ಕಠ್ಮಂಡು, 27 ಮಾರ್ಚ್ (ಹಿ.ಸ.):
ಆ್ಯಂಕರ್:ರಾಷ್ಟ್ರೀಯ ಸ್ವತಂತ್ರ ಪಕ್ಷದ ನಾಯಕ ಬಾಲೇಂದ್ರ ಶಾ ಅವರು ಶುಕ್ರವಾರ ನೇಪಾಳದ ಪ್ರಧಾನಿಯಾಗಿ ಪ್ರಮಾಣವಚನ ಸ್ವೀಕರಿಸಿದರು. ಶೀತಲ್ ನಿವಾಸ್ನಲ್ಲಿ ನಡೆದ ಸಮಾರಂಭದಲ್ಲಿ ಅಧ್ಯಕ್ಷ ರಾಮಚಂದ್ರ ಪೌಡೆಲ್ ಅವರು ಶಾ ಅವರಿಗೆ ಅಧಿಕಾರ ಮತ್ತು ಗೌಪ್ಯತೆಯ ಪ್ರಮಾಣವಚನ ಬೋಧಿಸಿದರು.
ಸಂವಿಧಾನದ 76(1)ನೇ ವಿಧಿಯಡಿ ಪ್ರತಿನಿಧಿಗಳ ಸಭೆಯ ಬಹುಮತ ಪಕ್ಷದ ನಾಯಕರಾಗಿ ಶಾ ಅವರನ್ನು ಪ್ರಧಾನಿಯಾಗಿ ನೇಮಿಸಲಾಯಿತು. ನೇಪಾಳದ 2015ರ ಸಂವಿಧಾನ ಜಾರಿಗೆ ಬಂದ ನಂತರ ಈ ವಿಧಾನವನ್ನು ಬಳಸಿಕೊಂಡು ಪ್ರಧಾನಿಯನ್ನು ನೇಮಿಸಲಾಗುತ್ತಿರುವುದು ಇದೇ ಮೊದಲ ಬಾರಿಯಾಗಿದೆ. ಮಾಧೇಶಿ ಸಮುದಾಯದ ವ್ಯಕ್ತಿಯೊಬ್ಬರು ಪ್ರಧಾನಿಯಾಗಿರುವುದೂ ಐತಿಹಾಸಿಕವಾಗಿದೆ.
36 ವರ್ಷದ ಶಾ ಅವರು ಕಠ್ಮಂಡು ಮಹಾನಗರ ಪಾಲಿಕೆಯ ಮೇಯರ್ ಸ್ಥಾನಕ್ಕೆ ರಾಜೀನಾಮೆ ನೀಡಿ ಲೋಕಸಭಾ ಚುನಾವಣೆಗೆ ಸ್ಪರ್ಧಿಸಿ, ಝಾಪಾ-5 ಕ್ಷೇತ್ರದಲ್ಲಿ ಮಾಜಿ ಪ್ರಧಾನಿ ಕೆ.ಪಿ. ಶರ್ಮಾ ಓಲಿ ಅವರನ್ನು ಸುಮಾರು 50,000 ಮತಗಳ ಅಂತರದಿಂದ ಸೋಲಿಸಿ ಸಂಸತ್ತಿಗೆ ಪ್ರವೇಶಿಸಿದ್ದರು.
ಸಂಪುಟ ರಚನೆ:
ಪ್ರಧಾನಿ ಶಾ ಅವರ ಸಂಪುಟದಲ್ಲಿ ಸ್ವರ್ಣಿಮ್ ವಾಗ್ಲೆ ಹಣಕಾಸು ಸಚಿವರಾಗಿ, ಸುಡಾನ್ ಗುರುಂಗ್ ಗೃಹ ಸಚಿವರಾಗಿ, ಶಿಶಿರ್ ಖನಾಲ್ ವಿದೇಶಾಂಗ ಸಚಿವರಾಗಿ ನೇಮಕಗೊಂಡಿದ್ದಾರೆ. ಸುನಿಲ್ ಲಾಮ್ಸಲ್ ಅವರಿಗೆ ಭೌತಿಕ ಮೂಲಸೌಕರ್ಯ, ಸಾರಿಗೆ ಮತ್ತು ನಗರಾಭಿವೃದ್ಧಿ ಇಲಾಖೆಯ ಜವಾಬ್ದಾರಿ ನೀಡಲಾಗಿದೆ.
ಇದೇ ವೇಳೆ ವಿರಾಜಭಕ್ತ ಶ್ರೇಷ್ಠ ಇಂಧನ, ಜಲಸಂಪನ್ಮೂಲ ಮತ್ತು ನೀರಾವರಿ ಸಚಿವರಾಗಿ, ಖಡ್ಕರಾಜ್ ಪೌಡೆಲ್ (ಗಣೇಶ್) ಪ್ರವಾಸೋದ್ಯಮ ಸಚಿವರಾಗಿ ನೇಮಕಗೊಂಡಿದ್ದಾರೆ. ಸಸ್ಮಿತ್ ಪೋಖರೆಲ್ ಅವರಿಗೆ ಶಿಕ್ಷಣ, ವಿಜ್ಞಾನ-ತಂತ್ರಜ್ಞಾನ ಹಾಗೂ ಯುವಜನ-ಕ್ರೀಡಾ ಇಲಾಖೆ ನೀಡಲಾಗಿದೆ.
ನಿಶಾ ಮೆಹ್ತಾ ಆರೋಗ್ಯ ಮತ್ತು ಜನಸಂಖ್ಯಾ ಸಚಿವೆಯಾಗಿದ್ದು, ವಿಕ್ರಮ್ ಟಿಮಿಲ್ಸಿನಾ ಸಂವಹನ ಸಚಿವರಾಗಿದ್ದಾರೆ. ಪ್ರತಿಭಾ ರಾವಲ್ ಸಾಮಾನ್ಯ ಆಡಳಿತ, ದೀಪಕ್ ಶಾ ಕಾರ್ಮಿಕ ಮತ್ತು ಉದ್ಯೋಗ, ಸೋವಿತಾ ಗೌತಮ್ ಕಾನೂನು ಸಚಿವೆಯಾಗಿದ್ದಾರೆ.
ಗೀತಾ ಚೌಧರಿ ಅವರಿಗೆ ಕೃಷಿ, ಪಶುಸಂಗೋಪನೆ, ಅರಣ್ಯ ಮತ್ತು ಪರಿಸರ ಜವಾಬ್ದಾರಿ ನೀಡಲಾಗಿದ್ದು, ಸೀತಾ ವಾಡಿ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವೆಯಾಗಿ ನೇಮಕಗೊಂಡಿದ್ದಾರೆ.
---------------
ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa
