ವಾರಣಾಸಿ, 25 ಅಕ್ಟೋಬರ್ (ಹಿ.ಸ.):

ಪ್ರಧಾನಿ ನರೇಂದ್ರ ಮೋದಿ ಅವರು ಭಾನುವಾರ ತಮ್ಮ ಲೋಕಸಭಾ ಕ್ಷೇತ್ರ ವಾರಾಣಸಿಯ ನಮೋ ಘಾಟ್‌ನಿಂದ ಭಾರತೀಯ ವಾಯುಪಡೆಯ ಶೌರ್ಯ, ಕೌಶಲ ಮತ್ತು ಸಾಹಸವನ್ನು ಅನಾವರಣಗೊಳಿಸಿದ ಭವ್ಯ ವೈಮಾನಿಕ ಪ್ರದರ್ಶನವನ್ನು ವೀಕ್ಷಿಸಿದರು.

ಭಾರತೀಯ ವಾಯುಪಡೆಯ 94ನೇ ವಾರ್ಷಿಕೋತ್ಸವದ ಅಂಗವಾಗಿ ಆಯೋಜಿಸಲಾಗಿರುವ ‘ವಿಂಗ್ಸ್ ಓವರ್ ಗಂಗಾ’ ಕಾರ್ಯಕ್ರಮದ ಮೂರನೇ ದಿನವಾದ ಭಾನುವಾರ ‘ವಾಯುಪಡೆ ದಿನದ ವೈಮಾನಿಕ ಪ್ರದರ್ಶನ–2026’ ನಡೆಯಿತು. ಈ ಸಂದರ್ಭದಲ್ಲಿ 100 ವಿಮಾನಗಳು ಮತ್ತು ಹೆಲಿಕಾಪ್ಟರ್‌ಗಳು ಗಂಗಾ ನದಿಯ ಮೇಲ್ಭಾಗದಲ್ಲಿ ರೋಮಾಂಚಕ ವೈಮಾನಿಕ ಕಸರತ್ತುಗಳನ್ನು ಪ್ರದರ್ಶಿಸಿದವು.

ಯುದ್ಧವಿಮಾನಗಳ ಗರ್ಜನೆ, ಅವುಗಳ ವೇಗ ಮತ್ತು ಆಕರ್ಷಕ ಹಾರಾಟದ ವಿನ್ಯಾಸಗಳು ಪ್ರಧಾನಿ ನರೇಂದ್ರ ಮೋದಿ, ರಕ್ಷಣಾ ಸಚಿವ ರಾಜನಾಥ್ ಸಿಂಗ್, ಉತ್ತರ ಪ್ರದೇಶದ ರಾಜ್ಯಪಾಲೆ ಆನಂದಿಬೆನ್ ಪಟೇಲ್, ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಸೇರಿದಂತೆ ಸಾವಿರಾರು ಪ್ರೇಕ್ಷಕರನ್ನು ರೋಮಾಂಚನಗೊಳಿಸಿದವು.

ಗಂಗೆಯ ಆಕಾಶದಲ್ಲಿ ಭಾರತೀಯ ವಾಯುಪಡೆಯ ಸಾಮರ್ಥ್ಯದ ಪ್ರದರ್ಶನ ನಡೆಯುತ್ತಿದ್ದಂತೆ ಘಾಟ್‌ಗಳು ಮತ್ತು ನದಿಯ ದಡಗಳಲ್ಲಿ ನೆರೆದಿದ್ದ ಜನರ ಉತ್ಸಾಹ ಮುಗಿಲುಮುಟ್ಟಿತು. ಇಡೀ ವಾತಾವರಣ ದೇಶಭಕ್ತಿಯ ಘೋಷಣೆಗಳಿಂದ ಮೊಳಗಿತು. ಜನರು ‘ಭಾರತ್ ಮಾತಾ ಕೀ ಜೈ’, ‘ಹರ ಹರ ಮಹಾದೇವ್’, ‘ವಂದೇ ಮಾತರಂ’ ಮತ್ತು ‘ಮೋದಿ ಮೋದಿ’ ಎಂದು ಘೋಷಣೆಗಳನ್ನು ಕೂಗಿದರು.

ಪ್ರಧಾನಿ ಮೋದಿ ಸೇರಿದಂತೆ ಗಣ್ಯರು ಚಪ್ಪಾಳೆ ತಟ್ಟುವ ಮೂಲಕ ವಾಯುಪಡೆಯ ಸಾಹಸಿಗಳಿಗೆ ಪ್ರೋತ್ಸಾಹ ನೀಡಿದರು. ಪ್ರಧಾನಿ ಕೈಬೀಸಿ ಜನರತ್ತ ಅಭಿವಾದನ ಸಲ್ಲಿಸಿದರು. ‘ಜೈ ಹಿಂದ್’ ಎಂಬ ಸಂದೇಶವನ್ನೂ ಸನ್ನೆಗಳ ಮೂಲಕ ವ್ಯಕ್ತಪಡಿಸಿದರು. ಪುಷ್ಪವೃಷ್ಟಿ ಮತ್ತು ‘ನಮೋ ನಮೋ’ ಘೋಷಣೆಗಳ ನಡುವೆ ಪ್ರಧಾನಿ ನಗುನಗುತ್ತಾ ಕಾರ್ಯಕ್ರಮ ವೀಕ್ಷಿಸಿದರು. ಈ ಸಂದರ್ಭದಲ್ಲಿ ಅವರು ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರೊಂದಿಗೆ ಮಾತುಕತೆ ನಡೆಸುತ್ತಿರುವುದು ಕಂಡುಬಂತು.

ಯುದ್ಧವಿಮಾನಗಳ ಸಾಹಸಮಯ ಹಾರಾಟ

ವೈಮಾನಿಕ ಪ್ರದರ್ಶನದಲ್ಲಿ ಸುಖೋಯ್‌–30 ಎಂಕೆಐ, ರಫೇಲ್‌, ಮಿರಾಜ್‌–2000, ಮಿಗ್‌–29, ಎಲ್‌ಸಿಎ ಮತ್ತು ಜಾಗ್ವಾರ್‌ ಸೇರಿದಂತೆ ಅತ್ಯಾಧುನಿಕ ಯುದ್ಧವಿಮಾನಗಳು ತಮ್ಮ ಸಾಮರ್ಥ್ಯ ಹಾಗೂ ಯುದ್ಧ ಕಾರ್ಯಾಚರಣೆಯ ಕೌಶಲವನ್ನು ಪ್ರದರ್ಶಿಸಿದವು. ಹಾರ್ವರ್ಡ್ ವಿಮಾನದ ಜತೆಗೆ ಸೂರ್ಯಕಿರಣ್ ಮತ್ತು ಸಾರಂಗ್ ವೈಮಾನಿಕ ಕಸರತ್ತು ತಂಡಗಳು ಪ್ರದರ್ಶಿಸಿದ ಸಾಹಸಗಳು ಪ್ರೇಕ್ಷಕರ ಗಮನ ಸೆಳೆದವು.

ವಿವಿಧ ದಿಕ್ಕುಗಳಿಂದ ವಿಮಾನಗಳ ಹಾರಾಟ, ಅತಿ ವೇಗದ ಚಲನೆ, ನಿಖರ ಹೊಂದಾಣಿಕೆ ಮತ್ತು ಆಕರ್ಷಕ ಹಾರಾಟದ ವಿನ್ಯಾಸಗಳು ಜನರನ್ನು ಮಂತ್ರಮುಗ್ಧಗೊಳಿಸಿದವು. ವಿಮಾನಗಳ ತಾಂತ್ರಿಕ ವೈಶಿಷ್ಟ್ಯಗಳು ಹಾಗೂ ಕಾರ್ಯತಂತ್ರದ ಸಾಮರ್ಥ್ಯಗಳ ಕುರಿತು ನೀಡಲಾದ ವಿವರಣೆಯು ಪ್ರದರ್ಶನವನ್ನು ಮತ್ತಷ್ಟು ಆಸಕ್ತಿದಾಯಕವಾಗಿಸಿತು. ಇದರ ಮೂಲಕ ಭಾರತೀಯ ವಾಯುಪಡೆಯ ಕಾರ್ಯವೈಖರಿ, ಆಧುನಿಕ ತಂತ್ರಜ್ಞಾನ ಮತ್ತು ಕಾರ್ಯಾಚರಣಾ ಸಾಮರ್ಥ್ಯಗಳ ಕುರಿತು ತಿಳಿದುಕೊಳ್ಳಲು ಪ್ರೇಕ್ಷಕರಿಗೆ ಅವಕಾಶ ದೊರೆಯಿತು.

ಹೆಲಿಕಾಪ್ಟರ್‌ಗಳು, ಸಾರಿಗೆ ವಿಮಾನಗಳೂ ಭಾಗಿ

ಯುದ್ಧವಿಮಾನಗಳ ಜತೆಗೆ ಹೆಲಿಕಾಪ್ಟರ್‌ಗಳು, ಸಾರಿಗೆ ವಿಮಾನಗಳು ಮತ್ತು ಸಹಾಯಕ ವಿಮಾನಗಳೂ ತಮ್ಮ ಸಾಮರ್ಥ್ಯವನ್ನು ಪ್ರದರ್ಶಿಸಿದವು. ಹೆಲಿಕಾಪ್ಟರ್‌ಗಳ ವಿಭಾಗದಲ್ಲಿ ಎಲ್‌ಸಿಎಚ್‌, ಚಿನೂಕ್‌, ಎಎಲ್‌ಎಚ್‌ ಮಾರ್ಕ್‌–3, ಎಎಲ್‌ಎಚ್‌ ಮಾರ್ಕ್‌–4, ಅಪಾಚೆ, ಚೇತಕ್‌, ಕಾಮೋವ್‌–31 ಮತ್ತು ಎಂಐ–17 ವಿ5 ಭಾಗವಹಿಸಿದ್ದವು.

ಸಾರಿಗೆ ಮತ್ತು ಸಹಾಯಕ ವಿಮಾನಗಳ ವಿಭಾಗದಲ್ಲಿ ಸಿ–295, ಸಿ–17, ಸಿ–130, ವಾಯುಗಾಮಿ ಮುನ್ನೆಚ್ಚರಿಕೆ ಮತ್ತು ನಿಯಂತ್ರಣ ವ್ಯವಸ್ಥೆಯ ವಿಮಾನ, ಐಎಲ್‌–78, ಎಎನ್‌–32 ಮತ್ತು ಪಿ–8ಐ ವಿಮಾನಗಳು ಪ್ರದರ್ಶನದಲ್ಲಿ ಪಾಲ್ಗೊಂಡವು.

ಭಾರತೀಯ ಭೂಸೇನೆಯ ಎರಡು ಎಎಲ್‌ಎಚ್‌ ಹೆಲಿಕಾಪ್ಟರ್‌ಗಳು ಹಾಗೂ ಭಾರತೀಯ ನೌಕಾಪಡೆಯ ಒಂದು ಪಿ–8ಐ ವಿಮಾನ ಮತ್ತು ಒಂದು ಕಾಮೋವ್‌–31 ಹೆಲಿಕಾಪ್ಟರ್‌ ಕೂಡ ಪ್ರದರ್ಶನದಲ್ಲಿ ಭಾಗವಹಿಸಿದವು. ಭಾರತೀಯ ವಾಯುಪಡೆಯ ಗರುಡ ವಿಶೇಷ ಪಡೆಗಳ ಉಪಸ್ಥಿತಿಯು ಕಾರ್ಯಕ್ರಮದ ಕಾರ್ಯತಂತ್ರದ ಮಹತ್ವವನ್ನು ಹೆಚ್ಚಿಸಿತು.

12 ವಾಯುನೆಲೆಗಳಿಂದ ವಿಮಾನಗಳ ಹಾರಾಟ

ಈ ಭವ್ಯ ವೈಮಾನಿಕ ಪ್ರದರ್ಶನದಲ್ಲಿ ಒಟ್ಟು 100 ವಿಮಾನಗಳು ಭಾಗವಹಿಸಿದ್ದವು. ಇವುಗಳಲ್ಲಿ 52 ಯುದ್ಧವಿಮಾನಗಳು, 15 ಸಾರಿಗೆ ವಿಮಾನಗಳು, 32 ಹೆಲಿಕಾಪ್ಟರ್‌ಗಳು ಮತ್ತು ಒಂದು ಐತಿಹಾಸಿಕ ವಿಮಾನ ಸೇರಿದ್ದವು. ಈ ವಿಮಾನಗಳು ದೇಶದ 12 ವಿವಿಧ ವಾಯುನೆಲೆಗಳಿಂದ ಹಾರಾಟ ಆರಂಭಿಸಿದ್ದವು.

ಗಂಗಾ ನದಿಯ ಮೇಲ್ಭಾಗದಲ್ಲಿ ನಡೆದ ಈ ಪ್ರದರ್ಶನವು ಭಾರತೀಯ ವಾಯುಪಡೆಯ ವಾಯುಸಾಮರ್ಥ್ಯ, ತಾಂತ್ರಿಕ ಪರಿಣತಿ ಮತ್ತು ವ್ಯಾಪಕ ಕಾರ್ಯಾಚರಣಾ ಸಾಮರ್ಥ್ಯವನ್ನು ಅನಾವರಣಗೊಳಿಸಿತು. ನಮೋ ಘಾಟ್‌ನಲ್ಲಿ ನೆರೆದಿದ್ದ ಪ್ರೇಕ್ಷಕರು ಚಪ್ಪಾಳೆ ಮತ್ತು ಜಯಘೋಷಗಳ ಮೂಲಕ ವಿಮಾನಗಳ ಸಾಹಸಮಯ ಕಸರತ್ತುಗಳನ್ನು ಸ್ವಾಗತಿಸಿದರು. ವಾಯುಪಡೆಯ ಸಾಹಸಗಳನ್ನು ವೀಕ್ಷಿಸಿದ ಪ್ರಧಾನಿ ಮೋದಿ ಕೂಡ ಉತ್ಸಾಹಭರಿತರಾಗಿ ಕಂಡುಬಂದರು.

--------

ಹಿಂದೂಸ್ತಾನ್ ಸಮಾಚಾರ್ / Rakesh.M.B.