ನವದೆಹಲಿ, 02 ಸೆಪ್ಟೆಂಬರ್ (ಹಿ.ಸ.) :

ಆ್ಯಂಕರ್ : ಭಾರತವು ಶೀಘ್ರದಲ್ಲೇ ಸೆಮಿಕಂಡಕ್ಟರ್ ಕ್ಷೇತ್ರದಲ್ಲಿ ವಿಶ್ವದ ಪ್ರಮುಖ ರಾಷ್ಟ್ರವಾಗಿ ಹೊರಹೊಮ್ಮಲಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದರು.

ನವದೆಹಲಿಯ ಯಶೋಭೂಮಿಯಲ್ಲಿ ಇಂದು ನಡೆದ ‘ಸೆಮಿಕಾನ್ ಇಂಡಿಯಾ 2025’ ಸಮ್ಮೇಳನವನ್ನು ಉದ್ಘಾಟಿಸಿ ಮಾತನಾಡಿದ ಅವರು, “ವಿನ್ಯಾಸದಿಂದ ಉತ್ಪಾದನೆಯವರೆಗಿನ ಪ್ರಕ್ರಿಯೆಯಲ್ಲಿ ಭಾರತ ಸ್ವಾವಲಂಬಿಯಾಗಿ, ಪೂರ್ಣ ಪ್ರಮಾಣದ ಅರೆವಾಹಕ ರಾಷ್ಟ್ರವಾಗಲಿದೆ” ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಪ್ರಧಾನಿ ಮೋದಿ ಅವರು, “ಇನ್ನು ಮುಂದೆ ಭಾರತ ಕೇವಲ ಬ್ಯಾಕೆಂಡ್ ಕೆಲಸಕ್ಕೆ ಸೀಮಿತವಾಗದೇ, ‘ಡಿಜಿಟಲ್ ವಜ್ರ’ಗಳಾದ ಚಿಪ್‌ಗಳ ಉತ್ಪಾದನೆಯಲ್ಲಿ ಮುಂಚೂಣಿಯಲ್ಲಿರಲಿದೆ. ಜಗತ್ತು ಈಗ ಭಾರತವನ್ನು ನಂಬಿದೆ, ‘ಭಾರತದಲ್ಲಿ ವಿನ್ಯಾಸಗೊಂಡಿದೆ, ಭಾರತದಲ್ಲಿ ತಯಾರಿಸಲಾಗಿದೆ, ಪ್ರಪಂಚದಿಂದ ನಂಬಲಾಗಿದೆ’ ಎಂದು ಹೇಳುವ ದಿನ ದೂರದಲ್ಲಿಲ್ಲ” ಎಂದು ಹೇಳಿದರು.

ಪ್ರಕ್ರಿಯೆಗಳನ್ನು ಸರಳಗೊಳಿಸುವ ಮೂಲಕ ಉದ್ಯಮಕ್ಕೆ ಹೊಸ ಶಕ್ತಿ ನೀಡಲಾಗುತ್ತಿದೆ ಎಂದು ಅವರು ತಿಳಿಸಿದರು. “ತೈಲವನ್ನು ‘ಕಪ್ಪು ಚಿನ್ನ’ ಎಂದು ಕರೆಯುವಂತೆ, ಇಂದು ಚಿಪ್‌ಗಳು ‘ಡಿಜಿಟಲ್ ವಜ್ರ’ಗಳಾಗಿವೆ. ಭಾರತ ಈ ಕ್ಷೇತ್ರದಲ್ಲಿ ನಾಯಕನಾಗಲು ಸಂಕಲ್ಪ ಮಾಡಿದೆ” ಎಂದು ಹೇಳಿದರು.

ಈ ಸಂದರ್ಭದಲ್ಲಿ, ಕೇಂದ್ರ ಐಟಿ ಸಚಿವ ಅಶ್ವಿನ್ ವೈಷ್ಣವ್ ಅವರು, ಇಸ್ರೋ ಸೆಮಿಕಂಡಕ್ಟರ್ ಲ್ಯಾಬ್ ಅಭಿವೃದ್ಧಿಪಡಿಸಿದ ‘ವಿಕ್ರಮ್’ 32-ಬಿಟ್ ಪ್ರೊಸೆಸರ್ ಹಾಗೂ ನಾಲ್ಕು ಪರೀಕ್ಷಾ ಚಿಪ್‌ಗಳನ್ನು ಪ್ರಧಾನಿಗೆ ಹಸ್ತಾಂತರಿಸಿದರು. ಇದು ಮೊದಲ ಸಂಪೂರ್ಣ ಮೇಕ್-ಇನ್-ಇಂಡಿಯಾ ಮೈಕ್ರೋಪ್ರೊಸೆಸರ್ ಆಗಿದೆ ಎಂದು ಅವರು ತಿಳಿಸಿದರು. ಪ್ರಸ್ತುತ ದೇಶದಲ್ಲಿ ಐದು ಸೆಮಿಕಂಡಕ್ಟರ್ ಘಟಕಗಳು ನಿರ್ಮಾಣ ಹಂತದಲ್ಲಿದ್ದು, ಅವುಗಳಲ್ಲಿ ಒಂದರ ಪೈಲಟ್ ಲೈನ್ ಪೂರ್ಣಗೊಂಡಿದೆ ಎಂದರು.

ಭಾರತದಲ್ಲಿ ಸ್ಥಿರ ಮತ್ತು ದೀರ್ಘಾವಧಿಯ ಹೂಡಿಕೆಗಳಿಗೆ ಅನುಕೂಲಕರವಾದ ನೀತಿಗಳು ಅಸ್ತಿತ್ವದಲ್ಲಿವೆ. ಜಾಗತಿಕ ಅನಿಶ್ಚಿತತೆಯ ನಡುವೆಯೂ ಭಾರತವು ಸ್ಥಿರತೆ ಮತ್ತು ಬೆಳವಣಿಗೆಯ ದಾರಿದೀಪವಾಗಿ ಹೊರಹೊಮ್ಮಿದೆ ಎಂದು ವೈಷ್ಣವ್ ಹೇಳಿದರು.

ಕಾರ್ಯಕ್ರಮದಲ್ಲಿ ಭಾಗವಹಿಸಿದ ದೆಹಲಿ ಮುಖ್ಯಮಂತ್ರಿ ರೇಖಾ ಗುಪ್ತಾ, “ಸೆಮಿಕಾನ್ ಇಂಡಿಯಾ ಕೇವಲ ಒಂದು ಕಾರ್ಯಕ್ರಮವಲ್ಲ, ಇದು ತಾಂತ್ರಿಕ ಪುನರುಜ್ಜೀವನದ ಸಂಕೇತವಾಗಿದೆ” ಎಂದು ಅಭಿಪ್ರಾಯಪಟ್ಟರು.

ಮೂರು ದಿನಗಳ ಕಾಲ ನಡೆಯುವ ಈ ಸಮ್ಮೇಳನದಲ್ಲಿ 20,750 ಕ್ಕೂ ಹೆಚ್ಚು ಮಂದಿ ಭಾಗವಹಿಸುತ್ತಿದ್ದು, ಭಾರತದಲ್ಲಿ ಬಲವಾದ ಮತ್ತು ಸುಸ್ಥಿರ ಅರೆವಾಹಕ ಪರಿಸರ ವ್ಯವಸ್ಥೆ ನಿರ್ಮಾಣವೇ ಇದರ ಉದ್ದೇಶ. ಈ ಹಿಂದೆ 2022 ರಲ್ಲಿ ಬೆಂಗಳೂರಿನಲ್ಲಿ, 2023 ರಲ್ಲಿ ಗಾಂಧಿನಗರದಲ್ಲಿ ಮತ್ತು 2024 ರಲ್ಲಿ ಗ್ರೇಟರ್ ನೋಯ್ಡಾದಲ್ಲಿ ಇಂತಹ ಸಮ್ಮೇಳನಗಳನ್ನು ಆಯೋಜಿಸಲಾಗಿತ್ತು.

ಹಿಂದೂಸ್ತಾನ್ ಸಮಾಚಾರ್ / Rakesh Mahadevappa