ಅಂಕಾರಾ, 31 ಅಕ್ಟೋಬರ್ (ಹಿ.ಸ.) :
ಆ್ಯಂಕರ್ : ಇಸ್ತಾನ್‌ಬುಲ್‌ನಲ್ಲಿ ನಡೆದ ಮಾತುಕತೆಗಳ ನಂತರ ಪಾಕಿಸ್ತಾನ ಮತ್ತು ಅಫ್ಘಾನಿಸ್ತಾನಗಳು ಕದನ ವಿರಾಮವನ್ನು ಮುಂದುವರಿಸಲು ಒಪ್ಪಿಕೊಂಡಿವೆ. ಕಳೆದ ಶನಿವಾರ ನಡೆದ ಎರಡನೇ ಸುತ್ತಿನ ಮಾತುಕತೆ ವಿಫಲವಾದರೂ, ಮಧ್ಯವರ್ತಿ ರಾಷ್ಟ್ರಗಳಾದ ಟರ್ಕಿಯೆ ಮತ್ತು ಕತಾರ್ ಅವರ ಪ್ರಯತ್ನದಿಂದ ಇಂದು ಬೆಳಿಗ್ಗೆ ಈ ಒಪ್ಪಂದಕ್ಕೆ ಬರಲಾಗಿದೆ.
ಟರ್ಕಿಯ ವಿದೇಶಾಂಗ ಸಚಿವಾಲಯದ ಪ್ರಕಟಣೆಯ ಪ್ರಕಾರ, ಎರಡೂ ದೇಶಗಳು ಶಾಂತಿಯನ್ನು ಕಾಪಾಡಿಕೊಳ್ಳಲು ಹಾಗೂ ಉಲ್ಲಂಘನೆಗಳ ಮೇಲೆ ಕ್ರಮ ಕೈಗೊಳ್ಳಲು ‘ಮೇಲ್ವಿಚಾರಣೆ ಮತ್ತು ಪರಿಶೀಲನಾ ಕಾರ್ಯವಿಧಾನ’ ರಚಿಸಲು ಒಪ್ಪಿಕೊಂಡಿವೆ. ನವೆಂಬರ್ 6ರಂದು ಇಸ್ತಾನ್‌ಬುಲ್‌ನಲ್ಲಿ ನಡೆಯಲಿರುವ ಮುಂದಿನ ಸಭೆಯಲ್ಲಿ, ಕದನ ವಿರಾಮದ ಅನುಷ್ಠಾನದ ವಿಧಾನಗಳ ಕುರಿತು ಚರ್ಚಿಸಲಾಗುವುದು.
ಟರ್ಕಿಯೆ ಮತ್ತು ಕತಾರ್ ಇಬ್ಬರೂ ಕಡೆಯವರ “ಸಕ್ರಿಯ ಸಹಕಾರ”ವನ್ನು ಮೆಚ್ಚಿ, ಶಾಶ್ವತ ಶಾಂತಿ ಹಾಗೂ ಸ್ಥಿರತೆಗಾಗಿ ಮುಂದಿನ ಮಾತುಕತೆಗಳಲ್ಲಿ ಸಹಕಾರ ಮುಂದುವರಿಸುವುದಾಗಿ ಘೋಷಿಸಿವೆ.
ಅಕ್ಟೋಬರ್ 11ರಂದು ಉಂಟಾದ ಗಡಿಘರ್ಷಣೆಯ ನಂತರ ಎರಡೂ ದೇಶಗಳ ನಡುವಿನ ಉದ್ವಿಗ್ನತೆ ಹೆಚ್ಚಿತ್ತು. ಪಾಕಿಸ್ತಾನವು ಕಾಬೂಲ್‌ನಿಂದ ಉಗಮಿಸಿದ ಭಯೋತ್ಪಾದಕ ದಾಳಿಗಳನ್ನು ಪ್ರಶ್ನಿಸಿದರೆ, ಅಫ್ಘಾನಿಸ್ತಾನ ಇದನ್ನು ತೀವ್ರವಾಗಿ ನಿರಾಕರಿಸಿತ್ತು. ನಂತರದ ಮಾತುಕತೆಯಲ್ಲಿ ಮಧ್ಯವರ್ತಿಗಳ ಪ್ರಯತ್ನದಿಂದ ತಾತ್ಕಾಲಿಕ ಕದನ ವಿರಾಮ ಜಾರಿಗೆ ಬಂದು, ಈಗ ಅದನ್ನು ಮುಂದುವರಿಸಲು ಒಪ್ಪಂದ ನಡೆದಿದೆ.
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
