ನವದೆಹಲಿ, 28 ಜೂನ್ (ಹಿ.ಸ.) :

ಆ್ಯಂಕರ್ : ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯ ವೈದ್ಯಕೀಯ ಸಾಧನಗಳ ಪರವಾನಗಿ ಪ್ರಕ್ರಿಯೆಯನ್ನು ಇನ್ನಷ್ಟು ಸರಳಗೊಳಿಸಿ, ವೇಗಗೊಳಿಸುವ ಉದ್ದೇಶದಿಂದ ವೈದ್ಯಕೀಯ ಸಾಧನಗಳ ನಿಯಮ–2017ಕ್ಕೆ ತಿದ್ದುಪಡಿ ತರಲು ಕರಡು ಅಧಿಸೂಚನೆಯನ್ನು ಪ್ರಕಟಿಸಿದೆ.

ಗುಣಮಟ್ಟ, ಸುರಕ್ಷತೆ ಮತ್ತು ಕಾರ್ಯಕ್ಷಮತೆಗೆ ಸಂಬಂಧಿಸಿದ ಮಾನದಂಡಗಳನ್ನು ಯಾವುದೇ ರೀತಿಯಲ್ಲೂ ರಾಜಿ ಮಾಡಿಕೊಳ್ಳದೆ ಪರವಾನಗಿ ನೀಡುವ ಅವಧಿಯನ್ನು ಕಡಿಮೆ ಮಾಡುವುದು ಈ ತಿದ್ದುಪಡಿಯ ಮುಖ್ಯ ಉದ್ದೇಶವಾಗಿದೆ.

ಸಚಿವಾಲಯದ ಪ್ರಕಾರ, ವಿವಿಧ ಅಪಾಯದ ವರ್ಗಗಳ ವೈದ್ಯಕೀಯ ಸಾಧನಗಳಿಗೆ ಪರವಾನಗಿ ನೀಡುವ ಕಾನೂನುಬದ್ಧ ಅವಧಿಯನ್ನು ತಾರ್ಕಿಕವಾಗಿ ಕಡಿಮೆ ಮಾಡುವ ಮೂಲಕ ವ್ಯವಹಾರ ನಡೆಸುವ ಸುಲಭತೆ ಹೆಚ್ಚಿಸುವುದು, ನಿಯಂತ್ರಣ ವ್ಯವಸ್ಥೆಯನ್ನು ಇನ್ನಷ್ಟು ಪರಿಣಾಮಕಾರಿಯಾಗಿಸುವುದು ಹಾಗೂ ಉತ್ತಮ ಗುಣಮಟ್ಟದ ವೈದ್ಯಕೀಯ ಸಾಧನಗಳು ದೇಶದಲ್ಲಿ ತ್ವರಿತವಾಗಿ ಲಭ್ಯವಾಗುವಂತೆ ಮಾಡುವುದು ಈ ಕ್ರಮದ ಗುರಿಯಾಗಿದೆ.

ಪ್ರಸ್ತುತ ನಿಯಮಗಳ ಪ್ರಕಾರ ವೈದ್ಯಕೀಯ ಸಾಧನಗಳನ್ನು ಅಪಾಯದ ಮಟ್ಟದ ಆಧಾರದ ಮೇಲೆ ಕ್ಲಾಸ್–ಎ, ಕ್ಲಾಸ್–ಬಿ, ಕ್ಲಾಸ್–ಸಿ ಮತ್ತು ಕ್ಲಾಸ್–ಡಿ ಎಂಬ ನಾಲ್ಕು ವರ್ಗಗಳಾಗಿ ವಿಂಗಡಿಸಲಾಗಿದೆ. ಇವುಗಳಲ್ಲಿ ಕ್ಲಾಸ್–ಡಿ ಸಾಧನಗಳು ಅತ್ಯಧಿಕ ಅಪಾಯದ ವರ್ಗಕ್ಕೆ ಸೇರಿವೆ.

ಕರಡು ತಿದ್ದುಪಡಿಯ ಪ್ರಕಾರ, ಕ್ಲಾಸ್–ಬಿ ವೈದ್ಯಕೀಯ ಸಾಧನಗಳಿಗೆ ಪರವಾನಗಿ ನೀಡುವ ಗರಿಷ್ಠ ಅವಧಿಯನ್ನು 140 ದಿನಗಳಿಂದ 115 ದಿನಗಳಿಗೆ ಇಳಿಸಲು ಪ್ರಸ್ತಾಪಿಸಲಾಗಿದೆ. ಈ ವರ್ಗದಲ್ಲಿ ರಕ್ತದೊತ್ತಡ ಮಾಪಕ (ಬ್ಲಡ್ ಪ್ರೆಶರ್ ಮಾನಿಟರ್), ಹೈಪೋಡರ್ಮಿಕ್ ಸೂಜಿಗಳು ಹಾಗೂ ಪಲ್ಸ್ ಆಕ್ಸಿಮೀಟರ್ಗಳಂತಹ ಕಡಿಮೆ ಮತ್ತು ಮಧ್ಯಮ ಅಪಾಯದ ಸಾಧನಗಳು ಸೇರಿವೆ.

ಅದೇ ರೀತಿ, ಕ್ಲಾಸ್–ಸಿ ಮತ್ತು ಕ್ಲಾಸ್–ಡಿ ವರ್ಗದ ಹೆಚ್ಚಿನ ಅಪಾಯದ ಸಾಧನಗಳಾದ ಹೃದಯದ ಸ್ಟೆಂಟ್ಗಳು, ಸೊಂಟ ಮತ್ತು ಮೊಣಕಾಲಿನ ಕೃತಕ ಕೀಲುಗಳು ಹಾಗೂ ಇತರ ಮೂಳೆ ಸಂಬಂಧಿತ ಇಂಪ್ಲಾಂಟ್ಗಳಿಗೆ ಪರವಾನಗಿ ನೀಡುವ ಅವಧಿಯನ್ನು 105 ದಿನಗಳಿಂದ 90 ದಿನಗಳಿಗೆ ಇಳಿಸಲು ಪ್ರಸ್ತಾಪಿಸಲಾಗಿದೆ.

ಕರಡು ತಿದ್ದುಪಡಿಯಲ್ಲಿ ಪರವಾನಗಿ ಪ್ರಕ್ರಿಯೆಯ ಪ್ರತಿಯೊಂದು ಹಂತಕ್ಕೂ ಪ್ರತ್ಯೇಕ ಕಾಲಮಿತಿಯನ್ನು ನಿಗದಿಪಡಿಸಲಾಗಿದೆ. ಅರ್ಜಿಗಳ ಪರಿಶೀಲನೆ, ಅಧಿಸೂಚಿತ ಸಂಸ್ಥೆಗಳ ಆಡಿಟ್, ನಿಯಮಾನುಸಾರತೆ ಪರಿಶೀಲನೆ ಹಾಗೂ ಅಂತಿಮ ಪರವಾನಗಿ ನೀಡುವ ಪ್ರಕ್ರಿಯೆಗಳಿಗೆ ಸ್ಪಷ್ಟ ಸಮಯ ಮಿತಿಯನ್ನು ನಿಗದಿಪಡಿಸುವ ಮೂಲಕ ನಿಯಂತ್ರಣ ವ್ಯವಸ್ಥೆಯಲ್ಲಿ ಹೆಚ್ಚಿನ ಪಾರದರ್ಶಕತೆ, ನಿರೀಕ್ಷಿತತೆ ಮತ್ತು ಕಾರ್ಯಕ್ಷಮತೆ ತರಲು ಸರ್ಕಾರ ಉದ್ದೇಶಿಸಿದೆ.

ಈ ಕ್ರಮದಿಂದ ವೈದ್ಯಕೀಯ ಸಾಧನಗಳ ಉದ್ಯಮಕ್ಕೆ ಅನುಕೂಲವಾಗುವುದರ ಜೊತೆಗೆ, ರೋಗಿಗಳಿಗೆ ಉತ್ತಮ ಗುಣಮಟ್ಟದ ವೈದ್ಯಕೀಯ ಸಾಧನಗಳು ಇನ್ನಷ್ಟು ವೇಗವಾಗಿ ಲಭ್ಯವಾಗುವ ನಿರೀಕ್ಷೆಯಿದೆ.

ಕರಡು ಅಧಿಸೂಚನೆಯನ್ನು ಸಾರ್ವಜನಿಕ ಅಭಿಪ್ರಾಯಕ್ಕಾಗಿ ಪ್ರಕಟಿಸಲಾಗಿದ್ದು, ಎಲ್ಲಾ ಸಂಬಂಧಿತ ಹಿತಾಸಕ್ತಿಪಕ್ಷಗಳಿಂದ ಸಲಹೆ ಮತ್ತು ಆಕ್ಷೇಪಣೆಗಳನ್ನು ಆಹ್ವಾನಿಸಲಾಗಿದೆ. ಅಧಿಸೂಚನೆಯು ಕೇಂದ್ರ ಔಷಧ ಗುಣಮಟ್ಟ ನಿಯಂತ್ರಣ ಸಂಸ್ಥೆ ವೆಬ್ಸೈಟ್ ಹಾಗೂ ರಾಜಪತ್ರದಲ್ಲಿ ಲಭ್ಯವಿದ್ದು, ನಿಗದಿತ ಅವಧಿಯೊಳಗೆ ತಮ್ಮ ಅಭಿಪ್ರಾಯಗಳನ್ನು ಸಲ್ಲಿಸುವಂತೆ ಸರ್ಕಾರ ಮನವಿ ಮಾಡಿದೆ.

ಹಿಂದೂಸ್ತಾನ್ ಸಮಾಚಾರ್ / Rakesh.M.B.