ಬಳ್ಳಾರಿ, 27 ಆಗಸ್ಟ್ (ಹಿ.ಸ.) :

ಆ್ಯಂಕರ್ : ಕುಡತಿನಿ, ಹರಗಿನಡೋಣಿ, ಜಾನೆಕುಂಟೆ, ವೇಣಿವೀರಾಪುರ, ಕೊಳಗಲ್ಲು, ಎರ್ರಂಗಳಿ ಮತ್ತು ಸಿದ್ದಮ್ಮನಹಳ್ಳಿ ಗ್ರಾಮದ ವ್ಯಾಪ್ತಿ ಭೂ ಸಂತ್ರಸ್ತ ರೈತರ ಎರಡನೇ ಹಂತದ ಹೋರಾಟದ ರೂಪುರೇಷಗಳ ಚರ್ಚೆಗಾಗಿ ಕುಡತಿನಿಯಲ್ಲಿ ಆಗಸ್ಟ್ 30ರ ಶನಿವಾರ ಬೆಳಗ್ಗೆ 11 ಗಂಟೆಗೆ ಸಭೆ ನಡೆಯಲಿದೆ ಎಂದು ಸಿಐಟಿಯು ಜಿಲ್ಲಾ ಅಧ್ಯಕ್ಷ ಜೆ. ಸತ್ಯಬಾಬು ಅವರು ತಿಳಿಸಿದ್ದಾರೆ.

ಭೂ ಸಂತಸ್ತರ ಹೋರಾಟ ಸಮಿತಿ- ಕುಡತಿನಿ, ಕರ್ನಾಟಕ ಪ್ರಾಂತ ರೈತ ಸಂಘ, ಸೆಂಟರ್ ಆಫ್ ಇಂಡಿಯನ್ ಟ್ರೇಡ್ ಯೂನಿಯನ್ ಮತ್ತು ಕನ್ನಡ ಪರ ಸಂಘಟನೆಗಳ ಜಂಟಿ ಆಶ್ರಯದಲ್ಲಿ ಸಭೆ ನಡೆಯಲಿದೆ. ಕುಡತಿನಿ ಸುತ್ತಲಿನ ವಿವಿಧ ಗ್ರಾಮಗಳ 12,500 ಎಕರೆಗಿಂತಲೂ ಹೆಚ್ಚಿನ ಭೂಮಿಯನ್ನು (ಕೆಐಡಿಬಿ) ಮೂಲಕ ರೈತರಿಂದ ಕರ್ಣಾಟಕ ರಾಜ್ಯ ಸರ್ಕಾರ ಅತ್ಯಂತ ಕಡಿಮೆ ಬೆಲೆಗೆ ಖರೀದಿ ಮಾಡಿ, ಹೆಚ್ಚಿನ ಬೆಲೆಗೆ ಕೈಗಾರಿಕೆಗಳಿಗೆ ನೀಡಿದೆ. ಬಲವಂತದ ಭೂ ಸ್ವಾದೀನವನ್ನು ವಿರೋಧಿಸಿ, ಸರ್ವೋಚ್ಚ ನ್ಯಾಯಾಲಯ ನೀಡಿರುವ ತೀರ್ಪುನ ಪ್ರಕಾರ ಪ್ರತಿ ಎಕರೆಗೆ 1 ಕೋಟಿ 30 ಲಕ್ಷ ರೂಪಾಯಿ ಪರಿಹಾರವನ್ನು ನೀಡಬೇಕಿದೆ.

ಅಲ್ಲದೇ, ಉದ್ದೇಶಿತ ಕೈಗಾರಿಕಾ ಘಟಕಗಳು ತಕ್ಷಣವೇ ಕೈಗಾರಿಕಾ ನಿರ್ಮಾಣ - ಉತ್ಪಾದನಾ ಚಟುವಟಿಕೆಗಳನ್ನು ಪ್ರಾರಂಭಿಸಿ ಉದ್ಯೋಗ ಸೃಷ್ಟಿಸಬೇಕು. ಭೂ ಸಂತ್ರಸ್ತರಿಗೆ ತಕ್ಷಣವೇ ಉದ್ಯೋಗ ನೀಡಬೇಕು. ಭೂ ಸ್ವಾಧೀನವಾಗಿ 14 ವರ್ಷಗಳಾಗಿದ್ದು, ಈವರೆಗೆ ಉದ್ಯೋಗ ನೀಡುವಲ್ಲಿ ನಿರ್ಲಕ್ಷ್ಯ ತೋರುತ್ತಿರುವ ಕೈಗಾರಿಕೆಗಳು ಭೂ ಸಂತ್ರಸ್ತ ಕುಟುಂಬದವರಿಗೆ ವೇತನ ನೀಡಬೇಕು ಎಂದು ಆಗ್ರಹಿಸಿದ್ದಾರೆ.

ಸರ್ಕಾರ, ಜನಪ್ರತಿನಿಧಿಗಳು - ಅಧಿಕಾರಿಗಳು 980 ದಿನಗಳಿಂದ ನಡೆಯುತ್ತಿರುವ ಹೋರಾಟವನ್ನು ನಿರ್ಲಕ್ಷಿಸಿದಂತಿದೆ. ವಿವಿಧ ಸಂದರ್ಭಗಳಲ್ಲಿ ಸರ್ಕಾರ, ಜನಪ್ರತಿನಿಧಿಗಳು ನೀಡಿದ ಭರವಸೆಗಳು - ಮೂಡಿಸಿದ ವಿಶ್ವಾಸಗಳು ವಿಫಲವಾಗಿವೆ. ಕಾರಣ ಎರಡನೇ ಹಂತದ ಹೋರಾಟದ ರೂಪುರೇಷಕ್ಕಾಗಿ ಈ ಸಭೆಯನ್ನು ಏರ್ಪಡಿಸಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಈ ಸಭೆಯಲ್ಲಿ ಕರ್ನಾಟಕ ಪ್ರಾಂತ ರೈತ ಸಂಘಟನೆ ರಾಜ್ಯಾಧ್ಯಕ್ಷ, ಭೂ ಸಂತಸ್ತರ ಹೋರಾಟ ಸಮಿತಿ ಗೌರವ ಅದ್ಯಕ್ಷರಾಗಿರುವ ಯು. ಬಸವರಾಜ, ವಿ.ಎಸ್. ಶಿವಶಂಕರ, ಜೆ.ಎಂ. ಚನ್ನಬಸಯ್ಯ, ಎಂ. ತಿಪ್ಪೇಸ್ವಾಮಿ, ಜಂಗ್ಲಿ ಸಾಬ್ ಇನ್ನಿತರರು ಚರ್ಚೆ ನಡೆಸಲಿದ್ದಾರೆ ಎಂದು ಅವರು ತಿಳಿಸಿದ್ದಾರೆ.

ಹಿಂದೂಸ್ತಾನ್ ಸಮಾಚಾರ್ / ಜಿ.ಎಂ. ರೋಹಿಣಿ ಕುಮಾರ್