ನವದೆಹಲಿ, 16 ನವೆಂಬರ್ (ಹಿ.ಸ.) :

ಆ್ಯಂಕರ್ : ಬ್ರೆಜಿಲ್‌ನ ಸಾವೊ ಪಾಲೊದಲ್ಲಿ ನಡೆದ 3ನೇ ಅಂತರರಾಷ್ಟ್ರೀಯ ಆಯುರ್ವೇದ ಸಮ್ಮೇಳನದಲ್ಲಿ ಆಯುರ್ವೇದದ 40 ವರ್ಷದ ಬೆಳವಣಿಗೆ, ಭಾರತ-ಬ್ರೆಜಿಲ್ ಸಹಕಾರ, ಸಾಂಪ್ರದಾಯಿಕ ಚಿಕಿತ್ಸಾ ಪದ್ಧತಿ, ಹೊಸ ಸಂಶೋಧನಾ ಮಾರ್ಗಗಳು ಹಾಗೂ ಬ್ರೆಜಿಲ್‌ನ ಅಧಿಕೃತ ವೈದ್ಯಕೀಯ ಕ್ಷೇತ್ರದಲ್ಲಿ ಆಯುರ್ವೇದದ ಸ್ಥಾನ ಮುಂತಾದ ವಿಷಯಗಳ ಕುರಿತು ಎರಡು ದಿನಗಳ ಕಾಲ ಚರ್ಚೆ ನಡೆಯಿತು.

ಕಾರ್ಯಕ್ರಮವನ್ನು ಬ್ರೆಜಿಲ್‌ನಲ್ಲಿನ ಭಾರತೀಯ ರಾಯಭಾರಿ ದಿನೇಶ್ ಭಾಟಿಯಾ ಉದ್ಘಾಟಿಸಿದರು. ಈ ಸಂದರ್ಭದಲ್ಲಿ ಆಯುಷ್ ಸಚಿವಾಲಯದ ಕಾರ್ಯದರ್ಶಿ ಡಾ. ರಾಜೇಶ್ ಕೋಟೆಚಾ ಮಾತನಾಡಿ, “ಆಯುರ್ವೇದವು ದೇಹ-ಮನಸ್ಸು-ಜೀವನಶೈಲಿಯ ಸಮತೋಲನದ ವಿಜ್ಞಾನ” ಎಂದು ಹೇಳಿದರು. ಆಯುರ್ವೇದ ವಿಸ್ತರಣೆಗೆ ಎರಡೂ ದೇಶಗಳ ಒಪ್ಪಂದಗಳು ಮಹತ್ವದ್ದೆಂದು ಅವರು ಹೇಳಿದರು.

ಬ್ರೆಜಿಲ್ ಆಯುರ್ವೇದವನ್ನು ಅಧಿಕೃತವಾಗಿ ಗುರುತಿಸಿದ ದಕ್ಷಿಣ ಅಮೆರಿಕಾದ ಮೊದಲ ದೇಶವಾಗಿದ್ದು, ಈಗ ತನ್ನ ಅಧಿಕೃತ ಉದ್ಯೋಗ ಪಟ್ಟಿಯಲ್ಲೂ ಆಯುರ್ವೇದವನ್ನು ಸೇರಿಸಿದೆ. ಇದು ಆಯುರ್ವೇದ ಅಭ್ಯಾಸ ವಿಸ್ತರಣೆಗೆ ದೊಡ್ಡ ಹೆಜ್ಜೆಯಾಗಿ ಪರಿಗಣಿಸಲಾಗಿದೆ.

ಸ್ವಾಮಿ ವಿವೇಕಾನಂದ ಸಾಂಸ್ಕೃತಿಕ ಕೇಂದ್ರ ಮತ್ತು ಬ್ರೆಜಿಲ್‌ನ ರಾಷ್ಟ್ರೀಯ ಆಯುರ್ವೇದ ನಿಯಂತ್ರಣ ಮಂಡಳಿ ಆಯೋಜಿಸಿದ್ದ ಈ ಸಮ್ಮೇಳನದಲ್ಲಿ ತಜ್ಞರು, ಸಂಶೋಧಕರು, ವಿದ್ಯಾರ್ಥಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿದ್ದರು. ಆಯುರ್ವೇದದ ಮುಂದಿನ 40 ವರ್ಷಗಳ ಸಾಧ್ಯತೆ ಮತ್ತು ಸವಾಲುಗಳ ಕುರಿತು ದುಂಡುಮೇಜು ಚರ್ಚೆಯೊಂದಿಗೆ ಕಾರ್ಯಕ್ರಮ ಮುಕ್ತಾಯವಾಯಿತು.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa