ನವದೆಹಲಿ, 19 ಡಿಸೆಂಬರ್ (ಹಿ.ಸ.) :

ಆ್ಯಂಕರ್ : ಸ್ವಾತಂತ್ರ್ಯ ಹೋರಾಟದ ಇತಿಹಾಸದಲ್ಲಿನ ಕಾಕೋರಿ ರೈಲು ದರೋಡೆಯ ಅಮರ ಕ್ರಾಂತಿಕಾರಿಗಳಾದ ಪಂಡಿತ್ ರಾಮ್ ಪ್ರಸಾದ್ ಬಿಸ್ಮಿಲ್, ಅಶ್ಫಾಕುಲ್ಲಾ ಖಾನ್ ಹಾಗೂ ಠಾಕೂರ್ ರೋಶನ್ ಸಿಂಗ್ ಅವರ ಹುತಾತ್ಮ ದಿನದಂದು ದೇಶಾದ್ಯಂತ ಗಣ್ಯ ನಾಯಕರು ಗೌರವ ಸಲ್ಲಿಸಿದರು.

ಕೇಂದ್ರ ಗೃಹ ಸಚಿವ ಅಮಿತ್ ಶಾ ಸಾಮಾಜಿಕ ಮಾಧ್ಯಮದಲ್ಲಿ, ಕಾಕೋರಿ ರೈಲು ಕಾರ್ಯಾಚರಣೆ ಬ್ರಿಟಿಷ್ ಆಳ್ವಿಕೆಯ ಅಡಿಪಾಯವನ್ನು ಅಲುಗಾಡಿಸಿದ ಮಹತ್ವದ ಕ್ರಾಂತಿಕಾರಿ ಹೆಜ್ಜೆಯಾಗಿದ್ದು, ದೇಶದ ಸಂಪನ್ಮೂಲಗಳ ಮೇಲೆ ಭಾರತೀಯರಿಗೆ ಹಕ್ಕು ಸಿಗಬೇಕು ಎಂಬ ಸಂಕಲ್ಪವನ್ನು ಈ ವೀರರು ಸಾರಿದರು ಎಂದು ಹೇಳಿದರು. ಅವರ ತ್ಯಾಗವು ಮುಂದಿನ ಪೀಳಿಗೆಯ ಕ್ರಾಂತಿಕಾರಿಗಳಿಗೆ ಧೈರ್ಯ ಮತ್ತು ಶೌರ್ಯಕ್ಕೆ ಸ್ಫೂರ್ತಿಯಾಗಿದೆ ಎಂದು ಶಾ ತಿಳಿಸಿದ್ದಾರೆ.

ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಮೂವರು ಹುತಾತ್ಮರ ತ್ಯಾಗವನ್ನು ಸ್ಮರಿಸಿ, ಗಂಗಾ–ಯಮುನಾ ಸಂಸ್ಕೃತಿ ಹಾಗೂ ವೈವಿಧ್ಯತೆಯಲ್ಲಿ ಏಕತೆ ಭಾರತದ ಬಲವಾಗಿದ್ದು, ಪ್ರತಿಯೊಂದು ವಿಷಯವನ್ನೂ ಕೋಮು ದೃಷ್ಟಿಕೋನದಿಂದ ನೋಡುವವರು ಈ ವೀರರ ಪರಂಪರೆಯಿಂದ ಪಾಠ ಕಲಿಯಬೇಕು ಎಂದರು.

ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ಗಾಂಧಿ ವಾದ್ರಾ, ಈ ಮೂವರು ಕ್ರಾಂತಿಕಾರಿಗಳ ಹುತಾತ್ಮತೆಯು ಸ್ವಾತಂತ್ರ್ಯ, ಸಮಾನತೆ, ನ್ಯಾಯ ಮತ್ತು ಭ್ರಾತೃತ್ವದ ಮೇಲೆ ನಿಂತ ಭಾರತದ ಕನಸಿನ ಪ್ರತೀಕ ಎಂದು ಹೇಳಿದರು. ಆ ಕನಸನ್ನು ಸಾಕಾರಗೊಳಿಸುವುದೇ ನಿಜವಾದ ಗೌರವ ಎಂದರು.

ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್, ಕಾಕೋರಿ ರೈಲು ಕಾರ್ಯಾಚರಣೆಯನ್ನು ಭಾರತದ ಸ್ವಾಭಿಮಾನದ ಅಮರ ಪ್ರತಿಧ್ವನಿಯಾಗಿ ವರ್ಣಿಸಿದರು. ಮಾತೃಭೂಮಿಯ ಗೌರವಕ್ಕಾಗಿ ಎಲ್ಲವನ್ನೂ ತ್ಯಾಗ ಮಾಡಿದ ಈ ಕ್ರಾಂತಿಕಾರಿಗಳ ಪರಂಪರೆ ರಾಷ್ಟ್ರಹಿತಕ್ಕೆ ಆದ್ಯತೆ ನೀಡಲು ಸ್ಫೂರ್ತಿ ನೀಡುತ್ತದೆ ಎಂದರು.

ದೆಹಲಿ ಮುಖ್ಯಮಂತ್ರಿ ರೇಖಾ ಗುಪ್ತಾ, ಕಾಕೋರಿಯಲ್ಲಿ ನಡೆದ ಕ್ರಾಂತಿ ಬ್ರಿಟಿಷ್ ಸಾಮ್ರಾಜ್ಯದ ಬುನಾದಿಯನ್ನು ಕದಡಿದ್ದು, ನಿದ್ರಿಸುತ್ತಿದ್ದ ರಾಷ್ಟ್ರವನ್ನು ಜಾಗೃತಗೊಳಿಸಿತು ಎಂದು ಹೇಳಿದರು.

ಗಮನಾರ್ಹವಾಗಿ, 1927ರ ಡಿಸೆಂಬರ್ 19ರಂದು ಪಂಡಿತ್ ರಾಮ್ ಪ್ರಸಾದ್ ಬಿಸ್ಮಿಲ್ ಅವರನ್ನು ಗೋರಖ್‌ಪುರದಲ್ಲಿ, ಅಶ್ಫಾಕುಲ್ಲಾ ಖಾನ್ ಅವರನ್ನು ಫೈಜಾಬಾದ್‌ನಲ್ಲಿ ಮತ್ತು ಠಾಕೂರ್ ರೋಶನ್ ಸಿಂಗ್ ಅವರನ್ನು ಪ್ರಯಾಗ್‌ರಾಜ್‌ನಲ್ಲಿ ಬ್ರಿಟಿಷರು ಗಲ್ಲಿಗೇರಿಸಿದ್ದರು.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa