ಬಾಗಲಕೋಟೆ, 25 ಸೆಪ್ಟೆಂಬರ್ (ಹಿ.ಸ.)

ಆ್ಯಂಕರ್ : ಹಾಲುಮತ ಸಮುದಾಯದ ಹಕ್ಕುಗಳು ಹಾಗೂ ಸಾರ್ವಜನಿಕರ ಸಮಸ್ಯೆಗಳಿಗಾಗಿ ನಿರಂತರವಾಗಿ ಹೋರಾಟ ನಡೆಸುತ್ತಿರುವ ಬಿಜೆಪಿ ಮುಖಂಡ ವೀರಣ್ಣ ಹಳೇಗೌಡರ ಅವರನ್ನು ಪಕ್ಷದಿಂದ ಉಚ್ಚಾಟಿಸಿರುವ ಕ್ರಮವನ್ನು ಅವರ ಬೆಂಬಲಿಗರು ತೀವ್ರವಾಗಿ ಖಂಡಿಸಿದ್ದಾರೆ. ಇದು ಬಾಗಲಕೋಟೆ ಜಿಲ್ಲಾ ಬಿಜೆಪಿಯ ಕೆಲ ನಾಯಕರ ಕುತಂತ್ರ ಮತ್ತು ಷಡ್ಯಂತ್ರದ ಭಾಗವಾಗಿದೆ ಎಂದು ವೀರಣ್ಣ ಹಳೇಗೌಡರ ಬೆಂಬಲಿಗ ಗದಿಗೆಪ್ಪ ಧಾರವಾಡ ಆರೋಪಿಸಿದರು.

ಬಾಗಲಕೋಟೆ ನಗರದಲ್ಲಿ ಶುಕ್ರವಾರ ಪತ್ರಿಕಾಗೋಷ್ಠಿ ನಡೆಸಿ ಮಾತನಾಡಿದ ಅವರು, ಹಾಲುಮತ ಸಮುದಾಯದ ಬಗ್ಗೆ ಅಪಾರ ಪ್ರೀತಿ, ವಾತ್ಸಲ್ಯ ಮತ್ತು ಕಾಳಜಿ ಹೊಂದಿರುವ ವೀರಣ್ಣ ಹಳೇಗೌಡರ ಅವರು ಸದಾ ಸಮುದಾಯದ ಹಕ್ಕುಗಳಿಗಾಗಿ ಧ್ವನಿ ಎತ್ತುತ್ತಾ ಬಂದಿದ್ದಾರೆ. ಇಂತಹ ನಾಯಕನನ್ನು ಪಕ್ಷದಿಂದ ಉಚ್ಚಾಟಿಸಿರುವುದು ಸರಿಯಲ್ಲ ಎಂದು ಹೇಳಿದರು.

ಹಿಂದುಳಿದ ಸಮುದಾಯಗಳ ನಾಯಕರಿಗೆ ಬಿಜೆಪಿಯಲ್ಲಿ ಪ್ರಶ್ನಿಸುವ ಹಕ್ಕಿಲ್ಲವೇ ಎಂಬ ಪ್ರಶ್ನೆ ಮೂಡುವಂತಾಗಿದೆ. ಪಕ್ಷದೊಳಗಿನ ಯಾವುದೇ ವಿಚಾರವನ್ನು ಪ್ರಶ್ನಿಸಬಾರದು, ನಾಯಕರ ವಿರುದ್ಧ ಧ್ವನಿ ಎತ್ತಬಾರದು ಎಂಬ ಮನೋಭಾವವನ್ನು ಹಳೇಗೌಡರ ಉಚ್ಚಾಟನೆಯ ಮೂಲಕ ಬಾಗಲಕೋಟೆ ಜಿಲ್ಲೆಯ ಕೆಲವು ಬಿಜೆಪಿ ನಾಯಕರು ಪ್ರದರ್ಶಿಸಿದ್ದಾರೆ ಎಂದು ಗದಿಗೆಪ್ಪ ಧಾರವಾಡ ಆರೋಪಿಸಿದರು.

'ಸಮುದಾಯದ ಹಕ್ಕಿಗಾಗಿ ಹೋರಾಡಿದವರಿಗೆ ಉಚ್ಚಾಟನೆಯ ಭಯವಿಲ್ಲ'

ಹಾಲುಮತ ಸಮುದಾಯಕ್ಕೆ ಎಸ್ಟಿ ಮೀಸಲಾತಿ ನೀಡಬೇಕು ಎಂಬ ಬೇಡಿಕೆಯನ್ನು ಮುಂದಿಟ್ಟುಕೊಂಡು ಹಳೇಗೌಡರ ನಡೆಸಿದ ಹೋರಾಟಗಳನ್ನು ನೆನಪಿಸಿದ ಅವರು, “ಹಾಲುಮತ ಸಮುದಾಯದ ಎಸ್ಟಿ ಮೀಸಲಾತಿಗಾಗಿ ಬಾಗಲಕೋಟೆಯ ಹೆಲಿಪ್ಯಾಡ್ ಬಳಿ ಸಿದ್ದರಾಮಯ್ಯನವರಿಗೇ ಗುದ್ದಿದ್ದ ಟಗರಿಗೆ ಬಿಜೆಪಿಯ ಉಚ್ಚಾಟನೆ ಯಾವ ಲೆಕ್ಕ?” ಎಂದು ಪ್ರಶ್ನಿಸಿದರು.

ಬೆಳಗಾವಿಯ ವಿಕಾಸಸೌಧಕ್ಕೆ ಕುರಿಗಳನ್ನು ಕರೆದುಕೊಂಡು ಹೋಗಿ ಹಾಲುಮತ ಸಮುದಾಯಕ್ಕೆ ಮೀಸಲಾತಿ ನೀಡಬೇಕು ಎಂದು ಒತ್ತಾಯಿಸಿ ಹೋರಾಟ ನಡೆಸಿದ್ದ ಹಳೇಗೌಡರ ಅವರು ಇಂತಹ ಪಕ್ಷದ ಕ್ರಮಗಳಿಗೆ ಹೆದರುವ ವ್ಯಕ್ತಿಯಲ್ಲ ಎಂದು ಹೇಳಿದರು.

“ಹೆದರುವ ಮಾತೇ ಇಲ್ಲ. ಹಳೇಗೌಡರ ಅವರು ಜೀವನವನ್ನು ಕೆಳಹಂತದಿಂದ ನೋಡಿ ಬಂದವರು. ಮಠದಲ್ಲಿದ್ದುಕೊಂಡು ಶಿಕ್ಷಣ ಪಡೆದವರು. ಜನಸಾಮಾನ್ಯರ ನೋವು, ಕಷ್ಟ ಹಾಗೂ ಸಮಸ್ಯೆಗಳನ್ನು ಹತ್ತಿರದಿಂದ ಕಂಡವರು. ಅಧಿಕಾರಿಗಳು ಮತ್ತು ರಾಜಕಾರಣಿಗಳಿಂದ ಜನಸಾಮಾನ್ಯರು ಎದುರಿಸುವ ಧಿಮಾಕಿನ ಉತ್ತರಗಳನ್ನೂ ಹತ್ತಿರದಿಂದ ಅನುಭವಿಸಿದವರು” ಎಂದು ಗದಿಗೆಪ್ಪ ಧಾರವಾಡ ಹೇಳಿದರು.

'ಸಾರ್ವಜನಿಕ ಸಮಸ್ಯೆ ಬಂದಾಗ ಆತ್ಮಸಾಕ್ಷಿ ಕಾರ್ಯೋನ್ಮುಖವಾಗುತ್ತದೆ'

ಒಂದೆಡೆ ಹಾಲುಮತ ಸಮುದಾಯದ ಹಕ್ಕುಗಳಿಗಾಗಿ ಹೋರಾಟ ನಡೆಸುವುದು, ಮತ್ತೊಂದೆಡೆ ಸಾರ್ವಜನಿಕರ ಸಮಸ್ಯೆಗಳ ಕುರಿತು ಧ್ವನಿ ಎತ್ತುವುದು ಹಳೇಗೌಡರ ಅವರ ಸ್ವಭಾವವಾಗಿದೆ ಎಂದು ಅವರು ಹೇಳಿದರು.

ಸಾರ್ವಜನಿಕ ಸಭೆಗಳಲ್ಲಿ ಹಳೇಗೌಡರ ಅವರ ನೇರ ಮಾತುಗಳು ಕೆಲವೊಮ್ಮೆ ಕೆಲವರಿಗೆ ಕಸಿವಿಸಿ ಉಂಟುಮಾಡಬಹುದು. ಆದರೆ ಅವರು ಹೇಳುವ ಮಾತುಗಳ ಹಿಂದೆ ಸಾರ್ವಜನಿಕ ಸಮಸ್ಯೆಗಳ ಬಗ್ಗೆ ಇರುವ ಕಾಳಜಿ ಇದೆ ಎಂದು ಗದಿಗೆಪ್ಪ ಧಾರವಾಡ ಸಮರ್ಥಿಸಿಕೊಂಡರು.

ಕೆಲವು ಸಂದರ್ಭಗಳಲ್ಲಿ ಹೋರಾಟ, ಪತ್ರಿಕಾಗೋಷ್ಠಿ ಅಥವಾ ಸಾರ್ವಜನಿಕ ಸಭೆಗಳಲ್ಲಿ ಮಾತನಾಡುವ ವೇಳೆ ಮಾತಿನ ಭರದಲ್ಲಿ ಒಂದೆರಡು ಪದಗಳು ಆಚೀಚೆಯಾಗಿರಬಹುದು. ಅದನ್ನೇ ಆಧಾರವಾಗಿಟ್ಟುಕೊಂಡು ಪಕ್ಷದಿಂದಲೇ ಉಚ್ಚಾಟಿಸುವುದು ಸರಿಯಲ್ಲ ಎಂದು ಅವರು ಹೇಳಿದರು.

'ಬಡವರಿಗೆ ನಿವೇಶನ, ಮನೆ ಕೊಡಿಸುವುದು ತಪ್ಪೇ?'

ಇತ್ತೀಚೆಗೆ ಜಗದೀಶ ಗುಡಗುಂಟಿಯವರೊಂದಿಗೆ ಹಳೇಗೌಡರ ಮಾತನಾಡಿದ ವಿಚಾರವನ್ನು ಉಲ್ಲೇಖಿಸಿದ ಗದಿಗೆಪ್ಪ ಧಾರವಾಡ, ಬಡವರಿಗೆ ನಿವೇಶನದ ಹಕ್ಕುಪತ್ರ ಹಾಗೂ ಮನೆಗಳನ್ನು ಒದಗಿಸಬೇಕು ಎಂಬ ವಿಚಾರವನ್ನು ಮುಂದಿಟ್ಟುಕೊಂಡೇ ಅವರು ಮಾತನಾಡಿದ್ದಾರೆ ಎಂದು ಹೇಳಿದರು.

“ಅವರು ಜಗದೀಶ ಗುಡಗುಂಟಿಯವರ ಆಸ್ತಿ ಕೇಳಿದ್ದರಾ? ಅಥವಾ ಅವರೊಂದಿಗೆ ಹೊಂದಾಣಿಕೆ ಮಾಡಿಕೊಂಡು ಸರ್ಕಾರದ ಹಣ ಪಡೆಯಲು ಯತ್ನಿಸಿದ್ದರಾ? ಇಲ್ಲ. ಅವರು ಕೇಳಿದ್ದು ಬಡವರಿಗೆ ನಿವೇಶನದ ಹಕ್ಕುಪತ್ರ ಮತ್ತು ಮನೆಗಳನ್ನಷ್ಟೇ” ಎಂದು ಹೇಳಿದರು.

ಹೀಗಿರುವಾಗ, ಸಾರ್ವಜನಿಕರ ಸಮಸ್ಯೆಗಳನ್ನು ಮುಂದಿಟ್ಟುಕೊಂಡು ಮಾತನಾಡಿದ ಕಾರಣಕ್ಕೆ ಪಕ್ಷದಿಂದ ಉಚ್ಚಾಟಿಸುವ ಕ್ರಮದ ಅಗತ್ಯವೇನಿತ್ತು ಎಂದು ಪ್ರಶ್ನಿಸಿದರು.

'ಮಾತಿಗಿಂತ ಉದ್ದೇಶ ಮುಖ್ಯ'

ಮಾತಿನ ಭರದಲ್ಲಿ ಒಂದೆರಡು ಮಾತುಗಳು ಆಚೀಚೆಯಾಗಿರಬಹುದು. ಆದರೆ ವ್ಯಕ್ತಿಯ ಉದ್ದೇಶವೇ ಮುಖ್ಯ. ಸಾರ್ವಜನಿಕರ ಹಿತದೃಷ್ಟಿಯಿಂದ ಪ್ರಶ್ನೆಗಳನ್ನು ಕೇಳಿದ್ದರೆ ಅದನ್ನು ಪಕ್ಷ ವಿರೋಧಿ ಚಟುವಟಿಕೆ ಎಂದು ಪರಿಗಣಿಸುವುದು ಸರಿಯಲ್ಲ ಎಂದು ಗದಿಗೆಪ್ಪ ಧಾರವಾಡ ಹೇಳಿದರು.

“ಉದ್ದೇಶ ಸರಿ ಇದ್ದಾಗ ಮಾತು ಲೆಕ್ಕಕ್ಕೆ ಬರುವುದಿಲ್ಲ; ಉದ್ದೇಶ ಲೆಕ್ಕಕ್ಕೆ ಬರುತ್ತದೆ. ಬಾಗಲಕೋಟೆಯ ಬಿಜೆಪಿ ನಾಯಕರು ಈ ವಿಚಾರವನ್ನು ಅರ್ಥಮಾಡಿಕೊಳ್ಳಬೇಕು” ಎಂದು ಅವರು ಹೇಳಿದರು.

ವೀರಣ್ಣ ಹಳೇಗೌಡರ ಅವರು ಯಾವುದೇ ವೈಯಕ್ತಿಕ ಲಾಭಕ್ಕಾಗಿ ಹೋರಾಟ ನಡೆಸಿಲ್ಲ. ಜನಸಾಮಾನ್ಯರ ಸಮಸ್ಯೆ, ಹಾಲುಮತ ಸಮುದಾಯದ ಹಕ್ಕುಗಳು ಹಾಗೂ ಬಡವರ ಪರವಾಗಿ ಧ್ವನಿ ಎತ್ತುವುದು ಅವರ ಉದ್ದೇಶವಾಗಿದೆ ಎಂದು ಬೆಂಬಲಿಗರು ಸಮರ್ಥಿಸಿಕೊಂಡರು.

ಪಕ್ಷದೊಳಗಿನ ಭಿನ್ನಾಭಿಪ್ರಾಯಗಳನ್ನು ಉಚ್ಚಾಟನೆಯಂತಹ ಕ್ರಮಗಳ ಮೂಲಕ ಬಗೆಹರಿಸುವ ಬದಲು, ಸಂಬಂಧಪಟ್ಟವರೊಂದಿಗೆ ಚರ್ಚಿಸಿ ಸಮಸ್ಯೆಯನ್ನು ಪರಿಹರಿಸಬೇಕು. ಹಿಂದುಳಿದ ಸಮುದಾಯಗಳ ನಾಯಕರಿಗೂ ಪಕ್ಷದೊಳಗೆ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸುವ ಅವಕಾಶ ಇರಬೇಕು ಎಂದು ಗದಿಗೆಪ್ಪ ಧಾರವಾಡ ಆಗ್ರಹಿಸಿದರು.

ವೀರಣ್ಣ ಹಳೇಗೌಡರ ಉಚ್ಚಾಟನೆ ವಿಚಾರದಲ್ಲಿ ಬಿಜೆಪಿ ಜಿಲ್ಲಾ ನಾಯಕತ್ವ ತನ್ನ ನಿರ್ಧಾರವನ್ನು ಮರುಪರಿಶೀಲಿಸಬೇಕು. ಇಲ್ಲದಿದ್ದರೆ ಈ ವಿಚಾರ ಮುಂದಿನ ದಿನಗಳಲ್ಲಿ ಮತ್ತಷ್ಟು ಚರ್ಚೆಗೆ ಕಾರಣವಾಗಲಿದೆ ಎಂದು ಅವರು ಹೇಳಿದರು.

---------------

ಹಿಂದೂಸ್ತಾನ್ ಸಮಾಚಾರ್ / jyothi deshpande