ಟೆಹ್ರಾನ್, 10 ಜನವರಿ (ಹಿ.ಸ.) :
ಆ್ಯಂಕರ್ : ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ವಿರುದ್ಧ ಇರಾನ್ನ ಸರ್ವೋಚ್ಚ ನಾಯಕ ಅಯತೊಲ್ಲಾ ಅಲಿ ಖಮೇನಿ ಕಟುವಾದ ವಾಗ್ದಾಳಿ ನಡೆಸಿದ್ದು, ದುರಹಂಕಾರಿ ಆಡಳಿತಗಾರರು ಅಧಿಕಾರದ ಉತ್ತುಂಗವನ್ನು ತಲುಪಿದ ಕ್ಷಣದಲ್ಲೇ ಅವರ ಪತನ ಆರಂಭವಾಗುತ್ತದೆ ಎಂದು ಹೇಳಿದ್ದಾರೆ. ಮಾಜಿ ಇರಾನ್ ಷಾ ಮೊಹಮ್ಮದ್ ರೆಜಾ ಪಹ್ಲವಿಯನ್ನು ಉಲ್ಲೇಖಿಸಿದ ಖಮೇನಿ, ಅಹಂಕಾರದ ಶಿಖರ ತಲುಪಿದ ಆಡಳಿತಗಾರರು ಇತಿಹಾಸದಲ್ಲೇ ಕುಸಿದಿದ್ದಾರೆ; ಟ್ರಂಪ್ ಕೂಡ ಅದೇ ವಿಧಿಯನ್ನು ಎದುರಿಸಬೇಕಾಗುತ್ತದೆ ಎಂದು ಎಚ್ಚರಿಸಿದರು.
ಸಾಮಾಜಿಕ ಮಾಧ್ಯಮದಲ್ಲಿ ಪ್ರತಿಕ್ರಿಯಿಸಿದ ಖಮೇನಿ, “ಜಗತ್ತಿನ ನಿರಂಕುಶಾಧಿಕಾರಿಗಳು ತಮ್ಮ ಹೆಮ್ಮೆಯ ಗರಿಷ್ಠ ಹಂತದಲ್ಲೇ ಅಂತ್ಯವನ್ನು ಕಂಡಿದ್ದಾರೆ. ನೀವೂ ಕೂಡ ಬೀಳುತ್ತೀರಿ” ಎಂದು ಟ್ರಂಪ್ಗೆ ನೇರ ಸಂದೇಶ ನೀಡಿದರು. ಇತ್ತೀಚೆಗೆ ಟೆಹ್ರಾನ್ ಮತ್ತು ಇತರ ನಗರಗಳಲ್ಲಿ ನಡೆದ ಹಿಂಸಾತ್ಮಕ ಘಟನೆಗಳನ್ನು ಅವರು ತೀವ್ರವಾಗಿ ಖಂಡಿಸಿದ್ದು, ಪ್ರತಿಭಟನಾಕಾರರ ಮೇಲೆ ಆರೋಪ ಹೊರಿಸಿದ್ದಾರೆ. ಅಮೆರಿಕದ ಅಧ್ಯಕ್ಷರನ್ನು ಮೆಚ್ಚಿಸಲು ಕೆಲವರು ತಮ್ಮದೇ ದೇಶಕ್ಕೆ ಹಾನಿ ಮಾಡುತ್ತಿದ್ದಾರೆ ಎಂದು ಖಮೇನಿ ದೂರಿದ್ದಾರೆ.
ಈ ಮಧ್ಯೆ, ಇರಾನ್ನ ಮಾಜಿ ಷಾ ಅವರ ಗಡಿಪಾರುಗೊಂಡ ಪುತ್ರ ರೆಜಾ ಪಹ್ಲವಿ, ಇರಾನ್ ಪರಿಸ್ಥಿತಿಯಲ್ಲಿ ಮಧ್ಯಪ್ರವೇಶಿಸಲು ಅಮೆರಿಕ ಸಿದ್ಧವಾಗಿರಬೇಕೆಂದು ಟ್ರಂಪ್ ಅವರಿಗೆ ಮನವಿ ಮಾಡಿದ್ದಾರೆ. ಸಾಮಾಜಿಕ ಮಾಧ್ಯಮ ‘ಎಕ್ಸ್’ನಲ್ಲಿ ಪೋಸ್ಟ್ ಮಾಡಿದ ಅವರು, ಇರಾನಿಯನ್ನರು ಬೀದಿಗಿಳಿದು ಆಡಳಿತದ ವಿರುದ್ಧ ಪ್ರತಿಭಟನೆ ನಡೆಸಲು ಸಜ್ಜಾಗಿದ್ದಾರೆ ಎಂದು ಹೇಳಿದ್ದು, ಸಮಯ ಅತ್ಯಂತ ನಿರ್ಣಾಯಕವಾಗಿದೆ ಎಂದು ಒತ್ತಿ ಹೇಳಿದ್ದಾರೆ. ಖಮೇನಿ ಆಡಳಿತದ ವಿರುದ್ಧ ನೀಡಿರುವ ಬೆದರಿಕೆಗಳು ಆಡಳಿತದ ಗೂಂಡಾಗಳನ್ನು ಹಿಂದೆ ಸರಿಯುವಂತೆ ಮಾಡಿವೆ ಎಂದು ಅವರು ಹೇಳಿದ್ದಾರೆ.
ಇದಕ್ಕೆ ಪ್ರತಿಯಾಗಿ ಅಮೆರಿಕ ಅಧ್ಯಕ್ಷ ಟ್ರಂಪ್ ಮತ್ತೊಮ್ಮೆ ಇರಾನ್ಗೆ ಎಚ್ಚರಿಕೆ ನೀಡಿದ್ದು, ಪ್ರತಿಭಟನಾಕಾರರನ್ನು ಕೊಲ್ಲಲಾದರೆ ಅಮೆರಿಕ ಮಧ್ಯಪ್ರವೇಶಿಸಿ ಅತ್ಯಂತ ನೋವುಂಟುಮಾಡುವ ಸ್ಥಳಗಳಲ್ಲಿ ದಾಳಿ ನಡೆಸಲಿದೆ ಎಂದು ಹೇಳಿದ್ದಾರೆ. ಇರಾನ್ನಲ್ಲಿನ ಬೆಳವಣಿಗೆಗಳನ್ನು ಅಮೆರಿಕ ಸೂಕ್ಷ್ಮವಾಗಿ ಗಮನಿಸುತ್ತಿದೆ ಎಂದು ಅವರು ತಿಳಿಸಿದ್ದಾರೆ.
ಇರಾನ್ನಲ್ಲಿ ಆರ್ಥಿಕ ಸಂಕಷ್ಟ ತೀವ್ರಗೊಂಡಿದ್ದು, ಹಣದುಬ್ಬರ ಏರಿಕೆ, ಕರೆನ್ಸಿ ರಿಯಾಲ್ ಮೌಲ್ಯ ಕುಸಿತದ ವಿರುದ್ಧ ದೇಶಾದ್ಯಂತ ವ್ಯಾಪಕ ಪ್ರತಿಭಟನೆಗಳು ನಡೆಯುತ್ತಿವೆ. ಉನ್ನತ ನಾಯಕತ್ವದ ವಿರುದ್ಧ ಜನರ ಆಕ್ರೋಶ ಹೆಚ್ಚಾಗಿದ್ದು, ಈ ಪ್ರತಿಭಟನೆಗಳು ದೇಶದ ಎಲ್ಲಾ 31 ಪ್ರಾಂತ್ಯಗಳಿಗೂ ಹರಡಿವೆ.
ಕಳೆದ ವರ್ಷ ಡಿಸೆಂಬರ್ 28ರಂದು ರಿಯಾಲ್ ಇತಿಹಾಸದಲ್ಲೇ ಕನಿಷ್ಠ ಮಟ್ಟಕ್ಕೆ ಕುಸಿದ ಬಳಿಕ ಟೆಹ್ರಾನ್ನ ಪ್ರಮುಖ ಮಾರುಕಟ್ಟೆಗಳಿಂದ ಆರಂಭವಾದ ಪ್ರತಿಭಟನೆಗಳು, ಕಠಿಣ ಭದ್ರತಾ ಕ್ರಮಗಳು ಹಾಗೂ ವ್ಯಾಪಕ ಇಂಟರ್ನೆಟ್ ನಿರ್ಬಂಧಗಳ ನಡುವೆಯೂ ಟೆಹ್ರಾನ್, ಮಶಾದ್ ಸೇರಿದಂತೆ ಪ್ರಮುಖ ನಗರಗಳಲ್ಲಿ ಮುಂದುವರಿದಿವೆ. ಈ ಪ್ರತಿಭಟನೆಯಲ್ಲಿ ಮಾಜಿ ಷಾ ಪುತ್ರ ರೆಜಾ ಪಹ್ಲವಿ ಪರ ಘೋಷಣೆಗಳನ್ನು ಕೂಗುತ್ತಿರುವ ಹೆಚ್ಚಿನ ಸಂಖ್ಯೆಯ ರಾಜಪ್ರಭುತ್ವ ಪರ ಪ್ರತಿಭಟನಾಕಾರರು ಭಾಗಿಯಾಗಿದ್ದಾರೆ.
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
