ಅದನ್(ಯೆಮೆನ್),29ಅಕ್ಟೋಬರ್(ಹಿ.ಸ.):

ಮಧ್ಯಪ್ರಾಚ್ಯದ ಯೆಮನ್‌ನ ಪ್ರಮುಖ ಬಂದರು ನಗರ ಅದನ್‌ನ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೇಲೆ ಇರಾನ್ ಬೆಂಬಲಿತ ಹೂತಿ ಬಂಡುಕೋರರು ನಡೆಸಿದ ಎರಡು ಕ್ಷಿಪಣಿ ದಾಳಿಗಳಿಂದ ವಿಮಾನಯಾನ ಸುರಕ್ಷತೆ ಬಗ್ಗೆ ಆತಂಕ ಹೆಚ್ಚಾಗಿದೆ. ದಾಳಿಯಿಂದ ವಿಮಾನ ಸಂಚಾರಕ್ಕೆ ಅಡಚಣೆಯಾಗಿದ್ದು, ನಾಗರಿಕರು ಗಾಯಗೊಂಡಿದ್ದಾರೆ. ಆಸ್ತಿಪಾಸ್ತಿಗೂ ಹಾನಿಯಾಗಿದೆ.

ಗಲ್ಫ್ ನ್ಯೂಸ್, ಅರಬ್ ನ್ಯೂಸ್ ಮತ್ತು ಅಲ್ ಜಜೀರಾ ವರದಿಗಳ ಪ್ರಕಾರ, ಯೆಮನ್‌ನ ಸೇನಾ ವಕ್ತಾರರು ಮತ್ತು ಸಾರಿಗೆ ಸಚಿವಾಲಯದ ಮಾಹಿತಿ ಆಧರಿಸಿ ಬುಧವಾರ ಎರಡು ಬ್ಯಾಲಿಸ್ಟಿಕ್ ಕ್ಷಿಪಣಿಗಳ ಮೂಲಕ ಅದನ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸಲಾಗಿದೆ. ಇದರಿಂದ ವಿಮಾನ ಸಂಚಾರ ಕೆಲಕಾಲ ಸ್ಥಗಿತಗೊಂಡಿತ್ತು. ಈ ಹಿಂದೆ ಅಕ್ಟೋಬರ್ 7ರಂದು ಕೂಡ ಕ್ಷಿಪಣಿಗಳು ಮತ್ತು ಮಾನವರಹಿತ ವೈಮಾನಿಕ ವಾಹನಗಳ ಮೂಲಕ ದಾಳಿ ನಡೆಸಲಾಗಿತ್ತು.

ಯೆಮನ್‌ನ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಮಾನ್ಯತೆ ಪಡೆದ ಸರ್ಕಾರದ ಪ್ರಮುಖ ನೆಲೆಯಾಗಿರುವ ಅದನ್‌ನ ವಿಮಾನ ನಿಲ್ದಾಣವನ್ನು ಖಾಲಿ ಮಾಡುವಂತೆ ಹೂತಿ ಬಂಡುಕೋರರು ಒತ್ತಾಯಿಸಿದ್ದಾರೆ ಎಂದು ವರದಿಯಾಗಿದೆ. ಮಾನವೀಯ ನೆರವು ಪೂರೈಕೆಗೆ ಪ್ರಮುಖ ಪ್ರವೇಶದ್ವಾರವಾಗಿರುವ ಈ ವಿಮಾನ ನಿಲ್ದಾಣದ ಮೇಲಿನ ದಾಳಿಯನ್ನು ಯೆಮನ್ ಸಾರಿಗೆ ಸಚಿವಾಲಯ ಖಂಡಿಸಿದೆ.

ಈ ದಾಳಿಗಳು ನಾಗರಿಕರ ಜೀವಕ್ಕೆ ಮತ್ತು ವಿಮಾನಗಳ ಸುರಕ್ಷಿತ ಸಂಚಾರಕ್ಕೆ ಅಪಾಯವನ್ನುಂಟುಮಾಡುತ್ತವೆ ಎಂದು ಸಚಿವಾಲಯ ಎಚ್ಚರಿಸಿದೆ. ಅಕ್ಟೋಬರ್‌ನಲ್ಲಿ ನಾಗರಿಕ ವಿಮಾನ ನಿಲ್ದಾಣಗಳ ಮೇಲೆ ನಡೆದ ದಾಳಿಗಳ ಬಳಿಕ ಸೌದಿ ಅರೇಬಿಯಾ ನೇತೃತ್ವದ ಸೇನೆ ಹೂತಿ ಬಂಡುಕೋರರ 82 ನೆಲೆಗಳನ್ನು ನಾಶಪಡಿಸಿದೆ ಎಂಬ ವರದಿಯೂ ಇದೆ.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.