ನವದೆಹಲಿ, 21 ಫೆಬ್ರವರಿ (ಹಿ.ಸ.) :

ಆ್ಯಂಕರ್ : ದೇಶದ ಬದಲಾಗುತ್ತಿರುವ ಆರ್ಥಿಕ ಸ್ಥಿತಿಗತಿ ಮತ್ತು ಜಾಗತಿಕ ವ್ಯಾಪಾರ ಪ್ರವೃತ್ತಿಗಳನ್ನು ಸಮರ್ಪಕವಾಗಿ ಪ್ರತಿಬಿಂಬಿಸುವ ಉದ್ದೇಶದಿಂದ ಕೇಂದ್ರ ಸರ್ಕಾರವು ಭಾರತದ ವ್ಯಾಪಾರ ಸೂಚ್ಯಂಕಗಳ ಮೂಲ ವರ್ಷವನ್ನು 2012-13ರಿಂದ 2022-23ನೇ ಹಣಕಾಸು ವರ್ಷಕ್ಕೆ ಪರಿಷ್ಕರಿಸಿದೆ.

ಈ ಕುರಿತು ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯ ಪ್ರಕಟಣೆ ಹೊರಡಿಸಿದ್ದು, ಆರ್ಥಿಕತೆಯಲ್ಲಿನ ರಚನಾತ್ಮಕ ಬದಲಾವಣೆಗಳು, ಸರಕುಗಳ ಬದಲಾಗುತ್ತಿರುವ ಸಂಯೋಜನೆ, ಜಾಗತಿಕ ಪೂರೈಕೆ ಸರಪಳಿಗಳಲ್ಲಿನ ಪರಿವರ್ತನೆಗಳು ಮತ್ತು ನವೀನ ವ್ಯವಹಾರ ಮಾದರಿಗಳನ್ನು ಪರಿಗಣಿಸಿ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ತಿಳಿಸಿದೆ.

ಸೂಚ್ಯಂಕಗಳ ಸಂಗ್ರಹಣೆ ಮತ್ತು ಪ್ರಕಟಣೆ ಕಾರ್ಯವನ್ನು ಸಚಿವಾಲಯದ ಅಂಗಸಂಸ್ಥೆಯಾದ ವಾಣಿಜ್ಯ ಗುಪ್ತಚರ ಮತ್ತು ಅಂಕಿಅಂಶಗಳ ಮಹಾ ನಿರ್ದೇಶನಾಲಯ ನಿರ್ವಹಿಸುತ್ತದೆ. ದೇಶದ ಬಾಹ್ಯ ವ್ಯಾಪಾರದಲ್ಲಿನ ಬೆಲೆ ಚಲನೆಗಳನ್ನು ಅರ್ಥಮಾಡಿಕೊಳ್ಳಲು, ರಾಷ್ಟ್ರೀಯ ಖಾತೆಗಳನ್ನು ಸಿದ್ಧಪಡಿಸಲು ಮತ್ತು ವ್ಯಾಪಾರದ ನಿಯಮಗಳನ್ನು ನಿರ್ಧರಿಸಲು ಈ ಸೂಚ್ಯಂಕಗಳು ಪ್ರಮುಖ ಆರ್ಥಿಕ ಮಾನದಂಡಗಳಾಗಿ ಪರಿಗಣಿಸಲ್ಪಟ್ಟಿವೆ.

ನವೀಕರಿಸಲಾದ ಸರಣಿಯಲ್ಲಿ 2022-23 = 100 ಅನ್ನು ಹೊಸ ಮೂಲ ವರ್ಷದ ಸೂಚ್ಯಂಕವಾಗಿ ಪರಿಗಣಿಸಲಾಗಿದೆ. ಈ ಬದಲಾವಣೆಯಿಂದ ವ್ಯಾಪಾರ ಅಂಕಿಅಂಶಗಳ ಪ್ರಸ್ತುತತೆ ಮತ್ತು ವಿಶ್ವಾಸಾರ್ಹತೆ ಹೆಚ್ಚಲಿದೆ ಎಂದು ಸಚಿವಾಲಯ ಅಭಿಪ್ರಾಯಪಟ್ಟಿದೆ. ನೀತಿ ನಿರೂಪಕರು, ಸಂಶೋಧಕರು ಮತ್ತು ಆರ್ಥಿಕ ತಜ್ಞರಿಗೆ ನಿಖರ ಮತ್ತು ಸಮಕಾಲೀನ ಡೇಟಾ ಲಭ್ಯವಾಗಲು ಇದು ಸಹಾಯಕವಾಗಲಿದೆ.

ಬದಲಾಗುತ್ತಿರುವ ಜಾಗತಿಕ ಆರ್ಥಿಕ ಪರಿಸ್ಥಿತಿಗೆ ಅನುಗುಣವಾಗಿ ಡೇಟಾವನ್ನು ಹೊಂದಿಸಲು ಈ ನವೀಕರಣ ಮಹತ್ವದ ಹೆಜ್ಜೆಯಾಗಿದೆ ಎಂದು ವಾಣಿಜ್ಯ ಸಚಿವಾಲಯ ಸ್ಪಷ್ಟಪಡಿಸಿದೆ.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa