ಬುಚಾರೆಸ್ಟ್, 04 ನವೆಂಬರ್ (ಹಿ.ಸ.) :

ಆ್ಯಂಕರ್ : ಭಾರತ ಮತ್ತು ರೊಮೇನಿಯಾ ದೇಶಗಳು ಪರಸ್ಪರ ವ್ಯಾಪಾರ, ಹೂಡಿಕೆ ಮತ್ತು ಪೂರೈಕೆ ಸರಪಳಿ ಸಹಕಾರವನ್ನು ವಿಸ್ತರಿಸಲು ಒಪ್ಪಿಕೊಂಡಿವೆ.

ಮಂಗಳವಾರ ಬುಚಾರೆಸ್ಟ್‌ನಲ್ಲಿ ನಡೆದ ದ್ವಿಪಕ್ಷೀಯ ಸಭೆಯಲ್ಲಿ ಭಾರತದ ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ರಾಜ್ಯ ಸಚಿವ ಜಿತಿನ್ ಪ್ರಸಾದ ಮತ್ತು ರೊಮೇನಿಯಾದ ವಿದೇಶಾಂಗ ಸಚಿವೆ ಓನಾ-ಸಿಲ್ವಿಯಾ ಟಸೋಯಿಯು ಭಾಗವಹಿಸಿದ್ದರು.

ಸಭೆಯಲ್ಲಿ ಈ ವರ್ಷದಲ್ಲೇ ಭಾರತ–ಯುರೋಪಿಯನ್ ಒಕ್ಕೂಟ (EU) ಮುಕ್ತ ವ್ಯಾಪಾರ ಒಪ್ಪಂದವನ್ನು (FTA) ಅಂತಿಮಗೊಳಿಸುವ ಗುರಿ ನಿಗದಿಪಡಿಸಲಾಯಿತು. ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯದ ಪ್ರಕಟಣೆಯ ಪ್ರಕಾರ, ಇಂಧನ, ಎಂಜಿನಿಯರಿಂಗ್, ಔಷಧ ಮತ್ತು ಸೆರಾಮಿಕ್ಸ್ ಕ್ಷೇತ್ರಗಳಲ್ಲಿ ಸಹಕಾರವನ್ನು ವಿಸ್ತರಿಸುವ ಕುರಿತು ಚರ್ಚೆ ನಡೆದಿದೆ. ಹೂಡಿಕೆದಾರರಿಗೆ ಅನುಕೂಲಕರ ವಾತಾವರಣ ಕಲ್ಪಿಸುವುದು ಹಾಗೂ ಮಾರುಕಟ್ಟೆ ಪ್ರವೇಶ ಸುಲಭಗೊಳಿಸುವ ಕ್ರಮಗಳ ಬಗ್ಗೆ ಎರಡೂ ರಾಷ್ಟ್ರಗಳು ಒಪ್ಪಿಕೊಂಡಿವೆ.

ಸಭೆಯಲ್ಲಿ ದ್ವಿಪಕ್ಷೀಯ ಆರ್ಥಿಕ ಸಂಬಂಧಗಳ ವಿಶ್ಲೇಷಣೆಯೂ ನಡೆಯಿತು. 2024-25ನೇ ಆರ್ಥಿಕ ವರ್ಷದಲ್ಲಿ ರೊಮೇನಿಯಾಗೆ ಭಾರತದ ರಫ್ತು US$1.03 ಬಿಲಿಯನ್ ಮೀರುವ ನಿರೀಕ್ಷೆಯಿದ್ದು, 2023-24ರಲ್ಲಿ ಒಟ್ಟು ದ್ವಿಪಕ್ಷೀಯ ವ್ಯಾಪಾರ US$2.98 ಬಿಲಿಯನ್ ತಲುಪುವ ಸಾಧ್ಯತೆ ಇದೆ.

ಅದೇ ರೀತಿ ಪೂರೈಕೆ ಸರಪಳಿಗಳ ವೈವಿಧ್ಯೀಕರಣ, ಉತ್ಪಾದನಾ ಪಾಲುದಾರಿಕೆ ವಿಸ್ತರಣೆ, ಹಾಗೂ ಮಾನದಂಡ ಮತ್ತು ಪರೀಕ್ಷಾ ವಿಧಾನಗಳ ಸರಳೀಕರಣ ಕುರಿತೂ ಒತ್ತು ನೀಡಲಾಯಿತು. ಉಭಯ ರಾಷ್ಟ್ರಗಳು ಉನ್ನತ ಮಟ್ಟದ ಸಂಪರ್ಕಗಳನ್ನು ಮುಂದುವರಿಸುವುದು, ವ್ಯಾಪಾರ ಪ್ರಕ್ರಿಯೆಗಳನ್ನು ಸರಳಗೊಳಿಸುವುದು ಮತ್ತು ಹೂಡಿಕೆದಾರರ ಪ್ರವೇಶ ಸುಲಭಗೊಳಿಸುವ ಸಲುವಾಗಿ ನಿಯಮಿತ ಸಂವಾದ ಚೌಕಟ್ಟನ್ನು ಸ್ಥಾಪಿಸಲು ಸಹ ಒಪ್ಪಿಕೊಂಡಿವೆ.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa