜಾಬ್ ಮುಖ್ಯಮಂತ್ರಿ ಭಗವಂತ್ ಮಾನ್ ಅವರಿಗೆ ಸಂಬಂಧಿಸಿದ ವಿವಾದಾತ್ಮಕ ವಿಡಿಯೊ ಪ್ರಕರಣದಲ್ಲಿ ಗುರುಗ್ರಾಮದಲ್ಲಿ ಎಫ್ಐಆರ್ ದಾಖಲಾಗಿರುವ ಹಿನ್ನೆಲೆಯಲ್ಲಿ ಭಾರತೀಯ ಜನತಾ ಪಕ್ಷ (ಬಿಜೆಪಿ) ತೀವ್ರ ವಾಗ್ದಾಳಿ ನಡೆಸಿದೆ. ಹಣದ ಪ್ರಭಾವ ಬಳಸಿ ಸುಳ್ಳು ವರದಿ ಸೃಷ್ಟಿಸಿ ಸಿಖ್ ಸಮುದಾಯದ ಭಾವನೆಗಳಿಗೆ ಧಕ್ಕೆ ತರುವ ಪ್ರಯತ್ನ ನಡೆದಿದೆ ಎಂದು ಬಿಜೆಪಿ ಆರೋಪಿಸಿದೆ.
ಬಿಜೆಪಿಯ ಹಿರಿಯ ನಾಯಕ ಹಾಗೂ ದೆಹಲಿ ಸರ್ಕಾರದ ಸಚಿವ ಮಂಜಿಂದರ್ ಸಿಂಗ್ ಸಿರ್ಸಾ ಬುಧವಾರ ಪಕ್ಷದ ಕೇಂದ್ರ ಕಚೇರಿಯಲ್ಲಿ ಸುದ್ದಿಗೋಷ್ಠಿ ನಡೆಸಿ, ಭಗವಂತ್ ಮಾನ್ ವಿರುದ್ಧ ಗಂಭೀರ ಆರೋಪಗಳನ್ನು ಮಾಡಿದರು.
ಅವರ ಪ್ರಕಾರ, ಶ್ರೀ ಅಕಾಲ್ ತಖ್ತ್ ಸಾಹಿಬ್ನ ಐವರು ಸಿಂಗ್ ಸಾಹಿಬಾನರು ಭಗವಂತ್ ಮಾನ್ ಅವರೊಂದಿಗೆ ಯಾವುದೇ ಸಿಖ್ ಸಂಬಂಧ ಇಟ್ಟುಕೊಳ್ಳಬಾರದು ಎಂದು ಆದೇಶ ಹೊರಡಿಸಿದ್ದಾರೆ. ಇದಕ್ಕೆ ಕಾರಣವಾಗಿ, ಭಗವಂತ್ ಮಾನ್ ಅವರು ಗುರು ಸಾಹಿಬರ ಪವಿತ್ರ ಸ್ವರೂಪದ ಮೇಲೆ ಮದ್ಯದ ಹನಿಗಳನ್ನು ಎರಚುತ್ತಿರುವಂತೆ ಕಾಣುವ ವಿಡಿಯೊ ಒಂದು ಬಹಿರಂಗಗೊಂಡಿರುವುದಾಗಿ ಅವರು ಹೇಳಿದರು.
ಈ ವಿಡಿಯೊ ಬಹಿರಂಗವಾದ ಬಳಿಕ ವಿಶ್ವದಾದ್ಯಂತದ ಸಿಖ್ ಸಮುದಾಯದಲ್ಲಿ ತೀವ್ರ ಆಕ್ರೋಶ ಮತ್ತು ನೋವು ಉಂಟಾಗಿದೆ. ಯಾವುದೇ ಸಿಖ್ ಗುರು ಸಾಹಿಬರ ಅವಮಾನವನ್ನು ಸಹಿಸುವುದಿಲ್ಲ ಎಂದು ಸಿರ್ಸಾ ಹೇಳಿದರು.
ಪ್ರಕರಣ ಬೆಳಕಿಗೆ ಬಂದ ಬಳಿಕ 2026ರ ಜನವರಿ 5ರಂದು ಅಕಾಲ್ ತಖ್ತ್ ಭಗವಂತ್ ಮಾನ್ ಅವರನ್ನು ಹಾಜರಾಗುವಂತೆ ಸೂಚಿಸಿ ಸ್ಪಷ್ಟನೆ ಕೇಳಿತ್ತು. ಆಗ ಮಾನ್ ಅವರು ಈ ವಿಡಿಯೊ ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನ ಬಳಸಿ ಸೃಷ್ಟಿಸಲಾದ ನಕಲಿ ವಿಡಿಯೊ ಎಂದು ಹೇಳಿದ್ದರು. ಆದರೆ ಬಳಿಕ ನಡೆದ ವಿಧಿವಿಜ್ಞಾನ ಪರೀಕ್ಷೆಯಲ್ಲಿ ವಿಡಿಯೊ ನೈಜವಾಗಿರುವುದು ದೃಢಪಟ್ಟಿದೆ ಎಂದು ಸಿರ್ಸಾ ಆರೋಪಿಸಿದರು.
ಇದಾದ ನಂತರ 2026ರ ಜೂನ್ 15ರಂದು ಅಕಾಲ್ ತಖ್ತ್ ಸಾಹಿಬ್, ಭಗವಂತ್ ಮಾನ್ ಅವರನ್ನು ಗುರುದ್ರೋಹಿ ಹಾಗೂ ಖಾಲ್ಸಾ ಪಂಥದ ವಿರೋಧಿ ಎಂದು ಘೋಷಿಸಿ ಸಿಖ್ ಸಮುದಾಯದಿಂದ ಬಹಿಷ್ಕರಿಸಿದೆ. ಜೊತೆಗೆ ವಿಶ್ವದಾದ್ಯಂತದ ಸಿಖ್ಗಳಿಗೆ ಅವರೊಂದಿಗೆ ಯಾವುದೇ ಸಂಬಂಧ ಇಟ್ಟುಕೊಳ್ಳಬಾರದು ಎಂದು ಸೂಚಿಸಿದೆ ಎಂದು ಅವರು ತಿಳಿಸಿದರು.
ಸಿರ್ಸಾ ಮತ್ತೊಂದು ಗಂಭೀರ ಆರೋಪ ಮಾಡಿದ್ದು, ಭಗವಂತ್ ಮಾನ್ ಅವರ ಆಪ್ತ ಸಹೋದ್ಯೋಗಿ ಸ್ವಪ್ನ್ ಶರ್ಮಾ ಗುರುಗ್ರಾಮದ ಹೋಟೆಲ್ನಲ್ಲಿ ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ ಸಂಬಂಧಿಸಿದ ಸಭೆ ನಡೆಸಿದ್ದರು. ಈ ಸಭೆಯಲ್ಲಿ ಹಣದ ವ್ಯವಹಾರ ನಡೆದಿದ್ದು, ವಿಡಿಯೊವನ್ನು ವ್ಯಾಪಕವಾಗಿ ಸಂಪಾದಿಸಿ ಅದರಲ್ಲಿ ಭಗವಂತ್ ಮಾನ್ ಕಾಣಿಸದಂತೆ ಹಾಗೂ ವಿಡಿಯೊ ನಕಲಿ ಎಂಬ ಭಾವನೆ ಮೂಡಿಸುವ ಪ್ರಯತ್ನ ನಡೆದಿದೆ ಎಂದು ಆರೋಪಿಸಿದರು.
ಕೆಲವರು ಹಣಕ್ಕಾಗಿ ಸಿಖ್ ಸಮುದಾಯದ ಭಾವನೆಗಳನ್ನು ನಿರ್ಲಕ್ಷಿಸಿ ಸುಳ್ಳು ಕಥಾನಕವನ್ನು ನಿರ್ಮಿಸಲು ಸಿದ್ಧರಾಗಿದ್ದಾರೆ ಎಂದು ಸಿರ್ಸಾ ಟೀಕಿಸಿದರು. ಪಂಜಾಬ್ನಲ್ಲಿ ಕಾಣಿಸುತ್ತಿರುವ ಈ ಮನೋಭಾವ ಮುಘಲ್ ಆಳ್ವಿಕೆಯ ಕಾಲದ ದೌರ್ಜನ್ಯಗಳನ್ನು ನೆನಪಿಸುತ್ತದೆ ಎಂದು ಅವರು ಹೇಳಿದರು.
ಅಲ್ಲದೆ, ಆಮ್ ಆದ್ಮಿ ಪಕ್ಷದ ನಾಯಕ ಅರವಿಂದ ಕೇಜ್ರಿವಾಲ್ ಮತ್ತು ಅವರ ಸಹಚರರು ಹಣದ ದುರುಪಯೋಗದ ಮೂಲಕ ಸುಳ್ಳು ವರದಿ ಸಿದ್ಧಪಡಿಸಿ ಸಿಖ್ ಸಮುದಾಯದ ಭಾವನೆಗಳಿಗೆ ಸವಾಲು ಹಾಕಲು ಯತ್ನಿಸಿದ್ದಾರೆ ಎಂದು ಆರೋಪಿಸಿದರು. ಅಕಾಲ್ ತಖ್ತ್ನ ಪರಮೋಚ್ಚ ಸ್ಥಾನಮಾನವನ್ನು ದುರ್ಬಲಗೊಳಿಸುವ ಉದ್ದೇಶದಿಂದಲೇ ಈ ಸಂಪೂರ್ಣ ಪ್ರಯತ್ನ ನಡೆದಿದೆ ಎಂದು ಅವರು ಹೇಳಿದರು.
ಹಿಂದೂಸ್ತಾನ್ ಸಮಾಚಾರ್ / Rakesh.M.B.
