ಬಳ್ಳಾರಿ, 21 ಅಕ್ಟೋಬರ್ (ಹಿ.ಸ.)

ಕುಡತಿನಿ ರೈಲ್ವೆ ನಿಲ್ದಾಣದ ಆವರಣದಲ್ಲಿರುವ ರಸ್ತೆ ಮೇಲ್ಸೇತುವೆ (ಆರ್ಒಬಿ ಸಂ. 102) ತುರ್ತು ದುರಸ್ತಿಯ ಕಾರಣ ವಾಹನ ಸಂಚಾರವನ್ನು ಅಕ್ಟೋಬರ್ 25ರವರೆಗೆ ತಾತ್ಕಾಲಿಕವಾಗಿ ನಿಬರ್ಂಧಿಸಿ ಜಿಲ್ಲಾಧಿಕಾರಿ ಕೆ. ನಾಗೇಂದ್ರ ಪ್ರಸಾದ್ ಆದೇಶ ಹೊರಡಿಸಿದ್ದಾರೆ.

ಕುಡತಿನಿ ರೈಲ್ವೆ ಮೇಲ್ಸೇತುವೆಯಲ್ಲಿ (ಆರ್ಒಬಿ 102) ಅಳವಡಿಸಲಾಗಿದ್ದ ಸ್ಟ್ರಿಪ್ ಸೀಲ್ ಎಕ್ಸ್ಪಾನ್ಶನ್ ಜಾಯಿಂಟ್ನ ಲಿಂಕ್ ಬಾರ್ ಮುರಿದು, ಜಾಯಿಂಟ್ ಅಸೆಂಬ್ಲಿ ಸಡಿಲಗೊಂಡಿತ್ತು. ನಿರಂತರ ಭಾರಿ ವಾಹನ ಸಂಚಾರ ಹಾಗೂ ಕಂಪನಗಳಿಂದ ಸ್ಥಿತಿ ಮತ್ತಷ್ಟು ಹದಗೆಟ್ಟ ಹಿನ್ನೆಲೆಯಲ್ಲಿ, ಸಾರ್ವಜನಿಕರ ಸುರಕ್ಷತೆಯ ದೃಷ್ಟಿಯಿಂದ ಅಸ್ತಿತ್ವದಲ್ಲಿರುವ ಕಾಂಕ್ರೀಟ್ ತೆರವು, ಆಂಕರೆಜ್ ಮರುಹೊಂದಾಣಿಕೆ ಹಾಗೂ ಬೋಲ್ಟ್ಗಳ ಬದಲಾವಣೆ ಸೇರಿದಂತೆ ಅಗತ್ಯ ತಾಂತ್ರಿಕ ದುರಸ್ತಿ ಕೈಗೊಳ್ಳಲು ರೈಲ್ವೆ ಇಲಾಖೆ ಸಂಚಾರ ಸ್ಥಗಿತಕ್ಕೆ ಮನವಿ ಮಾಡಿತ್ತು. ಇದಕ್ಕೆ ಜಿಲ್ಲಾ ಪೆÇಲೀಸ್ ವರಿಷ್ಠಾಧಿಕಾರಿಗಳು, ಲೋಕೋಪಯೋಗಿ ಇಲಾಖೆ ಹಾಗೂ ಸಹಾಯಕ ಆಯುಕ್ತರು ನಿರಾಕ್ಷೇಪಣಾ ಪತ್ರ ಸಲ್ಲಿಸಿದ್ದರು.

ರಸ್ತೆ ಮೇಲ್ಸೇತುವೆ ಮುಚ್ಚಿರುವ ಅವಧಿಯಲ್ಲಿ ವಾಹನ ಸವಾರರು ಕುಡಿತಿನಿ – ಸಿದ್ಧಮ್ಮನಹಳ್ಳಿ (ಎಸ್ಹೆಚ್-132) ಮಾರ್ಗದ ಮೂಲಕ, ರೈಲ್ವೆ ಲೆವೆಲ್ ಕ್ರಾಸಿಂಗ್ ಗೇಟ್ ಸಂಖ್ಯೆ 100 (ಏಳುಬೆಂಚಿ ರಸ್ತೆ) ಮಾರ್ಗವಾಗಿ ಸಂಚರಿಸಲು ಸೂಚಿಸಲಾಗಿದೆ.

ಪರ್ಯಾಯ ಮಾರ್ಗವಾದ ರೈಲ್ವೆ ಗೇಟ್ ಸಂ. 100 (ಏಳುಬೆಂಚಿ ರಸ್ತೆ) ಹದಗೆಟ್ಟಿದ್ದು, ಗುಂಡಿ ಬಿದ್ದಿರುವ ಜಾಗಗಳಿಗೆ ತಕ್ಷಣ ಜಲ್ಲಿ/ಮುರಂ ಹಾಕಿ ರಸ್ತೆಯನ್ನು ಸಮತಟ್ಟುಗೊಳಿಸಿ ಸುಗಮ ಸಂಚಾರಕ್ಕೆ ಅನುವು ಮಾಡಲಾಗಿದೆ. ಕಾಮಗಾರಿ ನಡೆಯುವ ಸ್ಥಳದಲ್ಲಿ ಬ್ಯಾರಿಕೇಡ್ಗಳು, ಎಚ್ಚರಿಕೆ ಫಲಕಗಳು ಹಾಗೂ ರಾತ್ರಿ ವೇಳೆ ಸೂಕ್ತ ಬೆಳಕಿನ ವ್ಯವಸ್ಥೆಯನ್ನು ರೈಲ್ವೆ ಇಲಾಖೆ ಕಲ್ಪಿಸಿದೆ ಎಂದು ಅವರು ತಿಳಿಸಿದ್ದಾರೆ.

ದುರಸ್ತಿ ಕಾಮಗಾರಿ ಪೂರ್ಣಗೊಂಡು, ತಾಂತ್ರಿಕ ಅಧಿಕಾರಿಗಳು ಸೇತುವೆಯ ಸುರಕ್ಷತೆಯನ್ನು ದೃಢಪಡಿಸಿದ ನಂತರವೇ ಎಂದಿನಂತೆ ಸಂಚಾರಕ್ಕೆ ಮುಕ್ತಗೊಳಿಸಲಾಗುವುದು.

ವಾಹನ ಸವಾರರು ಮತ್ತು ಸಾರ್ವಜನಿಕರು ಈ ಬದಲಾವಣೆಯನ್ನು ಗಮನಿಸಿ ಸಹಕರಿಸಬೇಕೆಂದು ಜಿಲ್ಲಾಧಿಕಾರಿ ನಾಗೇಂದ್ರ ಪ್ರಸಾದ್.ಕೆ ಅವರು ಕೋರಿದ್ದಾರೆ.

---------------

ಹಿಂದೂಸ್ತಾನ್ ಸಮಾಚಾರ್ / ಜಿ.ಎಂ. ರೋಹಿಣಿ ಕುಮಾರ್