ಬೊಗೋಟಾ, 29 ಜನವರಿ (ಹಿ.ಸ.) :

ಆ್ಯಂಕರ್ : ಕೊಲಂಬಿಯಾದಲ್ಲಿ ಬುಧವಾರ ಸಂಭವಿಸಿದ ಭೀಕರ ವಿಮಾನ ಅಪಘಾತದಲ್ಲಿ ಸಂಸತ್ತಿನ ಕೆಳಮನೆಯ (ಕಾಂಗ್ರೆಸ್) ಸದಸ್ಯ ಡಯೋಜೆನೆಸ್ ಕ್ವಿಂಟೆರೊ ಸೇರಿದಂತೆ ವಿಮಾನದಲ್ಲಿದ್ದ ಎಲ್ಲಾ 15 ಮಂದಿ ಮೃತಪಟ್ಟಿದ್ದಾರೆ.

13 ಪ್ರಯಾಣಿಕರು ಹಾಗೂ ಇಬ್ಬರು ಸಿಬ್ಬಂದಿಯನ್ನು ಹೊತ್ತೊಯ್ಯುತ್ತಿದ್ದ ವಿಮಾನದಲ್ಲಿ ಯಾರೂ ಜೀವಂತವಾಗಿ ಪತ್ತೆಯಾಗಿಲ್ಲ ಎಂದು ಕೊಲಂಬಿಯಾ ಅಧಿಕಾರಿಗಳು ದೃಢಪಡಿಸಿದ್ದಾರೆ.

ದೇಶದ ನಾಗರಿಕ ವಾಯುಯಾನ ಪ್ರಾಧಿಕಾರ ಅಪಘಾತದ ಮಾಹಿತಿ ದೃಢಪಡಿಸಿದ್ದು, ಸರ್ಕಾರಿ ಸ್ವಾಮ್ಯದ ವಿಮಾನಯಾನ ಸಂಸ್ಥೆ ಸಟೇನಾಗೆ ಸೇರಿದ HK-4709 ನೋಂದಣಿ ಸಂಖ್ಯೆಯ ವಿಮಾನವು ಕುಕುಟಾದ ಕ್ಯಾಮಿಲೊ ದಾಜಾ ವಿಮಾನ ನಿಲ್ದಾಣದಿಂದ ನಾರ್ಟೆ ಡಿ ಸ್ಯಾಂಟ್ಯಾಂಡರ್ ವಿಭಾಗದ ಓಕಾನಾಗೆ ತೆರಳುತ್ತಿದ್ದ ವೇಳೆ ಅಪಘಾತಕ್ಕೀಡಾಗಿದೆ ಎಂದು ತಿಳಿಸಿದೆ.

ವಿಮಾನವು ಬೆಳಿಗ್ಗೆ 11:42ಕ್ಕೆ ಟೇಕ್ ಆಫ್ ಆಗಿದ್ದು, ಬೆಳಿಗ್ಗೆ 11:54ಕ್ಕೆ ವಾಯು ಸಂಚಾರ ನಿಯಂತ್ರಣದೊಂದಿಗೆ ಸಂಪರ್ಕ ಕಳೆದುಕೊಂಡಿತು. ಟೇಕ್ ಆಫ್ ಆದ ಒಂಬತ್ತು ನಿಮಿಷಗಳಲ್ಲೇ ವಿಮಾನ ಸಿಗ್ನಲ್ ಕಳೆದುಕೊಂಡಿರುವುದಾಗಿ ವರದಿಯಾಗಿದೆ.

ಸಿಎನ್‌ಎನ್ ವರದಿ ಪ್ರಕಾರ, 36 ವರ್ಷದ ಡಯೋಜೆನೆಸ್ ಕ್ವಿಂಟೆರೊ ಅವರ ಸಾವನ್ನು ಅವರನ್ನು ಪ್ರತಿನಿಧಿ ಸಭೆಗೆ ನಾಮನಿರ್ದೇಶನ ಮಾಡಿದ್ದ ಪಕ್ಷ ದೃಢಪಡಿಸಿದೆ. ವಿಮಾನ ಸಂಪರ್ಕ ಕಡಿತಗೊಂಡ ನಂತರ ಕ್ವಿಂಟೆರೊ ಹಾಗೂ ಅವರ ಸಹಾಯಕರೊಂದಿಗೆ ಸಂಪರ್ಕ ಸಾಧಿಸಲು ಸಾಧ್ಯವಾಗಿರಲಿಲ್ಲ ಎಂದು ಅವರ ಕಚೇರಿ ತಿಳಿಸಿದೆ.

ಕ್ವಿಂಟೆರೊ ಅವರ ಮೊಬೈಲ್ ಫೋನ್‌ನ ಕೊನೆಯ ಲೊಕೇಶನ್ ಕುಕುಟಾದ ಕ್ಯಾಮಿಲೊ ದಾಜಾ ವಿಮಾನ ನಿಲ್ದಾಣದ ಸಮೀಪದಲ್ಲೇ ದಾಖಲಾಗಿತ್ತು.

ವೃತ್ತಿಯಲ್ಲಿ ವಕೀಲರಾಗಿದ್ದ ಕ್ವಿಂಟೆರೊ, 2022ರಲ್ಲಿ ದಶಕಗಳ ಕಾಲ ನಡೆದ ಕೊಲಂಬಿಯಾದ ಸಶಸ್ತ್ರ ಸಂಘರ್ಷದ ಬಲಿಪಶುಗಳನ್ನು ಪ್ರತಿನಿಧಿಸಲು ಕೆಳಮನೆಗೆ ಆಯ್ಕೆಯಾದ 16 ಪ್ರತಿನಿಧಿಗಳಲ್ಲಿ ಒಬ್ಬರಾಗಿದ್ದರು. ಅವರ ನಿಧನಕ್ಕೆ ಪಕ್ಷದ ನಾಯಕರು ತೀವ್ರ ದುಃಖ ವ್ಯಕ್ತಪಡಿಸಿದ್ದಾರೆ.

ಕೊಲಂಬಿಯಾದ ಅಧ್ಯಕ್ಷ ಗುಸ್ಟಾವೊ ಪೆಟ್ರೋ ಅವರು ವಿಮಾನ ಅಪಘಾತದ ಕುರಿತು ಆಘಾತ ಹಾಗೂ ದುಃಖ ವ್ಯಕ್ತಪಡಿಸಿದ್ದು, ಮೃತರ ಕುಟುಂಬಗಳಿಗೆ ಸಂತಾಪ ಸೂಚಿಸಿದ್ದಾರೆ.

ತೀವ್ರ ಶೋಧ ಕಾರ್ಯಾಚರಣೆಯ ಬಳಿಕ ಲಾ ಪ್ಲಾಯಾ ಡಿ ಬೆಲೆನ್‌ನ ಗ್ರಾಮೀಣ ಪ್ರದೇಶದಲ್ಲಿ ಅಪಘಾತಕ್ಕೀಡಾದ ವಿಮಾನ ಪತ್ತೆಯಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ನಾರ್ಟೆ ಡಿ ಸ್ಯಾಂಟ್ಯಾಂಡರ್ ರಾಜ್ಯಪಾಲರ ಕಚೇರಿಯೂ ಬಲಿಪಶುಗಳ ಕುಟುಂಬಗಳಿಗೆ ಸಂತಾಪ ಸೂಚಿಸಿದೆ.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa