ನಾಗ್ಪುರ, 04 ಜೂನ್ (ಹಿ.ಸ.):

ಆ್ಯಂಕರ್:ಭಾರತವು ವಿಶ್ವಕ್ಕೆ ಹೊಸ ದಿಕ್ಕು ತೋರಿಸುವ ಐತಿಹಾಸಿಕ ಹೊಣೆಗಾರಿಕೆಯ ಹಂತಕ್ಕೆ ತಲುಪಿದ್ದು, ಈ ಜವಾಬ್ದಾರಿಯನ್ನು ಸಮರ್ಥವಾಗಿ ನಿಭಾಯಿಸಲು ದೇಶವು ತನ್ನ ಸಿದ್ಧತೆಯ ವೇಗವನ್ನು ಮತ್ತಷ್ಟು ಹೆಚ್ಚಿಸಬೇಕಾಗಿದೆ ಎಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘದ (ಆರ್‌ಎಸ್‌ಎಸ್) ಸರಸಂಘಚಾಲಕ ಮೋಹನ್ ಭಾಗವತ್ ಹೇಳಿದ್ದಾರೆ.

ನಾಗ್ಪುರದ ರೇಶಿಂಬಾಗ್ ಮೈದಾನದಲ್ಲಿ ನಡೆದ ಆರ್‌ಎಸ್‌ಎಸ್ ಕಾರ್ಯಕರ್ತ ಅಭಿವೃದ್ಧಿ ವರ್ಗ–ದ್ವಿತೀಯ ತರಬೇತಿ ಶಿಬಿರದ ಸಾರ್ವಜನಿಕ ಸಮಾರೋಪ ಸಮಾರಂಭದಲ್ಲಿ ಮಾತನಾಡಿದ ಅವರು, ಸಂಘವನ್ನು ಕೇವಲ ಹೊರಗಿನಿಂದ ನೋಡುವುದಕ್ಕಿಂತ ಅದರೊಳಗೆ ಬಂದು ಅರ್ಥಮಾಡಿಕೊಳ್ಳುವಂತೆ ಸಮಾಜದ ಜನತೆಗೆ ಕರೆ ನೀಡಿದರು. ಸಮಾಜ ಮತ್ತು ರಾಷ್ಟ್ರದ ಸೇವೆಯನ್ನು ನಿಸ್ವಾರ್ಥವಾಗಿ ಮಾಡುವವರನ್ನು ಸಂಘದ ಕಾರ್ಯಕರ್ತರು ಸ್ವತಃ ಸಂಪರ್ಕಿಸಲಿದ್ದಾರೆ ಎಂದರು.

ಪ್ರಸ್ತುತ ವಿಶ್ವವು ಸಂಘರ್ಷ, ಸ್ವಾರ್ಥ ಮತ್ತು ಅಸಮತೋಲಿತ ಅಭಿವೃದ್ಧಿಯಂತಹ ಗಂಭೀರ ಸವಾಲುಗಳನ್ನು ಎದುರಿಸುತ್ತಿದೆ. ಇಂತಹ ಸಂದರ್ಭದಲ್ಲಿ ಮಾನವಕುಲಕ್ಕೆ ಭಾರತದ ಜೀವನದರ್ಶನ ಮತ್ತು ಮೌಲ್ಯಗಳ ಅಗತ್ಯ ಹೆಚ್ಚಾಗಿದೆ ಎಂದು ಅವರು ಹೇಳಿದರು. ಭಾರತದಲ್ಲಿ ವಿಶ್ವಗುರುವಾಗುವ ಸಾಮರ್ಥ್ಯವಿದ್ದು, ಅದಕ್ಕಾಗಿ ಸಮಾಜವನ್ನು ಸಜ್ಜುಗೊಳಿಸುವ ಕಾರ್ಯ ಇನ್ನಷ್ಟು ವೇಗ ಪಡೆಯಬೇಕಾಗಿದೆ ಎಂದು ಅಭಿಪ್ರಾಯಪಟ್ಟರು.

“ಪರಿಸ್ಥಿತಿಗಳನ್ನು ತಮ್ಮ ಅನುಕೂಲಕ್ಕೆ ತಕ್ಕಂತೆ ರೂಪಿಸಿಕೊಳ್ಳುವ ಸಾಮರ್ಥ್ಯವು ಮುಂಚಿತವಾಗಿ ಸಿದ್ಧತೆ ಮಾಡಿಕೊಂಡವರಲ್ಲೇ ಇರುತ್ತದೆ” ಎಂದು ಭಾಗವತ್ ಹೇಳಿದರು.

ವ್ಯಕ್ತಿಯ ಸ್ವಾತಂತ್ರ್ಯ, ಸಮಾಜದ ಸ್ವಾತಂತ್ರ್ಯ ಮತ್ತು ಸೃಷ್ಟಿಯ ಸಂರಕ್ಷಣೆಯನ್ನು ಒಂದೇ ದೃಷ್ಟಿಕೋನದಲ್ಲಿ ನೋಡುವ ಚಿಂತನೆ ಭಾರತದ್ದಾಗಿದೆ ಎಂದು ಅವರು ಹೇಳಿದರು. ವಿಶ್ವದ ಹಲವು ರಾಷ್ಟ್ರಗಳು ಈ ಅಂಶಗಳನ್ನು ಪ್ರತ್ಯೇಕವಾಗಿ ಪರಿಗಣಿಸಿದರೂ, ಸಮಗ್ರ ದೃಷ್ಟಿಕೋನ ಭಾರತದಲ್ಲಿಯೇ ಕಂಡುಬರುತ್ತದೆ ಎಂದರು. ಭಾರತವು ಇತರರನ್ನು ಅನುಕರಿಸುವ ಮೂಲಕವಲ್ಲ, ತನ್ನದೇ ಸಂಸ್ಕೃತಿ, ನಾಗರಿಕತೆ ಮತ್ತು ಮೌಲ್ಯಗಳ ಆಧಾರದ ಮೇಲೆ ವಿಶ್ವಕ್ಕೆ ಮಾರ್ಗದರ್ಶನ ನೀಡಬೇಕು ಎಂದು ಒತ್ತಿಹೇಳಿದರು.

ಸಾವಿರ ವರ್ಷಗಳ ಪರಾಧೀನತೆಯನ್ನು ಉಲ್ಲೇಖಿಸಿದ ಅವರು, ಭಾರತವನ್ನು ಆಳಿದವರು ಭಾರತೀಯ ಸಮಾಜಕ್ಕಿಂತ ಯಾವುದೇ ರೀತಿಯಲ್ಲೂ ಶ್ರೇಷ್ಠರಾಗಿರಲಿಲ್ಲ. ಸಮಾಜದಲ್ಲಿದ್ದ ಕೆಲವು ದುರ್ಬಲತೆಗಳಿಂದಾಗಿ ದೇಶವು ಗುಲಾಮಗಿರಿಯ ಅವಧಿಯನ್ನು ಅನುಭವಿಸಬೇಕಾಯಿತು ಎಂದು ಹೇಳಿದರು. ಇದೇ ಅನುಭವದ ಆಧಾರದ ಮೇಲೆ ವೈವಿಧ್ಯತೆಯಿಂದ ಕೂಡಿದ ಹಿಂದೂ ಸಮಾಜವನ್ನು ಒಗ್ಗೂಡಿಸುವ ಕಾರ್ಯಪದ್ಧತಿಯನ್ನು ಸಂಘ ಅಭಿವೃದ್ಧಿಪಡಿಸಿದೆ ಎಂದು ತಿಳಿಸಿದರು.

ವಿಶ್ವವು ಭಾರತೀಯ ದೃಷ್ಟಿಕೋನವೇ ಸರಿಯೆಂದು ಒಪ್ಪಿಕೊಂಡಿದ್ದರೂ, ಪ್ರಭಾವ ಬೀರುವುದು ಶಕ್ತಿಶಾಲಿ ರಾಷ್ಟ್ರಗಳೇ ಆಗಿವೆ. ಆದ್ದರಿಂದ ಭಾರತವು ಶಕ್ತಿಸಂಪನ್ನ ರಾಷ್ಟ್ರವಾಗಬೇಕು ಎಂದು ಅವರು ಹೇಳಿದರು. ‘ವಸುದೈವ ಕುಟುಂಬಕಂ’ ಮತ್ತು ‘ವಿಶ್ವ ಬಂಧುತ್ವ’ ಭಾರತದ ಮೂಲಭೂತ ಚಿಂತನೆಗಳಾಗಿವೆ ಎಂದು ಹೇಳಿದ ಅವರು, ಶಕ್ತಿಯುತ ರಾಷ್ಟ್ರಗಳು ತಮ್ಮ ಇಚ್ಛೆಯಂತೆ ಇತರ ರಾಷ್ಟ್ರಗಳ ಮೇಲೆ ಪ್ರಭಾವ ಬೀರುತ್ತಿರುವುದನ್ನು ನಾವು ನೋಡುತ್ತಿದ್ದೇವೆ ಎಂದರು.

“ಭಾರತವು ಶಕ್ತಿಶಾಲಿಯಾಗಿದ್ದರೂ ತನ್ನ ಬಲವನ್ನು ದುರುಪಯೋಗಪಡಿಸಿಕೊಳ್ಳದೆ ಎಲ್ಲರನ್ನೂ ಜೊತೆಯಾಗಿ ಕರೆದುಕೊಂಡು ಹೋಗುವ ರಾಷ್ಟ್ರ ಎಂಬ ವಿಶ್ವಾಸ ಜಗತ್ತಿನಲ್ಲಿ ಮೂಡಬೇಕು” ಎಂದು ಅವರು ಹೇಳಿದರು.

ಸಂಘವು ಸ್ವಾರ್ಥ, ಭೇದಭಾವಗಳನ್ನು ಮೀರಿ ಸಮಾಜ ಮತ್ತು ರಾಷ್ಟ್ರದ ಹಿತಕ್ಕಾಗಿ ಕಾರ್ಯನಿರ್ವಹಿಸುವ ಕಾರ್ಯಕರ್ತರನ್ನು ರೂಪಿಸಲು ಬದ್ಧವಾಗಿದೆ ಎಂದು ತಿಳಿಸಿದ ಭಾಗವತ್, ಸ್ವಾಮಿ ವಿವೇಕಾನಂದ ಅವರು ಕಂಡಿದ್ದ ಭಾರತದ ಪುನರುತ್ಥಾನದ ಕನಸು ಮುಂದಿನ ಎರಡು-ಮೂರು ವರ್ಷಗಳಲ್ಲಿ ಸಾಕಾರಗೊಳ್ಳುವ ಲಕ್ಷಣಗಳು ಗೋಚರಿಸುತ್ತಿವೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಕಾರ್ಯಕ್ರಮದ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದ ಕುಮಾರ ಮಂಗಲಂ ಬಿರ್ಲಾ ಅವರು, ಭಾರತದ ಪ್ರಗತಿಯಲ್ಲಿ ಆರ್‌ಎಸ್‌ಎಸ್‌ನ ಪಾತ್ರವನ್ನು ಶ್ಲಾಘಿಸಿದರು. ಸಂಘವು ಸಮಾಜಕ್ಕೆ ದಿಕ್ಕು ತೋರಿಸುವ ಕಾರ್ಯವನ್ನು ಮಾಡಿದೆ ಎಂದು ಹೇಳಿದರು.

ಪ್ರಸ್ತುತ ಕಾಲಘಟ್ಟ ಭಾರತಕ್ಕೆ ಅಪಾರ ಅವಕಾಶಗಳನ್ನು ತಂದಿದ್ದು, ದೇಶದ ಯುವಜನತೆ ಈ ‘ಅಮೃತ ಕಾಲ’ವನ್ನು ಸದುಪಯೋಗಪಡಿಸಿಕೊಂಡು ಭಾರತವನ್ನು ಹೊಸ ಎತ್ತರಗಳಿಗೆ ಕೊಂಡೊಯ್ಯಬೇಕು ಎಂದು ಅವರು ಕರೆ ನೀಡಿದರು.

ಸರಸಂಘಚಾಲಕ ಮೋಹನ್ ಭಾಗವತ್ ಅವರನ್ನು ಹಲವು ಬಾರಿ ಭೇಟಿಯಾಗುವ ಅವಕಾಶ ದೊರೆತಿದ್ದು, ಅವರ ಚಿಂತನೆಗಳು ತಮ್ಮ ಮೇಲೆ ಪ್ರಭಾವ ಬೀರಿವೆ ಎಂದು ಬಿರ್ಲಾ ಹೇಳಿದರು. ಸಂಘವನ್ನು ಒಳಗಿನಿಂದ ಅರಿಯುವಂತೆ ಭಾಗವತ್ ನೀಡಿದ್ದ ಆಹ್ವಾನದ ಹಿನ್ನೆಲೆಯಲ್ಲಿ ತಾವು ಈ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದಾಗಿ ತಿಳಿಸಿದರು.

ಜಾಗತಿಕ ಸವಾಲುಗಳನ್ನು ಉಲ್ಲೇಖಿಸಿದ ಅವರು, ಅಭಿವೃದ್ಧಿ ಹೊಂದಿದ ಭಾರತದ ಗುರಿ ಸಾಧಿಸಲು ದೇಶವು ತನ್ನ ರಾಷ್ಟ್ರೀಯ ಸಾಮರ್ಥ್ಯ ಮತ್ತು ಸ್ಥೈರ್ಯವನ್ನು ಮತ್ತಷ್ಟು ಬಲಪಡಿಸಬೇಕಾಗಿದೆ ಎಂದರು. ಕಚ್ಚಾ ತೈಲದ ಬೆಲೆ ಏರಿಕೆ, ಜಾಗತಿಕ ಪೂರೈಕೆ ಸರಪಳಿಯ ಅಡಚಣೆಗಳು ಹಾಗೂ ಕೃತಕ ಬುದ್ಧಿಮತ್ತೆಯಂತಹ ಹೊಸ ಸವಾಲುಗಳನ್ನು ಎದುರಿಸಲು ಭಾರತವು ಮುಂಚಿತ ಸಿದ್ಧತೆಯನ್ನು ಹೊಂದಿರಬೇಕಾಗಿದೆ ಎಂದು ಹೇಳಿದರು.

---------------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.