ಗಾಂಧಿನಗರ, 13 ಜನವರಿ (ಹಿ.ಸ.);
ಆ್ಯಂಕರ್:
ಗುಜರಾತ್ನ ಮೊದಲ ಬಯೋ-ಸೇಫ್ಟಿ ಲೆವೆಲ್–4 (ಬಿಎಸ್ಎಲ್–4) ಪ್ರಯೋಗಾಲಯ ದೇಶದ ಆರೋಗ್ಯ ಭದ್ರತೆ ಹಾಗೂ ಜೈವಿಕ ಸುರಕ್ಷತಾ ವಲಯಕ್ಕೆ ಹೊಸ ದಿಕ್ಕು ನೀಡಲಿದೆ ಎಂದು ಕೇಂದ್ರ ಗೃಹ ಸಚಿವ ಅಮಿತ್ ಶಾ ಹೇಳಿದರು.
ಗಾಂಧಿನಗರದಲ್ಲಿ ರಾಜ್ಯ ಸರ್ಕಾರ ನಿರ್ಮಿಸಲಿರುವ ದೇಶದ ಮೊದಲ ಅತ್ಯಾಧುನಿಕ ಬಿಎಸ್ಎಲ್–4 ಪ್ರಯೋಗಾಲಯ ಮತ್ತು ಪ್ರಾಣಿ ಜೈವಿಕ ಸುರಕ್ಷತಾ ಸೌಲಭ್ಯಕ್ಕೆ ಶಂಕುಸ್ಥಾಪನೆ ನೆರವೇರಿಸಿ ಮಾತನಾಡಿದ ಅವರು, ಇದು ಭವಿಷ್ಯದಲ್ಲಿ ಮಾರಕ ವೈರಸ್ಗಳ ವಿರುದ್ಧ ಭಾರತದ ಬಲವಾದ ರಕ್ಷಣಾ ಗುರಾಣಿಯಾಗಲಿದೆ ಎಂದರು. ₹362 ಕೋಟಿ ವೆಚ್ಚದಲ್ಲಿ ಈ ಪ್ರಯೋಗಾಲಯವನ್ನು ಗಾಂಧಿನಗರದಲ್ಲಿ ನಿರ್ಮಿಸಲಾಗುತ್ತಿದೆ.
ಪುಣೆ ಬಳಿಕ ಇದು ದೇಶದ ಎರಡನೇ ಉನ್ನತ ಮಟ್ಟದ ಪ್ರಯೋಗಾಲಯವಾದರೂ, ರಾಜ್ಯ ಸರ್ಕಾರದ ಉಪಕ್ರಮದಿಂದ ಸ್ಥಾಪನೆಯಾಗುತ್ತಿರುವ ಮೊದಲ ಬಿಎಸ್ಎಲ್–4 ಪ್ರಯೋಗಾಲಯ ಎಂಬುದು ಇದರ ವಿಶೇಷತೆಯಾಗಿದೆ ಎಂದು ಶಾ ಹೇಳಿದರು. ಇದರಿಂದ ಮಾದರಿ ಪರೀಕ್ಷೆಗಾಗಿ ವಿದೇಶಗಳ ಮೇಲೆ ಅವಲಂಬನೆ ಕಡಿಮೆಯಾಗಲಿದ್ದು, ಸ್ವಾವಲಂಬಿ ಭಾರತ ಗುರಿ ಮತ್ತಷ್ಟು ಬಲಪಡಲಿದೆ ಎಂದರು.
ಈ ಪ್ರಯೋಗಾಲಯವು “ಒಂದು ಆರೋಗ್ಯ ಮಿಷನ್” ಅಡಿಯಲ್ಲಿ ಪ್ರಾಣಿಗಳಿಂದ ಮನುಷ್ಯರಿಗೆ ಹರಡುವ ರೋಗಗಳ ತಡೆಗೆ ಸಹಕಾರಿಯಾಗಲಿದೆ. 2014ರಲ್ಲಿ $10 ಬಿಲಿಯನ್ ಇದ್ದ ಭಾರತದ ಜೈವಿಕ ಆರ್ಥಿಕತೆ 2024ಕ್ಕೆ $166 ಬಿಲಿಯನ್ಗೆ ಏರಿರುವುದನ್ನು ಶಾ ಉಲ್ಲೇಖಿಸಿದರು.
ಈ ಸಂದರ್ಭದಲ್ಲಿ ಕೇಂದ್ರ ಜೈವಿಕ ತಂತ್ರಜ್ಞಾನ ಇಲಾಖೆಯು ಗುಜರಾತ್ ಸರ್ಕಾರಕ್ಕೆ ಉದ್ದೇಶಿತ ಪತ್ರ (LOI) ಹಸ್ತಾಂತರಿಸಿ, ಗುಜರಾತ್ ಜೈವಿಕ ತಂತ್ರಜ್ಞಾನ ಸಂಶೋಧನಾ ಕೇಂದ್ರವನ್ನು ‘ರಾಷ್ಟ್ರೀಯ ಹೈ ಕಂಟೈನ್ಮೆಂಟ್ ರೋಗಕಾರಕ ಸಂಶೋಧನಾ ಸೌಲಭ್ಯ ಕೇಂದ್ರ’ ಎಂದು ಘೋಷಿಸಿತು.
---------------
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
