ನವದೆಹಲಿ, 06 ಜನವರಿ (ಹಿ.ಸ.) :

ಆ್ಯಂಕರ್ : ಇಂದಿನ ಆರಂಭಿಕ ವಹಿವಾಟಿನಲ್ಲಿ ಏರಿಳಿತಗಳ ನಡುವೆಯೂ ದೇಶೀಯ ಷೇರು ಮಾರುಕಟ್ಟೆ ಕೆಳಮಟ್ಟದಿಂದ ಚೇತರಿಕೆಯ ಸೂಚನೆ ನೀಡುತ್ತಿದೆ. ದುರ್ಬಲತೆಯೊಂದಿಗೆ ವಹಿವಾಟು ಆರಂಭಿಸಿದ ಮಾರುಕಟ್ಟೆಯಲ್ಲಿ ಪ್ರಾರಂಭಿಕ ಹಂತದಲ್ಲೇ ಮಾರಾಟದ ಒತ್ತಡ ಕಂಡುಬಂದರೂ, ನಂತರ ಖರೀದಿದಾರರು ನಿಧಾನವಾಗಿ ಮೇಲುಗೈ ಸಾಧಿಸಿದರು.

ಮಾರುಕಟ್ಟೆ ತೆರೆದ ತಕ್ಷಣ ಸೆನ್ಸೆಕ್ಸ್ ಮತ್ತು ನಿಫ್ಟಿ ಎರಡೂ ಸೂಚ್ಯಂಕಗಳು ಕುಸಿತವನ್ನು ಕಂಡವು. ಆದರೆ ಕಾಲಕ್ರಮೇಣ ಖರೀದಿ ಚಟುವಟಿಕೆ ಹೆಚ್ಚಾದ ಹಿನ್ನೆಲೆಯಲ್ಲಿ ಸೂಚ್ಯಂಕಗಳು ಮೇಲ್ಕೀಳಾಗಿ ಚಲಿಸುತ್ತಾ ಸ್ಥಿರತೆಯತ್ತ ಸಾಗಿದವು. ಬೆಳಿಗ್ಗೆ 10 ಗಂಟೆಯವರೆಗೆ ನಡೆದ ವಹಿವಾಟಿನಲ್ಲಿ ಸೆನ್ಸೆಕ್ಸ್ ಶೇಕಡಾ 0.07ರಷ್ಟು ನಷ್ಟದೊಂದಿಗೆ ಹಾಗೂ ನಿಫ್ಟಿ ಶೇಕಡಾ 0.03ರಷ್ಟು ಲಾಭದೊಂದಿಗೆ ವಹಿವಾಟು ನಡೆಸುತ್ತಿತ್ತು.

ಅತೀ ಹೆಚ್ಚು ಷೇರುಗಳಲ್ಲಿ ಐಸಿಐಸಿಐ ಬ್ಯಾಂಕ್, ಹಿಂಡಾಲ್ಕೊ ಇಂಡಸ್ಟ್ರೀಸ್, ಅಪೋಲೊ ಆಸ್ಪತ್ರೆಗಳು, ಬಜಾಜ್ ಆಟೋ ಮತ್ತು ಎಚ್‌ಡಿಎಫ್‌ಸಿ ಲೈಫ್ ಶೇಕಡಾ 1.50ರಿಂದ 2.23ರವರೆಗೆ ಏರಿಕೆ ದಾಖಲಿಸಿದವು. ಮತ್ತೊಂದೆಡೆ, ಟ್ರೆಂಟ್ ಲಿಮಿಟೆಡ್, ರಿಲಯನ್ಸ್ ಇಂಡಸ್ಟ್ರೀಸ್, ಟಿಎಂಪಿವಿ, ಎಚ್‌ಡಿಎಫ್‌ಸಿ ಬ್ಯಾಂಕ್ ಹಾಗೂ ಐಟಿಸಿ ಶೇಕಡಾ 0.54ರಿಂದ 7.45ರವರೆಗೆ ನಷ್ಟ ಅನುಭವಿಸಿವೆ.

ಇಲ್ಲಿಯವರೆಗೆ 2,240 ಷೇರುಗಳಲ್ಲಿ ಸಕ್ರಿಯ ವಹಿವಾಟು ನಡೆಯುತ್ತಿದ್ದು, 1,025 ಷೇರುಗಳು ಲಾಭದೊಂದಿಗೆ ಹಸಿರು ವಲಯದಲ್ಲಿದ್ದರೆ, 1,215 ಷೇರುಗಳು ನಷ್ಟದೊಂದಿಗೆ ಕೆಂಪು ವಲಯದಲ್ಲಿವೆ. ಸೆನ್ಸೆಕ್ಸ್‌ನ 30 ಷೇರುಗಳಲ್ಲಿ 19 ಷೇರುಗಳು ಹಸಿರು ವಲಯದಲ್ಲಿದ್ದು, 11 ಷೇರುಗಳು ಕೆಂಪು ವಲಯದಲ್ಲಿವೆ. ನಿಫ್ಟಿಯ 50 ಷೇರುಗಳಲ್ಲಿ 39 ಷೇರುಗಳು ಲಾಭದೊಂದಿಗೆ ಹಾಗೂ 11 ಷೇರುಗಳು ನಷ್ಟದೊಂದಿಗೆ ವಹಿವಾಟು ನಡೆಸುತ್ತಿವೆ.

ಬಿಎಸ್‌ಇ ಸೆನ್ಸೆಕ್ಸ್ ಇಂದು 108.48 ಅಂಕಗಳ ಕುಸಿತದೊಂದಿಗೆ 85,331.14 ಅಂಕಗಳಲ್ಲಿ ವಹಿವಾಟು ಆರಂಭಿಸಿತು. ಪ್ರಾರಂಭಿಕ ಮಾರಾಟದ ಒತ್ತಡದಿಂದ ಸೂಚ್ಯಂಕವು 430 ಅಂಕಗಳಷ್ಟು ಕುಸಿದು 85,007.67ಕ್ಕೆ ತಲುಪಿತು. ಬಳಿಕ ಖರೀದಿ ಬೆಂಬಲದಿಂದ ಚೇತರಿಸಿಕೊಂಡ ಸೆನ್ಸೆಕ್ಸ್, ಬೆಳಿಗ್ಗೆ 10 ಗಂಟೆಯ ವೇಳೆಗೆ 62.20 ಅಂಕಗಳ ನಷ್ಟದೊಂದಿಗೆ 85,377.42 ಅಂಕಗಳಲ್ಲಿ ವಹಿವಾಟು ನಡೆಸುತ್ತಿತ್ತು.

ಎನ್‌ಎಸ್‌ಇ ನಿಫ್ಟಿಯು 60.60 ಅಂಕಗಳ ಕುಸಿತದೊಂದಿಗೆ 26,189.70 ಅಂಕಗಳಲ್ಲಿ ಆರಂಭಗೊಂಡು, ಮೊದಲ 15 ನಿಮಿಷಗಳಲ್ಲಿ 100 ಅಂಕಗಳಿಗಿಂತ ಹೆಚ್ಚು ಕುಸಿತ ಕಂಡು 26,144.70ಕ್ಕೆ ಇಳಿಯಿತು. ನಂತರ ಖರೀದಿ ಚಟುವಟಿಕೆ ಹೆಚ್ಚಿದ ಪರಿಣಾಮ ಸೂಚ್ಯಂಕ ಚೇತರಿಸಿಕೊಂಡು 7.30 ಅಂಕಗಳಿಂದ ಅಲ್ಪ ಲಾಭದೊಂದಿಗೆ 26,257.60 ಅಂಕಗಳಲ್ಲಿ ವಹಿವಾಟು ನಡೆಸುತ್ತಿತ್ತು.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa