ಬೆಂಗಳೂರು, 09 ಆಗಸ್ಟ್ (ಹಿ.ಸ.):
ಚಿಕನ್ ಪ್ರಿಯರಿಗೆ ಇಷ್ಟವಾಗುವ ಖಾದ್ಯಗಳಲ್ಲಿ ಚಿಕನ್ ಲಾಲಿಪಪ್ ಪ್ರಮುಖವಾಗಿದೆ. ಹೊರಭಾಗದಲ್ಲಿ ಗರಿಗರಿಯಾದ ಲೇಪನ ಹಾಗೂ ಒಳಭಾಗದಲ್ಲಿ ಜ್ಯೂಸಿಯಾದ ಚಿಕನ್ನೊಂದಿಗೆ ತಯಾರಿಸುವ ಈ ಖಾದ್ಯವನ್ನು ಮನೆಯಲ್ಲಿಯೇ ಸುಲಭವಾಗಿ ಮಾಡಬಹುದು.
500 ಗ್ರಾಂ ಚಿಕನ್ ಲಾಲಿಪಪ್ ತುಂಡುಗಳಿಗೆ ಅರ್ಧ ಕಪ್ ಮೊಸರು, ಒಂದು ಟೇಬಲ್ಸ್ಪೂನ್ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಒಂದು ಟೇಬಲ್ಸ್ಪೂನ್ ನಿಂಬೆ ರಸ, ಒಂದು ಟೇಬಲ್ಸ್ಪೂನ್ ಕಾಶ್ಮೀರಿ ಮೆಣಸಿನ ಪುಡಿ, ಅರ್ಧ ಟೀಸ್ಪೂನ್ ಜೀರಿಗೆ ಪುಡಿ, ಅರ್ಧ ಟೀಸ್ಪೂನ್ ಗರಂ ಮಸಾಲಾ, ಅರ್ಧ ಟೀಸ್ಪೂನ್ ಕಾಳುಮೆಣಸಿನ ಪುಡಿ ಹಾಗೂ ಅಗತ್ಯವಿರುವಷ್ಟು ಉಪ್ಪು ಬೇಕಾಗುತ್ತದೆ. ಇದಕ್ಕೆ ಎರಡು ಟೇಬಲ್ಸ್ಪೂನ್ ಕಾರ್ನ್ಫ್ಲೋರ್ ಮತ್ತು ಎರಡು ಟೇಬಲ್ಸ್ಪೂನ್ ಮೈದಾ ಸೇರಿಸಬೇಕು. ಬಯಸಿದರೆ ಸ್ವಲ್ಪ ಕೆಂಪು ಆಹಾರ ಬಣ್ಣ, ಸೋಯಾ ಸಾಸ್, ಚಿಲ್ಲಿ ಸಾಸ್ ಹಾಗೂ ವಿನೆಗರ್ ಕೂಡ ಬಳಸಬಹುದು.
ಮೊದಲಿಗೆ ಚಿಕನ್ ಲಾಲಿಪಪ್ ತುಂಡುಗಳನ್ನು ಚೆನ್ನಾಗಿ ತೊಳೆದು ನೀರನ್ನು ಸಂಪೂರ್ಣವಾಗಿ ಒಣಗಿಸಿಕೊಳ್ಳಬೇಕು. ನಂತರ ಮೊಸರು, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ನಿಂಬೆ ರಸ, ಕಾಶ್ಮೀರಿ ಮೆಣಸಿನ ಪುಡಿ, ಜೀರಿಗೆ ಪುಡಿ, ಗರಂ ಮಸಾಲಾ, ಕಾಳುಮೆಣಸಿನ ಪುಡಿ ಮತ್ತು ಉಪ್ಪನ್ನು ಒಂದು ಪಾತ್ರೆಯಲ್ಲಿ ಹಾಕಿ ಚೆನ್ನಾಗಿ ಮಿಶ್ರಣ ಮಾಡಬೇಕು.
ಇದಕ್ಕೆ ಕಾರ್ನ್ಫ್ಲೋರ್ ಮತ್ತು ಮೈದಾ ಸೇರಿಸಿ ಗಟ್ಟಿಯಾದ ಮಿಶ್ರಣ ತಯಾರಿಸಿ, ಚಿಕನ್ ತುಂಡುಗಳನ್ನು ಅದರಲ್ಲಿ ಹಾಕಿ ಪ್ರತಿಯೊಂದು ತುಂಡಿಗೂ ಮಸಾಲೆ ಸಮವಾಗಿ ಅಂಟುವಂತೆ ಮಿಶ್ರಣ ಮಾಡಬೇಕು. ಕನಿಷ್ಠ 30 ನಿಮಿಷ ಮ್ಯಾರಿನೇಟ್ ಮಾಡಬೇಕು. ಹೆಚ್ಚು ರುಚಿ ಮತ್ತು ಜ್ಯೂಸಿಗಾಗಿ ಎರಡುರಿಂದ ಮೂರು ಗಂಟೆಗಳ ಕಾಲ ಫ್ರಿಜ್ನಲ್ಲಿ ಇಡಬಹುದು.
ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ, ಮಧ್ಯಮ ಉರಿಯಲ್ಲಿ ಚಿಕನ್ ಲಾಲಿಪಪ್ ತುಂಡುಗಳನ್ನು ಒಂದೊಂದಾಗಿ ಹಾಕಿ ಕರಿಯಬೇಕು. ಒಳಭಾಗ ಚೆನ್ನಾಗಿ ಬೇಯಿ, ಹೊರಭಾಗ ಬಂಗಾರದ ಬಣ್ಣಕ್ಕೆ ತಿರುಗಿ ಗರಿಗರಿಯಾಗುವವರೆಗೆ ಹುರಿಯಬೇಕು. ನಂತರ ಟಿಶ್ಯೂ ಪೇಪರ್ ಮೇಲೆ ತೆಗೆದು ಹೆಚ್ಚುವರಿ ಎಣ್ಣೆಯನ್ನು ಸೋಸಿಕೊಳ್ಳಬೇಕು.
ಬಿಸಿ ಬಿಸಿಯಾದ ಚಿಕನ್ ಲಾಲಿಪಪ್ ಅನ್ನು ಈರುಳ್ಳಿ ರಿಂಗ್ಸ್, ನಿಂಬೆ ತುಂಡುಗಳು, ಚಿಲ್ಲಿ ಸಾಸ್ ಅಥವಾ ಬೆಳ್ಳುಳ್ಳಿ ಮೇಯೋನೀಸ್ನೊಂದಿಗೆ ಸವಿಯಬಹುದು. ಮಧ್ಯಮ ಉರಿಯಲ್ಲಿ ಕರಿಯುವುದು, ಲೇಪನವನ್ನು ಅತಿಯಾಗಿ ದಪ್ಪ ಮಾಡದಿರುವುದು ಹಾಗೂ ಸಾಕಷ್ಟು ಸಮಯ ಮ್ಯಾರಿನೇಟ್ ಮಾಡುವುದು ಉತ್ತಮ ರುಚಿಗೆ ಪ್ರಮುಖವಾಗಿದೆ.
ಮನೆಯಲ್ಲಿಯೇ ಸುಲಭವಾಗಿ ತಯಾರಿಸಬಹುದಾದ ಈ ಕ್ರಿಸ್ಪಿ ಚಿಕನ್ ಲಾಲಿಪಪ್ ಪಾರ್ಟಿ, ವಾರಾಂತ್ಯದ ತಿಂಡಿ ಅಥವಾ ಸಂಜೆ ಸ್ನ್ಯಾಕ್ಗೆ ರುಚಿಕರ ಆಯ್ಕೆಯಾಗಲಿದೆ.
---------------
ಹಿಂದೂಸ್ತಾನ್ ಸಮಾಚಾರ್ / Rakesh.M.B.
