ಚಂಡೀಗಡ, 18 ಜೂನ್ (ಹಿ.ಸ.) :

ಆ್ಯಂಕರ್ : ಪಂಜಾಬ್ ನ ಅಮೃತಸರ ಕಮಿಷನರೇಟ್ ಪೊಲೀಸರು ಗಡಿ ದಾಟಿ ನಡೆಯುತ್ತಿದ್ದ ಅಕ್ರಮ ಶಸ್ತ್ರಾಸ್ತ್ರ ಕಳ್ಳಸಾಗಣೆ ಜಾಲವನ್ನು ಭೇದಿಸಿ, 11 ಆಧುನಿಕ ಪಿಸ್ತೂಲ್ಗಳು ಹಾಗೂ ಎಂಟು ಜೀವಂತ ಗುಂಡುಗಳೊಂದಿಗೆ ಎಂಟು ಮಂದಿಯನ್ನು ಬಂಧಿಸಿದ್ದಾರೆ.

ಪಂಜಾಬ್ ಪೊಲೀಸ್ ಮಹಾನಿರ್ದೇಶಕ ಗೌರವ್ ಯಾದವ್ ಅವರು ಗುರುವಾರ ಈ ಕುರಿತು ಮಾಹಿತಿ ನೀಡಿದ್ದು, ಅಮೃತಸರ ಜಿಲ್ಲೆಯ ಅಟ್ಟಾರಿ ಗ್ರಾಮದ ಗುಲಾಬ್ಜೀತ್ ಸಿಂಗ್ ಅಲಿಯಾಸ್ ಪ್ರಿನ್ಸ್, ಹರ್ಪ್ರೀತ್ ಸಿಂಗ್ ಅಲಿಯಾಸ್ ಪ್ರೀತ್, ಗುರುದಾಸ್ಪುರ ಜಿಲ್ಲೆಯ ಹರ್ದೋವಾಲ್ ಗ್ರಾಮದ ಗುರುಪ್ರೀತ್ ಸಿಂಗ್ ಅಲಿಯಾಸ್ ಗೋಪಿ, ಅಮೃತಸರದ ರಣಿಯಾಂ ಗ್ರಾಮದ ಕುಲ್ಜೀತ್ ಸಿಂಗ್, ಶಂಶೇರ್ ಸಿಂಗ್ ಅಲಿಯಾಸ್ ಶೇರಾ, ಛೆಹರಟ್ಟಾ ಗ್ರಾಮದ ಅಮನ್ ರಾಣಾ ಅಲಿಯಾಸ್ ಚೀನಿ, ಕಿರಲಗಢ ಗ್ರಾಮದ ಶರಣ್ಜೀತ್ ಸಿಂಗ್ ಅಲಿಯಾಸ್ ಸನ್ನಿ ಹಾಗೂ ತರಣತಾರಣ ಜಿಲ್ಲೆಯ ಮಾಲಿಯಾ ಗ್ರಾಮದ ಅಜಯ್ ಸಿಂಗ್ ಬಂಧಿತರಾಗಿದ್ದಾರೆ ಎಂದು ತಿಳಿಸಿದ್ದಾರೆ.

ಬಂಧಿತರಿಂದ ನಾಲ್ಕು ಚೀನಾ ನಿರ್ಮಿತ .30 ಬೋರ್ ಪಿಸ್ತೂಲ್ಗಳು, ನಾಲ್ಕು .30 ಬೋರ್ ಪಿಎಕ್ಸ್–5 ಸ್ಟಾರ್ಮ್ ಪಿಸ್ತೂಲ್ಗಳು, ಒಂದು .30 ಬೋರ್ ಜಿಗಾನಾ ಪಿಸ್ತೂಲ್, ಒಂದು ಆಸ್ಟ್ರಿಯಾ ನಿರ್ಮಿತ 9 ಎಂಎಂ ಗ್ಲಾಕ್ ಪಿಸ್ತೂಲ್ ಹಾಗೂ ಮತ್ತೊಂದು 9 ಎಂಎಂ ಪಿಸ್ತೂಲ್ ಸೇರಿದಂತೆ ಒಟ್ಟು 11 ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಇದಲ್ಲದೆ ಎಂಟು ಜೀವಂತ ಗುಂಡುಗಳು ಮತ್ತು ಒಂದು ಮೋಟಾರ್ಸೈಕಲ್ನ್ನೂ ಜಪ್ತಿ ಮಾಡಲಾಗಿದೆ.

ಪ್ರಾಥಮಿಕ ತನಿಖೆಯಲ್ಲಿ ಬಂಧಿತರು ವಿದೇಶದಲ್ಲಿರುವ ಕಳ್ಳಸಾಗಣೆ ಜಾಲದ ಸದಸ್ಯರ ಸಂಪರ್ಕದಲ್ಲಿದ್ದು, ಅಕ್ರಮ ಶಸ್ತ್ರಾಸ್ತ್ರಗಳ ಸಾಗಣೆ ಮತ್ತು ಪೂರೈಕೆಯಲ್ಲಿ ತೊಡಗಿದ್ದರು ಎಂಬುದು ಬೆಳಕಿಗೆ ಬಂದಿದೆ. ವಶಪಡಿಸಿಕೊಳ್ಳಲಾದ ಶಸ್ತ್ರಾಸ್ತ್ರಗಳನ್ನು ಮುಂದಿನ ಹಂತದಲ್ಲಿ ಅಪರಾಧ ಕೃತ್ಯಗಳಲ್ಲಿ ತೊಡಗಿರುವ ವ್ಯಕ್ತಿಗಳಿಗೆ ಪೂರೈಸುವ ಉದ್ದೇಶ ಹೊಂದಲಾಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ. ಸುಲಿಗೆ, ಹಿಂಸಾತ್ಮಕ ಅಪರಾಧಗಳು ಹಾಗೂ ಇತರೆ ಕಾನೂನುಬಾಹಿರ ಚಟುವಟಿಕೆಗಳಿಗೆ ಇವುಗಳನ್ನು ಬಳಸುವ ಸಾಧ್ಯತೆ ಇತ್ತು ಎಂದು ಡಿಜಿಪಿ ಹೇಳಿದ್ದಾರೆ.

ಅಮೃತಸರ ಪೊಲೀಸ್ ಆಯುಕ್ತ ಗುರ್ಪ್ರೀತ್ ಸಿಂಗ್ ಭುಲ್ಲರ್ ಅವರ ಪ್ರಕಾರ, ಖಚಿತ ಗುಪ್ತಚರ ಮಾಹಿತಿಯ ಆಧಾರದ ಮೇಲೆ ಕಾರ್ಯಾಚರಣೆ ನಡೆಸಿದ ಪೊಲೀಸರು ಮೊದಲು ಗುಲಾಬ್ಜೀತ್ ಸಿಂಗ್ ಮತ್ತು ಹರ್ಪ್ರೀತ್ ಸಿಂಗ್ ಅವರನ್ನು ಎರಡು ಪಿಸ್ತೂಲ್ಗಳೊಂದಿಗೆ ಬಂಧಿಸಿದರು. ಬಳಿಕ ತನಿಖೆಯನ್ನು ವಿಸ್ತರಿಸಿದಾಗ ಗುರುಪ್ರೀತ್ ಸಿಂಗ್ ನಾಲ್ಕು ಪಿಸ್ತೂಲ್ಗಳೊಂದಿಗೆ ಸಿಕ್ಕಿಬಿದ್ದನು. ಆತನಿಂದ ಪಡೆದ ಮಾಹಿತಿಯ ಆಧಾರದ ಮೇಲೆ ಕುಲ್ಜೀತ್ ಸಿಂಗ್ ಮತ್ತು ಶಂಶೇರ್ ಸಿಂಗ್ ಅವರನ್ನು ಇನ್ನೆರಡು ಪಿಸ್ತೂಲ್ಗಳೊಂದಿಗೆ ಬಂಧಿಸಲಾಯಿತು.

ವಿಚಾರಣೆ ವೇಳೆ ಗುರುಪ್ರೀತ್ ಸಿಂಗ್, ಸಾಮಾಜಿಕ ಜಾಲತಾಣಗಳ ಮೂಲಕ ವಿದೇಶದಲ್ಲಿರುವ ಒಬ್ಬ ಗ್ಯಾಂಗ್ ಸದಸ್ಯನ ಸಂಪರ್ಕದಲ್ಲಿದ್ದುದಾಗಿ ಒಪ್ಪಿಕೊಂಡಿದ್ದಾನೆ. ಅಟ್ಟಾರಿ ಗಡಿ ಪ್ರದೇಶದ ವಿವಿಧ ಸ್ಥಳಗಳಿಗೆ ಮಾನವರಹಿತ ವಿಮಾನಗಳ ಮೂಲಕ ಶಸ್ತ್ರಾಸ್ತ್ರಗಳ ಸಾಗಣೆಯನ್ನು ಇದೇ ವ್ಯಕ್ತಿ ವ್ಯವಸ್ಥೆ ಮಾಡುತ್ತಿದ್ದನು ಎಂಬ ಮಾಹಿತಿಯನ್ನೂ ಬಹಿರಂಗಪಡಿಸಿದ್ದಾನೆ.

ಮುಂದಿನ ತನಿಖೆಯಲ್ಲಿ ಅಮನ್ ರಾಣಾ ಮತ್ತು ಶರಣ್ಜೀತ್ ಸಿಂಗ್ ಅವರನ್ನು ಎರಡು ಪಿಸ್ತೂಲ್ಗಳೊಂದಿಗೆ ಬಂಧಿಸಲಾಗಿದ್ದು, ಅವರ ಮಾಹಿತಿಯ ಆಧಾರದ ಮೇಲೆ ಅಜಯ್ ಸಿಂಗ್ನನ್ನು ಮತ್ತೊಂದು ಪಿಸ್ತೂಲ್ ಸಮೇತ ವಶಕ್ಕೆ ಪಡೆಯಲಾಗಿದೆ.

ಪೊಲೀಸರ ತನಿಖೆಯಲ್ಲಿ ಹರ್ಪ್ರೀತ್ ಸಿಂಗ್, ಗುರುಪ್ರೀತ್ ಸಿಂಗ್, ಶರಣ್ಜೀತ್ ಸಿಂಗ್ ಹಾಗೂ ಅಜಯ್ ಸಿಂಗ್ ವಿರುದ್ಧ ಈ ಹಿಂದೆ ಕೊಲೆ, ಕೊಲೆ ಯತ್ನ, ಶಸ್ತ್ರಾಸ್ತ್ರ ಕಾಯ್ದೆ, ಮಾದಕ ವಸ್ತುಗಳ ನಿಯಂತ್ರಣ ಕಾಯ್ದೆ ಹಾಗೂ ಕಳ್ಳತನ ಪ್ರಕರಣಗಳು ದಾಖಲಾಗಿರುವುದು ತಿಳಿದುಬಂದಿದೆ.

ಈ ಜಾಲದ ಹಿಂದೆ ಇರುವ ಇತರೆ ವ್ಯಕ್ತಿಗಳನ್ನು ಪತ್ತೆ ಹಚ್ಚಲು ಹಾಗೂ ಗಡಿ ದಾಟಿ ನಡೆಯುತ್ತಿರುವ ಶಸ್ತ್ರಾಸ್ತ್ರ ಕಳ್ಳಸಾಗಣೆಯ ಸಂಪೂರ್ಣ ಜಾಲವನ್ನು ಭೇದಿಸಲು ತನಿಖೆಯನ್ನು ಮತ್ತಷ್ಟು ತೀವ್ರಗೊಳಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಹಿಂದೂಸ್ತಾನ್ ಸಮಾಚಾರ್ / Rakesh.M.B.