ಬೆಂಗಳೂರು, 24 ಆಗಸ್ಟ್ (ಹಿ.ಸ.) :

ಆ್ಯಂಕರ್ : ಗಣೇಶ ಚತುರ್ಥಿ ಹಬ್ಬ ಸಮೀಪಿಸುತ್ತಿದ್ದು, ಮನೆಮನೆಗಳಲ್ಲಿ ತಯಾರಿಯ ಚಟುವಟಿಕೆಗಳು ಜೋರಾಗಿ ಸಾಗುತ್ತಿವೆ. ಗಣೇಶನಿಗೆ ಅಚ್ಚುಮೆಚ್ಚಿನ ನೈವೇದ್ಯವೆಂದರೆ ಮೋದಕ. ಸಂಪ್ರದಾಯದಂತೆ ಬೆಲ್ಲ-ಕೊಬ್ಬರಿ ಪೂರಣದ ಮೋದಕವನ್ನೇ ತಯಾರಿಸುವ ಪದ್ಧತಿ ಇದ್ದರೂ, ಇತ್ತೀಚಿನ ದಿನಗಳಲ್ಲಿ ಜನರು ಬಗೆಬಗೆಯ ಮೋದಕಗಳನ್ನು ಸಿದ್ಧಪಡಿಸಿ ಹಬ್ಬದ ಸಿಹಿ ಸಂಭ್ರಮವನ್ನು ಹೆಚ್ಚಿಸುತ್ತಿದ್ದಾರೆ.

ಡ್ರೈ ಫ್ರೂಟ್ಸ್ ಮೋದಕ

ಆರೋಗ್ಯಕರ ಹಾಗೂ ಶಕ್ತಿದಾಯಕವಾಗಿರುವ ಈ ಮೋದಕ ತಯಾರಿಸಲು ಗೋಡಂಬಿ, ಬಾದಾಮಿ, ಪಿಸ್ತಾ, ಒಣ ದ್ರಾಕ್ಷಿ, ಖರ್ಜೂರ, ಕೊಬ್ಬರಿ ತುರಿ ಹಾಗೂ ತುಪ್ಪ ಬಳಸಲಾಗುತ್ತದೆ. ಈ ಮಿಶ್ರಣವನ್ನು ಮೋದಕ ಅಚ್ಚಿನಲ್ಲಿ ಒತ್ತಿ ಮಾಡಿದರೆ ಪೌಷ್ಟಿಕತೆಯುಳ್ಳ ಡ್ರೈ ಫ್ರೂಟ್ಸ್ ಮೋದಕ ಸಿದ್ಧ.

ರೋಸ್ ರಸ್‌ಮಲೈ ಮೋದಕ

ಹಬ್ಬದ ಸಂಭ್ರಮಕ್ಕೆ ರುಚಿ ಸೇರಿಸುವ ಈ ಮೋದಕ ತಯಾರಿಕೆಯಲ್ಲಿ ಪನ್ನೀರ್, ಹಾಲಿನ ಪುಡಿ, ಸಕ್ಕರೆ, ಏಲಕ್ಕಿ, ಪಿಸ್ತಾ ಹಾಗೂ ಗುಲಾಬಿ ದಳಗಳು ಪ್ರಮುಖವಾಗುತ್ತವೆ. ಪಿಂಕ್ ಫುಡ್ ಕಲರ್ ಬಳಸಿ ಸಿದ್ಧವಾಗುವ ಈ ಮೋದಕದ ಆಕರ್ಷಕ ಬಣ್ಣ ಹಾಗೂ ವಿಶಿಷ್ಟ ಸುವಾಸನೆ ಹಬ್ಬಕ್ಕೆ ವಿಭಿನ್ನ ಸೊಬಗು ನೀಡುತ್ತದೆ.

ಅಂಜೂರದ ಮೋದಕ

ಬಾದಾಮಿ, ಗೋಡಂಬಿ, ಪಿಸ್ತಾ, ಒಣ ದ್ರಾಕ್ಷಿ, ಖರ್ಜೂರ ಹಾಗೂ ಅಂಜೂರದ ಸಮನ್ವಯದಿಂದ ತಯಾರಾಗುವ ಈ ಮೋದಕಕ್ಕೆ ಗಸೆಗಸೆ ಹಾಗೂ ತೆಂಗಿನ ತುರಿಯ ರುಚಿ ಸೇರುತ್ತದೆ. ಅಂಜೂರದ ಮೋದಕ ಹಬ್ಬಕ್ಕೆ ಆರೋಗ್ಯ ಮತ್ತು ರುಚಿಯ ಸಮನ್ವಯವನ್ನು ತರುತ್ತದೆ.

ಸಾಂಪ್ರದಾಯಿಕ ಬೆಲ್ಲ-ಕೊಬ್ಬರಿ ಮೋದಕ

ಅಕ್ಕಿ ಹಿಟ್ಟಿನಿಂದ ತಯಾರಿಸಲಾದ ಹಾಳೆಯೊಳಗೆ ಬೆಲ್ಲ-ಕೊಬ್ಬರಿ ಪೂರಣ ತುಂಬಿ, ಸ್ಟೀಮ್ ಮಾಡಿದರೆ ಸಾಂಪ್ರದಾಯಿಕ ಉಕ್ಕಡೇ ಮೋದಕ ಸಿದ್ಧವಾಗುತ್ತದೆ. ಗಣೇಶನಿಗೆ ಅತ್ಯಂತ ಪ್ರಿಯವಾದ ಈ ಮೋದಕವನ್ನೇ ಹೆಚ್ಚಿನ ಮನೆಮನೆಗಳಲ್ಲಿ ವಿಶೇಷವಾಗಿ ತಯಾರಿಸಲಾಗುತ್ತದೆ.

ಚಾಕೊಲೇಟ್ ಮೋದಕ

ಮಕ್ಕಳಿಗಾಗಿ ಹೊಸ ಪ್ರಯೋಗವಾಗಿ ಬಿಸ್ಕಟ್ ಪುಡಿ, ಹಾಲಿನ ಪುಡಿ, ಚಾಕೊಲೇಟ್ ಸಿರಪ್ ಹಾಗೂ ಡ್ರೈ ಫ್ರೂಟ್ಸ್ ಸೇರಿಸಿ ತಯಾರಿಸುವ ಚಾಕೊಲೇಟ್ ಮೋದಕ ಹೆಚ್ಚು ಜನಪ್ರಿಯವಾಗುತ್ತಿದೆ. ಮಕ್ಕಳಿಗೆ ಇದು ವಿಶೇಷ ಆಕರ್ಷಣೆ.

ನಗರದ ಮಿಠಾಯಿ ಅಂಗಡಿಗಳು ಹಾಗೂ ಹೋಟೆಲ್‌ಗಳಲ್ಲಿಯೂ ಈಗ ಹಲವು ಬಗೆಯ ಮೋದಕಗಳು ಲಭ್ಯವಾಗುತ್ತಿವೆ. ಸಾಂಪ್ರದಾಯಿಕ ಮತ್ತು ಹೊಸ ಪ್ರಯೋಗಗಳ ಸಮನ್ವಯದಲ್ಲಿ ತಯಾರಾಗುತ್ತಿರುವ ಮೋದಕ ಹಬ್ಬದ ಸಿಹಿ ಸಂಭ್ರಮಕ್ಕೆ ವಿಶೇಷ ಮೆರುಗು ನೀಡುತ್ತಿದೆ.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa