ನವದೆಹಲಿ, 25 ಸೆಪ್ಟೆಂಬರ್(ಹಿ.ಸ.) :

ಆ್ಯಂಕರ್ : ಪೆಟ್ರೋಲ್, ಡೀಸೆಲ್ ಇತ್ಯಾದಿ ಪೆಟ್ರೋಲಿಯಂ ಉತ್ಪನ್ನಗಳಿಂದ ಪರಿಸರಕ್ಕೆ ಹಾನಿಯಾಗುತ್ತದೆ. ಇದನ್ನು ತಪ್ಪಿಸಲು ಕೇಂದ್ರ ಸರ್ಕಾರ ಎಲೆಕ್ಟ್ರಿಕ್ ವಾಹನಗಳ ಜೊತೆಗೆ ಪರಿಸರಕ್ಕೆ ಹಾನಿಯಾಗದ ಇತರ ಪರ್ಯಾಯ ಇಂಧನಗಳಿಗೆ ಒತ್ತು ಕೊಡುತ್ತಿದೆ.ಈ ಪರ್ಯಾಯ ಇಂಧನಗಳಲ್ಲಿ ಎಥನಾಲ್ ಕೂಡ ಒಂದು. ಸದ್ಯ ಕಬ್ಬು ಮತ್ತು ಜೋಳದಿಂದ ಎಥನಾಲ್ ಅನ್ನು ಹೆಚ್ಚಾಗಿ ತಯಾರಿಸಲಾಗುತ್ತಿದೆ. ಹಾಗೆಯೇ, ಸ್ಟಾರ್ಚ್ ಅಂಶ ಇರುವ ಆಲೂಗಡ್ಡೆ, ಮರಗೆಣಸು, ತರಕಾರಿಗಳಿಂದಲೂ ಎಥನಾಲ್ ಉತ್ಪಾದನೆ ಮಾಡಬಹುದು ಎಂಬುದು ಸಂಶೋಧನೆಗಳಿಂದ ದೃಢಪಟ್ಟಿದೆ. ಇದೀಗ ಆಲೂಗಡ್ಡೆಯಿಂದ ಎಥನಾಲ್ ಉತ್ಪಾದನೆ ಮಾಡುವ ತಂತ್ರಜ್ಞಾನವನ್ನು ಕೇಂದ್ರೀಯ ಆಲೂ ಸಂಶೋಧನಾ ಸಂಸ್ಥೆ ಅಭಿವೃದ್ಧಿಪಡಿಸಿದೆ. ಇದರ ಪ್ರಾಯೋಗಿಕ ಘಟಕ ಸದ್ಯದಲ್ಲೇ ಸ್ಥಾಪನೆ ಆಗಲಿದೆ.

ಶಿಮ್ಲಾ ಮೂಲದ ಸಿಪಿಆರ್​ಐ ಸಂಸ್ಥೆ ಆಲೂಗಡ್ಡೆ ತ್ಯಾಜ್ಯವನ್ನು ಎಥನಾಲ್ ಆಗಿ ಹೇಗೆ ಪರಿವರ್ತಿಸಬಹುದು ಎಂದು ಪ್ರಯೋಗಾಲಯದಲ್ಲಿ ಯಶಸ್ವಿ ಪರೀಕ್ಷೆಗಳನ್ನು ಮಾಡಿದೆ. ಈ ತಂತ್ರಜ್ಞಾನ ಸರಿಯಾಗಿ ಕೆಲಸ ಮಾಡುತ್ತದಾ ಇಲ್ಲವಾ ಎಂಬುದನ್ನು ಪರೀಕ್ಷಿಸಲು ಉತ್ತರಪ್ರದೇಶ ಅಥವಾ ಪಶ್ಚಿಮ ಬಂಗಾಳದಲ್ಲಿ ಒಂದು ಪ್ರಾಯೋಗಿಕ ಘಟಕ ಸ್ಥಾಪಿಸಲು ಯೋಜಿಸಿದೆ.

ಆಲೂಗಡ್ಡೆ ಉತ್ಪಾದನೆ ಚೀನಾ ಬಿಟ್ಟರೆ ಭಾರತದಲ್ಲೇ ಹೆಚ್ಚು. ವರ್ಷಕ್ಕೆ ಸರಾಸರಿಯಾಗಿ 5.6 ಕೋಟಿ ಟನ್ ಆಲೂಗಡ್ಡೆಯನ್ನು ಭಾರತದಲ್ಲಿ ಬೆಳೆಯಲಾಗುತ್ತದೆ. ತ್ಯಾಜ್ಯದ ಹಾಗೆ ಬಿಸಾಡಲಾಗುತ್ತಿರುವ ಆಲೂಗಡ್ಡೆ ಶೇ. 15ರಷ್ಟಿದೆ. ಫಸಲಿನ ಹಂತದಿಂದ ಹಿಡಿದು ಮಾರುಕಟ್ಟೆ ಬರುವವರೆಗೆ ಹಾಳಾಗುವ ಆಲೂಗಡ್ಡೆ ಪ್ರಮಾಣ ಇನ್ನೂ ಹೆಚ್ಚಿದೆ. ಇಷ್ಟೊಂದು ದೊಡ್ಡ ಪ್ರಮಾಣದ ಆಲೂಗಡ್ಡೆಯು ಎಥನಾಲ್ ಉತ್ಪಾದನೆಗೆ ಹೇಳಿ ಮಾಡಿಸಿದಂತಿರುತ್ತದೆ ಎಂಬುದು ತಜ್ಞರ ಅನಿಸಿಕೆ.

ಭಾರತದಲ್ಲಿ ಬೆಳೆಯಲಾಗುವ ಆಲೂಗಡ್ಡೆಯಲ್ಲಿ ಶೇ. 8-10ರಷ್ಟವು ಚಿಪ್ಸ್, ಫ್ರೈ ಇತ್ಯಾದಿ ಉತ್ಪನ್ನಗಳ ತಯಾರಿಕೆಗೆ ಬಳಕೆ ಆಗುತ್ತವೆ. ಕಟಾವು ಆದ ಬಳಿಕ ಅಸಮರ್ಪಕವಾದ ಉಗ್ರಾಣ ವ್ಯವಸ್ಥೆ, ಸಾಗಾಣಿಕೆ, ನಿರ್ವಹಣೆ ಇತ್ಯಾದಿ ಕಾರಣಗಳಿಂದ ಶೇ. 20-25ರಷ್ಟು ಆಲೂಗಡ್ಡೆ ಹಾಳಾಗಿ ಹೋಗುತ್ತವೆ ಎನ್ನುವ ಅಂದಾಜಿದೆ.

ಆಲೂಗಡ್ಡೆ ಹೆಚ್ಚಾಗಿ ಬೆಳೆಯಲಾಗುವ ಉತ್ತರಪ್ರದೇಶ ಅಥವಾ ಪಶ್ಚಿಮ ಬಂಗಾಳ ರಾಜ್ಯದಲ್ಲಿ ಸಿಪಿಆರ್​ಐನ ಪ್ರಾಯೋಗಿಕ ಘಟಕವು ಸ್ಥಾಪನೆಯಾಗಬಹುದು. ಆಲೂಗಡ್ಡೆಯ ಸಿಪ್ಪೆ, ತ್ಯಾಜ್ಯ, ಕೊಳೆತ ಆಲೂಗಡ್ಡೆ, ಕಳಪೆ ಗುಣಮಟ್ಟದ ಆಲೂಗಡ್ಡೆಗಳನ್ನು ಸಂಗರಹಿಸಿ ಅದರಿಂದ ಎಥನಾಲ್ ಅನ್ನು ತಯಾರಿಸಲಾಗುತ್ತದೆ.

ಹಿಂದೂಸ್ತಾನ್ ಸಮಾಚಾರ್ / ಡಾ.ಪಿ.ವಿ.ಪ್ರಸಾದ ರಾವ್