ನವದೆಹಲಿ, 10 ಜೂನ್ (ಹಿ.ಸ.) :

ಆ್ಯಂಕರ್ : ಭಾರತೀಯ ಜನತಾ ಪಕ್ಷ ನೇತೃತ್ವದ ರಾಷ್ಟ್ರೀಯ ಜನತಾಂತ್ರಿಕ ಮೈತ್ರಿಕೂಟ (ಎನ್‌.ಡಿ.ಎ) ಇಂದು ನವದೆಹಲಿಯ ಭಾರತ ಮಂಟಪಂನಲ್ಲಿ ಮಹತ್ವದ ಸಭೆಯನ್ನು ಆಯೋಜಿಸಿದೆ. ಮಧ್ಯಾಹ್ನ 3 ಗಂಟೆಗೆ ಆರಂಭವಾಗಲಿರುವ ಈ ಸಭೆಯಲ್ಲಿ ಎನ್‌.ಡಿ.ಎ ಆಡಳಿತವಿರುವ ರಾಜ್ಯಗಳ ಮುಖ್ಯಮಂತ್ರಿಗಳು, ಉಪ ಮುಖ್ಯಮಂತ್ರಿಗಳು ಹಾಗೂ ಮೈತ್ರಿಕೂಟದ ಪ್ರಮುಖ ನಾಯಕರು ಭಾಗವಹಿಸಲಿದ್ದಾರೆ.

ಸಭೆಯಲ್ಲಿ ಆಂಧ್ರ ಪ್ರದೇಶ ಮುಖ್ಯಮಂತ್ರಿ ಹಾಗೂ ಟಿಡಿಪಿ ಮುಖ್ಯಸ್ಥ ಎನ್. ಚಂದ್ರಬಾಬು ನಾಯ್ಡು ಅವರು ಪ್ರಧಾನಿ ನರೇಂದ್ರ ಮೋದಿ ಅವರ ಸುದೀರ್ಘ ಚುನಾವಣಾ ವಿಜಯದ ದಾಖಲೆಗೆ ಅಭಿನಂದನಾ ನಿರ್ಣಯ ಮಂಡಿಸಲಿದ್ದಾರೆ. ಮೈತ್ರಿಕೂಟದ ಇತರೆ ನಾಯಕರು ಈ ನಿರ್ಣಯವನ್ನು ಬೆಂಬಲಿಸಲಿದ್ದು, ಪ್ರಧಾನಿ ಮೋದಿಯವರ 12 ವರ್ಷಗಳ ಆಡಳಿತ ಸಾಧನೆಗಳನ್ನು ಸ್ಮರಿಸಲಾಗುತ್ತದೆ.

ನೆಹರು ದಾಖಲೆ ಮೀರಿದ ಮೋದಿ :

ಪ್ರಧಾನಿ ಮೋದಿ ಅವರು 2014ರ ಮೇ 26ರಂದು ಮೊದಲ ಬಾರಿಗೆ ಪ್ರಧಾನಿಯಾಗಿ ಪ್ರಮಾಣವಚನ ಸ್ವೀಕರಿಸಿದ್ದರು. ಬಳಿಕ 2019 ಹಾಗೂ 2024ರ ಲೋಕ ಸಭಾ ಚುನಾವಣೆಗಳಲ್ಲಿ ಸತತವಾಗಿ ಜಯಗಳಿಸಿ ಮೂರನೇ ಅವಧಿಗೂ ಅಧಿಕಾರಕ್ಕೇರಿದರು. 2026ರ ಜೂನ್ 9ರಂದು ಪ್ರಧಾನಿಯಾಗಿ ಅವರ ಅವಧಿ 4,398 ದಿನಗಳನ್ನು ಪೂರೈಸಿದ್ದು, ಚುನಾವಣೆಯಲ್ಲಿ ಗೆದ್ದು ಅತ್ಯಂತ ದೀರ್ಘಕಾಲ ಪ್ರಧಾನಿಯಾಗಿ ಸೇವೆ ಸಲ್ಲಿಸಿದ ನಾಯಕರಾಗಿ ಹೊರಹೊಮ್ಮಿದ್ದಾರೆ.

ಈ ಮೂಲಕ ಭಾರತದ ಮೊದಲ ಪ್ರಧಾನಿ ಜವಾಹರಲಾಲ್ ನೆಹರು ಅವರ ಚುನಾವಣೋತ್ತರ ಪ್ರಧಾನಿತ್ವದ 4,397 ದಿನಗಳ ದಾಖಲೆಯನ್ನು ಮೋದಿ ಮೀರಿದ್ದಾರೆ. ನೆಹರು ಅವರು 1952ರ ಮೊದಲ ಸಾರ್ವತ್ರಿಕ ಚುನಾವಣೆಯ ಬಳಿಕದಿಂದ 1964ರವರೆಗೆ ಪ್ರಧಾನಿಯಾಗಿದ್ದರು.

ಬಿಜೆಪಿ ಸಾಧನೆಗಳ ಪ್ರಚಾರ:

ಪ್ರಧಾನಿ ಮೋದಿ ನೇತೃತ್ವದ ಸರ್ಕಾರವು 12 ವರ್ಷಗಳನ್ನು ಪೂರ್ಣಗೊಳಿಸಿರುವ ಹಿನ್ನೆಲೆಯಲ್ಲಿ ಬಿಜೆಪಿ ದೇಶಾದ್ಯಂತ ಸಾಧನೆಗಳ ಪ್ರಚಾರ ಕೈಗೊಂಡಿದೆ. ಬದಲಾವಣೆಯ 12 ವರ್ಷಗಳು: ಭರವಸೆಯಿಂದ ಅಭಿವೃದ್ಧಿಯತ್ತ ಎಂಬ ಘೋಷಣೆಯೊಂದಿಗೆ ಪಕ್ಷವು ವಸತಿ, ಕುಡಿಯುವ ನೀರು, ಆರೋಗ್ಯ, ಸ್ವಚ್ಛತೆ, ವಿದ್ಯುತ್ ಹಾಗೂ ಮೂಲಸೌಕರ್ಯ ಕ್ಷೇತ್ರಗಳಲ್ಲಿನ ಸಾಧನೆಗಳನ್ನು ಜನರ ಮುಂದಿಟ್ಟಿದೆ.

ಜಾಗತಿಕ ನಾಯಕರಿಂದ ಶುಭಾಶಯ :

ಪ್ರಧಾನಿ ಮೋದಿ ಅವರ ಈ ಮೈಲುಗಲ್ಲಿನ ಸಾಧನೆಗೆ ಅನುರ ಕುಮಾರ ದಿಸಾನಾಯಕ, ಜೇಮ್ಸ್ ಮರಾಪೆ ಹಾಗೂ ಕಮಲಾ ಪ್ರಸಾದ್ ಬಿಸೆಸರ್ ಸೇರಿದಂತೆ ಹಲವು ರಾಷ್ಟ್ರಗಳ ನಾಯಕರು ಅಭಿನಂದನಾ ಸಂದೇಶ ಕಳುಹಿಸಿದ್ದಾರೆ.

ಅಭಿವೃದ್ಧಿ, ಆತ್ಮವಿಶ್ವಾಸ ಮತ್ತು ಜಾಗತಿಕ ನಾಯಕತ್ವದ 12 ವರ್ಷ :

ಎನ್‌.ಡಿ.ಎ ನಾಯಕರು ಮತ್ತು ಮೈತ್ರಿಕೂಟದ ಪಕ್ಷಗಳ ಅಭಿಪ್ರಾಯದ ಪ್ರಕಾರ, ಪ್ರಧಾನಿ ಮೋದಿ ಅವರ 12 ವರ್ಷಗಳ ಆಡಳಿತಾವಧಿ ಕೇವಲ ರಾಜಕೀಯ ಸ್ಥಿರತೆಯ ಸಂಕೇತವಾಗಿಲ್ಲ. ಆತ್ಮನಿರ್ಭರ ಭಾರತ, ತಂತ್ರಜ್ಞಾನ ಪ್ರಗತಿ, ಸಾಮಾಜಿಕ ಸಮಾವೇಶ, ಮೂಲಸೌಕರ್ಯ ಅಭಿವೃದ್ಧಿ ಹಾಗೂ ಜಾಗತಿಕ ವೇದಿಕೆಯಲ್ಲಿ ಭಾರತದ ಹೆಚ್ಚುತ್ತಿರುವ ಪ್ರಭಾವದ ಹೊಸ ಅಧ್ಯಾಯವಾಗಿ ಈ ಅವಧಿಯನ್ನು ಪರಿಗಣಿಸಲಾಗುತ್ತಿದೆ.

ಹಿಂದೂಸ್ತಾನ್ ಸಮಾಚಾರ್ / Rakesh.M.B.