ಬೆಂಗಳೂರು, 15 ಅಕ್ಟೋಬರ್ (ಹಿ.ಸ.):
ವಿಜ್ಞಾನ ಮತ್ತು ತಂತ್ರಜ್ಞಾನದ ಮೂಲಕ ದೇಶದ ಬಲವರ್ಧನೆಗೆ ತಮ್ಮ ಜೀವನವನ್ನೇ ಸಮರ್ಪಿಸಿದ ಭಾರತದ ಮಾಜಿ ರಾಷ್ಟ್ರಪತಿ, ದೂರದೃಷ್ಟಿಯ ವಿಜ್ಞಾನಿ ಹಾಗೂ ಭಾರತ ರತ್ನ ಪುರಸ್ಕೃತ ಡಾ. ಎ.ಪಿ.ಜೆ. ಅಬ್ದುಲ್ ಕಲಾಂ ಅವರ ಜನ್ಮದಿನದಂದು ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಗೌರವ ನಮನ ಸಲ್ಲಿಸಿದ್ದಾರೆ.
ಈ ಕುರಿತು ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಸಂದೇಶ ಪ್ರಕಟಿಸಿರುವ ಅವರು, ಎಸ್‌ಎಲ್‌ವಿ-3 ಕಾರ್ಯಕ್ರಮದ ನೇತೃತ್ವದಿಂದ ಹಿಡಿದು ಭಾರತದ ಕ್ಷಿಪಣಿ ಸಾಮರ್ಥ್ಯವನ್ನು ವೃದ್ಧಿಸುವವರೆಗೆ ಕಲಾಂ ಅವರ ಕೊಡುಗೆಗಳು ಬಲಿಷ್ಠ ಮತ್ತು ಸ್ವಾವಲಂಬಿ ಭಾರತದ ನಿರ್ಮಾಣಕ್ಕೆ ಭದ್ರ ಬುನಾದಿ ಹಾಕಿವೆ ಎಂದು ಸ್ಮರಿಸಿದ್ದಾರೆ.
ಯುವ ಮನಸ್ಸುಗಳ ಶಕ್ತಿಯ ಮೇಲಿನ ಅಚಲ ನಂಬಿಕೆಯೇ ಕಲಾಂ ಅವರ ಅತ್ಯಂತ ದೊಡ್ಡ ಪರಂಪರೆ ಎಂದು ಬಣ್ಣಿಸಿರುವ ಅವರು, ವಿಶ್ವ ವಿದ್ಯಾರ್ಥಿಗಳ ದಿನದಂದು ಯುವಜನರಿಗೆ ಕನಸು ಕಾಣಲು, ಕಲಿಯಲು, ಪ್ರಶ್ನಿಸಲು ಹಾಗೂ ಅಭಿವೃದ್ಧಿ ಹೊಂದಿದ ಭಾರತದ ನಿರ್ಮಾಣಕ್ಕಾಗಿ ಶ್ರಮಿಸಲು ಪ್ರೇರಣೆ ನೀಡಿದ ಮಹಾನ್ ಶಿಕ್ಷಕರನ್ನು ಸ್ಮರಿಸಬೇಕು ಎಂದು ತಿಳಿಸಿದ್ದಾರೆ.
ಜ್ಞಾನ, ನಾವೀನ್ಯತೆ ಮತ್ತು ಸೇವೆಯಿಂದ ರೂಪುಗೊಳ್ಳುವ ಭವಿಷ್ಯದತ್ತ ವಿದ್ಯಾರ್ಥಿಗಳು ಹಾಗೂ ದೇಶ ಮುನ್ನಡೆಯಲು ಡಾ. ಕಲಾಂ ಅವರ ದೂರದೃಷ್ಟಿ ಸದಾ ಮಾರ್ಗದರ್ಶನ ನೀಡಲಿ ಎಂದು ಮುಖ್ಯಮಂತ್ರಿ ಆಶಿಸಿದ್ದಾರೆ.
---------------
ಹಿಂದೂಸ್ತಾನ್ ಸಮಾಚಾರ್ / Rakesh.M.B.
