ಮೆಕ್ಸಿಕೋ ಸಿಟಿ, 11 ಜೂನ್ (ಹಿ.ಸ.) :

ಆ್ಯಂಕರ್ : 2026ರ ಫಿಫಾ ವಿಶ್ವಕಪ್ ಟಿಕೆಟ್ಗಳ ಹೆಚ್ಚಿದ ದರವನ್ನು ಫಿಫಾ ಅಧ್ಯಕ್ಷ ಜಿಯಾನಿ ಇನ್ಫಾಂಟಿನೋ ಸಮರ್ಥಿಸಿಕೊಂಡಿದ್ದು, ಫಿಫಾ ತಪ್ಪು ಮಾಡುತ್ತಿದೆ ಎಂದರೆ ಉತ್ತರ ಅಮೆರಿಕಾದಲ್ಲಿ ಟಿಕೆಟ್ ಮಾರಾಟ ಮಾಡುವ ಬಹುತೇಕ ಎಲ್ಲಾ ಕ್ರೀಡಾ ಆಯೋಜಕರೂ ತಪ್ಪು ಮಾಡುತ್ತಿದ್ದಾರೆ ಎಂದು ಹೇಳಿದ್ದಾರೆ.

ವಿಶ್ವಕಪ್ 2026ರ ಉದ್ಘಾಟನಾ ಪಂದ್ಯಕ್ಕೂ ಮುನ್ನ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಟಿಕೆಟ್ ಬೆಲೆ ನಿಗದಿ, ಭದ್ರತಾ ನಿಯಮಗಳು ಹಾಗೂ ಅಮೆರಿಕ ಪ್ರವೇಶ ನಿರಾಕರಣೆಗೆ ಒಳಗಾದ ಸೋಮಾಲಿ ರೆಫರಿಯ ವಿವಾದ ಕುರಿತು ತಮ್ಮ ನಿಲುವು ಸ್ಪಷ್ಟಪಡಿಸಿದರು.

ವಿಶ್ವಕಪ್ 2026ರ ಗುಂಪು ಹಂತದ ಪಂದ್ಯಗಳ ಟಿಕೆಟ್ ದರ ಸುಮಾರು 140 ಅಮೆರಿಕನ್ ಡಾಲರ್ನಿಂದ ಆರಂಭವಾಗಿದ್ದು, ಫೈನಲ್ ಪಂದ್ಯದ ಟಿಕೆಟ್ಗಳ ಬೆಲೆ ಸಾವಿರಾರು ಡಾಲರ್ಗಳಿಗೆ ತಲುಪಿದೆ. ಕೆಲವು ಫೈನಲ್ ಟಿಕೆಟ್ಗಳ ಬೆಲೆ ಬಳಿಕ ಇನ್ನಷ್ಟು ಹೆಚ್ಚಳ ಕಂಡಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿದ ಇನ್ಫಾಂಟಿನೋ, ಟಿಕೆಟ್ಗಳನ್ನು ಕಡಿಮೆ ದರದಲ್ಲಿ ಮಾರಾಟ ಮಾಡಿದ್ದರೆ ಅವು ಮರುಮಾರಾಟ ಮಾರುಕಟ್ಟೆ ಹಾಗೂ ಅಕ್ರಮ ಟಿಕೆಟ್ ವ್ಯಾಪಾರಿಗಳ ಕೈಗೆ ಸಿಲುಕಿ ಹೆಚ್ಚಿನ ಬೆಲೆಗೆ ಮಾರಾಟವಾಗುತ್ತಿತ್ತು. ಅದರಿಂದ ಫುಟ್ಬಾಲ್ಗೆ ಯಾವುದೇ ಪ್ರಯೋಜನವಾಗುತ್ತಿರಲಿಲ್ಲ ಎಂದು ಹೇಳಿದರು.

ಸ್ಪರ್ಧೆಯ ಸರಾಸರಿ ಟಿಕೆಟ್ ದರವನ್ನು 500 ಡಾಲರ್ಗಿಂತ ಕಡಿಮೆ ಮಟ್ಟದಲ್ಲಿ ಇರಿಸಲಾಗಿದೆ. ಅಮೆರಿಕದ ಇತರ ಪ್ರಮುಖ ಕ್ರೀಡಾಕೂಟಗಳ ಟಿಕೆಟ್ ದರಗಳೊಂದಿಗೆ ಹೋಲಿಸಿದರೆ ಇದು ಅಸಾಮಾನ್ಯವಲ್ಲ ಎಂದು ಅವರು ಸಮರ್ಥಿಸಿಕೊಂಡರು.

ಇತ್ತೀಚೆಗೆ ಅಮೆರಿಕದ ಕೆಲವು ರಾಜ್ಯಗಳಲ್ಲಿ ಟಿಕೆಟ್ ಮಾರಾಟದ ಕುರಿತು ತನಿಖೆ ಆರಂಭವಾಗಿರುವ ಬಗ್ಗೆ ಕೇಳಿದ ಪ್ರಶ್ನೆಗೆ, ಫಿಫಾಗೆ ಯಾವುದೇ ಆತಂಕವಿಲ್ಲ ಎಂದು ಹೇಳಿದರು.

“ಯಾವುದೇ ತನಿಖೆಯನ್ನು ನಾವು ಸ್ವಾಗತಿಸುತ್ತೇವೆ. ಟಿಕೆಟ್ ಮಾರಾಟ ಆರಂಭಿಸುವ ಮೊದಲು ತಜ್ಞರು ಹಾಗೂ ಕಾನೂನು ಸಲಹೆಗಾರರೊಂದಿಗೆ ಸಂಪೂರ್ಣ ಪ್ರಕ್ರಿಯೆಯನ್ನು ಪರಿಶೀಲಿಸಿದ್ದೇವೆ” ಎಂದು ಅವರು ತಿಳಿಸಿದರು.

ಸೋಮಾಲಿ ರೆಫರಿ ವಿವಾದ

ವಿಶ್ವಕಪ್ ಇತಿಹಾಸದಲ್ಲಿ ಮೊದಲ ಬಾರಿಗೆ ಸೋಮಾಲಿಯಾದಿಂದ ಆಯ್ಕೆಯಾದ ರೆಫರಿ ಒಮರ್ ಆರ್ಟಾನ್ ಅವರಿಗೆ ಅಮೆರಿಕ ಪ್ರವೇಶ ನಿರಾಕರಿಸಲಾಗಿದೆ. ಭದ್ರತಾ ಪರಿಶೀಲನೆಗೆ ಸಂಬಂಧಿಸಿದ ಆತಂಕಗಳನ್ನು ಅಮೆರಿಕ ಅಧಿಕಾರಿಗಳು ಕಾರಣವಾಗಿ ಉಲ್ಲೇಖಿಸಿದ್ದಾರೆ.

ಈ ಬಗ್ಗೆ ಪ್ರತಿಕ್ರಿಯಿಸಿದ ಇನ್ಫಾಂಟಿನೋ, ಎಲ್ಲ ವಿಚಾರಗಳನ್ನು ಫಿಫಾ ನಿಯಂತ್ರಿಸಲು ಸಾಧ್ಯವಿಲ್ಲ ಎಂದರು.

“ನಾವು ಪರಿಹಾರ ಕಂಡುಕೊಳ್ಳಲು ಪ್ರಯತ್ನಿಸುತ್ತೇವೆ. ಕೆಲವೊಮ್ಮೆ ಸ್ವಲ್ಪ ಶಾಂತವಾಗಿರುವುದೂ ಅಗತ್ಯ. ಪ್ರತಿಯೊಂದು ವಿಷಯಕ್ಕೂ ತಕ್ಷಣ ಗದ್ದಲ ಎಬ್ಬಿಸುವುದರಿಂದ ಸಮಸ್ಯೆ ಪರಿಹಾರವಾಗುವುದಿಲ್ಲ” ಎಂದು ಹೇಳಿದರು.

ಅಲ್ಲದೆ, ಭದ್ರತೆಯೇ ಅತ್ಯುನ್ನತ ಆದ್ಯತೆ ಆಗಿದ್ದು, ಸರ್ಕಾರಗಳು ಹಾಗೂ ಭದ್ರತಾ ಸಂಸ್ಥೆಗಳ ನಿರ್ಧಾರಗಳನ್ನು ಗೌರವಿಸಲೇಬೇಕು ಎಂದು ಅವರು ಹೇಳಿದರು.

ಇರಾನ್ ತಂಡದ ಆಗಮನ ದೊಡ್ಡ ಸಾಧನೆ

ಪ್ರಸ್ತುತ ಜಾಗತಿಕ ಉದ್ವಿಗ್ನ ಪರಿಸ್ಥಿತಿಯ ನಡುವೆಯೂ ಇರಾನ್ ತಂಡವನ್ನು ವಿಶ್ವಕಪ್ನಲ್ಲಿ ಭಾಗವಹಿಸಲು ಅಮೆರಿಕಕ್ಕೆ ಕರೆತರಲು ಫಿಫಾ ಮಹತ್ವದ ಪಾತ್ರ ವಹಿಸಿದೆ ಎಂದು ಇನ್ಫಾಂಟಿನೋ ಹೇಳಿದರು.

ವಿವಿಧ ಸಂಕೀರ್ಣ ಸನ್ನಿವೇಶಗಳ ನಡುವೆ ಕಾರ್ಯನಿರ್ವಹಿಸುವುದು ಫಿಫಾದ ಜವಾಬ್ದಾರಿಯಾಗಿದ್ದು, ಅದನ್ನು ಯಶಸ್ವಿಯಾಗಿ ನಿರ್ವಹಿಸಲಾಗಿದೆ ಎಂದು ಅವರು ತಿಳಿಸಿದರು.

“ಮಾನವ ಇತಿಹಾಸದ ಅತಿದೊಡ್ಡ ಕ್ರೀಡಾ ಆಯೋಜನೆ”

2026ರ ವಿಶ್ವಕಪ್ ಮಾನವ ಇತಿಹಾಸದಲ್ಲೇ ಅತಿದೊಡ್ಡ ಕ್ರೀಡಾ ಆಯೋಜನೆಯಾಗುವ ಸಾಧ್ಯತೆ ಇದೆ ಎಂದು ಇನ್ಫಾಂಟಿನೋ ವಿಶ್ವಾಸ ವ್ಯಕ್ತಪಡಿಸಿದರು.

ಈ ಟೂರ್ನಿಯಿಂದ ಫಿಫಾಗೆ ಸುಮಾರು 11 ಬಿಲಿಯನ್ ಡಾಲರ್ ಆದಾಯ ನಿರೀಕ್ಷೆಯಿದೆ. ಎಲ್ಲ ಪ್ರಸಾರ ಹಾಗೂ ಸೇವೆಗಳನ್ನು ಸಂಪೂರ್ಣವಾಗಿ ಪಾವತಿ ಆಧಾರಿತವಾಗಿಸಿದ್ದರೆ ಆದಾಯ ಇನ್ನಷ್ಟು ಹೆಚ್ಚಾಗುತ್ತಿತ್ತು. ಆದರೆ ಹಾಗಾದರೆ ವಿಶ್ವದ ಕೋಟ್ಯಂತರ ಅಭಿಮಾನಿಗಳು ವಿಶ್ವಕಪ್ ವೀಕ್ಷಿಸಲು ಸಾಧ್ಯವಾಗುತ್ತಿರಲಿಲ್ಲ ಎಂದು ಅವರು ಹೇಳಿದರು.

56 ವರ್ಷದ ಇನ್ಫಾಂಟಿನೋ 2016ರಿಂದ ಫಿಫಾ ಅಧ್ಯಕ್ಷರಾಗಿ ಕಾರ್ಯನಿರ್ವಹಿಸುತ್ತಿದ್ದು, ಮುಂದಿನ ಅವಧಿಗೂ ಸ್ಪರ್ಧಿಸಲು ಸಿದ್ಧತೆ ನಡೆಸುತ್ತಿದ್ದಾರೆ.

ಹಿಂದೂಸ್ತಾನ್ ಸಮಾಚಾರ್ / Rakesh.M.B.