ಗದಗ, 28 ಮೇ (ಹಿ.ಸ.) :

ಆ್ಯಂಕರ್ : ಸುಡು ಬಿಸಿಲು, ಮಳೆ, ಗಾಳಿ ಎನ್ನದೆ ರಸ್ತೆ ಬದಿಯಲ್ಲೇ ಕುಳಿತು ಜೀವನ ಸಾಗಿಸುವ ಬೀದಿ ಬದಿ ವ್ಯಾಪಾರಿಗಳ ಬದುಕು ಅನೇಕ ಸಂಕಷ್ಟಗಳಿಂದ ಕೂಡಿದೆ. ದಿನನಿತ್ಯದ ಆದಾಯಕ್ಕಾಗಿ ಹೋರಾಡುವ ಈ ಅಸಂಘಟಿತ ವಲಯದ ಶ್ರಮಿಕರ ಬದುಕಿಗೆ ಸಮಾಜ ಮಾನವೀಯ ಸ್ಪಂದನೆ ನೀಡಬೇಕೆಂಬ ಉದ್ದೇಶದಿಂದ ದಾರಿದೀಪ ಮಹಿಳಾ ವಿವಿಧೋದ್ದೇಶಗಳ ಸಂಸ್ಥೆ ವತಿಯಿಂದ ಬೀದಿ ಬದಿ ವ್ಯಾಪಾರಿಗಳಿಗೆ ಹಾಗೂ ವೃದ್ಧರಿಗೆ ಛತ್ರಿ ವಿತರಿಸುವ ಮೂಲಕ ಮಾನವೀಯತೆಯ ಸಂದೇಶ ಸಾರಲಾಯಿತು.

ಗದಗ ನಗರದ ಸಿದ್ದರಾಮೇಶ್ವರ ನಗರ ಹಾಗೂ ಪ್ರಮುಖ ತರಕಾರಿ ಮಾರುಕಟ್ಟೆ ಆವರಣದಲ್ಲಿ ನಡೆದ ‘ಮಾನವೀಯತೆಯ ಕೊಡೆ’ ವಿತರಣಾ ಅಭಿಯಾನಕ್ಕೆ ಚಾಲನೆ ನೀಡಿ ಮಾತನಾಡಿದ ದಾರಿದೀಪ ಮಹಿಳಾ ವಿವಿಧೋದ್ದೇಶಗಳ ಸಂಸ್ಥೆಯ ಅಧ್ಯಕ್ಷೆ ಶ್ರೀಮತಿ ಶಕುಂತಲಾ ಮುಳುಗುಂದ ಅವರು, ಸಮಾಜದ ಬೆನ್ನೆಲುಬಾಗಿರುವ ಶ್ರಮಿಕ ವರ್ಗದ ಬದುಕಿನ ಕಠಿಣತೆ ಬಗ್ಗೆ ಕಳಕಳಿ ವ್ಯಕ್ತಪಡಿಸಿದರು.

“ಬಿಸಿಲು-ಮಳೆಯೆನ್ನದೆ ರಸ್ತೆ ಬದಿಯಲ್ಲಿ ಕುಳಿತು ಜೀವನ ಸಾಗಿಸುವ ಶ್ರಮಿಕ ವರ್ಗದ ಕಷ್ಟಗಳು ವರ್ಣನಾತೀತವಾಗಿವೆ. ತಮ್ಮ ಆರೋಗ್ಯ, ಸುರಕ್ಷತೆ ಮತ್ತು ಕುಟುಂಬದ ಬದುಕಿಗಾಗಿ ಪ್ರತಿದಿನ ಹೋರಾಡುವ ಇಂತಹ ಜನರ ನೆರವಿಗೆ ಸಮಾಜ ಮುಂಚೂಣಿಯಲ್ಲಿ ನಿಲ್ಲಬೇಕು. ವಿಶೇಷವಾಗಿ ವೃದ್ಧರು ಹಾಗೂ ಮಹಿಳಾ ವ್ಯಾಪಾರಿಗಳು ಎದುರಿಸುವ ಸಮಸ್ಯೆಗಳನ್ನು ಗಮನದಲ್ಲಿಟ್ಟುಕೊಂಡು ಈ ಸೇವಾ ಕಾರ್ಯಕ್ರಮ ರೂಪಿಸಲಾಗಿದೆ,” ಎಂದು ಹೇಳಿದರು.

ಇತ್ತೀಚಿನ ದಿನಗಳಲ್ಲಿ ತಾಪಮಾನದ ಏರಿಳಿತ ಹೆಚ್ಚಾಗಿದ್ದು, ಮುಂದಿನ ದಿನಗಳಲ್ಲಿ ಮಳೆಗಾಲ ಆರಂಭವಾಗಲಿರುವ ಹಿನ್ನೆಲೆಯಲ್ಲಿ ಬೀದಿ ಬದಿ ವ್ಯಾಪಾರಿಗಳ ದೈನಂದಿನ ಜೀವನ ಮತ್ತಷ್ಟು ಸಂಕಷ್ಟಕ್ಕೆ ಸಿಲುಕುವ ಸಾಧ್ಯತೆ ಇದೆ. ತಲೆಯ ಮೇಲೆ ಸರಿಯಾದ ಆಶ್ರಯವಿಲ್ಲದೆ ಬಿಸಿಲು, ಮಳೆ ನಡುವೆಯೇ ವ್ಯಾಪಾರ ನಡೆಸುವ ಶ್ರಮಿಕರಿಗೆ ನೆರವಾಗುವ ಉದ್ದೇಶದಿಂದ ಛತ್ರಿಗಳನ್ನು ವಿತರಿಸಲಾಗುತ್ತಿದೆ ಎಂದು ಅವರು ತಿಳಿಸಿದರು.

ಈ ಸೇವಾ ಕಾರ್ಯಕ್ಕೆ ಗದಗ ಜಿಲ್ಲಾ ಸವಿತಾ ಸಮಾಜದ ಜಿಲ್ಲಾಧ್ಯಕ್ಷರು ಹಾಗೂ ಸಮಾಜ ಸೇವಕರಾದ ಕೃಷ್ಣಾ ಎಚ್. ಹಡಪದ ಅವರು ವಿಶೇಷ ಆರ್ಥಿಕ ಸಹಕಾರ ನೀಡಿದ್ದು, ಕಾರ್ಯಕ್ರಮಕ್ಕೆ ವಿಶೇಷ ಮೆರುಗು ತಂದಿತು. ಸಮಾಜಮುಖಿ ಕಾರ್ಯಗಳಲ್ಲಿ ಸದಾ ಸಕ್ರಿಯರಾಗಿರುವ ಅವರು ಶ್ರಮಿಕರ ಪರವಾದ ಕಾಳಜಿಯನ್ನು ಮತ್ತೊಮ್ಮೆ ವ್ಯಕ್ತಪಡಿಸಿದರು.

ಕಾರ್ಯಕ್ರಮದಲ್ಲಿ ಸಂಸ್ಥೆಯ ಪ್ರಮುಖ ಪದಾಧಿಕಾರಿಗಳಾದ ಜ್ಯೋತಿ ದೇಸಾಯಿ ಗೌಡರ, ವಿಜಯಲಕ್ಷ್ಮಿ ಅಸೂಟಿ, ರಾಜೇಶ್ವರಿ ಕುಲಕರ್ಣಿ, ಶಶಿಕಲಾ ಗಾವಡಿ ಹಾಗೂ ರಮ್ಯಾ ಗಾವಡಿ ಅವರು ಮಾತನಾಡಿ, ಕೇವಲ ಭಾಷಣ ಅಥವಾ ಪ್ರಚಾರಕ್ಕೆ ಸೀಮಿತವಾಗದೆ ನೇರವಾಗಿ ತಳಮಟ್ಟದ ಜನರ ಸಮಸ್ಯೆಗಳಿಗೆ ಸ್ಪಂದಿಸುವ ಕೃಷ್ಣಾ ಎಚ್. ಹಡಪದ ಅವರ ಸಮಾಜಮುಖಿ ಮನೋಭಾವ ಶ್ಲಾಘನೀಯವಾಗಿದೆ ಎಂದು ಅಭಿಪ್ರಾಯಪಟ್ಟರು.

“ಇಂದಿನ ಸಮಾಜದಲ್ಲಿ ಹಲವರು ಸಮಸ್ಯೆಗಳ ಬಗ್ಗೆ ಮಾತನಾಡುತ್ತಾರೆ. ಆದರೆ ಸಮಸ್ಯೆ ಎದುರಿಸುತ್ತಿರುವ ಜನರ ನಡುವೆ ಹೋಗಿ ಅವರ ಅಗತ್ಯಗಳನ್ನು ಅರಿತು ನೆರವಾಗುವವರು ವಿರಳ. ಅಂತಹ ಅಪರೂಪದ ಸಾಮಾಜಿಕ ಕಳಕಳಿಯನ್ನು ಕೃಷ್ಣಾ ಎಚ್. ಹಡಪದ ಅವರು ತೋರಿಸುತ್ತಿದ್ದಾರೆ. ಇಂತಹ ಮಾನವೀಯ ಸೇವೆಗಳು ಸಮಾಜದಲ್ಲಿ ವಿಶ್ವಾಸ ಮೂಡಿಸುತ್ತವೆ,” ಎಂದು ಅವರು ಹೇಳಿದರು.

ಮುಖ್ಯ ಅತಿಥಿಯಾಗಿ ಪಾಲ್ಗೊಂಡಿದ್ದ ದಿ ಕಾರ್ಪೊರೇಷನ್ ಕ್ರೆಡಿಟ್ ಸೌಹಾರ್ದ ಸಹಕಾರಿ ಸಂಘದ ಉಪಾಧ್ಯಕ್ಷ ನಾಗರಾಜ ಗಾವಡಿ ಅವರು ಮಾತನಾಡಿ, ಸಮಾಜದಲ್ಲಿ ದೊಡ್ಡ ಬದಲಾವಣೆಗಳನ್ನು ತರಲು ಯಾವಾಗಲೂ ದೊಡ್ಡ ಯೋಜನೆಗಳೇ ಬೇಕಾಗುವುದಿಲ್ಲ. ಸಣ್ಣ ಮಟ್ಟದ ಸೇವಾ ಕಾರ್ಯಗಳೂ ಜನರ ಬದುಕಿನಲ್ಲಿ ದೊಡ್ಡ ಬದಲಾವಣೆಗೆ ಕಾರಣವಾಗುತ್ತವೆ ಎಂದು ಅಭಿಪ್ರಾಯಪಟ್ಟರು.

“ಒಬ್ಬ ಶ್ರಮಿಕನಿಗೆ ಬಿಸಿಲಿನಿಂದ ರಕ್ಷಣೆ ಸಿಗುವಂತೆ ಒಂದು ಕೊಡೆ ನೀಡುವುದು ಕೇವಲ ವಸ್ತು ವಿತರಣೆ ಅಲ್ಲ; ಅದು ಮಾನವೀಯತೆಯ ಪ್ರತೀಕವಾಗಿದೆ. ಇಂತಹ ಸೇವಾ ಚಟುವಟಿಕೆಗಳು ಸಮಾಜದಲ್ಲಿ ಸಹಾನುಭೂತಿ ಮತ್ತು ಸಾಮಾಜಿಕ ಜವಾಬ್ದಾರಿಯನ್ನು ಹೆಚ್ಚಿಸುತ್ತವೆ,” ಎಂದರು.

ಕಾರ್ಯಕ್ರಮದಲ್ಲಿ ಸಿದ್ದರಾಮೇಶ್ವರ ನಗರ ಹಾಗೂ ತರಕಾರಿ ಮಾರುಕಟ್ಟೆ ಪ್ರದೇಶದ ನೂರಾರು ಮಹಿಳಾ ಮತ್ತು ಪುರುಷ ಶ್ರಮಿಕರು ಭಾಗವಹಿಸಿದ್ದರು. ದೇವಿ, ಲಕ್ಷ್ಮಿ ಸೇರಿದಂತೆ ಹಲವು ವೃದ್ಧರು ಹಾಗೂ ಬೀದಿ ಬದಿ ವ್ಯಾಪಾರಿಗಳು ಕೊಡೆಗಳನ್ನು ಸ್ವೀಕರಿಸಿ ಸಂತಸ ವ್ಯಕ್ತಪಡಿಸಿದರು.

ಕೊಡೆಗಳನ್ನು ಪಡೆದ ಅನೇಕ ವೃದ್ಧರು ಹಾಗೂ ಮಹಿಳಾ ವ್ಯಾಪಾರಿಗಳು ಮಾತನಾಡಿ, ದಿನನಿತ್ಯ ಸುಡು ಬಿಸಿಲಿನಲ್ಲಿ ವ್ಯಾಪಾರ ನಡೆಸುವುದು ಬಹಳ ಕಷ್ಟಕರವಾಗಿದೆ. ಮಳೆಗಾಲದಲ್ಲೂ ವ್ಯಾಪಾರ ನಡೆಸಬೇಕಾಗಿರುವುದರಿಂದ ಇಂತಹ ನೆರವು ನಮಗೆ ಅತ್ಯಂತ ಉಪಯುಕ್ತವಾಗಿದೆ ಎಂದು ಹೇಳಿದರು. ದಾರಿದೀಪ ಮಹಿಳಾ ವಿವಿಧೋದ್ದೇಶಗಳ ಸಂಸ್ಥೆ ಹಾಗೂ ಕೃಷ್ಣಾ ಎಚ್. ಹಡಪದ ಅವರ ಮಾನವೀಯ ಕಾರ್ಯವನ್ನು ಅವರು ಕೃತಜ್ಞತೆಯಿಂದ ಸ್ಮರಿಸಿದರು.

“ಶ್ರಮಿಕರ ಬೆವರಿನ ಹನಿಗೆ ಗೌರವ ನೀಡುವುದು ನಮ್ಮ ಕರ್ತವ್ಯ” : ಕೃಷ್ಣಾ ಎಚ್. ಹಡಪದ

“ಬೀದಿ ಬದಿ ವ್ಯಾಪಾರಿಗಳು ಸಮಾಜದ ಅತ್ಯಂತ ಪ್ರಾಮಾಣಿಕ ಶ್ರಮಿಕರು. ಸುಡು ಬಿಸಿಲು, ಬಿರುಗಾಳಿ, ಮಳೆಯ ನಡುವೆಯೂ ಅವರು ರಸ್ತೆ ಬದಿಯಲ್ಲಿ ಕುಳಿತು ದುಡಿಯುವುದು ಕೇವಲ ಹೊಟ್ಟೆಪಾಡಿಗಾಗಿ ಮಾತ್ರವಲ್ಲ; ಸಮಾಜದ ದೈನಂದಿನ ಅಗತ್ಯಗಳನ್ನು ಪೂರೈಸುವ ಜವಾಬ್ದಾರಿಯನ್ನೂ ಅವರು ನಿರ್ವಹಿಸುತ್ತಿದ್ದಾರೆ. ಇಂತಹ ಶ್ರಮಜೀವಿಗಳಿಗೆ, ವಿಶೇಷವಾಗಿ ವೃದ್ಧರಿಗೆ ಕನಿಷ್ಠ ಸುರಕ್ಷತೆ ಒದಗಿಸುವುದು ನಮ್ಮ ಸಾಮಾಜಿಕ ಕರ್ತವ್ಯವಾಗಿದೆ. ದಾರಿದೀಪ ಸಂಸ್ಥೆಯ ಸಹೋದರಿಯರೊಂದಿಗೆ ಸೇರಿ ಈ ಸಣ್ಣ ಸೇವಾ ಕಾರ್ಯದಲ್ಲಿ ಭಾಗಿಯಾಗಲು ಅವಕಾಶ ಸಿಕ್ಕಿರುವುದು ನನ್ನ ಸೌಭಾಗ್ಯ. ಮುಂದಿನ ದಿನಗಳಲ್ಲೂ ಜನಪರ ಮತ್ತು ಮಾನವೀಯ ಕಾರ್ಯಕ್ರಮಗಳು ನಿರಂತರವಾಗಿ ಮುಂದುವರಿಯಲಿವೆ,” ಎಂದು ಸಮಾಜ ಸೇವಕರು ಹಾಗೂ ಗದಗ ಜಿಲ್ಲಾ ಸವಿತಾ ಸಮಾಜದ ಜಿಲ್ಲಾಧ್ಯಕ್ಷರಾದ ಕೃಷ್ಣಾ ಎಚ್. ಹಡಪದ ಹೇಳಿದರು.

ಹಿಂದೂಸ್ತಾನ್ ಸಮಾಚಾರ್ / lalita MP