ಕೊಲಂಬಿಯಾ (ದಕ್ಷಿಣ ಕೆರೊಲಿನಾ), 18 ಆಗಸ್ಟ್ (ಹಿ.ಸ.):

ಆ್ಯಂಕರ್:

ಅಮೆರಿಕದ ಖ್ಯಾತ ನಟಿ ಹಾಗೂ ಮಾಜಿ ಬಾಲನಟಿ ಹೇಡನ್ ಪ್ಯಾನೆಟಿಯರ್ ಅವರು 36ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆ. ದಕ್ಷಿಣ ಕೆರೊಲಿನಾದ ಗ್ರೀನ್‌ವಿಲ್‌ನಲ್ಲಿರುವ ನಿವಾಸದಲ್ಲಿ ಭಾನುವಾರ ಮಧ್ಯಾಹ್ನ ಅವರು ಪ್ರಜ್ಞಾಹೀನ ಸ್ಥಿತಿಯಲ್ಲಿ ಪತ್ತೆಯಾಗಿದ್ದು, ತುರ್ತು ವೈದ್ಯಕೀಯ ಸಿಬ್ಬಂದಿ ಹೃದಯದ ಮರುಚೇತನ ಪ್ರಕ್ರಿಯೆ ನಡೆಸಿದರೂ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾರೆ. ಗ್ರೀನ್‌ವಿಲ್ ಕೌಂಟಿ ಕೊರೊನರ್ ಕಚೇರಿ ಈ ಕುರಿತು ಮಾಹಿತಿ ನೀಡಿದೆ.

ಮಧ್ಯಾಹ್ನ ಸುಮಾರು 1.51ಕ್ಕೆ ತುರ್ತು ಸೇವೆಗೆ ಕರೆ ಬಂದಿದ್ದು, ಸ್ಥಳಕ್ಕೆ ಪೊಲೀಸರು ಹಾಗೂ ವೈದ್ಯಕೀಯ ಸಿಬ್ಬಂದಿ ಧಾವಿಸಿದ್ದರು. ಸುಮಾರು 40 ನಿಮಿಷಗಳ ಬಳಿಕ, ಮಧ್ಯಾಹ್ನ 2.32ಕ್ಕೆ ಹೇಡನ್ ಅವರನ್ನು ಮೃತಪಟ್ಟಿದ್ದಾರೆ ಎಂದು ಘೋಷಿಸಲಾಯಿತು. ಅವರು ಹೃದಯ ಸ್ತಂಭನದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಆದರೆ ಸಾವಿಗೆ ನಿಖರ ಕಾರಣವನ್ನು ಇನ್ನೂ ಅಧಿಕೃತವಾಗಿ ಪ್ರಕಟಿಸಲಾಗಿಲ್ಲ. ಸೋಮವಾರ ನಡೆದ ಮರಣೋತ್ತರ ಪರೀಕ್ಷೆಯಲ್ಲಿ ಯಾವುದೇ ಗೋಚರ ಗಾಯ ಅಥವಾ ದೈಹಿಕ ಆಘಾತದ ಗುರುತು ಪತ್ತೆಯಾಗಿಲ್ಲ. ಹೆಚ್ಚಿನ ಪರೀಕ್ಷೆಗಳ ಬಳಿಕ ಸಾವಿನ ಕಾರಣ ಮತ್ತು ಸ್ವರೂಪವನ್ನು ನಿರ್ಧರಿಸಲಾಗುವುದು ಎಂದು ಕೊರೊನರ್ ಕಚೇರಿ ತಿಳಿಸಿದೆ.

ಪೊಲೀಸರ ಪ್ರಾಥಮಿಕ ತನಿಖೆಯಲ್ಲಿ ಯಾವುದೇ ದುಷ್ಕೃತ್ಯ ಅಥವಾ ಅನುಮಾನಾಸ್ಪದ ಚಟುವಟಿಕೆಯ ಲಕ್ಷಣಗಳು ಕಂಡುಬಂದಿಲ್ಲ. ತುರ್ತು ಕರೆ ದಾಖಲೆಯಲ್ಲಿ ಮಿತಿಮೀರಿದ ಔಷಧ ಸೇವನೆಯ ಅನುಮಾನ ಹಾಗೂ ಹೃದಯ ಸ್ತಂಭನದ ಉಲ್ಲೇಖವಿದ್ದರೂ, ಅದನ್ನೇ ಸಾವಿನ ಕಾರಣವೆಂದು ಅಧಿಕಾರಿಗಳು ಇನ್ನೂ ದೃಢಪಡಿಸಿಲ್ಲ. ಹೀಗಾಗಿ ತನಿಖೆ ಮುಂದುವರಿದಿದೆ.

ಬಾಲನಟಿಯಾಗಿ ಆರಂಭವಾದ ವೃತ್ತಿ

1989ರ ಆಗಸ್ಟ್ 21ರಂದು ನ್ಯೂಯಾರ್ಕ್‌ನ ಪಾಲಿಸೇಡ್ಸ್‌ನಲ್ಲಿ ಜನಿಸಿದ ಹೇಡನ್, ಕೇವಲ 11 ತಿಂಗಳ ವಯಸ್ಸಿನಲ್ಲೇ ಜಾಹೀರಾತುಗಳಲ್ಲಿ ಕಾಣಿಸಿಕೊಳ್ಳುವ ಮೂಲಕ ಮನರಂಜನಾ ಕ್ಷೇತ್ರ ಪ್ರವೇಶಿಸಿದ್ದರು. ಬಳಿಕ ದೂರದರ್ಶನ ಧಾರಾವಾಹಿಗಳು ಮತ್ತು ಚಲನಚಿತ್ರಗಳಲ್ಲಿ ಬಾಲನಟಿಯಾಗಿ ಅಭಿನಯಿಸಿ ಗಮನ ಸೆಳೆದರು. ‘ದಿ ಗೈಡಿಂಗ್ ಲೈಟ್’, ‘ರಿಮೆಂಬರ್ ದಿ ಟೈಟನ್ಸ್’, ‘ಐಸ್ ಪ್ರಿನ್ಸೆಸ್’ ಹಾಗೂ ‘ಎ ಬಗ್ಸ್ ಲೈಫ್’ ಸೇರಿದಂತೆ ಹಲವು ಕೃತಿಗಳಲ್ಲಿ ಕಾಣಿಸಿಕೊಂಡಿದ್ದರು.

ಆದರೆ 2006ರಲ್ಲಿ ಆರಂಭವಾದ ‘ಹೀರೋಸ್’ ಧಾರಾವಾಹಿಯಲ್ಲಿನ ಕ್ಲೇರ್ ಬೆನೆಟ್ ಪಾತ್ರ ಅವರಿಗೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರಿ ಜನಪ್ರಿಯತೆ ತಂದುಕೊಟ್ಟಿತು. ವಿಶೇಷ ಸಾಮರ್ಥ್ಯ ಹೊಂದಿರುವ ಚೀರ್‌ಲೀಡರ್ ಪಾತ್ರದ ಮೂಲಕ ಅವರು ಯುವ ಪ್ರೇಕ್ಷಕರ ಗಮನ ಸೆಳೆದಿದ್ದರು.

ನಂತರ ‘ನ್ಯಾಶ್‌ವಿಲ್’ ಧಾರಾವಾಹಿಯಲ್ಲಿ ಜೂಲಿಯೆಟ್ ಬಾರ್ನ್ಸ್ ಎಂಬ ಯುವ ಗಾಯಕಿಯ ಪಾತ್ರ ನಿರ್ವಹಿಸಿ ಮತ್ತಷ್ಟು ಖ್ಯಾತಿ ಗಳಿಸಿದರು. 2012ರಿಂದ 2018ರವರೆಗೆ ಪ್ರಸಾರವಾದ ಈ ಧಾರಾವಾಹಿಯ ಅಭಿನಯಕ್ಕಾಗಿ ಅವರಿಗೆ ಎರಡು ಗೋಲ್ಡನ್ ಗ್ಲೋಬ್ ನಾಮನಿರ್ದೇಶನಗಳೂ ದೊರೆತಿದ್ದವು. ‘ಸ್ಕ್ರೀಮ್ 4’ ಹಾಗೂ ‘ಸ್ಕ್ರೀಮ್ VI’ ಚಿತ್ರಗಳಲ್ಲಿನ ಕಿರ್ಬಿ ರೀಡ್ ಪಾತ್ರವೂ ಅವರ ಪ್ರಮುಖ ಅಭಿನಯಗಳಲ್ಲಿ ಒಂದಾಗಿದೆ.

ವೈಯಕ್ತಿಕ ಸವಾಲುಗಳ ಕುರಿತು ಮುಕ್ತವಾಗಿ ಬರೆದಿದ್ದರು

ಹೇಡನ್ ತಮ್ಮ ವೈಯಕ್ತಿಕ ಜೀವನದಲ್ಲಿ ಎದುರಿಸಿದ ಹಲವು ಸವಾಲುಗಳ ಕುರಿತು ಸಾರ್ವಜನಿಕವಾಗಿ ಮಾತನಾಡಿದ್ದರು. ಮದ್ಯಪಾನ ವ್ಯಸನ, ಮಾದಕವಸ್ತು ಅವಲಂಬನೆ ಹಾಗೂ ಹೆರಿಗೆಯ ನಂತರದ ಖಿನ್ನತೆಯಂತಹ ಸಮಸ್ಯೆಗಳ ಬಗ್ಗೆ ಅವರು ಇತ್ತೀಚೆಗೆ ಪ್ರಕಟಿಸಿದ ‘ದಿಸ್ ಇಸ್ ಮೀ: ಎ ರೆಕನಿಂಗ್’ ಎಂಬ ಆತ್ಮಚರಿತ್ರೆಯಲ್ಲಿ ಮುಕ್ತವಾಗಿ ಬರೆದಿದ್ದರು.

2026ರಲ್ಲಿಯೂ ಅವರು ನಟನಾ ಕ್ಷೇತ್ರದಲ್ಲಿ ಸಕ್ರಿಯರಾಗಿದ್ದರು. ಅವರ ಅಭಿನಯದ ‘ಸ್ಲೀಪ್‌ವಾಕರ್’ ಚಿತ್ರ ಜನವರಿಯಲ್ಲಿ ಬಿಡುಗಡೆಯಾಗಿತ್ತು.

ಹೇಡನ್ ಅವರಿಗೆ ಮಾಜಿ ಸಂಗಾತಿ ಹಾಗೂ ಉಕ್ರೇನ್‌ನ ಮಾಜಿ ವಿಶ್ವ ಹೆವಿವೇಟ್ ಬಾಕ್ಸಿಂಗ್ ಚಾಂಪಿಯನ್ ವ್ಲಾದಿಮಿರ್ ಕ್ಲಿಟ್ಸ್ಕೊ ಅವರಿಂದ ಕಯಾ ಎಂಬ 11 ವರ್ಷದ ಪುತ್ರಿ ಇದ್ದಾರೆ. ಕಯಾ ತಂದೆಯೊಂದಿಗೆ ವಾಸಿಸುತ್ತಿದ್ದಾರೆ ಎಂದು ವರದಿಯಾಗಿದೆ.

ಕುಟುಂಬದಿಂದ ಭಾವುಕ ಸಂತಾಪ

ಹೇಡನ್ ಅವರ ತಂದೆ ಸ್ಕಿಪ್ ಪ್ಯಾನೆಟಿಯರ್ ಕುಟುಂಬದ ಪರವಾಗಿ ಸಂತಾಪ ವ್ಯಕ್ತಪಡಿಸಿ, ತಮ್ಮ ಪುತ್ರಿ ಪ್ರೀತಿಪಾತ್ರ ವ್ಯಕ್ತಿಯಾಗಿದ್ದು, ಅಪಾರ ಉತ್ಸಾಹ ಮತ್ತು ಜೀವಂತಿಕೆಯಿಂದ ಕೂಡಿದ್ದವರು ಎಂದು ಸ್ಮರಿಸಿದ್ದಾರೆ. ಅವರ ನಿಧನಕ್ಕೆ ಸಹನಟರು, ಸ್ನೇಹಿತರು ಹಾಗೂ ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳ ಮೂಲಕ ಕಂಬನಿ ಮಿಡಿದಿದ್ದಾರೆ.

ಬಾಲನಟಿಯಾಗಿ ಆರಂಭಿಸಿ ಹಾಲಿವುಡ್‌ನ ಪ್ರಮುಖ ದೂರದರ್ಶನ ಧಾರಾವಾಹಿಗಳು ಮತ್ತು ಚಿತ್ರಗಳಲ್ಲಿ ಮಿಂಚಿದ್ದ ಹೇಡನ್ ಪ್ಯಾನೆಟಿಯರ್ ಅವರ ಅಕಾಲಿಕ ನಿಧನ ಚಿತ್ರರಂಗಕ್ಕೆ ಹಾಗೂ ಅವರ ಅಪಾರ ಅಭಿಮಾನಿಗಳಿಗೆ ಆಘಾತವನ್ನುಂಟು ಮಾಡಿದೆ.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.